منو يعرف ليش؟

مهزلة....؟!

بس كلام...؟!

احنا شعب يحب يتكلم ويتحلطم وما يعرف يعمل بصمت، كل شي نبي نتكلم فيه ونفهم بكل شي من تركيب ألعاب الأطفال لغاية الطاقة الذرية، وفي الديوانيات تلاقينا نتكلم في البداية عن مشكلة وطرح شبه راقي وجاد ويتحول ويتفرع الموضوع ونوصل لسعر كيلو "الميد" وليش ان فلان تزوج وهذا طلق وهذاك شايف نفسه ونعيش يومنا على كلام الجرايد، حتى شركات الاتصالات اتصور لو وزير الداخلية قرر يطبق اللي براسه ويراقبنا راح ينبط راس هالرقيب لأنه راح يدوخ ولا يعرف شسالفه هالشعب اللي يسولف 24 ساعة باليوم!!

العجيب الغريب ان الاجانب لما يسافرون سياحة أول شي يتخلصون منه التلفون، على عكسنا تلاقي اول شي نفكر فيه شحن التلفون واللاب توب وطبعا بعضنا يعتبر نفسه رئيس مجلس ادارات شركات عابرة للقارات والبورصة العالمية من غير اتصال او "مسج" تضيع!!

الوالدة الله يحفظها تتعامل مع التلفون وكأنه دوام قطاع خاص، تشغله الصبح لغاية 1 الظهر وبعدين من الساعة5 العصر لغاية 9 مساء، وماتتصل منه الا للضرورة اذا كانت خارج البيت اما داخل البيت فتقول ان تلفون البيت احسن.

تبون الصج حسبتها كل اسبوع اصرف 5 دنانير تعبئة هذا بالوضع المعتاد لكن مرات اصرف 8 دنانير، حسبوها بالشهر وحسبوها بالسنة؟!

تقريبا 400 دينار مصاريف اتصالات!! بالسنة يعني لو اوفرهم واسافر فيهم مو احسن..

قررت ما اتكلم وايد بالتلفون لأن بيئيا في شي اسمه تلوث سمعي..

شرايكم نخلي السوالف والهذرة ونشتغل ونعمل..

جم مرة ؟!

اليوم احتمال يصعد رئيس حكومتنا الرشيدة منصة الاستجواب للمرة الثانية وعلى التوالي تكون "سرية" مع ان هذه المرة الموضوع ما يستاهل أصلا السرية لكن الظاهر من يوم وطالع اي استجواب راح يكون سري!!

أم الهيمان وانقطاع التيار الكهربائي وأزمة تطبيق قوانين الاصلاح الرياضي، وغيرها من المشاكل اللي بعضها مخشوش مثل "ميكر" الجنجفة ما يطلع الا اذا صار الوقت المناسب علشان يعيش الشارع الكويتي يوم او اسبوع ما عنده غير القرقة بهالسالفة او تلك؟!

عموما عندي نصيحة ياليت احد "واصل" يوصلها نصيحة مواطن إلى رئيس الحكومة، ترا المرة اللي فاتت كانت كافية انك تعرف منو معاك ومنو ضدك هالمرة واضح تماما ان للي معاك من اعضاء المجلس يكفون انهم يسدون الطريج ويوقفون ببلاعيم اي استجواب سواء كان استجواب في محله او استجواب ما له معنى..

وعندي هم نصيحة للنائب اللي شاد حيله من قبل لا يفوز بكرسي المجلس، النائب خالد الطاحوس صحيح ان الاستجواب حق أصيل وأداة من ادواتك كعضو في مجلس الامة ونشكرك على استخدامك هذا الحق، لكن قبل لا تشد حيلك اكثر ما فكرت لو ثانية وحدة ان استجوابك اساسا "لا يودي ولا اييب" لأن الحكومة مجهزة الدوا قبل الفلعة وبعدين من دخلت المجلس حضرتك ما تدري ان ام الهيمان فيها تلوث، وماتدري ان هناك مشكلة بيئية مو فقط بأم الهيمان لكن في مناطق اخرى، ما تعتقد ان مشكلة البدون وتقاعس الحكومة عن متابعة تنفيذ مشاريع البنية التحتية وغيرها كان لازم تفتح "حلجك" وتورينا عضلاتك...

آخر موضوع..

من فترة وانا اعاني من التهاب في اذني وطلبت من مستوصف منطقتنا احالتي إلى المركز التخصصي، كان الألم يزيد يوم عن يوم لدرجة اني مااقدر اسمع من اذوني عدل..

المهم عطوني موعد بعد شهر، ولما تحلطمت تقولي الموظفة والدكتور بعد ليش تنسرع وتنطر روح مستشفى خاص مستشفى خاص اسرع..

وفعلا طبقت وصفتهم وقطيت فلوسي بالمستشفى وتعالجت بشكل مؤقت، اليوم رد العوار اتضح ان الالتهاب ما خف ولازم موعد ورديت نفس المستوصف هالمرةالطبيب قالي تحمل وانطر احولك المركز التخصصي ولما شرحت له اللي صار معاي قالي تحمل هالجم يوم لغاية موعدك الحكومي..

شرايكم انطر دوري بعد شهر واتحمل الألك ولا اروح مستشفى خاص؟

الكويتيين أبطال ولكن؟!

اشجب واستنكر وأندد وأرفض وامتعض واستغرب ما حدث مع ركاب "اسطول الحرية" زين جذيه خلاص طاب خاطركم اني قلت هالكلمات للي ما عاد لها لا طعم ولا ريحة ولا حتى لون!!

أكيد كإنسان ضد هالأسلوب اللي تعاملت فيه قوات الاحتلال الصهيوني مع قافلة السلام، لكن المفروض محد بالعالم يستغرب لأن هالشي متوقع من جيش مغتصب شعبه بأرضه وتاريخه من 60 سنة وأكثر!!

لو تبون رايي باللي صار كنت متوقع هالشي يصير وتوقعت سيناريو أكثر دراما و"أكشن" لكن اللي صار الحين راح يمنح اوردغان "العلماني" يكون بطل شباك التذاكر في الشرق الاوسط ويخلي كل اللي راحو من عيالنا وأولهم ولدنا "السيد د.وليد الطبطبائي" بحكم انه راح وتم اعتقاله بعرص البحر، ونقعد احنا عاد نستعرض بطولاتهم وجهادهم ونتناسى الموضوع الأساسي وهو "غزة".

راح يرجعون للكويت ويتم استقبالهم أحسن استقبال وهالشي من حقهم، وكل دولة عربية راح تستقبل عيالها بنفس الحفاوة، اما عن فكرة البحث عن طريقة أخرى لكسر الحصار وكيفية الاستفادة من تجربة الاسطول اللي ماحالفه الحظ فراح تترك لحين لانتهاء من ردح وفرح المبتهجين بعودة الأبطال.

هذا اول موضوع حبيت أدلي بدلوي فيه..

اما الموضوع الثاني..

لو سمحتوا هذا اقتباس مباشر من جزء لخبر بجريدة الجريدة بخصوص الانتهاء من وضع تعريف للباس المناسب..

" وأشار إلى أن اللجنة ناقشت مشروع برنامج بكالوريوس الصيدلة الإكلينيكية «Pharm D» بكلية الصيدلة بغرض تطوير مهنة الصيدلة بدولة الكويت، ووافقت عليه، إضافة إلى مناقشة اللجنة تفعيل البند الخامس من المادة التاسعة من لائحة النظام الجامعي الطلابي بجامعة الكويت والتي تنص على أن يلتزم الطالب والطالبة داخل الجامعة والمرافق الدراسية باللباس المناسب، وما انتهت إليه اللجنة من تحديد مفهوم اللباس المناسب من أنه اللباس الذي يتفق بحسب المألوف للشخص المعتاد مع طبيعة الحرم الجامعي، والقيم الإسلامية وأعراف البلاد، ووافقت اللجنة على التعميم على الطلاب بمنع ارتداء الشورت منعاً تاماً وعدم ارتداء اللباس الشفاف والملابس ذات الألوان الصارخة أو التي تحمل عبارات أو شعارات جدلية مخلة بالآداب العامة ولا تتفق مع طبيعة الحرم الجامعي، وبالنسبة للطالبات عدم ارتداء التنورة فوق الركبة، وبالنسبة للطلاب عدم لبس السلاسل والأقراط وما شابهها، وعلى ذوي الشأن اتخاذ الإجراء المناسب نحو التأكد من الالتزام بهذا التعميم."

أطالب بانسحاب كل الطلبة المحترمين واللي يؤمنون بان اللي اتخذته الجامعة طعن في أخلاقهم وطعن في تربية أهاليهم وانتقاص من حرياتهم..


آخر موضوع

باجر في مظلة العمل الكويتي راح يتم تكريم 4 شخصيات مميزة في العمل التطوعي ضمن احتفالية المظلة بمرور الذكرى الثالثة على تأسيس المظلة.

الاحتفالية تضم معرض تشكيلي وآخر للعمل التطوعي في تمام الساعة7 مساء في مقر المظلة الكائن بمنطقة الشهداء ق2 ش201 م71
في جامعة الكويت