سموك...ممكن؟!

منذ تسلم "سموه" رئاسة الحكومة ونحن "كنا" متفائلين بطيبته وقدرته على المضي خطوة في طريق الإصلاح الطويل، استبشرنا خير بابتسامته "الشقاقية" وبالكم الهائل من تصريحات وزرائه وتصريحاته التي"تعودنا" عليها منذ 7 فبراير 2006 وحتى هذا اليوم واحتمال حتى نؤمن بأن مافي "بالبلد غير هالولد"!!

"سموه" طيب وهذا لا يكفي سموه "يطوف" هذا ما ينفع "سموه" يسكت، وهذا اللي مضيعنا!! ففي أول استجواب قدم لسموه، رفض الصعود، بحجة أن حكومته "الرشيدة" مترددة في تأييد "نبيها خمسة" وبعد حل مجلس الأمة من أجل خاطر "سموه" انتخبنا مجلس شبه جديد واقر الخمسة دوائر وكان "سموه" أول المرحبين والموافقين"!!

ولم يكمل ذلك المجلس عاما من حياته القصيرة حتى تم حله، واستلم سموه حكومة جديدة وقلنا "نفتح صفحة جديدة" لعلنا كنا المخطئين"؟! وبسبب دخول "رجل دين" البلاد قامت الدنيا على "سموه" وتم تقديم استجواب آخر في حق "سموه" لتستقيل حكومته ويعاد تشكيلها من جديد "صبه حقنا لبن" إلا أن الاستجوابات كانت وراه وراه!! وتم حل مجلس الأمة للمرة الثانية!!

ماني مكمل القصة!! سموك انت ما تعرفني لأني واحد من مليون كويتي عايشين على هالأرض، اللي يبدو ان الفساد فيها صار لها مؤسسات عابرة للقارات، كنت طمعان يا سموك لو قدمت لنا دليل واحد على تنفيذ خطوة في اتجاه الإصلاح، ماني مع رحيلك لأني ماني متعشم خير باللي بيستلم وراك، خصوصا وأن "الشق عود" ماني مصدق ولا راح اقتنع ان العلة في المجلس، فإحنا جربنا نغير المجلس ونشيل معظم اللي قالو عنهم "مأزمين" لكن اللي واضح لنا ان العلة في حكوماتك، ادري ان أمير البلاد المفدى اختارك وما نشك ولا نشكك في اختياره بس عاد ما يصير بعد ما تبي تصعد منصة الاستجواب، اثبت لنا ان 1% من اللي ينقال عنك وعن فساد حكوماتك غير صحيح وانا اضمن لك من باجر ادافع عن الحكومة!!

معقولة استاد جابر صاير مجرد زينة نشوفه من بعيد!!

معقولة مستشفى جابر الاحمد للحين حفرة!!

معقولة ان جامعة الكويت بموقعها اليديد صايرة حفر "للجرابيع" !!

سموك يا بعد جبدي يا طويل العمر..انا ما اقولك اخترع لنا زر نسوي له click علشان نسبق الزمن ونصير دولة متقدمة، ترا الشعب الكويتي مو يوعان ولا فقير بالعكس الحمدلله الخير وايد بس نبي هالخير يبين بديرتنا، ليش يا سموك ما تقعد على يوم بزيارة مفاجأة زور فيها ديوانية "غير مخالفة" طبعا وتسمع الناس شتقول!!

ترضاها يا سموك يقولون الناس وعن قناعة "يا معود خل يبوقون بس يسوون لنا شي؟!" سموك انت ما يحتاي احد "يقص عليك" أو حتى ليش تسمح "لليهال" يخربون الصورة الحلوة اللي كنا نبي نرسمها عنك؟

سموك..تحويل مصاريف ديوانك سموك موكافي..؟! احنا مو هامنا جم "تولة بخور ودهن عود وهدايا" فسفستوهم؟! عليك بألف عافية، ولا يهمنا "معرض سيارات قديمة" انا يهمني اني اعيش لو يوم واحد من الاسبوع من غير ما "أسب وألعن" الفساد واللي ساكتين عليه!!

سموك...أمنتك بالله؟ انت راضي عن اللي قاعد يصير للرياضة؟ انت راضي ان اسم الكويت ينكتب بقائمة الدول اللي تنتهك حقوق الإنسان؟ سموك..ابيك تجاوبني على سؤال سألني اياه أحد طلابي بالمدرسة؟ سألني ليش خلال 20 سنة الامارات وباجي دلو الخليج "طافونا" ترا انا حاولت اقنعه ان الكويت متقدمة بالديموقراطية وبأنها من الدول القليلة اللي في شعب يحب الأسرة اللي تحكمه والأسرة اللي تحكمه تحب الشعب..بس حسيت ان هالطالب ما اقتنع؟! ممكن تقنعه بأفعالك؟....ممكن؟؟