ماعندي سالفه!!

من اسبوعين تقريبا والمدام وكل من يتابع اللي ارسمه يقول ويسأل...بدر ما قمت ترسم سياسي شفيك؟!

شفيك حاط حطه على الحريم بالفيس بوك وبالرسومات كأنك هونت عن السياسة وشفت إنها "عوار راس" و"دندرة" على الفاضي..!!

بصراحةواحد ما عرفنالكم..تقولون انت مركز على السياسة والناس ملت منها، واذا رسمت شغلات اجتماعية قلتو الظاهر زهق من السياسة وحاط على الحريم!! يا جماعة الخير لما الواحد يقعد مع الورق والاقلام ويقلب أفكاره ويستعين بأخبار الصحف، ويسمع سوالف الناس ويقرا المدونات وبعض الكتب "على فكرة هاليومين مطيح بكتاب أسرار ممنوعة" هذا غير التلفزيون ومافيه من مسلسلات اكثرها نكد ومشاكل حتى المجمعات اللي احاول اكون فيها ضيف شرف خفيف ظريف مو ثقيل مثل بعض الناس اللي يظن ان المجمع له بروحه ما بقى احد بفريجهم ما يابه معاه، يستحل سطرين من كراسي الكوفي شوب، هذا غير لما يتمشون ما يعرفون يسولفون ويتفاهمون على اي مطعم ياكلون منه او بعد اسبوع ويومين وين بيروحون هالناس ما تسولف الا عند الاصنصير او عند السلم الكهربائي!!

طبعا ما اقولكم عن كتيبة الخدم والحشم اللي معاهم اللي تركض ورا حمودي النزغة اللي مو راضي ياكل، واللي تسحب دانوه مو راضية تطلع من محل الألعاب واللي تجر عزوز منسدح ومعصب ومطنقر ومنسدح بالارض والناس تطالعه!! هذا غير الامهات وبناتهم اللي فجاة ومن غير مقدمات تدخل المحل بسرعة جنونية تخليك تطق بريك وتحذف اللي يمك او حتى تدوس دشاديش وعبايات الحريم!!

لحظة لحظة كأني تحلطمت وايد وابتعدت عن لب الموضوع!! المهم كرسام هاوي جدا اعترف لكم بسر لأول مرة أقوله، مرات اقعد اجابل الورق والاقلام من غير نتيجة حتى اني هديت الرسم ورحت اكتب شي، هالشي راح يكون مفاجاة راح تعرفونها قريبا بس خل تخلص..

رسام الكاريكاتير ترا انسان عادي يتأثر وممكن يأثر ما هو شخص مثالي ولا يدعي انه بيصلح الكون، الوالدة الله يخليها كل ما اشوفها تقولي "يا ولدي انت ما راح تصلح الكون دربالك انت الحين مسؤول عن بيت وزوجة وبنت" تحسسني ان الرسم الكاريكاتيري معركة وهوشة وكل ما اوريها شي يديد، تقولي ايي انت الظاهر تبي تأذيني وتأذي عايلتك!!

بصراحة من داخلي اضحك..مرات اقول ياريت اكون في معركة على الاقل لي شرف المحاولة احارب، احنا يا جماعة لازم نفكر الحياة مسرح ولا ساحة معركة ولا حديقة تستحق التعب فيها وزرعها لغيرنا ولا جسر صعب عبوره ولا محطة ننطر فيها قطار الدنيا!!

عن اذنكم ابي اكتشف الفروق السبعة بين فيلم "ما تيجي نرقص" وبين فيلم "shall we dance" ابي اعرف شلون ومتى راح نعترف ان الابداع في السينما المصرية قائم على التقليد، ما انكر في افلام مصرية مميزة قديمة ويديدة لكن في افلام تقليد لأفلام اجنبية وجان زين تقليد درجة أولى إلا بطريقة تحسسك إنك لو تشوف مسلسل في قناة السودان احسن لأنه مسلسل فكرته واخراجه وكل مافيه من امكانيات سودانية يا زووول!!

ما عليه كان لازم اقول هالكلام لأن ما ترضونها اخش عليكم شي !!

نصيحة لا تسهرون وايد باجي يومين ونرد نداوم..