31 أغسطس 2009

مسلسل القمندة (ح8)

موقع بيت عبدالله

www.kacch.org




صرخ بوعزوز ذيج الصرخة اللي خلت هاليئة العامة للثروة السمكية والزراعية تنفي خبر هروب اسد يوعان من حديقة الحيوان، وخله كل من في المستشفى يزهب تلفونه علشان يصور اي شي ممكن يصير ويكون بذلك حقق الانجاز، وام عزوز تاخذ ولدها وتدخله على ابوه اللي "رنجفه وطورقه" لغاية ما دشت الممرضة اللي عدت 1 2 3 واعلنت فوز بوعزوز بالضربة القاضية، عزوز يعدل هندامه وتسريحة شعره، وبوعزوز يرد يستنشق شوية من الكمام وام عزوز قاعدة تقرا مسج ياها عن حفل استقبال ام كمال بعد نجاح عملية زراعة خشم يديد بدال القديم!!

بوعزوز يأشر لولده "الدرو" وعزوز بكل روح رياضية يطمر على السرير زين ما كسر ضلوع ابوه، وبعد المشاورات السريةيطلع عزوز منصدم من اللي اسمعه، وقرر يقعد بغرفة الاستراحة اللي غالبا ما تكون حضانة صغيرة يقعدون اليهال يكسرون فيها الكراسي ويقطون الوصخ بالارض والخدم واولياء الامور مو فاضين لهم، وهناك قعد ولا كوثر ما غيرها بجمالها قاعدة تبجي مو عارفه شنو تسوي؟! وقام ابو الشهامة عزوز يسألها..

عزوز: لو سمحتي اختي ممكن اعرف شفيج الدنيا ما تسوى؟
كوثر: امي بغرفة العمليات والدكتور يقول ناقصهم دم والمستشفى مافيها نفس فصيلة امي!!
عزوز: سهلة نروح بنك الدم هناك عندهم انواع ونخمط لنا برميلين دم للوالدة ولا يهمج المهم لا تبجين ترا الناس هني ما ترحم واخاف يفكرون ويظنون شغلات ما تصح!! تدرين شلون كتبي لي فصيلة دم امج وانا الحين اشوف الموضوع..

بعد تردد كتبت كوثر على طرف صفحة مجلة تنتفت من كثرة اللي يقرونها، وطار عزوز بسيارته وحاول دخول الجابرية لكن محاولاته فاشلة، قررت يوقف سيارته عند مجمع البحر، ويعبر الشارع ركض، وهناك دخل وكل شي ماشي حسب الاصول لغاية ما صار اللي صار!!

عصابة تدخل البنك وتهدد الجميع بنسف البنك باللي فيه، وزعيم العصابة اللي متقلقص بدلاق امه الذهبي، يهدد بقتل الرهائن، وحط الرشاش بظهر عزوز وقاله ابيك تمشي جدامي وتروح للصندوق وتاخذ الفلوس بسرعة؟ وعزوز من سمع هالشي طاح بالارض يضحك اللي جعل معظم الناس الموجودة تشك انه مينون او فيه يني او حتى جنون بقر، زعيم العصابة يمسك عزوز من شعره ويقوله شفيك تضحك انت الظاهر مو متربي ما تعرف ان اللي يضحك من غير سبب قلة ادب!!

عزوز انقص ويهه بهالكلام وقاله بابتسامة صفرة، يا الطيب انت من صج داش البنك تبي فلوس؟ هذا بنك الدم مافيه فلوس انت الظاهر مضيع داش هالبنك وانت المفروض تدخل البنك للي بالشارع الثاني!! طبعا زعيم العصابة عصب وقال تصدق يا الغالي انا من دشيت هالمجال وانا مو مترقع والسبه اللي معاي امي الله يسامحها تقولي خل ولد خالتك فرج وولد الجيران خلف يشتغلون معاك وهذيل ما يعرفون يمينهم من شمالهم يكون متكل عليهم مالت علي!! انزين ما تدل البنك الثاني بالضبط وينه؟ وبعد ما شرح له المكان اقترح عزوز على زعيم العصابة هالاقتراح..

ليش ما يبلغ واحد فيهم الشرطة وياخذ جائزة المواطن الصالح ويتقاسمونها عقب ما يطلعون من السجن!! وفعلا اخذ برايه وقاله انك خوش واحد وولد حلال، وترك عزوز اللي طار مرة ثانية المستشفى عقب المسج اللي ياله ان الدكتور بالجامعة قرر باجر الاختبار..

شنو راح يصير بالجامعة وليش بوزعزوز يبي يطلق ام عزوز وهل ينجح فلاح في اقناع حيدر بالعودة للكويت!!

30 أغسطس 2009

علشانهم..بيت عبدالله



برعاية وزير الصحة د.هلال الساير

يوم الاربعاء الموافق 2 سبتمبر 2009 وفي تمام الساعة 9 مساء مجموعة من خيرة شباب الكويت بانتظاركم لافتتاح معرض "علشانهم"

فكرة "علشانهم" مبدعين في مجالات التصوير الفوتوغرافية والفنون التشكيلية والأدب اجتمعوا على دعم بيت عبدالله، اللي هو اتصار للجمعية الكويتية لرعاية الأطفال بالمستشفيات، وراح يكون نسبة 75% من بيع المعروضات لصالح بيت عبدالله.

ومبادرة يشكرون عليها راح يستضيف المعرض مقهى كريب كافيه بمجمع الراية.

حضوركم دعم لبيت عبدالله

28 أغسطس 2009

النائب الولعان ومسلسل القمندة!!






الحلـقــ السابعة ـــة

تعب هيثم بتلفونه بلاك بيري وراح ينبش بالمسجات اللي وصلت له من مشاري كانت اغلب المسجات السؤال عن الحال والنكت الحلوة وجم مرة يذكر مشاري صاحبه هيثم بآخر الاحداث اللي توصل هذا غير صور مشاري الله يرحمه بالمحاضرة لما تكون المحاضرة مليقة يقعد يصور روحه ويصور القاعة!! هيثم مو مصدق اللي صار مو متخيل انه صار مجرم وذبح صاحبه،المسألة معقدة شلون يطلع مشاري يواعد حبيبة هيثم ويكلمها معقولة، مع ان مشاري يدري ان هيثم وصديقته "وعد" متفقين على انهم عقب ما يتخرج هيثم من الجامعة "انطر يا حمار" راح يتقدم هيثم ويخطب وعد من عمها لأن ابو وعد مسجون بقضية ما تسوى "مهرب خمور" بس!!

-----------

عزوز وصل البيت وبدا يدخل البيت يتسحب مثل الحرامية عايش الدور مثل الافلام، وصار له ربع ساعة موقادر يطوف الصالة يصعد لأن الخدامة قاعدة بالصالة وبقنفة ابوه، وقاعد تبجي بصوت عالي وتنوح شلون راج بطل الفيلم الهندي "وادي الحب" طقوه بالرشاش من فوق الجبل وتركفس وقام يبي ينقذ حبيبته والدبابة داست ببطنه ومع هذا كسر الدبابة وراح طمر على زعيم العصابة وانفجر مصنع قديم وطار منها شظية طيحت البطل اللي الكتشب ساح منه "الدم" وتوه يبي يطلع المسدس اللي خاشه بريله قام زعيم العصابة وأطلق النار بمسدسه اللي من ايام الحرب العالمية الاولى، وجسد البطل كله متأثر بس اشوه صار عمي وقعد يدور على شي جان يلاقي سهم طايح وتذكر يوم كان صغير ابوه شلون يعمله يحذف السهم وهو مغمض وفعلا حذف السهم وحاش زعيم العصابة اللي طاح من الجبل واحترقت فيه السيارة!!
عزوز انسدح على بطنه وزحف لغاية ما صار عن الدرج، هناك طاحت عليه اخته الصغيرة اللي ماراحت معاهم المستشفى كانت شابكة بالانترنت، وقالت..

منيرة: عزوووووز شقاعد تسوي لايكون تبي تقلب حية!!
عزوز: انتي شكو مع راسج وخري خل اكمل مهمتي، وابيج تروحين الثلاجة تصبين حقي قلاص لبن مع ثلجتين وربع!!
منيرة: عزوز جم ايد عندك؟
عزوز: ثنتين ليش؟
منيرة: عزوز جم ريل عندك؟
عزوز: هم ثنتين شككتيني شصاير؟!
منيرة: عزوز جم عمرك؟
عزوز: 20 سنة وخمس ايام وساعتين وثلاث دقايق!!
منيرة: انا جم عمري؟
عزوز: ماادري بس ابوي واموي يابوجلنا من المستشفى عقب الغزو باربعة او خمسة سنين!!
منيرة: انزين وين المطبخ؟
عزوز: كاهو ورا المزهرية اللي كسرتها امي فوق راسي لما سقطت بالتربية الاسلامية!!
منيرة: خوش ثبت ايدك الثنتين بالارض وارفع نفسك وبعدين ابيك تمشي على ريولك الثنتين بعدين تمشي وتلف ورا المزهرية اللي تعرفها وتدخل المطبخ وتبطل الثلاجة وتصب حق روحك لبن مع ثلجتين وربع وتييب لي معاك قهوة اسبرسو اللي شريتها امس من ستاربكس!! انا اختك بمقام امك واحترام الكبير واجب مو عدل؟
عزوز: ايي صح خلاص انا اروح اييب لج اللي تبينه حاضر يمه!!!!

منيرة صعدت فوق اما عزوز انبهر من ذكاء اختهوقدرتها على الاقناع وفكر بينه وبين نفسه يخليها معاه مفتاحه الانتخابي في حال نزل انتخابات الجامعة، لأن القائمة اللي اهو فيها صار لهم سنين مو عارف يقنعون الطلبة انهم الوحيدين الصح وباجي القوائم غلط، والمشكلة ان القائمة اللي عزوز فيها ما يدري هل كيف ينجحون وهم داخل القائمة كله مشاكل وحسد ولوبيات تاكل في بعضها بعض!!

وعقب ما ياب طلبات الكونتيسه منيرة راح غرفة ابوه وشال صورة يده اللي وراها التجورين وفتح التجوري واخذ اللي وصى عليه ابوه ورد المستشفى، وهو مو مصدق شلون اخته منيرة تشبك من غير واير!!ةمن غير كرت انترنت مثل ما اهو يسوي!!! ورجع المستشفى وهناك عند غرفة الانتظار شاف كوثر اللي من شافته قالت حق اختها "كاهو وصل"

قامت كوثر وبخجل وبثقل قل ما نجد نفسه هالايام!! وعطت عزوز كبوسه اللي ماني قايل ريحته شلون!! وقالت له "تفضل ومشكور"..

عزوز ساح بمكانه وجسمه عرق ولسانه طح بره موقادر يبلع ريجه وغص، لكن طراق على افاه من امه خلته يستوعب الوضع، وتحرك باتجاه ابوه بالغرفة العمومي وهناك سمعو اهل الفروانية وجليب الشيوخ صرخة عااااااااااااااااالية من الغرفة..

لكن ليش وشسالفه بالحلقة القادمة اقولكم!!

27 أغسطس 2009

القمندة (الحلقة 6)



استقر الامر ان يتم نقل ام كوثر إلى المستشفى وهناك صارت عفسه مو طبيعية يقولون ان نائب ماسك له "بوم" ناوي يبط راس مسؤول بالمستشفى ليش مغير لون طوفة ممر الباطنية وما قاله، وطبعا ام عزوز وعزوز وشريفة بنتهم يحاتون ابوهم اللي مر فوق راسه خمسين طبيب ودرزن وربع سسترات ومحد فيهم عبره، ابوعزوز نادى ولده عزوز وقاله..

بوعزوز: اسمع يا الهيس الاربد ابي اقولك وصيتي لأني مو ضامن شنو راح يصير فيني؟!
عزوز: ها يبا عندك ورث خاشه وتبيني اطلع من الجامعة واشتري حقي هامر فسفوري عليه ترتر وشوارفسكي!! واكتب عليه دام الكتكات غالي الباميه ترخص لك..
بوعزوز: تبي تورثني بالحيا يا الحمار يا ولد الحمار!! انا اوريك تعال بس لا تسمعك امك؟؟ امسك هذا مفتاح التجوري ابيك تروح ومابي احد يشوفك تطلع الجيس الاحمر مو الجيس الاخضر وتيي المستشفى بسرعة!!
عزوز: يبا احنا عندنا تجوري وليش انا اخر من يعلم على الاقل جان سويت نفس هالمسلسلات اسوي نفسي ما عرف شي وابوق منه جم دينار وابلش الخدامه!! بعدين يبا خبري فيك حافي منتف من وين ل انا جم مرة مسلفك تترس بانزين حق سيارتك!
بوعزوز: انت الظاهر تبي احد يبط راسك بطفاية الحريجه ما عليه انا غلطان المفروض احذفك بالشارع..المهم عن الربربه بسرعة لا تطول وشوف ابيك تروح الديوانية وتخش ريموت الكنترول علشان الطباخ ما يبسط ويشوف تلفزيون مع ربعه!!

عزوز طلع من المستشفى وهو نازل اليلم المكسر شاف ابوكوثر معتفس ووراه المسعفين شايلين ام كوثر وكوثر ام عيون فتانة وراهم، عزوز انثول بجمال كوثر مو قادر يتحرك مو قادر يتنفس مو قادر ينطق بكلمة!! وعقب ما طافت كوثر وشقحه اختها ودخلت المستشفى قرر عزوز يلحقهم ويشوف البنت الصاااااروخ!! عزوز وراهم من الحوادث إلى وحدة الاشعة اللي الناس واقفين دور من يومين، ويقولون ان موظف الاشعة حالف ما يسوي اشعة حق احد الا لما تسامحه زوجته لأن يقولون طاحت عليه وهو ماسك ايد وحدة اغلب الظن انها عمته!!

عزوز يرز ويهه ويقول حق ابو كوثر انه يقدر يخلي ام كوثر تدخل قبل الناس، طبعا بوكوثر ما صدق خبر وقاله تكفه نخيتك!! ودش عزوز وبعد 5 دقايق يطلع الموظف ويستقبل حالة ام كوثر قبل الكل، كبر عزوز بعين كوثر اللي ابتسمت من ورا البرقع! عزوز حس انه تبتسم!! وفعلا سوو الاشعة واتضح ان سماعة البلوتوث متعلقة بعامودها الفقري من ايام ما سوت عملية الديسك في المستشفى وتوها السماعة تطيح!!

طبعا عزوز تذكر كلام ابوها وهد كل شي وطاح منه كبوسه يعني مثل طريقة السندريلا بس الفرق تعرفونه شنو!! حولت كوثر تركض وراه لكن تذكرت انها صابغة اظافر ريولها وماتبي الصبغ يحت!

هيثم قاعد بالقهوة مع الربع لكن باله مو معاه يفكر بمشاري اللي كل ما يحلم يطلع له يقوله ليش ذبحتني انا صاحبك!! وفي حمامة سوده تطير بالحلم، طبعا اتصل هيثم باحد مشايخ تفسير الاحلام وكل واحد فسر الحلم على كيفه، واحد قال "شوف صاحبك راح يعيش اكثر منك والحمامة السوده يعني انه راح يصير مشهور يوما ما" وشيخ ثاني يقول ان الحلم هذا يعني لازم يشتري درزنين حمام اسود من ولد عم الشيخ بسوق الحمام ويشويهم، وماراح اقولكم شنو قاله الشيخ صالح النهام لهيثم؟!

واثناء ما هيثم لاهي وسرحان قطع حلمه عاطف راعي الشيشة اللي قاله عمي هيثم في واحد عنده سيارة كامري عطاني هالورقة..

بيني وبينكم للحين ما ألفت باجي الحلقة إلى هنا كافي لليوم!!