22 سبتمبر 2009

شقاعد يصير؟!



ممكن احد يشرح لي شقاعد يصير؟!

هل صحيح راح نرجع نعيش على الحصير!!

الفقير يطالع الغني والغني يحسد الفقير!!

ألعن ابو الواسطة واللي حط هالمدير!!

كل شي عنده اعتفس والمريض محتاج لسرير

الفساد دمرنا ما عاد يشيله بعير

قبل الحرامي يستحي ويخاف الحين صرنا نحسده من يسافر يطير!!

وينكم متى تصحون ولا مستانسين بجم مجمع كبير

اذا اشتكيت عايروك واذا سكت قالو مساهم بالشخير

قبل النظيف نحترمه والحين بعضنا ورا الخاين يسير

الحكومة قاصه علينا بجم يوم عطلة ومجلس يرسم بالهوا أوهام ما تصير!!

كنا نقول عن الريال الحين ما نعرف سالم من عبير!!

الشرف الامانة الاخلاص كلمات داثرة صار مكانها قاموس مثير

الناقلات انباقت وسكتنا واولمبيا بلعناها هنات كلها خمسة ملايين طارت وغيرها بيطير!!

ضاعت الطاسه جاوبني يا فلان شنهو المصير..شنهو المصير؟!

سامحوني مواصل ولقيت نفسي مندمج ما حبيت اكسر بنفسي ادري ما اقايش اخوي براك الصوري ولا حتى ربع ابداعاته بس من حر مافي نفسي !!

وسلامتكم

هناك 16 تعليقًا:

رورو الشخبوطه يقول...

السلام..

عيدك مبارك وتقبل الله طاعتك..

اللي قاعد يصير جزء منه بس اللي قلته ..

اخيييييه من عروس الخليج صارت ديرتنا عيوز الخليج ..

ياريت يصحصحون بس ملينا وخصوصا المجلس لانه اختيارنا ملينا من القضايا الهامشيه اللي يناقشونها ويريت عاد يحلونها :(

مشكور اخوي ..

وماشاءالله حلو عجبني كلامك مع انه رفع ضغطي بس حلو السجع :)

غير معرف يقول...

صح لسانك

وانت الصاج والله الديره رايحة فيها كل شي معتفس

"الحكومة قاصه علينا بجم يوم عطلة ومجلس يرسم بالهوا أوهام ما تصير!!"
هذي اكثر كلمه عجبتني

'lsdjgsk'eljr يقول...

كل عام وانت بخير اخوي

والله الله يعينكم ويحفظ الكويت وأهلها

اللي قاعد يصير هذا لعب ما ينسكت عليه


قواك الله

Alikingkw يقول...

صح السانك

Mohammad Al-Yousifi يقول...

صح لسانك

كاريكاتير يقول...

رورو

ايامج سعيدة

رفع ضغطج ولا نزل شنو فرقت دام الواقع مر ما تغير من سنين!!

شوتيك بوشا

يعني شنو بستفيد من العطلة ايام الدوام زحمة وبالعطلة اكثر ازدحام بدال ما يشجعون الشباب على العمل التطوعي ويسوون حفلات مميزة بالاندية ومباريات "بالجو بالبر بالصبخة"

العنزي

يقويك وان شاء الله انا متفاءل بجيل قادم فاهم ليش التغيير!!

علي الرائع

صح لساناتك

صح جسمك!!

@alhaidar يقول...

الله كريم

وحـدهـ من البـشر يقول...

قالوها

كويت الماضي دبي المستقبل قطر الحاضر

و كويت الماضي مو ب بالتطور و النهضه و المجالات لا ختى بالتصرفات و الاطباع

الله يستر من الياي

واكيد بنكرر هالسؤال شقاعد يصير

بس راح نلقى جواب؟




الله يعطيك العافيه خيووو

كاريكاتير يقول...

الله يعينا يا بوكوثر

كاريكاتير يقول...

وحده من البشر

شكرا على مرورج الخفيف

بس ملاحظة مع كل السواد في لوحتي الكاريكاتيرية الا ان نقطة البيضاء في زاوية اللوحة اكبر واكثر اشراقا من اللي نسمعه عن التقدم الشكلي لمحيطنا

الحريات العامة وحقوق الانسان هي اساس تطور الشعوب والمجتمعات، لا المجمعات وغيرها من الماديات..

اذكر احد الرحالة الألمان حينما اعطى وصفا للكويت ف الماضي كتب "جمهورية الكويت" !!

تطورنا الشكلي مافي شك متأخر لكن هذا ما يمنع ان هناك من يحفر بالصخر ويرسم عليه مستقبل رائع خاصة اذا الكل استوعب وين الخطأ وبشنو يتصلح؟

رورو الشخبوطه يقول...

الواقع يتغير باراداة الناس طبعا مو واحد او 2 لما الاغلب يرفضه نقدر نغيره..

انا وحده شبعت دقرات لي رتفع اكثر ضغطي بطق اموت منهم ..

كاريكاتير يقول...

رورو

تدرين ان الثورات في العالم قامت على مجموعة صغيرة فيها حماس ودراية وتخطيط وقيادة وحب الخير للجميع..

وايد ناس ضحو قبلنا علشان هاليوم احنا شنو نقدر نقدم حق اللي بيعيش باجر؟

Alikingkw يقول...

جسمي مو صح يا خوي يبيلي أنزل ثلاثين كيلو D:

كاريكاتير يقول...

علي المميز

انا بعد شكلي راح ارد النادي مرة ثانية..!

الوتيــــــــــن يقول...

صح لسانك

صباح الخير اخوي بدر
ماشالله كل هاذا طلع وانتا مو عارف تنام؟ ابدعت

لا تحر قلبك .. نب نشوف حل والمخيف إن الجيل القادم من النواب وحملة الرسالة لهالبلد بيكون فرد منا الشباب .. فما يندرى بيكون الحال على ماهو عليه ولا أردى

الله يستر

عساك تعوده وسلملي على فطومه

كاريكاتير يقول...

حاليا جمدت قلمي عن الرسم ليرتاح جم يوم ومخي قاعد ينزل برنامج "مع الطلبة يا استاذ؟"

راح اوصل سلامج يا الوتين