"طالت وتشمخت" هذا افضل تعبير عن رفضي القاطع للي قاعد تسعى له وزارة الداخلية، اللي هاليومين الظاهر "مشتهية" تزيد من جراح محبي "دولة القانون" وانا منهم!! فالداخلية لا تفاجئني لكنها تصر على "تعكير مزاجي" وانا اتصفح الصحف وفكرتها "الخنفوشية" بايجاد طريق قانوني لمراقبة خدمة BBM؟!
"طبعا هذا الموضوع راح ياخذ صداه بين أنصار "الستر زين" وبين عيال "الماك شكن على اعتبار ان مراقبة البلاك بيري تعني كشف اسرار وفضايح الناس او بين وقف الرسايل اللي كان لأحد القبائل نصيب الاسد منها!!
لازم تفهم ياوزير الداخلية ان البلاك بيري ما تقدر ومستحيل تراقبه لأكثر من سبب، اهمم بالنسبة لي ان كوادر "العسس" اللي راح تعينهم لمراقبة البلاك بيري يبيلهم يجابلون البلاك بيري 24 ساعة من غير ما يغمضون، خبرك بمعدل كل ثانيتين يوصوص البلاك بيري وعادي جدا تكون بحركة مثل هذه منك ترد موضة البلاك بيري للصدارة مجددا!!
بعدين منو هالخبير الدستوري "الفذ"اللي ألهم وزارة الداخلية فكرة مقاومة رسائل البلاك بيري، وهو يعلم ان هناك اكثر من طريقة وطريقة تصل فيها الاشاعات والرسايل والفضايح، لا تنسى الانترنت من منتديات وغرف المحادثة والبريد الالكتروني والمدونات وسوالف جاي الضحى ومسجات بوراشد، والقائمة تطول؟!
وزير الداخلية "ياشيخ" من يومين نرفزني تحرك رجال "وزارتك" لما قاموا بتحسين شعور المغازلجية بحجة مقاومة هالسلوك المشين على شبابنا، وكدرني ان هالشي غير قانوني وطبعا ما اكتفت المباحث بفتح صالون من باب التجربة في "كبسة" كلية التربية الاساسية حتى وصلتم لكبسة جديدة على أبناء الجهراء؟!
سؤال ==
اذا صدتو مغازلجي "اقرع" شنو راح تقصون فيه؟!
عندي لك سؤالين ارجو ما تجاوب عليهم واشوف اجابتهم كفعل مو بس كلام؟!
اول سؤال..
لو شايب "ماعاش" مراهقته وراح وتحرش/غازل هل سيتم تحسينه على الصفر ام غسل شعره بديتول حتى نعرف لون قرعته؟!
لو شاف بالغلط شرطي من "شراطوتكم" الاشاوس بنت تتحرش في شاب كويتي محترم ما هي العقوبة السريعة اللي راح توفرها الداخلية؟!
الشي اللي حتى هذه اللحظة ماني فاهمه من وزارة الداخلية؟!
شنو سالفة لوحات السيارات اللي صارت موضة زوجتي تحن علي تبي تحط اللوحة اليدية "الطويلة" يعني معاليك ترضاها اتحمل اسبوع من الحنة، ترضاها اشوف لي واسطة علشان اركب لوحة سيارة يديدة لسيارة أم فطوم والسيارة ماصار لها 4 شهور ركبنا لها لوحات يديدة؟!
تذكرت مقطع مسرحية سيف العرب "لويش مو مغيرين لوحات السيارات؟ّ"
اخيرا دام هالموضوع صار يخص وزارة "معاليك" ابي اسألك عن سبب اهتمام أحد مدراء ادارات الوزارة، في كشفه بطريقة "عبيطة" اسماء كل الضباط والافراد والمخبرين اللي كانو وراء تنفيذ كمين "جمعها كمائن" لتجار المخدرات؟!
ادري معاليك ما راح تقرأ هالموضوع لكن يمكن واحد من "المخبرين" يوصلها وعلى طريجه ابيه يطمني على المحبوس المحامي محمد عبدالقادر الجاسم "سجين الرأي" وبالمرة اقولك اني سبق لي مدحك على موضوع تصديك للانتخابات الفرعية لكن شكلي راح اهون!!تنويه..
الموضوع السابق ما كان قصة حقيقية بل قصة قصيرة كتبتها ونشرتها مؤخرا في الفيس بوك، معظم التعليقات الواردة على بالها انا بطل/ضحية القصة :)
ملاحظة راح اكون اول من يتحرك لدعوة أنصار البلاك بيري وتأسيس اللجنة الشعبية الوطنية للدفاع عن البلاك بيري وراح نعتصم في ساحة الارادة في اعتصام "صامت" شرط راح تشوفون بالاعتصام "اللي خبري خبركم" وتابعه قفه يصرخون ويردحون !!!!!!
