08 فبراير 2010

سوء تفاهم بس!!




ادري انك متضايق توك متزاعل مع المدما، ادري الموضوع يبط الجبد ادري ان انت سويت اللي عليك لكن اللي صار صار، ما عليه اخذ لك راحة وقلل من زحمة افكارك عن اللي صار ابعد عن خيالك كل الصور اللي قاعد تركبها على زوجتك، ترا اهي تحبك ادري بتقولي انها غلطانه وهي السبب انا مصدقك صدقني بس ما ينفع تعصب وتحمق وتسكر الباب بقوة وتصرخ وتسوق سرعة و"تبتون" بين السيارات، اقولك شي كل هذا ما يفيدك ولا حتى انك تخلص باكيت زقاير كامل علشان توهم نفسك انك نسيت اللي صار مساع في البيت، تبي نصيحتي دزها مسج من كلمة وحدة ، بتقولي مو كفو اقولك مو علشانها المسج علشان تهزها تثبت لها انك ريال مو مصنوع من خشب سريع الاشتعال ولا انك علبة بيبسي مكتوب عليها "قابل للضغط" انا اقولك

اكتب لها مسج قول فيه ......
........................................
........................................
........................................
أحبج


شفت هالكلمة مع انها عادية تقولها مرات بالغلط او كنت متعود تقولها بأول شهر شهرين زواج او حتى قبل لا تبتلش بالدنيا اللي انت فيها، صدقني هالكلمة مو دليل ضعف ولا دليل "تضييع الصقله" لا لا هذه مفتاح تفتح فيه ولاعة بوسط بانزين الحب اللي بينكم انت تبيه طول عمره مولع، الحب مو سهل ينطفي بين اثنين خصوصا اللي متزوجين على حب او صار بينهم عشرة والمودة....

حتى انتي بعد اسمحي لي اعاتبج لا تتوقعين من ريال عايش انه يتحمل كل شي وتبينه طول الوقت على مزاجج، ترا الكلمة الحلوة تأثر تهدم جدار برلين بثوان، ادري انه غبي ما يسمعج يبي كل شي على مزاجه مو عاجبه العجب ادري يتنرفز بسرعة، صاير جبريت حتى الياهل مو مثله يتصرف، انتي ما تشتغلين عنده ولا خدامته، ولا حتى جارية من جواريه الحسناوات، انتي باختصار أرق انسان ممكن يرجع لها صندوق الدنيا اللي من غيره ما يعتبر نفسه عايش يومه، تذكري انج انتي الوحيدة اللي تعرفين اللي يحبه ويكرهه انتي اكثر الناس تعرفين الاغنية اللي تخليه يندمج ويصير رومانسي، ميخالف ادري انه مرات يتنح ما يقول "احبج" صدقيني اهو ما تعود ولا كان يسمع ابوه يقولها حق امه، كانت هالكلمة من الكلمات "العيب" اللي لازم يسكر اذونه لما كانت تنقال في افلام فاتن حمامة وليلى مراد والمغبرين!!

تبين نصيحتي انتي اعتبري اللي صار مساع مشهد بايخ غلط المخرج انه حاطه بالمسلسل اللي تتابعينه، تقدرين تشيلينه من ذكرياتج وبدليه بمشهد يوم كان مساك ايدج وانتو طالعين السينما او قاعدين تضحكون وانتو تاكلون صمون من شارع المطاعم ايام الملجة، او اي مشهد رومانسي ما ينسي!!

دزي له رسالة ترا اهو على باله انج معصبة وتبجين ومقهورة اثبتي له انج قوية بالحب اللي تشيلينه له، تكتبين له مسج تقولين فيه باختصار..............
.......................................................
...................................................
ترا احبك..

وسالمتج وسالمتك..

هناك 5 تعليقات:

sarona يقول...

يعطيك العافية

و صح كلامك هالايام ماكو تفاهم

و بالكلمة الطيبة الواحد يكسب قلوب الناس

..

^_^

Catism القطويّة يقول...

كلام جميل، الله يعطيك العافية ويبارك لك في زواجك. ^_^

مـي يقول...

الله الله
خوش كلام..

بس الكاريكاتير تحفة!!
شكل الريال كسر خاطري..
أما المرة تمام / رغم كل شي التفخة مازالت سليمة والجنطة بيدها .. خخخخ

Engineer A يقول...

حصل خير!! :)


لا يحوشك!

وتسلم على الكاريكاتير والكلمات المنمقة وان شاءالله ما توصل الأمور بالنقاش إلى هذا الحد!

كاريكاتير يقول...

سارونا

الكلمة الطيبة واللي تكون خالية من النفاق وباسلوبنا مو شرط نحفظ لنا سطر مكتوب ويطلع من القلب، راح تذوب الثلج

القطوية

تسلمين يا قطوطة :)

مي...

هذا الكلام اقل رد مني للي يشكك ان مافي ريال طيب بالدنيا وعاقل !!


مهندستنا...

لازم نحافظ على رونق الزوجة بعد الهوشة :)