ألبوم قديم!!

صبيان الحرامي!!

نائب بوسبرنغ!!

هذا النوع من النواب عنده مبدأ "يهز راسه" على كل شي كله موافق على شنو ما يدري المهم يظل يهز وهو محتفظ في منصبه!!

بعيد الشر عنكم من الهز!!

سامحونا!!

سامحينا يا وفاء العامر

سامحنا يا فهد الأحمد

سامحينا يا أسرار القبندي

سامحنا يا سيد هادي علوي

سامحنا يا مبارك النوت

سامحنا يا فيصل البحر

سامحنا يا عدنان الضامر

سامحينا يا حياة الفضلي

سامحنا يا هشام العبيدان

سامحينا يا غالية التركيت

سامحنا يا عامر فرج العنزي

سامحنا يا بدر العيدان

سامحونا يا شهداء وشهيدات الكويت الكويتيين منهم والبدون والعرب، فأنتم محفوظين بقلوب المخلصين من أبناء الكويت، محفورين بالذهب الخالص في تاريخ الكويت، هذا التاريخ الذي سجل في يوم الخميس 2 اغسطس 1990 أبشع مثال لغدر الأخ بأخيه.

سامحونا لأن هناك من يريد أن ينسى 2 اغسطس..سامحونا لأن هناك من يريد ان يلغي من ذاكرتنا وذاكرة أهاليكم كيف رحلتم، ولماذا رحلتم؟

سامحونا لأن هناك من يرى في دماءكم الطاهرة أزمة وعدت، سامحونا لأن هناك من يطالبنا بمحي الغزو بممحاة قذرة لأنها تذكرهم بفشلهم الذريع في عودة البلد كما كانت قبل الساعة الثانية فجرا من الصباح الاسود من ذلك اليوم المشؤوم!!

اعدكم لن أنساك ساقرأ على مسامع طلبتي في كل صباح مدرسي اسم أحدكم فهذا أقل ما يمكني فعله.

سامحينا يا كويت أم الأبطال يا أم الاحرار، فاليوم لم يعد هناك إلا قلة قليلة تعي الدرس بينما البقية لا يهمهم الدرس ولا الاختبار، لطالما باعوا ذاكرتهم الفارغة ولا يرغبون إلا بالعيش "فوق النخل"

لا نكره العراق ولا شعبها الذي ذاق المر قرونا، لكننا نكره الطواغيت ونكره من يمس شبرا من أرضنا الطاهرة.

لا نريد أغاني وطنية ولا مهرجانات بل نريد رفضا تاما لأي محاولة لمحي الذاكرة.

بيت الهلاقة (قصة قصيرة)

تحذير كل ما ورد من أسماء لشخصيات القصة لا تمت بالواقع شيء إنما جاءت من خيال الكاتب اللي عايش واقعه!!

الولد: يمه أقدر ألعب مع ولد بيت جيرانا كرة؟
الأم: أي جيران فيهم؟!
الولد: يمه جيرانا اللي يابو لنا هريس برمضان؟
الأم: لا ما تلعب معاهم هذيل هيلق!!
الولد: يمه شنو هيلق؟!
الأم : يمه ولدي حبيبي هذيل ما يلبسون عيالهم مثل ما انت واخوانك وخواتك تلبسون، ولا ياكلون مثل ما انت واخوانك تاكلون، وأصلا ما عندهم ألعاب مثل ألعابنا ولا أصلا يروحون مدارس مثل المدارس اللي تروحون لها؟
الولد: يعني يمه احنا كشخه وأهم لا؟
الأم: طبعا احنا كشخه وايد، يلا روح شوف cartoon network علا ما أقول لروز تسوي لي chicken nuggets ؟

بعد 8 سنوات أو يمكن 10 سنوات ويومين!! ما ثبت التاريخ!!

البنت : مامي مامي..؟
الأم : شنو تبين ريتاج؟ ما تشوفين انا لاهية في kitchen دادي يبي مجبوس chicken؟ ولا ترا he will be angry and will sleep with her wife ROSE!!
البنت : انا مالي شغل I NEED MY LAPTOP WHERE IS IT?!
الأم: وانا شدراني تلقين اخوج رامي ماخذه يلعب Games net؟
البنت : وانا how many time I told you don't use my stuff!!!!
الأم : خلاص مامي عقب ما تاخذين اللاب توب ابي منج خدمة please help your Mama in kitchen I need you?
البنت : مامي يعني لازم ازفج مثل كل مرة قايله لج انا ما ادخل المتبخ انا بروح chocolate bar مع صديقاتي مسوين surprise event حق سعودي my boy friend!!
الأم : انزين مامي لا تطولين عفيه ابوج راح يعصب لما يعرف انج رديتي متاخرة مثل ذاك اليوم يوم طلعتي مع سعودي الشاليه ورديتي الساعة 5 الفجر!!
البنت : مامي ريلج معقد وايد شنو يعني طالعه مع سعودي خو عادي انتو مو تقولون لازم تصير اجتماعية وعندج ربع وايد وعلاقات!!
الأم: خلاص خلاص انا كنت انصحج، ما علينا اذا تبين فلوس عندج بالدرج بس لا تاخذين وايد؟
البنت : what what what انا آخذ فلوسات معاي، I will take your credit card

تطلع البنت وما راح اقولكم شنو لابسه، اما الأم فتحوس بالمتبخ على قولة بنتها "المحترمة" تبي تشوف شلون تقدر تسوي عشا حق ريلها، اللي دز لها مسج وقال لها الليلة ابي مشخول بطاط مع حمسة جبود وقلوب لأن طلب المجبوس الدياي هون عنه، طبعا من الواضح ان العلاقة بين الزوجين تغيرت للأفضل!!

على فكرة نسيت اقولكم ابو هالبيت طاحت عليه الأم قبل جم سنه، قايلهم مسافر السويد يبي يتفق على شحنة خسب وأثاث خبرهم المعزب بس بس مان!! لكن طلع الحبيب قاعد بالملحق عند روز اللي مسويته "يادهينه ما تنكتين.." عاد تخيلو الجو كل طلبات السلطان مجابة تذكره بأيام أمه وأبوه أيام ما كان أبوه اذا بس رفع حاجبه اليمين، الأم تطير تييب بايله الجاي، واذا بس رفع صبع ريله الصغير (ريله اليمين) يعني تطمر الأم تييب البخور قبل لا يروح ديوانية بوجلال!! وطبعا Rose عرفت الجو اللي يبيه المعزب على عكس زوجته بنت الأصل والفصل اللي كان شرطها قبل لا تتزوج بيت حشم وخدم، طبعا ثاني يوم من العرس قال لها "عمري حبيبتي يا بعد يوفي يا حياتي يا بعد طوايفي يا قلبي ممكن ما عليج أمر وتكفين ابي قلاص ماي؟" طبعا ما أقولكم شنو سوت فيه بعدها!!!

اما في بيت جيرانهم الهلاقة..

الكل قاعد بالصالة الأبو والأم وبنتهم تهاني وولدهم الصغير عزوز، طبعا قاعدين يشوفون قناة فلاش حاطين بوخرشد، ومعهم أم أبوهم "جدتهم" وناطرين دخول ولدهم سلوم اللي ما يدري ان أهله مسوين لهم مفاجأة بمناسبة تخرجه من الجامعة، كان الجو أسري بنتهم سعاد بالمطبخ تسوي لهم كيكة الفرحة الكبيرة اما ابوهم فقاعد بآخر الصالة، يتلقى التبريكات على تخرج ولده وطبعا خطبة بنته الكبيرة اللي راح تتزوج ولد الحلال اللي اتصلت أمه وخطبت البنت اللي سمعوا عنها لإنها زينة البنات، تساعد أهلها وعمرهم ما سمعوا على بنتهم كلمة بالجامعة، خاصة أن ولدهم كان يوم من الأيام كان خاطب ريتاج بس عرف بسوالفهم خاصة إن مرة بيوم من أيام الخطبة كان قايلها ما تطلع إلا اذا اتصلت فيه واستأذنت، طبعا ما ردت عليه يومها ومضطر يسافر يخلص صفقة تجارية مع شركة كبيرة في دبي، تفاجئ الحبيب ان خطيبته مسافرة دبي من وراه وهناك قالها انتي طالق بالثلاثة!!

بس القصة ما خلصت ولد الجيران العود كان معزوم مع ربعه في مطعم بالمارينا مول، وهناك شافته ريتاج اللي عجبها وقررت تتحرش فيه، فقامت ودزت له بلوتوث بتلفونها Blackburry خبركم صارت هبة الصيف!! المهم ولد الجيران "طنشها" جان تقوم وتقول للغرسون يوصل للولد رسالة مكتوبة بكلينكس المطعم تقول فيها "ابيك تعال ناطرتك عند كشك حجز فيلكا"

طبعا البنت قامت سبقت الولد لمكان الوعد، اما اهو فما شاف الورقة ولا قراها قطها على الطاولة بالطفاية، وقعدو مكانه شلة عباسوه اللي مدلع نفسه وحاط nickname على سيارته وبالمسنجر "ساسو" المهم عباسو أخذ الورقة وراح لحق البنت، ومن يومها محد شاف ريتاج!!

ناس قالو الحوت اللي دخل المارينا خطف ريتاج وناس قالو إنها تزوجت عباسوه، وأبوها رفض هالزواج وتبرا من بنته وطلق أمها وتزوج على روز اللي طلعت تواعد سايق بيت خليل السماوي، وناس قالت إن ريتاج هاجرت إلى فيلكا وهناك قررت تبيع قحافي تلزق عليه شوارفسكي على الأجانب اللي يزورون الجزيرة، خبركم خذت هالخبرة من عملها في "لوياك"!!

وناس قالو ان طراد خطف ريتاج وراحو الديرة اللي خاطفه حسين الفضاله!!

وما تزال الحقيقة ضايعه!!

بدر بن غيث – قصة قصيرة 2009