الحلقة الثالثة عشر والرابعة عشر iron man

الحلقة الثالثة عشر والرابعة عشر

هذه الحلقة برعاية

قرقيعان أم بدر...

----------


Iron : wait wait what is the problem?

صاحب الديوانية: الحق علينا الجماعه يبون يشيلون المجلس ويفشلوني معاك ومع الجماعة، تراضها وانت امس ماكل وشارب معي؟ اشهد انها كبيرة بحقك وارجو تتصل في شيخكم اوباما ولا نائب دائرتكم يشوف لنا حل للجنة الازالة.

Iron: ok its very easy just give me 5 minutes and I will solve this problem?

رد اتصل فيني iron والظاهر انه ناسي اني مجرد معلم بوزارة التربية يعني مو وزير ولا نائب علشان اتوسط حق العالم والناس، وقمت شرحت له ان الديوانية هذه وغيرها من أشكال البناء هو استغلال لأملاك الدولة، وشرحت له ان في تجار وناس بسطاء ومن مختلف شرائح المجتمع استغلو سكوت وصمت وتطنيش الحكومة عن ممارسة دورها في الدفاع عن أملاك الدولة، وقلت له إن أحد المواطنين كان مسوي ديوانية وتحتها مسبح أولمبي وغرفتين يعني تقريبا ماخذ مساحة ثلث بيت حكومة، وطبعا كل هذا مكلفه آلاف الدنانير والأرض اللي باني عليها كل هذا هي أرض الدولة، ولأن النواب بس شاطرين يحولون مثل هالمواضيع من عبارة عن تطبيق لقانون إلى لأن الموضوع هو حضري وبدوي، فصار الموضوع محط متابعة وصارت سكوب والعدالة ماعندهم غير يستقبلون المتردية والنطيحة علشان بس يتفنون إنهم يرقعون لبعضهم البعض، وأذكر طلع واحد ما ادري شنو بالضبط دوره بالموضوع كانت مهمته إنه يسب رئيس لجنة الإزالة ويدعي عليه، وما قدم أي حجة أو دليل في دفاعه عن رفض تطبيق القانون، شرحت حق iron ان حكوماتنا تركت الفساد والاهمال وغضت النظر عن وايد امور من سنوات طويلة وانا في تصوري جزء منه سياسة إفساد المؤسسات وجزء منه هو فعلا فشل في ادارة هذه المؤسسات.

Iron من طرفه تصرف وقال حق اللجنة شوفو شغلكم، طبعا صارت هوشة وطق مطاقق وفزعو الناس تكفخ في iron اللي كان المفروض يصير عون صار عليهم فرعون، وانا ما الومهم ولا راح اقول انهم ما يحترمون القانون ولا حتى هم غير متحضرين، ما ينلامون لأن في إهمال كبير وتقصير من قبل المؤسسات التعليمية والاجتماعية والاعلامية في انها تغير مفاهيم وايده في مناطق صار فيها مخالفة القانون شي عادي وتحول إلى قانون بحد ذاته، اتصل فيني iron لكن وقتها كنت مندمج اشرح درس عن حق في المساواة بين الناس مثل ما كفل الدستور هالشي، والملاحظ وانا ادرس او حتى اسولف مع وايد ناس عن الدستور، على بالهم كتاب موجود بس عند الحكومة او عند النواب او موجود بالمتحف ومحد يقدر يشوفه، وطبعا قعدت اشرح ان الدستور هو وثيقة ربطت الشعب الكويتي وأسرة الصباح من جديد، وصار فيه إلزام قانوني لكيفية الحكم ومنو اللي يحكم وما هي حقوق المواطنين، ما راح اشرح وايد لأن وقتها طق الجرس وبعض الطلبة للامانة يبوني اطلع لأن وراهم حصة (ألعاب) ومساكين ما ألومهم لأن بالمدرسة مافي نشاط ولا فرصة ينفسون فيها عن روحهم غير حصة الألعاب اللي اهي مجرد خمسين دقيقة يركضون فيها ورا كرة قدم وبعضهم اصا ما يبي يلعب يبي يقعد تحت الظل يسولف وينام ويحل واجب الفيزيا او الرياضيات!!

يتبع باجر...

الحلقتين الاحدعش والثانية عشر iron man

----------

الحلقتين الحادية عشر والثانيةعشر

صار في مشكلة بالمدونة مما اضطرني اني ما انزل الحلقة العاشرة :(

----------

راح iron محطة الباص واللي عبارة عن ثلاثي كراسي اثنين منهم مكسورين والثالث موموجود مفقود، احتمال تلاقيه راح للصيانة أو اللي خذاه محتاجة حق المخيم، المهم وقف iron ونطر لكن الباصات عدت عليه من غير مافيهم واحد يوقف، وبعد هالباصات عدت عليه 20 سيارة تاكسي جوال يبدو انهم يلعبون سباق سيارات لأن كلهم مو مبين عندهم breake إلا لزوم الوقوف بنص الشارع حتى يركب له زبون!! عموما استمتع صاحبنا بمتابعة الشارع اللي (القار) فيه يعاني من تسلخات وحفر كل وحده تكفي لإخراج البترول منها، وأثناء تفقده للشارع والرصيف كادت سيارة وانيت (قمارتين) انها تصطدم فيه، وتوقف فجأة بعد استعراض رائع وتقحيص واضطر انه يلحق على السايق قبل لا يموت وتفقد الكويت واحد من أهم رياضييها، واتضح ان صاحب الوانيت شايب متقاعد كان يحاول يوقف سيارته علشان يركب iron لكن خانه التعبير وضغط بانزين وعقبه side breake، وعموما أبشركم الشايب بأحسن حال صحيح الخروف اللي ورا صار حول وفقد الذكرة وقام يقول (ميو ميو) لكن ميخالف المهم ان الكل بخير.

راعي الوانيت : وين رايح يا الاخو تبي اوصلك؟
Iron : I need to go o Zahra ?
راعي الوانيت : اركب اركب انا رايح للجهرا طريجنا واحد حياك؟

وفعلا ركب iron وكشخ بالوانيت وراحو الجهرا، وبحكم ان راعي الوانيت شايب راح تلاقونه ملتزم بالسرعة المحددة واللي اهي 140 كم/بالثانية وقدر انه يتغلب على السيارات اللي بالخط السريع، لكن حصل اللي ما كان احد يتوقعه؟! تعرضت السيارة لبنجر/بنشر مما اضطر السايق للوقوف بسرعة لكن المشكلة ان التيار السبير موموجود، مما يعني حتما ان الرحلة تتوقف إلى هذا المكان، iron شاف انه راح يتأخر مما اضطره ياخذ معاه الخروف والشايب وجم جيس شاريهم الشايب لأهله ويوديه البيت، وفعلا قطعو المسافة ووصلو البيت بوقت قياسي، ويقولون ان معسكر الجهرا التقط جسم غريب فوق الجهرا لكن ما تم التعامل معاه على أحسن وجه لأنه ضابط الرادار كان مضطر يطلع من الدوام ويلحق على الغدا في بيت أهل زوجته، خصوصا وأنه من يومين متهاوش معاها وأخذت عياله وراحت بيت أهله واهو غصب أقنعها إنها ترد البيت، بعد ما تعهد لها يسفرها دبي ويشتري لها تلفزيون يديد وييب لها 3 خدامات وسايق وطباخ، وهي من جانبها راح تسامحها على انه خانها للمرة الثلاثين!!

وصل iron بيت راعي الوانيت واللي طلح اسمه (بوضاهي) ورحب فيه خير ترحيب خلاه يقعد بالديوانية العامرة، وطلع منها اليهال اللي قاعدين يشوفون mbc action ونادى (محمد) بالمناسبة ليش نسمي كل الهنود والبنغالية اللي يشتغلون بالكويت (محمد)؟!، ما علينا قام محمد يصب قهوة وجاي وطبعا لا تتخيلون جم فنجان قهوة شرب iron خبركم ما شاف مشهد علي المفيدي في حامي الديار!! طبعا الدلة خلصت واضطر محمد يسوي للضيف دلة ثانية، ودخل بوضاهي الديوان وقعد يشكر هالضيف على الخدمة اللي سواها ولا كانت الاغراض ما وصلت بهالسرعة واختربت بسبب الحر الشديد، وقام الشايب يشرح حق هالضيف الغريب الاجنبي ان الجهراء من مدن الكويت القديمة وفيها تاريخ طويل، وقاله ان من عادات البدو ان الضيف يقعد ثلاثة ايام حسب العادات، وصاحبنا مو فاهم شسالفه لكن ارتسمت عليه علامات الفرح والسرور والبهجة، وقبل لا تصير الشمس عامودية في سماء الكويت اتصل بوضاهي بجماعته وجيرانه وعزمهم على الغدا على شرف هالضيف الخدوم، وحطو الذبايح واللبن وكل الخير اللي معروفين عنه أهل الجهراء، ومن خلص الغدا وغسلو الضيوف اياديهم شرح بوضاهي شلون iron هالأمريكي ساعده ووصل له الاغراض وطار فيه، بيني وبينكم مو مصدقين انه يطير لكن ما عليه أمريكي ويسويها؟! وقام جار بوضاهي وحلف يطلق حريمه الاربع اذا ما لبى iron طلبه؟

طلب جار بوضاهي ان عزيمة العشا في ديوانيته المخالفة والحضور على شرف iron، وفعلا صارت العزيمة وذبحو الذبايح وكل أهل الفريج عرفو ان في عزيمة حتى يقولون ان صاحب الديوانية حط اعلان عند مدخل الجهرا من صوب القصر الاحمر، والناس تدخل تسلم وتقعد وصاحبنا مو عارف شسالفه وليش كل هالناس تجمعت مو مصدق انه قاعد بديوانية يبدو ان صاحبها صاحب جاه ومال ولا شلون عزم كل هالناس، والحمدلله العشا كفى وزاد وطلب صاحب الديوانية ان يبات iron الليلة وباجر يرد عند ابوضاهي، وغمز الجار حق ابوضاهي غمزة واحد محترف كوت بوسته ويبي يطلع باون!! وصار الصبح ولا زلزال يهز الديوانية وشكله صوت دبابات، اتصل فيني صاحبنا وقالي الظاهر صار غزو شنو ممكن يسوي، قلت له أي غزو أي خرابيط يبا مافيهم شدة العراق حق الغزو والاحتلال اللي فيهم مكفيهم، بس ما استبعد يكونون منخشين تحت الارض وطلعو لنا، وماخلاني اكمل جملتي الا وسكر السماعة بويهي ويبي يشوف شسالفه ولا حفارة البلدية قاد تهدم الملحق والديوانية وراعي الديوانية صاحب العزيمة معصب ويصارخ وقاعد يدعي على لجنة الإزالة وقاعد يتصل بنائب دائرتهم اللي محول تلفونه على بدالة المطاعم، اما صاحبنا فكان يبي يحل المشكلة وعرف ان البلدية تعتبر الديوانية والملحق الجينكو مخالف واستغلال لأراضي الدولة من غير وجه حق، وسعى انه يهدي الجو المتكهرب وقال لهم ..

يتبع غدا...

الحلقة العاشرة iron man

الحلقة العاشرة

هذه الحلقة بالذات برعاية مجبوس دياي ام بدر..

---------------

وفعلا طار iron من الفرحة وراح يشوف هالتاجر ويوقفه عند حده، ووصل للمكتب وقعد ينطر المعزب اللي واضح انه مشغول في اجتماع مغلق وهام، وأثناء تواجده في المكتب طلب من السكرتيرة اللي اصلا متزوجها المعزب على زوجته إنها تطلب له ماي بارد، خبركم مفعول الطرشي بدا يطلع وواضح انه يمر في تلبك معوي، ومثل ما انتو عارفين ان الاجتماعات المغلقة تاخذ لها وقت، مما يعني حتما ان iron تحمل وايد وبطنه كما يقولون في حالة حرب دامية ومفرقعات نارية راح يضطر فيها الخروج والبحث عن أقرب دورة مياه او حتى عيادة للجهاز الهضمي ولا راح يتحول المكتب إلى ستاد أولمبي يشهد افتتاح دورة الطرشي للألعاب النارية!!

ما تحمل صاحبنا ومن قوة العوار اضطر يطلع من الدريشة ويطير يشوف له حمام عمومي، على باله في حمام عمومي أصلا بالشوارع، وشدعوه اذا حصل حمام بيلاقيه نظيف، خلوني ساكت مابي أوصف لكم وضع الحمام العمومي اللي لقيته في سوق المباركية، واذا في واحد من القراء عنده الشجاعة الكافية يقطع تذكرة رايح ياي لذلك الحمام العمومي، بس قبلها يقولنا في أي مستشفى راح يغسل معدته وفي أي مستشفى راح يرمم عيونه بعد المنظر اللي راح يشوفه، كافي الريحه تخليك تسوي حركات لا إرادية!!

طار iron وبطريجه شاف ستاد جابر الدولي واتصل فيني بطريجه، وبلغني عن إعجابه الشديد بتصميم الملعب، وقلت له إن هالملعب احنا حاطينه زينة يشوفونه المسافرين بالطيارات، وصارت الجماهير واللاعبين يحلمون يلعبون فيه، واللي ما يعرفه ان في سوالف تدخل ضمن بند تعطيل المصلحة العامة وتدمير الرياضة قاعد يمارسها أكثر من طرف حتى نصرخ بالنهاية ونقوله (تكفه انقذنا صحيح انك فاسد لكن يامعود الحق علينا) وفي رواية أخرى راح نرفع شعار لحملة شعبية رياضية في ساحة الارادة نقول فيها (بوق ولا تخاف احنا معاك..بس نبي نلعب)؟! واضطر انه يسكره مني ونزل أقرب دورة مياه وبعد ما ارتاح طلع يتمشى حتى يستعيد لياقته، لأنه كان في الحمام لمدة ساعة ونص ولعب شوط اضافي، ولولا ان الشمس بدت تغيب جان لعب ركلات ترجيح!! ما علينا وقف يشوف الشارع واللي طبعا احنا البلد الوحيد بالعالم اللي نعتبر الاشارة الحمرا مالها لزمه والكويتي لازم يطوفها حتى لو دعم له باص مدرسة ولا حتى ذبح له عايله، لأنه باختصار مجهز لهم العذر بيقول (آسف مو قصدي) والحمدلله إن عندنا بنوك تصرف (آسف) ونحمد ربنا نبوس ايدنا ان عندنا نواب يعرفون يطلعون الحرامية من المخافر مرفوعين الراس، وفي مرات يقولون والعهدة على الراوي دورية المخفر توصل المجرم لباب بيته وتزفه زفة معرس بعد!!

يتبع غدا...

الحلقة التاسعة iron man

الحلقة التاسعة

هذه الحلقة برعاية كلوب ساندويش ام فطوم


---------------

اتفقت مع iron امره ونروح العصر مكتب (ج.ع) وهو بالمناسبة واحد من أشهر تجار البشر/الاقامات، وطبعا انا قلت له إنه ما يستخدم قوته الا في الضرورة القصوى ولا راح ننكشف بأن الكويت استعانت بخبير أجنبي علشان يحل مشاكلها العالقة، مو كافي يعني (بلير) اللي لهط له جم ألف دينار وعطانا مشاكلنا اللي اصلا احنا نعرف نحلها لكن مسؤولينا الكبار يبون يثبتون الحكمة اللي تقول (اقولكم ثور..يقولون لي حلبه) عموما اذا طلع المثل مو دقيق طوفو مو وقته نصحح الحكم والامثال واخلي iron؟!

قلت له العنوان ووصيته إنه يتنكر بصفة بصاحب شركة عالمية للبناء، وإنه يبي يبني أكبر فندق في بر السالمي، ومحتاج شركة توفر له العمال من داخل الكويت، ونزلته العمارة اللي فيها المكتب، كان المكتب في الدور قبل الأخير ودخل العمارة ونطر الاصنصير او المصعد الكهربائي ينزل لكن اتضح ان الصيرفي مع ممثل (كومبارس) قاعدين يصورون ويمثلون على جمهور رمضان إن هناك مقلب والممثل متوهق!! اضطر iron يستخدم السلالم لكن ما قدر يكمل لأن في الدور الرابع لقى الطريج مسدود لأن القهوة اللي مأجرة الدور مسوية السلم غرفة للفحم ورمي نفايات القهوة، اضطر iron يرد ينزل وأثناء خروجه من العمارة صادف سايق مطعم يبي يوصل الطلب للدور الأخير متوهق لأن الصيرفي للحين بالمصعد والظاهر قاعد يتهاوش مع المخرج او المنتج لأن الظاهر الضيفة الثانية ما رضت على السعر المتفق عليه لتصوير الحلقة، فقرر iron يطير للدور الأخير ويدخل المكتب ومعاه جيس طلب المطعم اللي كان عبارة عن صحن فول وفلافل وصحن مشاوي مشكلة وصمونتين بطاط وبيديان ودرزن سمبوسة جبن، وكما جرت العادة لما يوصل الطلب من المطعم دايما وأبدا ما يكون عنده خردة علشان جذيه من البديهي تترك لهذا السائق باقي الحساب واللي يبدأ من نص دينار ويصل إلى دينار أحيانا وفي رواية أخرى يتأتي الطلب ناقص أو بارد وفي كلا الحالتين يصل الطلب متأخرا!!، طبعا iron قرر يذوق من الجيس الشفاف اللي فيه جزر وخيار، وشكله كان مستانس شلون الكويت تقدر تسوي fruit salad داخل جيس مثل هذا؟!


احترق iron من الطرشي وبصراحه عجبه بدليل اتصل فيني وانا على بالي قدر انه يحل مشكلة العمالة الوافدة، وقالي في عبارة واضحة لا تحتمل التأويل (ياجماعة لاحظو اني فلته باللغة العربية..ولا منو يقول تأويل هالأيام) ..

Iron : Mr. bader could you please bring for me the spicy fruit salad? It's very delicious and please make it very spicy?

بدر : انت شقاعد تخربط انت الظاهر الشمس بخرت مخك وذوبت الوايرات اللي براسك، شوف انت بالأول شوف لنا حل لمشكلة تجار الإقامات ولك علي أخليك تذوق أكل كويتي يخليك تقط الجنسية الأمريكية وتاخذ الكويتية؟ بس الحين مو وقته حل لنا المشكلة ولك مني عزيمة على شرفك وهذا men talk (كلام رياييل).


يتبع غدا..

الحلقة الثامنة iron man

الحلقة الثامنة
--------------

قرر iron يتعرف على بواب بيت الأمم المتحدة ويعرف ظروف نزلاء هالفندق العالمي، وعرف منه إن نص نزلاء هالمكان إما إنهم منحاشين من عيشتهم من بلدانهم اللي غنية أصلا لكن سوء الطالع (حلوة سوء الطالع) او لأنهم مو عارفين يستفيدون من خير بلدانهم، وبعضهم توهق بالوضع اللي يعيشه بعد ما باع اللي جدامه واللي وراه بس علشان يكون بالكويت ويشتغل له جم سنة يكون نفسه ويعوض أهله شقا الأيام، لكن تدبس في واقع آخر وعيشة ما تختلف وايد عن اللي كان عايشها، بعضهم توقع أن الفلوس بكل مكان موجودة ومن كثرها الكويتيين ما يبونها، وطبعا كل هذا بسبب مصاصين الدماء او خل نسمي الأشياء باسماءها "تجار البشر" او تجار الاقامات، يسجلون هالضعفاء باعداد كبيرة في شركات وهمية ومن سنوات الكل مستفيد هالتجار وبعض المسؤولين في وزارة الشؤون والداخلية، وتكبر المشكلة وتوصل لحد تجاوز هالمساكين القانون ويبدون يعيشون حياة الغابة، وطبعا من تصير قضايا قتل وجرايم يتكلم الكل عن محاسبة وملاحقة تجار الإقامات، ولغاية اليوم ما سمعنا عن تاجر إقامات تم إلقاء القبض عليه ومحاكمته ولا سمعنا حتى بوزير للشؤون اعترف ان هالمشكلة "معصي" يحلها وإلا اهو ووايد ناس وراه وتحته يطيرون!!

Iron ظل يسمع النزلاء اللي بالبيت ويتعرف على مشاكلهم، وبعد ما جمع المعلومات الكافية قرر إن يحل هالمشكلة واتصل فيني، لكني وقتها كنت بالصف أحاول اقنع الطلبة ان الكويت بلد ديموقراطي في حرية رأي وانتخابات وإن مجلس الأمة هو بيت الأمة وإن الدستور يضمن التعليم للكويتيين، لكن المشكلة إن الصف نفسه والطاولات والكراسي والسبورة المكسورة، وواقع مستقبل هالطلبة عكس اللي اقوله، اقولهم ان لازم مافي واسطة تلاقيهم يقولون لي "استاذ بدر تكفه شنو الشي اللي ما يمشي بالكويت إلا بالواسطة؟!" ..

طلعت من الصف ورديت على iron وقلت له إن وزارة الشؤون عندها كافة أسماء الشركات والعمال، وإن في أكثر من مناسبة دولية يسافر وفد رسمي يعلن للمنظمات الدولية إن مشكلة العمالة الوافدة وحقوقهم انتهت او شارفت على الانتهاء، واحنا بعضنا حاول يحرض أعضاء مجلس الأمة إنهم يسألون الوزير عن دورهم وشنو صار على هالمشكلة، تلاقي الحكومة "تضيع الصقلة" تارة وتارة أخرى بعض النواب يعرف ان كشف الحقائق يعني باختصار فضيحة size (ام جلاجل) على راس بعضهم اللي جمع فلوسه من هالتجارة وصار واستوى من كبار الفعاليات الاقتصادية في البلد على ظهر هالعمال!!


Iron ما اقتنع ان المشكلة مالها حل وقال ان عندكم مشكلة في عدم المواجهة، وإن المواطنين ما يحسون بالمشكلة إلا بعد ما يطيح الراس على الراس، والدليل (وحش حولي) وغيره من البشر اللي عصرتهم الحياة وتحولو إلى ذئاب بشرية ماتبي غير إنها تطلع حرتها، iron سكر السماعة وراح القهوة اللي كان فيها وأخذ معاه سراج اللي كان يبوق كهربا من إشارة المرور علشان يوصله للملحق اللي ساكن فيه، وخلاه مترجمه الخاص في رحلة تقصي الحقائق، وفعلا عرف iron إن في واحد من تجار البشر نص اللي بالفريج هذا تحت رحمته، وقرر إنه يلاحقه ويخليه يرد حقوق هالناس.

يتبع غدا....

الحلقتين السادسة والسابعة iron man

اقدم اعتذاري لكافة المتابعين لعدم عرض الحلقة السادسة نظرا لخطأ فني غير مقصود..

وشكرا لكم من راسلني وسأل عن المسلسل..

---------------

الحلقة السادسة والسابعة

برعاية

جريش عمتي

---------------

وفعلا صار iron ضيف على هالبواب ونزلاء البيت، وردو الاسيويات يمارسون مهنتهن، بينما رد البنغالي وبرميله يزيد عليه شوية بانزين، اما حجي اغا كمل شغله وضبط جنطته لزوم السفر لديرته بعبارة الساعة الواحدة ظهرا بتوقيت عبادان! وبالنسبة لي كنت بسابع نومه وحاط تلفوني على وضع الصامت، تحسبا لأي رسالة نصية قصيرة SMS بعز النوم توصل وبالنهاية تنزيلات من محل ولا حتى رسايل بوراشد اللي يحسسك إنه الوحيد الفاضي بالديرة يلقط أخبار الجرايم والوادث وأسعار بورصة سوق الفرضة وسوق السمج، هذا غير رسايل النواب اللي يهنونك على كل شي ويعزمون الواحد على حفل عشاء وغيرها اللي تخليك تكره التلفون!!

صار الصبح ورحت الدوام كالمعتاد، ووصلت هناك متأخر عشرة دقايق، طبعا انا ما احب اتأخر لكن شوارع الكويت تعلمك شلون تطلع لك أعذار غير عذر الزحمة لأن باختصار "صار شي عادي" وعذر غير مقبول، عموما وصلت المدرسة وحطيت جنطتي بالقسم وطلعت افتش على الطلبة اللي ينخشون بالصفوف ومنحاشين عن الطابور، من هواياتي اللي أمارسها بالمدرسة مطاردة هؤلاء المتخلفين عن الطابور، ولا تتخيلون أشكال الطلبة اللي اصيدهم، اللي تلاقيه لصق بالدرج من كثر السعابيل وهو نايم، ولا تلاقيه "هشّم" درايش الصف من الشخير، واللي منسدح بالمسجد ولاف نفسه في ستارة المسجد اللي محد راضي يركبها!! هذا غير اللي منحاشين وعلى بالهم ألعب معاهم "لبيده" وقاعدين بالحمامات، وما يحتاج أقولكم عدد الطلاب اللي أوقفهم عند مدخل المدرسة يعني الطابور ماادري منو فيه؟!

من صباح الله خير تعال شوف جدول المدرسين الزملاء الغايبين وعن نفسي اتعاون وادخل حصصهم، لكن المشكلة لما انت تغيب او يصير عندك ظرف اول الناس يحقدون عليك اللي كنت تشيل حصصهم؟!، المدرسة باختصار هو مجتمع مصغر وحياة وبيت آخر ومثل أي مدرسة يحاول أولياء الأمور فرض علاقاتهم وواسطاتهم علينا، بما فيهم أولياء الامور العسكريين، واللي فعلا نسبة كبيرة من عيالهم يعانون مشاكل كثيرة في التحصيل العلمي وفي شخصياتهم، تلاقي الواحد فيهم يا مسكين فقير ضعيف الشخصية، أو تلاقيه شاق القاع وقايل مباع، ومن يوصل ابوه يصير حمل وديع طفل بريء كبراءة الذئب من دم يعقوب؟! المشكلة مو في الولد لأن في هالعمر متوقع يكون فيه مشاكل نواجهها معاه في المدرسة، المشكلة أن الاب العسكري يحضر بلبسه العسكري ورتبه حتى لو كنت خيط ترهب الزملاء المدرسين خصوصا الوافدين، لأن معظم الوافدين كانو عايشين في بلدان يحكمها العسكريين والطراق عنهم بالشارع وببيزة!!

IRON قام من النوم وظهره منصلخ والسبه الحر ومسكين نام فوق السطح لأنه ما تحمل ريحة النزلاء في الغرفة الديلوكس، وأخذ له نص ساعة علشان يتأكد بالضبط وين طريج دورة المياه، وبعد ما عرف وين اهو اصلا؟! ، اتصل فيني وقالي..

IRON: PLEASE…PLEASE I need your help? i did not sleep last night and this house is different than you tell me before?!

انا : انت من اولها تبيني اساعدك عيل ليش انا يايبك with your face (ويا ويهك) iron هذه اول مشكلة ابيك تحلها لنا بالكويت، عندنا عمالة هامشية كبيرة مالهم لزمة وكثير من منهم من غير حقوق، والمشكلة ان كل ما تسكت الحكومة عنهم والمجلس بس يهدد باستجواب وزير الشؤون، نسمع عن بناء مدن عمالية والمشكلة تكبر كل يوم، عندك مثلا سنة 1999 قامو علينا الصعايدة بخيطان والسبه صحن، وما تعلمنا من الدرس وقامت الحكومة سفرت منهم اللي تقدر والباجي خلتهم ينتقلون لمناطق للعزابية ويعيشون حياة اكثر مأساوية، ومحد متأذي غير الناس، سرقات ومشاكل نفسية وبيئية وأمنية تتراكم، فجان زين تشوف لنا حل على ما انا ادخل my class وراح اتصل فيك بعدها اشوف شنو سويت؟!

يتبع...

الحلقة الخامسة iron man

الحلقة الخامسة

هذه الحلقة برعاية قطايف ام فطوم :)


ضيوف الحلقة حسب الظهور او الواسطة !!

أبو الكلام
أبو سليم البنجرجي
البواب
-----------------

فجأة الكل اختفى وضاع الحابل بالنابل وحتى IRON نفسه ما يدري شنو يسوي وقرر ينحاش مثلهم؟! ومن التعب قرر يوقف يم محل تلفونات، كان فيه (أبو الكلام) وهو عامل بنغالي الجنسية واضح انه عاش فترة طويلة من غير ما يحلق شواربه، وطلب منه IRON يدليه على بيت الأمم المتحدة، طبعا ابو الكلام يهز راسه مو فاهم واضطر يعرض بضاعته، وقاله..

ابو الكلام: بابا في سوي اتصال واحد ساعة واحد دينار..في ممكن سوي (مسج) ممكن ربع دينار..في ممكن افلام كلو موجود؟!

طبعا IRON ما استفاد من ابو الكلام بشي وقرر يخليه، واتجه إلى الشارع وهناك الوضع أكثر صخب (حلوة صخب...ماادري من وين يبتها)، كان الجميع في حالة سهر جماعي اللي يشتري مواعين واللي يبيع حديد مبيوق من مخازن الحكومة، واللي يبيع نعل وجواتي مسروقة من المساجد والمقابر، واللي يبيع ألعاب أطفال لاقينها في حاويات القمامة، واللي مسوي مطعم متنقل يبيع مشويات لا يعلم نوع اللحوم المستخدمة فيها، واللي مسوي سيرك صغير مخلي الفار يسوي (وقوف على الايدين) وتخيل معي عزيزي القارئ/المشاهد عالم مليء بالمفاجآت.

بعد هذه الجولة في (السوق الحرة) شاف صاحبنا IRON محل يبيع اجهزة كهربائية، فشي طبيعي يكون صاحبه يعرف انجليزي ينقذه، وفعلا دخل وشاف المحل اللي كان عبارة عن متحف للاجهزة الكهربائية القديمة وسأل صاحب المحل اللي مدعوس ورا ثلاجة يحاول يصلحها حق زبون من سنتين ما اخذ ثلاجته (عفوا..سنتين وخمسة شهور واسبوع) وسعى صاحبنا إنه يستفسر عن مكان عوض (البواب) لكن الظاهر ان صاحب المحل مافهمت شنو المطلوب لكن قاله إن ممكن يحصل طلبه عند ابوسليم البنجرجي (البنجرجي أي مصلح السيارات).

خرج من المحل من غير أي فرصة للوصول لعوض، اما انا فبصراحة حطيت تلفوني (صامت) لأن توصلني رسايل من محلات للملابس وغيرها ترفع الضغط..المسكين IRON اتصل فيني وقطع علي حبل تأملي في مذكرات "الطريق الطويل" وقررت ارد عليه بصوت يغلب عليه النعاس..

IRON : I need your help? I did not found your friend Awad al bawab?!

انا : هدي اعصابك انت الحين لا تتعب نفسك شوف لك اقرب بيت واطلب من الحارس تنام عنده لغاية الصبح وانا من باجر الصبح اشوف لي جريدة اعلانية جايز الاقي فيها اعلان الصباغ اللي خبرك يدليني على ولد عمه؟

سكرت التلفون منه بينما صاحبنا فعلا نفذ الكلام اللي قلت له اياه، واقتحم بيت قريب من وهناك انتفضو سكان البيت، مجموعة بنغالية انحاشو ومعاهم براميل (محلي) في حين انحاشت 5 إلى 8 آسيويات هربا من القبض عليهم متلبسين؟! اما حجي اغا فكان الوحيد اللي ثابت وماشاف انه له داعي ينحاش، طبعا طلع الحارس وقال له..

البواب : ايي يا عم داخل علينا زي التور..مش تحاسب ده بيت محترم ومالك لابس لبس حديد عامل نفسك عربية لا مو أخذه؟! .. عاوز مين ولا انت عاوز تبات في البيت وخلاص وهربان من الشرطة؟! تعال تعال انت باين عليك غلبان وطيب ان حتويك عندي لغاية الصبح وبكره ربنا يفرجها علينا ونشوف لك شغلانه عند ولد اخوي بالشويخ الصناعية وبرضه نشوف لك حاجه تلبسها اصل النهار في الكويت حر ممكن تنفجر علينا؟!

يتبع غدا...!!

الحلقة الرابعة iron man

الحلقة الرابعة

سامحونا ما يمدي نحط اغنية المسلسل لان الاعلانات مو ملحقين عليها؟!

ضيوف الحلقة حسب الظهور:

شون مايكل
هولك هوقن
هريدي ولد عم معلم القهوة


نزلته من عند الباب وقلت له حاول ماتتكلم وايد وكثر ما تقدر تكلم عربي او انجليزي مكسر، شلون ما ادري المهم يحاول!! وفعلا نزل وأخذ معاه باجي العشا "طلع بخيل" وخليته يروح اما عن نفسي فعلى طول ما صدقت خبر وفوق تحت ورديت البيت لأن كان وراي دوام باجر الصبح.

وصل iron وكان الشارع مافيه غير هنود يتمشون بالوزرة (جمع وزار) وجم واحد من مختلف الجنسيات اما الصعايدة بالذات فتجمعهم في القهوة اللي أساسا عبارة عن كراج سيارات حق البيت اللي تحول لفندق بوربع نجمه للعمال، المهم الصعايدة يتابعون مباراة في المصارعة بين شون مايكل وهولك هوقن!! وواضح ان الجمهور متابع بحماس والدليل إن التلفزيون معلقينه بالسقف وأي حركة ممكن يطيح على راس معلم القهوة اللي قاعد يحسب عدد روس الشيشة الموجودة وشكثر محتاج حق عرس ولد عمه هريدي؟

طبعا دخل iron القهوة ومحد سلم عليه لأن واضح هولك هوقن ماسك شون مايكل وطايح فيه طق والشباب بالقهوة يصفقون تقول ولد عمهم بالتلفزيون!، راح صاحبنا وسأل معلم القهوة وين عوض البواب؟ للأمانة معلم القهوة خاف لكن قال هذا أكيد عامل حدادة لابس لبس الشغل للحين ما بدل؟ وفعلا طلب له جاي "حاجم" وخلاه يقعد لغاية ما يشرب الجاي ويشوف شنو يبي؟ وطبعا وصل الجاي وصاحبنا ما صدق خبر جرب الجاي "من باب إنه كرم عربي" وواحد من الموجودين زاد هالكرم بشفطتين من الشيشة السلوم، ومن عقبها زقارة كيلوبترا عربون محبة من محمدين اللي كان يضبط الفيديو كل ما اخترب عليهم شريط "الحزام الأزرق".

ما اطولها صار هالحوار بين معلم القهوة والموجودين مع iron..

Iron: excuse me? Where can I found Awad bawab?
المعلم : يا ولكم يا ولكم اهلا اهلا شكلك بتعرف انجليزي قوي قوي بص يا باشا عندينا هني في الحساوي many عوض بس أي واحد فيهم عاوز..عاوز اللي يصلح المواسير ولا الستلايتات سوري سوري seatlete ولا عاوز عوض بتاع غاز الفروانية ولا عاوز عوض ابن عمي بس ده بالصعيد لسه بيدرس اعدادي وقبال أمنتك عاوز يتجوز نفيسة بنت رجب الطحوني بس أمها مش عوازها بتقول عوض لسه ميعرفش internet؟

طبعا تدخل كل من في القهوة لشرح ومعرفة اللي يبيه iron لكن الحبيب ضاع معاهم فقرر انه يسكتهم وصرخ صرخة "من قلب" وقال..

PLEASE..PLEASE..

نط واحد من الحضور واللي كان فاهم وايد وقال..يا رجاله الواد ده من الشرطة انا سامع بليز دي بالافلام البوليسية حتنط الشرطة علينا اهربو يا رجاله؟!

الحلقة الثالثة IRON MAN

الحلقة الثالثة

ما حبيت أصدمه وخليته يكمل عشاه وطبعا شرب البارد وحسيت داخ خصوصا وإني حاط له برنامج إذاعي مقدم البرنامج الظاهر يساسر الناس ويبيهم ينامون بالسيارة، مو احنا ناقصين حوادث!! ما علينا خذيت فيه لفه بشارع الخليج ووريته الكويت الجميلة خصوصا العمارات في الفترة المسائية ومع ظلام الليل تخش عيوب مدينة الكويت المهجورة، وتخش فضايح بيوت بنيد القار، وطبعا قعد اهو يسألني شنو هذا وشنو هذا وانا أجاوبه بكل أريحية، لغاية ما قربنا من مجلس الأمة وقالي what about this building? قلت له هذا بيت الأمة "البرلمان" وإنه رمز الديموقراطية اللي كانت يوم من الأيام "حرام" عند ناس وبيوم وليلة صارت"حلال" وعند البعض كانت "تعدي على الحكام" وتحولت بالنسبة لهم شوية كراسي تخيلهم من "سواق تكاسي ووانيتات" إلى أصحاب شركات عمالقة؟!

بيت الأمم المتحدة

طحت بمشكلة وبشغلة ما حسبتها وين راح أسكن هالضيف؟ بيتي عبارة عن شقة زين شايلتني انا وعايلتي؟! وبيت أهلي ما يصير احطه بالديوانية ولا أقدر أخليه في غرفة السواق، أخاف "يصير شي"!! لا تفهموني غلط أخاف مثلا يحرضهم على الاحتجاج والمظاهرات وتنطلق ثورة السواق والطباخين من بيتنا وتعم البلاد فوضى، وقتها عاد مو بس أهم يتسفرون الكل يتسفر!! ما علينا خلونا بالمهم لازم أفكر الحين وين ينام، وانا سألته إذا كان معاه أي أوراق رسمية مثل الجواز أو حتى بطاقة مدنية، لحظة أي بطاقة مدنية ما عندهم هذيل، بعدين ليش إييب الجواز وهو طاير من هناك بنفسه من غير طيارة، بصراحة كانت وهقة والساعة الحين قريب الثانية عشر ليلا، ومافي غير إني أخليه ينام فوق السطح لكن الخوف إني أصحى الصبح آلاقيه ساح من الحر!! تدرون شلون قررت أوديه جليب الشيوخ هناك كنت أعرف صعيدي مرة من المرات صبغ لنا السرداب فاحتمال يضبطني بغرفة محترمة عندهم ببيت العزابية؟


قررت أصارحه وأقوله الآتي:

Looking front of you the first problem you need to solve it? And if you do it you will see my first homework. you will sleep in somewhere like united nations house its very nice way to learn new language, traditional and costumes for many of people who work in Kuwait and they want to make there dreams.

للي ما يعرفون انجليزي قلت له..

شوف جدامك أول مشكلة نبيك تحلها؟ واذا حليتها راح تشوف أول واجب لك، راح تنام في مكان ما يشابه بيت للأمم المتحدة (ماقلت له بيت عزابية) هذه طريقة زينة لتعلم لغات وتقاليد وعادات يديدة من ناس يشتغلون بالكويت ويايين يحققون أحلامهم.

*ملاحظة1: المكان مشبوه وراح أخليه يروح بيت العزابية ويسأل عن عوض البواب اللي ولد عمه الصباغ اللي صبغ السرداب، وبصراحة انا ما عطيته فلوس لأن راح يفهمني غلط وقلت له في حال صارت لك أي مشكلة يقولهم إنك مباحث؟

*ملاحظ2 : أخذت منه الغترة والعقال لأن راح يكون شكله غلط بعدين أنا متسلفهم من راعي المصبغة اللي بالجمعية.

iron man - الحلقة الثانية

الحلقة الثانية

ضيوف الحلقة:

أحمدي نجاد
وزير الداخلية
عامل نظافة - لم يفصح عن اسمه؟
الفنان سعد الفرج
سمو الشيخ ناصر المحمد - رئيس الوزراء
اللاعب الكنتاكي- ليو ميسي

---------

ابشركم وصل :)



طبعا ما راح تصدقون رحب فيني خير ترحيب وقال لي إنه very happy، وماراح تصدقون إنه ضافني عنده وتبادلنا أطراف الحديث، ودار بينا هذا الحوار..

بدر: شلون راح تيي الكويت؟
Iron man : let me ask my company before?
بدر : الشركة راح تطول على ما ترد عليك..بعدين راح تطلع التكاليف على ظهري وانا عندي أقساط أصلا؟!
Iron man : I know that..so what can you do?
بدر : خلني أسألك واحد بالداخلية يمكن يطلع لك كرت زيارة شرايك؟
Iron man: WHAT?! Are you crazy im American!!
بدر : اووه نسيت آسف دام جذيه عيل تعال على أقرب طيارة واخذ الفيزا من المطار؟
Iron man: no it will be along trip?
بدر : انزين عيل انت ليش ما تطير وتيي الكويت وانطرك بمكان بالبر مو أحسن؟
Iron man : ok let we see where is the perfect location?

انا حسبتها لو فرضا استقبلت الرجل الحديدي بالمطار أكيد الجرايد راح تشم خبر واحتمال قبل كل هذا، تعرف ايران ان الكويت راح تستقبل الرجل الحديدي وهذا يعني ان أمنها الخارجي في خطر، وراح يعفسنا أحمدي نجاد(الرئيس الايراني) واحنا أصلا مو ناقصين كافي حسين الفضاله للحين ما ندري شصار علي؟!

اتفقت معاه على إني أنطره بمواقف سيارات جمعية الخالدية وتحديدا عند لوازم العائلة، وفعلا ثاني يوم جهزت نفسي لهذا الحدث الكبير واللي طبعا خلاني بس أدعي إن النائب الفاضل محمد هايف ما يدري عني؟!، حتى ما يصرح من خلال لجنة الظواهر السلبية إن تواجد iron man ظاهرة سلبية وراح يهدد باستجواب وزير الداخلية، واللي اتوقعه من وزير الداخلية عادي جدا يتخذ قرار بالابعاد الإداري لضيفي العزيز بس علشان يفتك من حنة ودندرة "هايف"؟! ، بيني وبينكم شريت غترة وعقال ونظارة سوده ونطرته، وطبعا انا موصيه من يقرب يتصل فيني "ما يدق رنه" لأن شركة الاتصالات اللي مشترك فيها ما ترحم تحاسبنا على اللي يتصل فينا؟! المهم دقايق ولا الحبيب يطق علي الدريشة، لفيت ويهي ولا عامل نظافة "سلام عليكم بابا" وهذه التحية يعني يا بدر طلع المقسوم ورد عليه السلام بالفلوس!! بصراحة سلمت عليه وماعطيته شي خبركم ماني لاقي فلوسي بالشارع علشان أوزعها زكاة وصدقات!!


وصل الرجل الحديدي وكان مبين عليه التعب وفهمت من كلامه إن المطبات هي السبب وإن التلوث الهوائي في أم الهيمان وغيرها خلته ياخذ له لفة ويدخل من صوب الأجواء الشمالية ويوصل للخالدية، بعد الترحيب والسلام عرفت إنه مو يايب معاه جنطه وراح يظل ببدلته الحديدية، على أساس إنه الحبيب ياي يسير علي يوم مو أكثر، ما يدري إني راح أنقعه عندي جم يوم لزوم أحل جم مشكلة؟!

خذيت فيه لفه بشوارع الكويت وطبعا مافي خط سريع إلا وزحمة ومافي منطقة سكنية إلا الجمعيات زحمة، حتى إنه طلب مني نشوف لنا metro وقلت له إن الفنان سعد الفرج قالها في "حامي الديار" لكن للحين حكومة الشيخ ناصر المحمد ما رست على أي شركة راح تسوي القطارات لأنهم مشغولين في وايد مشاكل وقضايا أهمها طبعا التبرع لدول فقيرة ما نعرف عنها شي بالملايين لمجرد دعم صورة الكويت في الخارج.

صار وقت العشا وللأمانة كنت أبي أعشيه بسوق المباركية لكن ما اتصور هالضيف يعرف ياكل جبده وقلوب محموسة فقررت أشوف له مطعم يعرفه أحسن، وسألته عن المطعم المفضل عنده وقالي أسماء غريبة عجيبة واضح إني أحتاج مترجم علشان أعرف إذا قال أسماء مطاعم ولا كان الحبيب "ينكت"؟! وصلت يم مطعم هندي وقلت له wait ونزلت شريت درزن سمبوسه جبن ونص درزن سمبوسه خضرا و6 جباتي وصمونتين مشكل فلافل، ويب له بارد على ذوقي، وقلت له إن هالوجبة تعتبر وجبة غذائية متكاملة العناصر وكل أهل الكويت "المفلسين" يلجؤون لها بنص الشهر، طبعا اهو ما فهم نص اللي قلته لكن شفته فتح الجيس وقعد يشوف السمبوسه وسألني منو هالشيف الخبير اللي خبز هالبيتزا الصغيرة؟ بيتزا ها..ماشي انا على بالي يتطنز لكن طلع من صجه يتكلم، ويقولي أن هالشيف لازم ما نفرط فيه وقعد يحسب لي شلون ممكن يخلي من هالمطعم أشهر مطعم بالعالم ويقدر ينافس كنتاكي اللي استعان في MESSI ومافاد وياه او حتى McDonalds ما يدري إن المطاعم الهندية بالكويت والخليج أكثر من المطاعم الهندية بالهند نفسها؟! ولا يدري إن الشيف اللي شوي ويكتب فيه شعر أصلا يسوي السمبوسه بايده ويا عالم إذا كان يمسح عرق جبهته قبلها أو يلعب بشعر خشمه؟!

الحلقة الأولى-iron man kuwait trip

طماشه بكشرز

تقدم

IRON MAN
KUWAIT TRIP

قصة ورسومات وإخراج
بدر بن غيث

---------------

الحلقة الأولى

هذا المسلسل برعاية مدونة laish

www.bloglaish.com

---------------

ضيوف الحلقة حسب الظهور:

ابو بدر
ام بدر
السيد محمود حيدر
السيد جاسم الخرافي
الصحافي ياسر العيله

----------------


مقدمة (حالي حال المؤلفين)

مثلي مثل أي طفل يولع ويحب الأبطال الخارقين مثل "سوبرمان-باتمان...الخ" وهذا الولع كبر معاي، حتى إن لما كبرت بديت أطلع حرتي أكثر، خصوصا لما كان ابوي ولا حتى اموي مرات ما يلبون طلباتي "الماصخة" لما أطلب منهم لعبة أو شريط حق هذا البطل أو ذاك، وتلاقيني ماصار لي جم يوم شاري على حسابهم لعبة وشريط!!

لما كبرت اعتقدت مسألة الفلوس هي العائق وراء حصولي على هالأشياء، لكن اكتشفت ان الفلوس ما كانت العائق وراء امتناع ابوي وأمي من شراء اللي اطلبه، بكثر ما هي كانت حكمة كان لازم اكتشفتها لما اكبر، والحين انا كبرت وما اكتشفت شنو الحكمة؟!

المهم حصلت نسخة "موأصلية" من فيلم IRON MAN 2 وقلت لازم أشوف شنو ممكن يقدمون في الجزء الثاني من هذا البطل اللي تتوفر فيه التكنولوجيا المقنعة والقدرات اللي تخليه أقوى رجل في العالم، وللأسف ما كان الفيلم بالمستوى المطلوب وكأنه مجرد "سلق بيض" ويومها تحسفت على "النص دينار" ولو شاري أي شي ثاني من البسطة أفضل؟!

قعدت يومها أفكر بالخسارة الفنية اللي تعرض لها البطل وصورته اللي اهتزت في بالي، خصوصا وأن بقية الأبطال الخارقين كانوا يقدمون أفضل ما عندهم وهم يدرون ما يملكون كل اللي قدر يحصل عليه "الرجل الحديدي" ولما راجعت حساباتي، قلت مافي غير إني أساهم في إنقاذ هذا البطل وفي نفس الوقت استعين في قدراته الخارقة، ويكون معاي بالكويت علشان يحل معاي مجموعة من المشاكل والقضايا اللي اشوفها صعب تنحل إلا اذا كان مثل الرجل الحديدي موجود بينا!!

ما قدرت انام يومها ودخلت الانترنت فكرت ادور الرجل الحديدي في "face book" لكن للأسف ما حصلت له شي، وقلت أدور في Google لكن للاسف ما طلع معاي غير صور ومواقع تتكلم عن الفيلم ولقيت الموقع الالكتروني الخاص بالفيلم، وكذلك الموقع الخاص بشركة MARVEL، فكرت اني اتواصل معاهم وأبلغهم إني ممكن أساهم في تعويض خسارتهم من عرضهم للجزء الثاني واللي ما كان بقيمة ولا بتشويق الجزء الأول؟

لكن كل هالأفكار هونت عنها لأن الشركة الأم ما اتصور بتفكر إني مو من صجي، ولا حتى أصلا اني قادر ماليا أعوضهم، مو معقولة أكون بيوم وليلة "محمود حيدر" ولا حتى "جاسم الخرافي"، المهم استسلمت وقررت إني أحذف الفكرة من راسي، وأثناء تواجدي على "face book" قررت إني أبحث أكثر يمكن ألاقي أحد عنده مثلا Email الرجل الحديدي، بصراحة قلت بالكويت مافي غير إني ألاقي أحد يمون على ياسر العيلة، المتخصص في استقبال الفنانين من المطار لصالة هلا فبراير، لكن قلت ياسر العيلة راح يحسبها معاي حسبة وبالنهاية راح ياخذه مني؟! قلت أشوف كاتب صحفي ولا حتى سينمائي كويتي معروف، للأسف مافي أحد أقدر أوصله بسهولة ولا أتصور يعرفون يوصلون للي أبيه...!!
كرت زيارة

يعني شلون أهون عن الفكرة خلاص أدفنها مع غيرها من الأفكار اللي ما حققتها؟!، لا طبعا قعدت أحوس وأحوس لغاية قدرت أوصل للرجل الحديدي، وبعثت له رسالة الكترونية واللي اخذت مني تقريبا ساعة أعدل فيها وأضبطها وأشرح فيها كل اللي ابيه، ومن بعدها قررت أنهي السهرة وأنام.


يتبع غدا...

عمااااااااااااار..يافساد..عمااااااااااااااار!!

جنسيتين..؟!