المهم يوصل صاحبنا...؟!

طارق العلي..حسافة عليك؟!

اتحمل مشهد غرق مبدع في وحل "الغرور" أو حتى ضياعه في "غابة" فقدان الثقة بالنفس، لكن ما راح أتحمل إن فنان بحجم طارق العلي يستمر بالطريج اللي يمشي فيه، صحيح ماني خريج المعهد العالي للفنون المسرحية ولا اعتبر نفسي حتى متابع للمسرح، لكن على الاقل مشاهد تابع معظم مشوار الفنان طارق العلي.

طارق العلي اللي انطلق من مسرح الشباب ومن المعهد العالي للفنون المسرحية وأجاد لعب عدة ادوار في اعمال تلفزيونية ومسرحية، ووقف أمام عملاقة المسرح والفن بالكويت استمثر موهبته كفنان يجيد التمثيل والغناء وراح يحفر اسمه كفنان كوميدي، وتحول لنجم للشباك بعد ما كان "كومبارس" بارز في مسرحية سيف العرب، مثل ما كان فنان موهوب في مسرحية "هالو بانكوك".

طارق العلي اليوم ما هو طارق العلي اللي عرفناه في عدة اعمال مميزة اجاد فيها دور الشاب المراهق المتهور وأجاد فيها تقليد العديد من الشخصيات وبطريقة تخليك ما تفرق بين الأصل و"التقليد"..كان ممثل يفرض نفسه بالعمل بفنه مو فقط لأنه طارق العلي..

اليوم ما عاد طارق العلي هو طارق العلي اللي يعرفه جمهوره وما اتصور في ناقد مسرحي ومتتبع لمشوار طارق العلي يقبل لو مجرد التفكير والتخيل ان هذا المستوى اللي يقدمه طارق العلي على خشبة المسرح تحديدا يسمى بفن عهدناه من طارق العلي.

اقدر ألخص لكم اللي قاعد يسويه طارق العلي في مسرحياته بالتالي..

طارق "عصر" كل المشاهد اللي أداها في برنامج مسرحيات 2000 وراح يكبرها و"يمغطها" علشان تتحول إلى مسرحيات يكون فيها النجم، وللاسف ما كان يسمع طارق الناس اللي تحب فنه لما كانوا ينصحونه يوفق من خروجه الزايد عن اللزوم من نصوص الأعمال اللي يقدمها، ويفتك من عقدة الكومبارس اللي صار بطل ولازم يطلع حرته ببقية الممثلين وفي جمهور أول سطرة!!

طارق حتى لو كنت تعتقد إن اللي تقدمه مسرح مو تجاري، فإسمح لي أقولك تراك غلطان، لأن الجمهور اللي يحبك ما قام يشوف لك اعمال يديدة ويفضل يشتري من البسطة جم مسرحية من المسرحيات اللي كنت وفيها ويشوف طارق العلي وفنه، اليوم يا طارق ما عندك غير إنك تمثل دور شايب من غير ضروس او حتى رب أسرة بنفس "الكركتر" حتى بنفس الملابس..البالطو الازرق!! او تلبس ملابس "الشخصية العراقية" وتفصل على الجمهور بشوية اغاني مستفيد من صوتك الحلو، وتضيع تقريبا 5 دقايق ويمكن اكثر من عمر المسرحية بوصلة غنائية ما تخدم النص..؟!

طارق اسال الناس اللي تحبك وتحب فنك، ليش وخروا عنك الممثلين حسن البلام وعبدالناصر درويش، واسماعيل سرور وشعبولا وغيرهم، وراح يوخرون منك الشباب اللي تعتقد إنك قاعد تمنحهم الفرصة إنهم يطلعون معك، على فكرة يا طارق ترا جزء كبير من جمهور هالأيام "زهقان نفسه" وفقط يبي يدفع لو 100 دينار بس علشان يدخل بالزحمه ويقدر يضحك من غير محد يقوله ليش تضحك وعلى شنو؟

طارق مو انا اللي يعلمك الصح من الغلط ولا أفكر يوم ألعب دور المرشد ولا حتى الناقد المسرحي، طارق اللي اعرفه إن العمل المسرحي يحتاج ديكور يتناسب مع العمل تقدر تقولي شنو الفايده من استعراض ديكور صالة البيت "بودورين" وكانك تسوق حق مهندس ديكور مو لاقي أحد يعطيه ويه؟! طارق ارجع لآخر 5 مسرحيات قدمتها وشوف شكثر انت خذيت وقت علشان تنفرد بجمهور الصالة علشان تتحول من ممثل مسرح إلى مقدم عرض كوميدي "غصب يبي يضحك الجمهور" صرت تنسى نفسك وتتكلم عن تفاصيل هامشية وتستخدم فيها اوصاف ومفردات ما تليق بفنان اكاديمي يعرف ان المسرح أبوالفنون مو رصيف خمارة!!

على فكرة طارق العلي وحسن البلام ومعاكم داوود حسين وحتى عبدالناصر درويش صرتو تايهين بعد ما كان الجميع يتوقع منكم متجمعين أو متفرقين تكونون صف يديد يسد الفراغ اللي تركوه عمالقة المسرح الراقي، اللي منح المجتمع فرصة للتفكير في مشاكله المختلفة، طارق استهلكت وايد حوار"الجهراوي" واستهلك اكثر الطنازة على زملائك وأعطيك مثال شفته وياليتني ما شفته "تركض بالمسرح وتطيح هيا شعيبي بالمسرح" وفوق هذا تمسك فرحان العلي وانت عارف يا طارقإن لا فرحان ولا أي احد على خشبة المسرح يقدر يرد عليك الحوار او الحركة لأنك باختصار مو نجم في المسرح؟ لأنك باختصار صاحب المسرحية وفلوسهم عندك!!

اعتبر كلامي "حرة فيني" على اللي اشوفه منك يا طارق، لأن فنان مثلك المفروض يكون الحين "أثقل" وأكثر "دقة" في اختياره لكل حركة وتصرف على خشبة المسرح، وللاسف ان حتى اعمالك التلفزيونية صارت من غير طعم، وما ودي إنك "تخورها" ويكفي الصورة الحلوة عن الفنان طارق العلي اللي نعرفه.

iron man في الكويت.....؟!

موعدكم بشهر رمضان الكريم..مع المسلسل الكاريكاتيري

IRON MAN - kuwait trip

تأليف وإخراج - بدر بن غيث





كل اللي اقدر اقولكم عنه انه مسلسل ما راح ينعرض إلا على مدونة منع في الكويت..

بس تخيلو iron man في Kuwait

شنو ممكن يصير؟!

الحقيقة تعور....!!

الدوري الكويتي أحسن دوري بالعالم!!

بققت عيوني وبينت كل ضروسي والسبه الخبر المضحك الغريب العجيب اللي قريته على جريدة الآن الالكترونية، والخبر عن تصنيف الاتحاد الدولي لكرة القدم، واللي أعلن عن تصنيف أفضل بطولات الدوري في دول العالم.

تخيلوا الماكينة الإعلامية للدوري الاماراتي وللدوري القطري وللدوري السعودي، فشلت وعجزت عن منافسة الدوري الكويتي واللي يعتمد على القناة الثالثة بتلفزيون الكويت ونقل تلفزيون الوطن لبعض المباريات والاذاعة الكويتية وبعض الاخبار في صفحاتنا الرياضية بجرايدنا المحلية!!

المستوى عند الدوري الاماراتي والقطري والمتابعة الجماهيرية والتعاون الواضح بين القطاع الخاص والحكومي، خلقت عند الاخوة الخليجين الأمل للتنافس القاري والدولي، على سبيل المثال، منتخب الامارات فاز بكأس الخليج واستضاف بطولة الاندية للقارات واستضاف بطولة كأس العالم للشباب وغيرها من المباريات الدولية.

الكرة القطرية تمكنت من التفوق والفوز بكأس الخليج مرتين هذا بخلاف ذهبية لعبة كرة القدم في دورة الالعاب الاسيوية "آسياد الدوحة2006" وطبعا حاليا القطريين يستعدون واتوقع انهم مستعدين و"قدها" يستضيفون كأس العالم 2022.

الكرة السعودية ما غابت عن المشاركةعن كأس العالم الا في النسخة الاخيرة 2010، ووصلت إلى نهائي كأس أمم آسيا من عام 1984 حتى النسخة الاخيرة، وما بين تفوز فيه وما بين تطلع الوصيف، هذا غير انديتها اللي فازت ببطولات الخليج للاندية وبطولة دوري أبطال آسيا، ناهيكم عن المحترفين بالدوري والدعم اللا محدود.

طيب نرجع حق طمباخيتنا المسكينة...أول شي النشاط شبه معطل ومهدد بالايقاف بأي وقت، واخر انجاز للكرة الكويتية هو الفوز بميدالية دورة الالعاب لدول غرب آسيا 2001، وفرقنا الرياضية ما حققت اي انجاز يذكر سوى فوز نادي الكويت ببطولة كأس الاتحاد الآسيوي اللي يعتبر بطولة هواة آسيا!!

على المستوى الخليجي آخر بطولة فاز فيها المنتخب 1998، وما عرفنا شلون نوصل لنهائيات كأس أمم آسيا الا "بطلعة الروح" طبعا على مستوى تصفيات كأس العالم كان حدنا نوصل للدور النهائي وهذا خبري فيه عام 1998!!

الا يمكن واحتمال ضعيف يكون الاتحاد الدولي لكرة القدم يمكن متابع لدورة الروضان والشايع وجم دورة رمضانية واعتبرهم كرة قدم حقيقية تلعب بالكويت؟!

ولا معقولة الدوري الكويتي الاول خليجيا وال24 عالميا والثالث عربيا؟!

يعني على فرض ان احنا الافضل "ودي اصدق بس قوية؟!" هل انعكس هذا المركز على مستوى الكرة الكويتية وتمت ترجمه لانجازات؟! ووين هذه الانجازات والشيخ طلال الفهد وربعه من صوب والنائب مرزوق الغانم من صوب "حاطين دوبهم من دوب بعض...."





بالمناسبة ما هو آخر تصنيف دولي لمنتخب الكويت لكرة القدم؟

102

او

100

او

70

او

92
















الاجابة الصحيحة هي

92

وعلى فكرة تصنيفنا الاسيوي هو 12..