صعب علي أخمن متى راح تنحل مشكلة البدون بدولة صغيرة جغرافيا عفيسة سياسيا، تنمو بشكل طبيعي سكانيا، فمشكلة البدون واللي مرت بمسميات ومراحل حتى بلغت أربعة أجيال كشهود عيان على هذه القضية الإنسانية.
عندي شوية أسئلة ياريت اللي فاضي يجاوبني عليها..
اللي يدعي ان البدون كلهم خاشين جناسيهم تحت الكاشي!!
يعني معقولة 100 ألف من البدون كلهم عندهم جناسي؟!
راح نفترض ونقول ان 99,9% من البدون عندهم جناسي!!
ممكن نعرف ليش الحكومة من سنة الاستقلال ولغاية لحظة كتابة هالموضوع ما اكشفت عن جناسيهم ليش؟!
هل معقولة دولة مؤسسات ووزارة بحجم وقدرة وزارة الداخلية ما يعرفون شنهي جنسية فلان وشنهي جنسية علنتان؟!
أحد يفسر لي دافع البدون العسكريين والمدنيين في الدفاع عن الكويت في الحروب العربية وفي حرب تحرير الكويت وأثناء الاحتلال العراقي الغاشم؟!
زين خل اتخيل ان كل ما سبق من أسئلة تم تفنيدها !!
سؤال
كم عدد الشهداء البدون الذين يحصل اهاليهم على استحقاقتهم خصوصا في مسألة الجنسية واللي أكد عليه المرسوم الأميري واللي يقره قانون الجنسية الصادر عام 1959؟
زين
راح اسوي نفسي مقتنع بإجابات كل ما سبق..
ركزوا معاي
...
...
...
...
إنسان ممنوع من حصوله على إثبات يوم ميلاده!!
إنسان ممنوع من توثيق زواجه!!
إنسان محروم من التعليم!!
إنسان محروم من الرعاية الصحية!!
إنسان محروم من حقه في العمل!!
إنسان ما يملك هوية تثبت إن اسمه كذا ولد كذا!!
إنسان تدعي الدولة إنه مو مواطن ولا عنده جواز سفره وين يروح!!
إنسان ندعي إنه ساكن في منطقة سكنية مع إن "الصليبية" ما تصلح للقطط" من تلوث وانعدام خدمات وانفلات أمني!!
شنو تتوقعون مستقبله؟!
يصير عالم فضاء بوكالة ناسا..!!
يصير لاعب كرة مشهور ويفوز بكأس العالم بإسم الديرة اللي مو معترفه فيه مواطن!!
يصير شبه إنسان وبالإمكان يتحول لمجرم مدمن قاتل مروج إرهابي وأقل شي يتحول إلى حامل أمراض وأوبئة اجتماعية ونفسية يهدد أمن ومستقبل بلد صغير!!
فكرو فيها!!
اليوم اذا ما حلينا قضية البدون راح ايي يوم تكون هالقضية سبب في اعتبار الكويت دولة معادية لكل مفاهيم حقوق الإنسان حسب مسطرة الكونغرس الأمريكي وحسب مجلس حقوق الإنسان وكل المنظمات الدولية لحقوق الإنسان حزتها خل نشوف منو فينا يقدر يرفع راسه ويقول ان الكويت دولة محترمة وتحترم الإنسان!!
هناك 14 تعليقًا:
احنا نقدر نوصل صوتنا للناس وللحكومه واجاوبك وراح يقرون اويمكن يقرون !! بس راح ياخذون كلامنا بعين الإعتبااار وله لا حياة لمن تنادي ؟؟
اذا قلتلي راح ياخذوون كلامي بالإعتبار راح اجاوبك على اسإلتك كلها ... واذا قلتلي لا حياة لمن تنادي بقولك صح كلامك مليوون % لانهم قاعدين يجنسوون اللي ابالهم بس ما يشوفون ملفات الغير سواء كانوا يستحقونها او لا وما اقول اللي ابالهم معناته اهلهم ومن قبيلتهم او شي جذي لا قاعد يجنسون الممثلين المغنين اللي يمثلوون الكويت اسم الله عليهم
والباجي اللي ما عطوهم حقوقهم سكروها بويهم مع انه صح يمكن يكون بأعلى المراكز لو عطوه الفرصه
انا ما اقول غير حسبي الله ونعم الوكيل ما في اي عدل بهالزمن
تـحياتيـ ..دعاء
الله ...
أحييـك على هالتساؤلات اللي تحصر عمق المشكلة الانسانيـة اللي يمـرون فيها هالفئة ..
حقيقة لم أحاول أن اتعمق في تفاصيل هذه القضية المتشابكة ،هذه المشكلة التي عجزت اليد العليا في بلادنا أن تفك خيوطها المتشابكة !!
حالة من الاستغراب تحاصرني كلما مر بي سؤال من الاسئلة العديدة التي ذكرتها
الله يعين ! :\
:
والله البوست يعور القلب ..
والله ندري والله فاهمين ومقدرين بس وين اللي يسمع؟؟!!
وانت قلت مشكلة أزلية 4 أجيال الحين من البدون ولادة الكويت وابهاتهم ولادة الكويت وللحين مافي شي يثبت هويتهم!!
انزين أنا عندي سؤال ..
بالنسبة للكويتيين مادة ثانية ، وايد ناس ابهاتهم حزة التجنيس قالوا انهم من السعودية .. ايران .. العراق .. الامارات .. الخ ..وخذوا الجنسية الكويتية بس مادة ثانية..
انزين عيالهم وعيال عيالهم وعيال عيال عيالهم ليش مادة ثانية بعد؟؟!!
عجبي من هالديرة بصراحة اللي لها مليون مادة ومليون تقسيمة مع ان الكويتي مفروض كويتي مادة اولى عاشرة مليون اسمه كويتي ليش التفرقة؟
وتبينهم يحلون مشكلة البدون؟؟
متى؟!
السلام عليكم ورحة الله وبركاته
فعلا البجون قنبلة موقوتة، من عشرين سنة اتخرج فيصل ومحمد وفلاح
محمد وفيصل دخلوا الجامعة وتخرجوا واشتغلوا وصار عندهم احفاد، اما فلاح
ما وصل خارج منطقتهم ، لانه بدون لا اله الا الله محمد رسول الله
الله يعينهم
التساؤل الأهم من ذلك يالزميل هو الآتي:
الحكومه ليش ما تستعين بجهاز "الجويهل" الإنتربولي وتأخذ منه كشوفات بأسامي وجناسي البدون؟ مو أهو عنده كشوفات فيها مزدوجين وشعبيين ...إلخ؟ أكيد يقدر يحفر الصخر ويطلعلك جناسيهم!!!
بعدين يالزميل أي جهاز دولة تتكلم عنه؟ جهاز دولة مو قادر يحل أبسط المشاكل..تحياتي للجهاز "المفرمت"!
احيي فيك الانسانية اخوي العزيز بدر .. على تخصيصك هالرقعة لاخوانا البدون .. اعتقد ان مدونة بدر بن غيث تعتبر المكان الوحيد اللي تواجدوا فيه بناء على رغبة صاحبها .. غير متطفلين او طفليين مثل ما الكل يفسر وجودهم في الكويت !
اقدر استشف ان وعود الحكومة و آمالها لحل القضية .. و ممطالتها تحديدا ما هي الا رفض ضمني لأغلاق ملف غير محددين الجنسية ..
شكرا
الخوف ان لا يكون عند الحكومة معلومات عن اللي خاشين جناسيهم وهذا ما اتوقعة
دعاء المبدعة
في أي قضية تعتقدين ان لج دور فيها ومتأثرة فيها مجرد الحديث فيها واثارتها وتناولها راح يدفعنا للتفكير بطريقة أخرى لتحريكها بالمجتمع والبحث عن حلول لها
اليوم اثبت الشباب الكويتي انهم قادرين على أخذ زمام المبادرة وحل مشاكل البلد
الحكومة والمجلس وكل من مسؤول راح يضطر للتحرك في سبيل عدم فضيحته وتصغيره.
سارة المميزة
الكويت طرف في العديد من الاتفاقات الدولية المتعلقة بخصوص حقوق الانسان ومن المؤسف انها غير ملتزمة فيما يخص برفع المعاناة عن البدون!!
نصيحة اطلعي على بعض المعلومات حول هالقضية وراح تعرفين ان القضية كل يوم تتعقد وتكبر ولاخاسر المجتمع الكويتي..
مهندستا
فيما يخص سؤالج
حسب اطلاعي على القانون ومعرفتي ببعض اركان قضية البدون
فيما يتعلق بالمادة الثانية من الجنسية
نفترض التالي
زوج وزوجته حصل الاب على الجنسية حسب نص المادة الثانية
اذا كان قبل حصوله على الجنسية عنده عيال فكلهم يستحقون الجنسية حسب المادة الثانية واذا قدر الله ان ينجب طفل اخر فيكون هالطفل يحصل على جنسية مادة أولى
طبعا المشرع في هذا الزمن كان يبي يحمي المجتمع الكويتي من كثرة التجنيس وتغيير هوية المجتمع وهذا حق مشروع
اما الحين فاحنا نعيش في مجتمع مختلط مع العديد من الجنسيات الاخرى ومتصاهرين معاها ويكفي ان اللهجة الكويتية عبارة عن خلطة عجيبة من اكثر من لغة ولهجة داخل وخارج شبه الجزيرة.
اشكرج :)
الأخت هدى خميس
المسألة تتعدى منح من يستحق الجنسية
المسألة ان هناك سلسلة متصلة من حقوق الإنسان تنتهك في بلد ينعم بالسلام وينعم في برسوخ دولة المؤسسات وبدولة تدعي بانها دولة محبة للسلام ومحبة وتطالب العالم باحترام حقوق الإنسان.
ويل سرفيس
أزيدك من الشعر بيت حكومتنا ما تبي تحل هالمشكلة الا بشروط :)
غير معرف (1)
اشكرك عزيزي قضية البدون تؤلم كل إنسان في الكويت وخارج الكويت
لأنها تعني حرمان إنسان من حقوقه وتجريده من أبسط أحاسيسه بأنه موجود!!
ليس كل البدون يستحقون الجنسية لكن كل البدون يستحقون أن نعاملهم كبشر
غير معرف (2)
انا واثق ان الحكومة عندها كافة المعلومات لكن شتقول!!!!!!!!!
إرسال تعليق