يحق لي أفرح..

بحضور عضو المجلس البلدي عبدالكريم سليم احتفلت أسرة ثانوية صالح شهاب للبنبن بتخريج الدفعة الأولى من طلبة النظام الموحد لعام 2009، وسط فرحة الأهل والأصدقاء التي غصت بهم قاعة الهاشمية في فندق ساس.

مبروك لأهالي والطلبة وللمعلمين ومبروك للكويت تخرج طلبتي اللي كبروني زيادة وخلو دمعتي تنزل غصب!!


شكرا للجندي المجهول وراء تنظيم الحفل بهذا الشكل الرائع اخوي العزيز أ.محمد المطوع


هناك صور أخرى سيتم إضافتها لاحقا

بلاك بيري لكل كويتي!!

هالأيام والايام اليايه راح نشوف بعض النواب ما ادري عاد كلهم ولا بعضهم أي الأقلية، هالنواب راح يسمعونا مقترحاتهم اللي يمكن توصل لتخصيص الدولة مدلك تايلندي يهمز كل مواطن ويلحقه وين ما يكون حتى لو بالحمام!!

نائب يقترح تسمية شارع بإسم شخصية توفاها الله، ونائب يبي مدرسة بإسم شخصية أخرى ونائب يطالب ببناء مخفر في منطقة ما ونائب يرغب في فتح المستوصف 24 ساعة، وهكذا...

وبعد أربعة سنوات هذا إذا الله كتب لمجلس الأمة يكمل مدته، فراح تشوف نفس النواب راح يسطر لك اقتراحاته بعد ما يجمعها من الجرايد على طريقة "القص واللزق" ويقولك شوف انا اشتغلت ما كنت نايم.

لو انت نائب شنو راح تقترح؟

ناطركم..


بالنسبة راح اطالب وزير المالية بتخصيص بدل "رفاهية" لكل أسر كويتية خصوصا في ظل الطلب الزائد على "البلاك بيري" خصوصا ان زبابيط النقعة واللي للحين ما طلعو من البيضة كل واحد يتشيحط بواحد ولا مشتري له التلفون هذا ولونه على لون عدسةعيونه!!

ماني ضد ان الكويتي يشتري التكنولوجيا المتطورة لكن بذمتك واحد عمره 11 سنة شنو يبي بالبلاك بيري!! من كثر عماراته ولا الـ 100 ألف سهم بالبورصة او المنتجعات اللي يملكها في بورت غالب!!

هذا الكويتي!!

شلون تعرف إنك كويتي؟!

بعد البحث والتحري عن طريقة جديدة لاختبار النفس بأسلوب علمي حديث طلعت بمجموعة أسئلة أرجو الإجابة عليه بتأني..


شنو أكثر شي يزعجك وانت بعز الزحمة؟!
o واحد مليق يتصل فيك!!
o اللي وراك يطق هرنات!!
o تتذكر إنك ما نظفت أسنانك بالفرشة والمعجون!


شي ما تبيه يصير معاك وانت قاعد بمطعم مع ربعك؟!
o تخلي طلباتهم على حسابك وتكتشف أنك ناسي البوك!
o يسلم عليك واحد من الشباب انت حاقره من اسبوع!!
o يطيح عليك صحن المرق ويضحكون عليك الربع!!


شنو الأمنية اللي ودك تتحقق وأنت قاعد بمحاضرة بالصيفي؟!
o تنطفي الكهربا وتلغي المحاضرة!!
o يطيح بالأرض الدكتور وتضحكون عليه!!
o يقوم الدكتور بإحراج واحد مليق معاك بالمحاضرة !!

شغلة ما ودك تصير وأنت بالسينما؟
o بنص الفيلم يمرون جدامك 5 شباب يدوسون ريولك!!
o يقعد جدامك واحد يغطي عليك الشاشة!!
o يقعد يمك واحد داش الفيلم ثلاث مرات ويشرح لصاحبه القصة!!

شي دايما يصير معاك وانت بالمطار؟
o تطير عنك الطيارة وحضرتك نايم!!
o الطيارة فيها عطل أو الطيار ناسي مفتاح الطيارة!!
o جوازك منتهي او ماخذ جواز أخوك بالغلط!!


بعد ما جاوبت على الأسئلة اللي فوق تأكد إنك كويتي وعايش بالكويت!!


قريب

شلون تعرفين إنك كويتية؟!

ساس البلا..!!

نورية قبل لا تسافر بيروت اتهمت د.رشا الصبا بأنها المتسبب الأساسي بملف شهادات البقالات!!

مجرد أسئلة "تسربت" من عقلي للمدونة!!

وين كنتي يا نورية من صرتي وزيرة إلى غاية ما حجزتي تذكرة سفر لبيروت؟!

وينج عن تعيينات الجامعة والتطبيقي لموظفين حصلوا على وظائفهم على أساس شهادات البقالات؟!

وينج أصلا عن التجديد لوكيل التعليم العالي د.رشا الصباح إذا القانون ما يسمح لها بالتجديد وصار لها تقريبا 20 سنة وكيل وزارة؟!

وينج ووينج ووينج..

حتى القرار اللي اخذتيه ترا يناقض نفسه!!

القرار يعترف باللي اشترى له شهادات "اشتر شهادتين تحصل على شهادة مجانا" اعترف باللي اخذ الشهادات وتوظف على أساسها وبنفس الوقت يوقف ضد الاعتراف باللي يبي يوقف بالدور بالبقالات!!

انا ما أبي أعرف منو ساس البلا..لأن هذا ما راح يأثر بالموضوع احنا نبي نحاسب ساس البلا ومطلوب من "أصحاب الضمائر الصاحية" فتح تحقيق ويتم إحالة نورية الصبيح ود.رشا الصباح وكل مسؤول عن هذا الملف للتحقيق وقبلا تصدرون القرار..

مطلوب من ديوان الخدمة المدنية يحاسب المواطنين اللي اشتروا من البقالات شهاداتهم وحصلوا بمقابل شهاداتهم الرخيصة مناصب وألقاب..

وراح أعترف لكم بالآتي

كنت ناوي أدرس في أحد الجامعات البحرينية ماجستير اللي طريقته "مرة كل أسبوع" لكن سبحانه كنت شاك بالبقالة البحرينية، لغاية ما ظهرت الحقيقة!!

اشوه ان شهادتي من جامعة كويتية عمرها أكثر من 40 عام.

صج ان الجامعة اللي درست فيها "متطرشة بأكثر من منطقة بالكويت لكن ميخالف اسمها شهادة موثوق فيها.