موقع الأمة و"الناس" المريضة!!
قبل ما نبدي استراحة الجمعة..ابي اقول اني متضامن وماخذ موقف بمجمع الوزارات وواقف ساعتين وعشر دقايق وخمس ثوان مو حداد طبعا "الله يحفظكم" ولكن تضامنا مع المسؤولين عن موقع الأمة دوت أورغ..الجماعة امس تعرضوا لغزو من هكرز لم يحدد إن كان أصولي الانتماء أم من الناس "الفاضية" اللي تحب تخترق من باب إثبات أنفسهم "المريضة" على قدرتهم في اختراق أي موقع!!
خطاكم الشر يا جماعه وصدقوني إني زعلان وايد، لكن بنفس الوقت ترا يحق لكم تفخرون إن مجرد "الغزو" عليكم وهذه مو الأولى طبعا، هو دليل على نجاح موقعكم وتأثيره وطبعا أعداء النجاح وايد واعداء حرية التعبير أكثر!!، وأهم شي لا تهبط عزيمتكم ولا تعتبرون هالشي دليل على تقصير وزير من الوزراء ترا مو ناقصين اللي فيهم يكفيهم!!
بعد ما سوينا الواجب نرد للإستراحه..
يوم الأحد بداية المشوار
بعد عودتنا من مصر اكتشفنا إن دفتر* سيارة المدام منتهي، وبالتالي صار علينا نجدد وندفع غرامة التأخير ورسوم المعاملة، في اليوم الأول رحت الفحص الفني بمنطقة الجابرية وكانت الساعة تقريبا 5 العصر "ابيكم تركزون بالوقت" وطبعا بعد فترة انتظار لغاية ما مشى طابور السيارات دخلت على الكشك "موظف قاعد داخل قفص من الكيربي" المهم ما كان يعطي ويه وكان لابس زي حتى للبيت ما يصلح وفوق كل هذا منفس "ليش مداوم ما ادري" المهم سألني بطريقة غير ذربة "شنو تبي" كان ودي أجاوبه ابي اثنين شاورما وواحد عصير برتقال طازج بس أخلاقي وذرابتي المعتادة خلتني أقوله "ابي افحص السيارة لو سمحت؟" طبعا شكله متوقع الإجابة ورد عليه باستعلاء "عندك اوراق البيمه؟!" طبعا ما كان عندي انا ياي استفسر لأني ما ادري من وين أبدأ في تجديد الدفتر؟
أشر لي بالمنديل..أقصد أشر لي بصبعه إن في مكتب للتأمين ورا أقدر أييب منه ورقة التأمين المطلوبة وقالي فوق بيعه "شوف انا دوامي يخلص 6 ونص لحق!!" تركته وشكرته على احترامه وضيافته وحسن استقباله وحفاوته عسى ربي يخليه ولا يرقيه مدير او زير!!، طبعا وصلت مكتب التأمين بسهولة، وهناك طلب مني الموظف مبلغ وقدره 19 دينار وكنت حاسب حسابي على 15 دينار يعني فرقت معاي 4 دنانير، قلت له عندك K-NET ؟، للأسف ما عنده ورفض حتى أعطيه كل اللي عندي وفوقهم بوسه وتظل الأوراق عنده على ما أوصل لأقرب بنك بالمنطقة.
خرجت من مكتب التأمين وكلي ثقة إني راح أسحب فلوس من البنك اللي ما يبعد عن الفحص الفني ولا حتى مكتب التأمين غير 5 دقايق، وكان عندي خيارين يا أروح البنك اللي يم إشارة مستشفى مبارك، او أروح البنك اللي في الجمعية والاثنين يقول انا أقرب!!
فضلت الجمعية ويا ريتني ما رحت هالطريج!!، وقفت بزحمة الشارع 10 دقايق وليش الزحمه ما ادري؟!، وعلى ما وصلت البنك وسحبت ورديت وقفت بالزحمة من يديد أخذ الطريج معاي 20 دقيقة!!، يعني لو نازل بوسط الشارع ومطفي السيارة كان احسن مليون مرة من كل هالسالفه!!، عموما رجعت لمكتب التأمين ودفعت له اللي يبي وأخذت أوراقي ورحت الفحص الفني ولا خلص الدوام!!
انا واقف في طابور المراجعين!!
الاثنين نهاية المشوار!!
تحرك الطابور بعد 10 دقايق!!
بعد 20 دقيقة دخلنا في طريق الفحص الفني
رحت نفس المكان بمنطقة الجابرية من الساعة 4 العصر انا هناك، ووقفت بالزحمة اللي بدأت تزداد وطابور السيارات واصل من داخل الفحص الفني ولغاية إشارة الجابرية!!، الصور اللي تشوفونها تقريبا التقطتها كل 10 ..15 دقيقة، وأخيرا وصلت للكشك ولقيت نفس الموظف الظاهر إنه نايم بهالمكان أو مو قادر يطلع من الكشك!!، عموما من غير ما يرد علي أخذ الأوراق وشخبط عليها وقالي "توكل.." رحت مكان الفحص ولقيت طابور لا بأس فيه، وأول ما وصل دوري وقفت السيارة وطفيتها عشان الفحص جان يقولي الموظف اللي أصلا ما ادري اذا كان قاعد يكلمني ولا قاعد يكلم "رفيجـ.." المهم طلب مني أخلي السيارة خارج المكان وأنزل أكمل أوراقي..انزين والفحص؟! ما فحصها تخيلو وبعد مراقبة للموظف ما كان يفحص أي سيارة وحسب المزاج سيارة شكلها مو عاجبته أو مو عاجبه اللي راكبها يفحصها والعكس صحيح!
هانت دام صرنا يم الطوفه يعني قربنا!!
وقفت بالدور عند شباك تخليص الفحص الفني، ومن أنهى الموظف معاملتي سألته بأدب "لوسمحت وين أروح الحين؟" ردي علي بإجابة فيها ريحة طنازة وفيها ريحة فلسفة سقراطية!! "روح وين ما تبي.." بصراحه ما حبيت أرد أسأله وفضلت أتبع حدسي، وتوجهت لمكتب خدمة المواطن، وبما إن مافي بمنطقتنا خدمة مواطن فلازم أروح الرميثية، وبما إني رايح الرميثية فهذا يعني إني راح أكون من ضمن السيارات اللي بتوقف بزحمة طريق الفحيحيل السريع!!، أخذ مني المشوار من الجابرية إلى الرميثية 10 دقايق، ووصلت وهناك وقفت بالدور عند الاستقبال اللي فعلا انا مو من وزير الداخلية أعطي الموظفة ترقية وأحط لها تمثال من البرونز في ساحة العلم، نظرا للأسلوب الراقي والابتسامة المريحة اللي تقابل فيه وترد فيه على كل مراجع، لكن الحلو ما يكمل مثل ما يقولون..بعد طول انتظار ووصولي لهذه الموظفة المثالية في كل شي صدمتني إن كمبيوتر المرور عندهم خارج الخدمة!! يعني وين أروح الساعة الحين 6 المغرب وللحين ما خلصت دفتر سيارة مو دبابة أو بارجة!!
بيني وبين بوابة الدخول بس 3 سيارات!!
وناسة باقي سيارة وادخل "كللولولولوش"
امام ممر الفحص
على اليمين كشك الفيلسوف!!
الزحمه من الرميثية لغاية المرقاب!!
أخيرا وصلت برج التحرير!!
مافي غير وين يا شطار؟.. عدل الحكومة مول هذا المكان اللي تعتبره الدولة مفتاح بوابة الحكومة الالكترونية والمكان اللي ينهي أغلب معاملات المراجعين ولكافة الوزارات، كل هالكلام الطيب انا واثق منه لأني جربته من قبل في هالمكان، لكن المشكلة إن من الرميثية ولغاية المرقاب أخذ من وقت للوصول 30 دقيقة والزحمة هي السبب!، وصلت برج التحرير ونزلت بعد ما وقفت سيارتي آخر الدنيا، دخلت المول وتوجهت لمحل الداخلية، اسمحوا لي ضيعت بين المارينا مول وبين الحكومة مول..مو محل مقر وزارة الداخلية في المكان، أخذت لي رقم انتظار وانتظرت دوري، حاولت أضيع وقت بقراءة الارشادات ومتابعة شاشة البلازما اللي وضحت لنا إرشادات السلامة في البحر والبر من غير صوت، وقريت من ضمن الاعلانات إن "ممنوع استقبال وتخليص معاملة من يرتدي الشورت أو البيجاما" طبيعي كانوا المسؤولين يبحثون عن حث المراجعين على الاتكيت، لكن المشكلة إن بعض المراجعين لابسين شورت سواء الشورت القصير أو "البرمودا" او اللي يسميه البعض شورت إسلامي!!، أما البيجاما فمقياسها يختلف وماراح اتكلم في هالنقطة لأني راح أطول فيها وما راح تفهمون مني شي!!
المهم قبل لا يقترب رقمي بـ 10 أرقام جلس بالقرب مني مراجع نايم ولابس دشداشة نوم "بيجاما" وراح في غفوة بعدين صحى وهو يتحلطم بصوت خافت وقرب مني وقال "" اووف اوف لهالدرجة وصلت هالديرة..صار في مكاين للواسطات؟!" بصراحه ما فهمت كلامه لكن سألته ليش شصاير؟ قالي "شنو اللي بايدك هذه مو توصية واسطة يعني تمشي معاملتك وكل واحد قاعد عنده.."
تركته وانا أضحك وانا مالي خلك الضحك، ووصلت للموظفة المتنقبة اللي ما ادري مستحية ترفع صوتها او انا ما قمت أسمع عدل، وعلى ما استوعبت طلباتها عرفت بالنهاية إنها تبي مني أروح للمكتب اللي يمها عشان يوقع المدير!!، وقفت عند المدير اللي مو موجود وكان مكانه موظف ما ادري ليش ماخذ في نفسه مقلب!، قاعد يمسك بالورقة و"يتمعن" فيها وكأنه قاعد يصحح اختبار فلسفة، بعدين شخبط بالاحمر وقال روح صور، شنو أصور ما أدري ووين أصور هم ما أدري!!، وخرت من المكان وسألت موظف قاعد ضايق خلقه، والمسكين قالي أروح من هالممر ثاني مكتب على اليمين أصور، انزين شنو أصور مافي احد راضي يعلمني؟! رحت مكان التصوير وقلت له وانا متضايق "اكسر الخاطر" صور؟ .. لا تسألوني انا ما ادري شنو بيصور لكن عطيته كل اللي عندي من الاوراق وقلت له صور "يكون طالع فيها" عطاني نسخ من كل الاوراق ولأنهم يبون يستغلون المراجع قيمة تصوير النسخة 100 فلس، يعني هذه الحكومة مول غالية عيل لو المارينا بجم النسخة بدينار!!
رجعت للموظفة وقلت لها تفضلي هذه الأوراق اللي طلبتوها، طبعا ما فهمت شي من كلامها "تساسر روحها" وبعد ما طلبت منها ترفع صوتها قالت "انا قاعد اقولك شنو هذيل ليش صورت كل هذيل؟!"، ليش شنو المطلوب أصوره؟..تدرون شنو يبون أصور؟ البطاقة المدنية!! يعني في أحد قالهم إني ساحر أو مفسر أحلام مثل صالح النهام، المفروض يحطون إعلان الأوراق المطلوبة لتخليص المعاملة، بدال الكاميرا الخفية "البايخه" اللي تصير للمراجعين وانا متأكد إني مو أول واحد تصير فيه السالفه وطبيعي الكل قال "ذيع يا فندم.."
المهم أنهيت المعاملة بنجاح أخيرا، وانا أستلم دفتر السيارة قالي الموظف عطني بطاقتك المدنية؟، عطيته جان يقول وبكل ثقة إنها مو "أصلية" شلون عرفت يا فطين، مسكت البطاقة وقلت له ألمسها وراح تعرف إنها أصلية، الحبيب انحرج وويهه صار يقط ألوان وقال بابتسامة غبية" ادري كنت اتغشمر معاك" صج فاضي يتغشمر إلا قول طلعت ما تعرف شي!!
عند سيارتي شفت الساعة ولا الساعة جم الساعة 8 ونص!!، شنو كل هذا عشان معاملة مرور، عيل لو مقدم مشروع يهم البلد مثل فندق على البحر ولا منطقة منتجع سياحي شكثر تاخذ المعاملة أكيد من أقل من 9 سنوات!!
*ليش نسمي دفتر السيارة بدفتر مع إنه ورقة وحده!!!
فوق البيعه..
أدري طولتها باستراحة الجمعة بس ميخالف من الحرة كتبت كل اللي صار، المهم جواز السفر يستغرق تجديده في إدارة الجنسية والجوازات ما يقارب 21 يوم من تاريخ تقديم طلب التجديد، يعني الواحد تتعطل مصالحه، ويظل حابس نفسه بالكويت وياجل أي موعد بالخارج عشان "الداخلية" تخلص الجواز وتجدده!!
ويقولون ليش نزرع فراولة ويطلح بطيخ!!
