22 نوفمبر 2009

حلم بالأسود والأبيض...؟!





كنت راجع مع المدام من قبرص الصيف الماضي، وبمطار لارنكا الدولي تأخرت الطيارة وقلت لازم استفسر عن سبب التأخير او حتى أعرف شنو اسوي خلال الـ3 ساعات قبل لا تطير فينا الطيارة وتردنا الكويت؟

توجهت لمسؤول المعلومات والعلاقات العامة وكان مشغول يتكلم بتلفونه النقال، احنا خو بالكويت متعودين على هالمنظر ونطرته يخلص، واثناء ما كان اهو مندمج كنت اطالع ساعتي اللي في ايدي، اهو شافني جان يتعومس وتخسبق ويسكر التلفون ويتأسف مني ويهه قط سبعتعش لون!!

بالانجليزي والفرنسي والألماني والايطالي قام يتأسف ويعتذر، واللي فهمت من كلامه إنه مو من عادته يتكلم بالتلفون النقال، أثناء العمل وقالي "تكفه لا تبلغ المدير"؟!

طبعا اهو ما يعرف يقول تكفه بس هذه ترجمتي لها، ومن رديت الكويت وانا احوس في الوزارات وغيرها لتخليص المعاملات، ما شفت موظف الا ويدخن ويتكلم بالتلفون وياكل ويشرب وما فكر يشوف شغل المراجعين، الجذب خيبة موظف واحد بالكويت شفته يحط تلفونه النقال "صامت" ويتريق في بيتهم قبل الدوام وما يطلع إلا مع انتهاء الدوام من غير "تزريق" ومن غير ما يوصي ربعه يوقعون بداله!!

هذا الموظف شفته بأحلامي الكثيرة اللي اتمنى أشوفها لو بالاسود والابيض، تتحقق بالكويت!!

محد فيكم فكر يشتكي على موظف متقاعس مو متقعد!! متقاعس عن أداء عمله أو إنه يخالف لائحة الدوام وما يحترم المراجعين!! عن نفسي صار لي فترة "أفتن" على أي مدرس في المدرسة "يدخن" في الممرات، أو إنه يدخل حصته الدراسية متأخر؟!

ليش ما نشتكي

هناك 3 تعليقات:

forzaq8 يقول...

اذا تبي الموظفيين يكرهونك بلغ عن الخطأ

استمرايه الخطأ اصبح الطبيعي و اتباع القوانين و اللوائح اصبح مستنكر لا و تصير نحيس و نغل

كاريكاتير يقول...

عاد انا مو نحيس وايد؟؟؟؟

Alikingkw يقول...

والله يا اخوي بدر المسؤول هو المسؤول عن ضبط هالأمور مع الاقرار بأن تفتنك بمحله وحلمك كلنا نبيه

بس في نقطة مهمة الا وهي ان الموظفين في الدوام العلاقة لازم تصير ودية بينهم لأن الموظف يقضي اكبر فترة زمنية في حياته مع زملائه الموظفين فالمفروض ان زملاء العمل يكونون اسرته الثانية والعلاقة الودية في العمل ضرورية.

واكيد مكان العمل وطابعة يعطي معايير مختلفة ..فالموضوع فيه شيء من النسبية.