وصلت ولا بعد..؟!

ابتلشنا بالعقد مرة ثانية..!!

كتبت هذا الموضوع قبل سنة تقريبا

حاولت اكتب واحتفل مثل غيري لكن في النهاية قلت مافي غير هالموضوع اللي كتبته يصلح لمثل هذا اليوم!!

ابتلشنا بالعقد؟!

اضغط على العنوان اللي فوق وشوف هالموضوع!!

شفيهم الناس....؟!

ماعنده سالفه..؟!

هلا فومات !!

شنو باجي ماصار؟!

الرجل كائن رومانسي!!

كسر خاطري؟!

ماعندي سالفه!!

من اسبوعين تقريبا والمدام وكل من يتابع اللي ارسمه يقول ويسأل...بدر ما قمت ترسم سياسي شفيك؟!

شفيك حاط حطه على الحريم بالفيس بوك وبالرسومات كأنك هونت عن السياسة وشفت إنها "عوار راس" و"دندرة" على الفاضي..!!

بصراحةواحد ما عرفنالكم..تقولون انت مركز على السياسة والناس ملت منها، واذا رسمت شغلات اجتماعية قلتو الظاهر زهق من السياسة وحاط على الحريم!! يا جماعة الخير لما الواحد يقعد مع الورق والاقلام ويقلب أفكاره ويستعين بأخبار الصحف، ويسمع سوالف الناس ويقرا المدونات وبعض الكتب "على فكرة هاليومين مطيح بكتاب أسرار ممنوعة" هذا غير التلفزيون ومافيه من مسلسلات اكثرها نكد ومشاكل حتى المجمعات اللي احاول اكون فيها ضيف شرف خفيف ظريف مو ثقيل مثل بعض الناس اللي يظن ان المجمع له بروحه ما بقى احد بفريجهم ما يابه معاه، يستحل سطرين من كراسي الكوفي شوب، هذا غير لما يتمشون ما يعرفون يسولفون ويتفاهمون على اي مطعم ياكلون منه او بعد اسبوع ويومين وين بيروحون هالناس ما تسولف الا عند الاصنصير او عند السلم الكهربائي!!

طبعا ما اقولكم عن كتيبة الخدم والحشم اللي معاهم اللي تركض ورا حمودي النزغة اللي مو راضي ياكل، واللي تسحب دانوه مو راضية تطلع من محل الألعاب واللي تجر عزوز منسدح ومعصب ومطنقر ومنسدح بالارض والناس تطالعه!! هذا غير الامهات وبناتهم اللي فجاة ومن غير مقدمات تدخل المحل بسرعة جنونية تخليك تطق بريك وتحذف اللي يمك او حتى تدوس دشاديش وعبايات الحريم!!

لحظة لحظة كأني تحلطمت وايد وابتعدت عن لب الموضوع!! المهم كرسام هاوي جدا اعترف لكم بسر لأول مرة أقوله، مرات اقعد اجابل الورق والاقلام من غير نتيجة حتى اني هديت الرسم ورحت اكتب شي، هالشي راح يكون مفاجاة راح تعرفونها قريبا بس خل تخلص..

رسام الكاريكاتير ترا انسان عادي يتأثر وممكن يأثر ما هو شخص مثالي ولا يدعي انه بيصلح الكون، الوالدة الله يخليها كل ما اشوفها تقولي "يا ولدي انت ما راح تصلح الكون دربالك انت الحين مسؤول عن بيت وزوجة وبنت" تحسسني ان الرسم الكاريكاتيري معركة وهوشة وكل ما اوريها شي يديد، تقولي ايي انت الظاهر تبي تأذيني وتأذي عايلتك!!

بصراحة من داخلي اضحك..مرات اقول ياريت اكون في معركة على الاقل لي شرف المحاولة احارب، احنا يا جماعة لازم نفكر الحياة مسرح ولا ساحة معركة ولا حديقة تستحق التعب فيها وزرعها لغيرنا ولا جسر صعب عبوره ولا محطة ننطر فيها قطار الدنيا!!

عن اذنكم ابي اكتشف الفروق السبعة بين فيلم "ما تيجي نرقص" وبين فيلم "shall we dance" ابي اعرف شلون ومتى راح نعترف ان الابداع في السينما المصرية قائم على التقليد، ما انكر في افلام مصرية مميزة قديمة ويديدة لكن في افلام تقليد لأفلام اجنبية وجان زين تقليد درجة أولى إلا بطريقة تحسسك إنك لو تشوف مسلسل في قناة السودان احسن لأنه مسلسل فكرته واخراجه وكل مافيه من امكانيات سودانية يا زووول!!

ما عليه كان لازم اقول هالكلام لأن ما ترضونها اخش عليكم شي !!

نصيحة لا تسهرون وايد باجي يومين ونرد نداوم..

غبي ولا عبيط يسوي نفسه غبي؟!

مخلوقات غريبة يا أنفال!!

انتهيت قبل اسبوع تقريبا من قراءة كتاب الزميلة الشاعرة والصحافية الكويتية أنفال القلاف "مخلوقات غريبة" فأنفال قدمت سلسلة مقالات شرحت فيها علة بنات جيلها وجريهن وراء عالم الموضة وانسلاخهم غير المبرر من ما عرف عن بنات الخليج بالتزامهن بالزي الأكثر تناسبا مع الدين الإسلامي.

الكتاب الذي قدمها الكاتب انطوان بارا، سطر فيه مقدمة إنشائية أراها مبالغ فيها، معتبرا الكتاب والمؤلفة نبؤة بعودة الادب الساخر، على العموم هو رأي لا بد من احترامه.

فيما يخص الكتاب

قدمت الكاتبة كما هائلا من السخرية على ما ترتديه الفتيات وما يقمن به من مبالغة في استعراض ما يملكن من مظاهر الجمال ولفت الأنظار، حتى أنها سبحت كثيرا في نقطة "القواطي" ومعظم المقالات التي تناولت ذات الجانب كررت ما بدأته أنفال في البداية.

أنفال حسبما قرأت سهت وقدمت نفسها نموذجا مثاليا على حساب كل الأمثلة السيئة التي طرحتها في الكتاب، كما أنها كادت أن تتفوق على كل الواعظين حينما ادعت مسبقا أنها ليست بواعظة أو خطيبة وإن أحسنت ذلك لكنها تراجعت عن ذلك في عدة فقرات وراحت تقدم مواعظ وأمثلة عديدة.

أنفال يحسب لها شجاعتها في انتقاد بنات جيلها ويحسب لها اهتمامها في صياغة تيار جديد من فن الكتابة لمن سيقدم على الكتابة، فالكتابة الساخرة فن لم نعتاد عليه من جيل الكتاب الشباب الذين ملؤوا الساحة مؤخرا، نصيحتي بأن تستمر وأن توظف أبيات الشعر أكثر في تعرية الظواهر وأي مخلوقات ستظهر على الأرض مجدد.

كتاب مسلي فهو تجربة تستحق التشجيع.

أكرر لست سوى قارئ بسيط ولا أدعي بأني ناقد

تحياتي

سوء تفاهم بس!!

ادري انك متضايق توك متزاعل مع المدما، ادري الموضوع يبط الجبد ادري ان انت سويت اللي عليك لكن اللي صار صار، ما عليه اخذ لك راحة وقلل من زحمة افكارك عن اللي صار ابعد عن خيالك كل الصور اللي قاعد تركبها على زوجتك، ترا اهي تحبك ادري بتقولي انها غلطانه وهي السبب انا مصدقك صدقني بس ما ينفع تعصب وتحمق وتسكر الباب بقوة وتصرخ وتسوق سرعة و"تبتون" بين السيارات، اقولك شي كل هذا ما يفيدك ولا حتى انك تخلص باكيت زقاير كامل علشان توهم نفسك انك نسيت اللي صار مساع في البيت، تبي نصيحتي دزها مسج من كلمة وحدة ، بتقولي مو كفو اقولك مو علشانها المسج علشان تهزها تثبت لها انك ريال مو مصنوع من خشب سريع الاشتعال ولا انك علبة بيبسي مكتوب عليها "قابل للضغط" انا اقولك

اكتب لها مسج قول فيه ......
........................................
........................................
........................................
أحبج


شفت هالكلمة مع انها عادية تقولها مرات بالغلط او كنت متعود تقولها بأول شهر شهرين زواج او حتى قبل لا تبتلش بالدنيا اللي انت فيها، صدقني هالكلمة مو دليل ضعف ولا دليل "تضييع الصقله" لا لا هذه مفتاح تفتح فيه ولاعة بوسط بانزين الحب اللي بينكم انت تبيه طول عمره مولع، الحب مو سهل ينطفي بين اثنين خصوصا اللي متزوجين على حب او صار بينهم عشرة والمودة....

حتى انتي بعد اسمحي لي اعاتبج لا تتوقعين من ريال عايش انه يتحمل كل شي وتبينه طول الوقت على مزاجج، ترا الكلمة الحلوة تأثر تهدم جدار برلين بثوان، ادري انه غبي ما يسمعج يبي كل شي على مزاجه مو عاجبه العجب ادري يتنرفز بسرعة، صاير جبريت حتى الياهل مو مثله يتصرف، انتي ما تشتغلين عنده ولا خدامته، ولا حتى جارية من جواريه الحسناوات، انتي باختصار أرق انسان ممكن يرجع لها صندوق الدنيا اللي من غيره ما يعتبر نفسه عايش يومه، تذكري انج انتي الوحيدة اللي تعرفين اللي يحبه ويكرهه انتي اكثر الناس تعرفين الاغنية اللي تخليه يندمج ويصير رومانسي، ميخالف ادري انه مرات يتنح ما يقول "احبج" صدقيني اهو ما تعود ولا كان يسمع ابوه يقولها حق امه، كانت هالكلمة من الكلمات "العيب" اللي لازم يسكر اذونه لما كانت تنقال في افلام فاتن حمامة وليلى مراد والمغبرين!!

تبين نصيحتي انتي اعتبري اللي صار مساع مشهد بايخ غلط المخرج انه حاطه بالمسلسل اللي تتابعينه، تقدرين تشيلينه من ذكرياتج وبدليه بمشهد يوم كان مساك ايدج وانتو طالعين السينما او قاعدين تضحكون وانتو تاكلون صمون من شارع المطاعم ايام الملجة، او اي مشهد رومانسي ما ينسي!!

دزي له رسالة ترا اهو على باله انج معصبة وتبجين ومقهورة اثبتي له انج قوية بالحب اللي تشيلينه له، تكتبين له مسج تقولين فيه باختصار..............
.......................................................
...................................................
ترا احبك..

وسالمتج وسالمتك..

الأم المثالية...تستاهل!!

خوش هدية..!!

وين نروح...؟!

يظل الباب مفتوحا..

أن تغادر بيتك الذي ولدت فيه وترعرعت فيه


أن تضع خلف ظهرك ذكريات الطفولة أين اختبأت حينما كانت جدتك تسعى لضربك

أن تجبر على مغادرة غرفتك التي لطالما كانت مسرحا خاصا عشت فيه أحلام الطفولة، مرة تعتبر نفسك بطلا خارقا تقفز من السرير ومرة أخرى تختبأ تحت السرير حاملا بندقيتك البلاستيكية ومرة أخرى تقف مبتسما تحاول أن تكون بطول وحجم اللاعب المفضل لديك الذي لصقت صوره على حائط غرفتك


أن تخضع لأوامر والدك وتأخذ فقط ما تحتاجه وتترك خلفك كل ما تعتقد بأنه ثمين لديك من بقايا ألعاب جمعتها وأعدت تدويرها لتلائمك كل هذا تركه لأنه يوم الرحيل

لك أن تترك كل شيء خلفك إلا أمر واحدا ذكرياتك ستحملها أينما كنت، فلن تكون الكاميرا أكثر دقة في تصوير كل أركان البيت بغرفه وممراته ودهاليزه التي تحفظها عن ظهر قلب..لن يكون المخرج السينمائي أبرع من عينك وهي تطوف بسرعة خاطفة تدحرج فيها ذكرياتك في هذا البيت..

هكذا قرأت أعين أبي وهو يقلب ذاكرته وانا أناوله صورا عن منطقة شرق!!