12 مارس 2010

مدرس وافتخر...




اي نعم افتخر إني مدرس عندكم مانع؟! بالعكس هالوظيفة هي أفضل وظيفة لي شخصيا ولو أمدح هالوظيفة راح تقولون شفيه مو صاحي في أحد يرضى يعيش كل حياته العملية يصارخ ويركض ورا الطلبة "اقعد يا جسوم وين الواجب ياسلوم..."!!

من 5 سنوات واتوقع لغاية آخر يوم قبل التقاعد راح أظل اجاوب على سؤال العمر، "ليش صرت مدرس"؟!، وطبعا ابدأ اعيش الدور واجاوب واسترجع لحظة التفكير قبل جم سنة، كنت على مقاعد الدراسة الجامعية" اللي كانت تتغير كل سنة مرة تصير احمرو ومرة ازرق" وهذا يرجع على من يفوز برابطة طلبة كليتنا مرة المستقلة ومرة الائتلافية!! والمشكلة انه ينحسب "انجاز"!!!!!!!!

مو موضوعنا موضوعنا ان كان عندي خيارات قليلة للوظيفة المناسبة بعد التخرج، فمثل خريج ليسانس آداب وتاريخ تحديدا مو جدامه غير يا انه يصير مدرس او يقنع نفسه بوظيفة بوزارة يقعد هناك يشتغل في شي عمره ما سمع فيه!! او انه يحصل له مكان يحتاجون فيه إلى باحثسن في التاريخ وهذا بالنسبة لي "حامض على بوزي" وطبعا القطاع الخاص ما يهتم للي مثلنا يعني شنو راح يستفيد من واحد دارس تاريخ المشرق الاسلامي وعارف كل سوالف هولاكو او مطيح بتاريخ الفراعنة!!

المهم في لحظة تاريخية صادني الدكتور ناصر سعيدوني وانا اشرح لعدد من الزملاء جزئية غابوا عنها قبل موعد الاختبار!! فقالي انك تصلح تصير مدرس والدليل العدد الكبير اللي يتابع شرحك، لما لفيت رقبتي وزين ما طقني عرج!! الا معظم طلبة الشعبة مجابليني!!

من تلك اللحظة وانا حطيت في مخي اكون مدرس تاريخ، وبعد التخرج انتظرت شهرين لحين فتح باب الديوان للي مثل حلاتي والحمدلله ما قعدت غير 6 أشهر لحين إصدار فرمان تعييني كمعلم بوزارة التربية، وهالشي صار عقب اجتيازي لاختبار تحريري ومقابلة اذكر تفاصيلها المضحكة عدل مدل!!

من لحظة دخولي أول مدرسة داومت فيها "ثانوية عبدالله العسعوسي" ومرورا بثانويتي ايام ما كنت طالب "ثانوية صالح شهاب" وتواجدي حاليا ومن سنتين في ثانوية فلسطين بالرميثية، اقدر اقولكم ان مهنة التدريس رغم ما تحمله من مشقات وآهات وأفلام شي من الخيال العلمي وشي من الاكشن الهوليودي على مسلسلات رمضان من تفكك أسري وسوالف المراهقين وغيرها، ومرات نشوف أفلام هندية!!

كل يوم يبدأ يومك الساعة 7.30 صباحا طبعا كونك معلم تحب وظيفتك لازم تطلع من البيت قبلها بربع نص ساعة، وعلى ما تتقلقص بسيارتك بالزحمة وتسمع الراديو وسمفونية السيارات، خصوصا بعض أولياء الامور والموظفين اللي يعتبرون الشارع ملكهم والوحيديين اللي رايحين دوامهم ويبون يصلون بسرعة!! ومو مهم الناس تحذف روحها من فوق الجسر او حتى نقتنع بضرورة ان تتحول سيارتنا مثل فيلم transformers!!

ماادري شلون تنكتب المهم انتو فهمو عن أي فيلم اتكلم!! ارد حق المدرسة والتدريس، طبعا طابور الصباح اسعى اني اكون واقف فيه واحي فيه العلم حالي حلا أي طالب يحب الكويت، ما ألوم بعض الطلبة اللي ما يحييون العلم مثل الطلبة اللي يحبون الكويت، هالجيل ما انزرع فيه حب البلد بالعكس انزرع فيه ان الواحد ياخذ حقه بذراعه وبالواسطة الكويت عبارة عن شوارع للقز وشاليهات ومخيمات وجواز سفر ازرق لزوم السفر، بالنسبة لهم هذا الجيل اللي اهو انولد بعد التحرير ما عرف الفرق بين ما بعد وقبل الغزو العراقي الغاشم، راح تلاقي وايد منهم حافظ اغاني عراقية وما يقدر يعد لنا 3 أسماء لشهداء الكويت!!

هالجيل والأجيال القادمة برقبتنا احنا المعلمين وبرقبة من يختار المعلمين ويكتب المناهج وبرقبة حبيت كل مؤول يشك إنه مسؤول عن شي في هالبلد! ما علينا...اليوم حبيت افضفض عليكم كل اللي يحوس بمخي من أفكار وذكريات، وسبب هالاسترجاع إني قبل يومين "الخميس" وقفت في طابور الصباح اوزع شهادات التقدير والتفوق لطلابي الحاصلين على الدرجة النهائية في الفصل الدراسي الأول في مادة الدستور ومادة الوطن العربي.

شعوري لما كان كل طالب فيهم يستلم الشهادة ويسمع صفقة الطلبة وتحية وتهاني المعلمين وإدارة المدرسة احسها دعوة بأن أرفع راسي وبأني مدرس وافتخر.




هناك 17 تعليقًا:

sarona~ يقول...

:

يعطيك العافية اخوي

و منها للاعلى

^_^

فريج سعود يقول...

الي كرمتوه بالصورة الاخيرة متأكد انه طالب ؟

لان شكله ناظر متقاعد

Super Sara يقول...

الله يا بـدر
مادري شقـول .. انا اقدرلك انك قاعد تقوم بعملك بكل ايمان و صـدق

والله هالشي نادر
و الله يقويك و يكثر من امثالك

ارفع راسك اكيد :) انت مربي أجيال
بـ حق و حقيق

كل الود و المحبة :)

:

نمووول يقول...

ماكوا ارقى من مهنة المعلم وماكوا اصعب منها ..

قواك الله يا بن غيث
ومنها للأعلى .. وبالتوفيق لك ولطلبتك ..

كاريكاتير يقول...

فريج سعود...

الا هالطالب صج انه شكله اكبر مني لكنه قمة في الاخلاق

والادب والعلم :)


سارونا..

اجمعين وعسى ربي يوفق كل طالب وطالبة يحبون الكويت من قلبهم :)


سوبر سارة

تسلمين الكويت تستاهل اكثر :)

الاجيال القادمة تحتاجي مربيين ومخلصين لهم :)

شاي الضحى يقول...

الله يوفقك

جان زين كل المدرسين والمدرسات يحبون شغلهم ويفتخرون فيه نفسك

صايره هبه الحين كل وحده تتخرج بتصير ابله للأسباب التاليه:
1- تتزوج بسرعه "لان الي يخطبون كلهم يبون مدرسات هههههههه مادري منو الي بيصرف على منو المره او الرايل!!"
2- الاجازات
3- الراتب

بس ناااااادر الي يفكرون انهم بربون اجيال

عرباوي فور افر يقول...

استاذ بدر شهادتي فيه مجروحه والله
من افضل الاساتذه اللي مرو علي مع احترامي لجميع الاساتذه
احنى بالحصص الثانيه نعد الثواني عشان تخلص الحصه
بس بحصه الدستور لا ما عندنا مانع نقعد اكثر
و الله يوفق هالاستاذ المخلص في عمله
بالنسبه حق فريج سعود
صدق او لا تصدق
هالطالب من مواليد 28_10_1992 يعني من اصغر الطلاب في دفعته :)

Barrak يقول...

استاذ بدر
من غير مجامله
انت مثال للمواطن الكويتي الصادق في حب بلده وعمله

هذا الشي شفته بعيني

اتمنى ان تستمر على هذا المنوال وثق تماما ان هناك من يجد في شخصك الكريم مثال له

تدري فيني مااحب اقول هالحجي بس هذا الصج

منال العنزي يقول...

بدر على كثر ما كنت تسولف لي عن التدريس على كثر ما بديت أعرف شكثر انت تحب هالمهنة

؛) أما عن شعووور تكريم طلبتك أكييييييد إينن وحلووو تحس انك تشوف تعبك فيهم وهذا عن تجربة شخصية خاصة لما يكون معدله 99 % موفق ومنها للأعلى ؛))

الوتيــــــــــن يقول...

علشان جذي أقول " مو كل معلم خُلق ليكون معلماً "

يعطيك العافيه بدر

ٵنثے ملآئكيـﮧ ~ يقول...

لنآ الفخر على أن نربي أجيآل
موفق ،

why me يقول...

كاد المعلم أن يكون رسولا:)


الله عليك

صباح الخير

Chaotic pOsha يقول...

يعطيك العافيه أخ بدر ماقصرت صج شي يفرحني اني اشوف معلمين ماخذين المهنه جد وحابين شغلهم واهتماماتهم تتعدى المعاش والاجازه واهم شي انهم يقدرون طلبتهم مثلك


قواك الله و منها للأعلى

حَافِـيَةُ الَقَدمَيّـنْ ولِبَاسِي المَطـرْ يقول...

تدري انها سابقة تاريخية لي
إني اسمع واحد يفتخر انه مدرس !

صراحة أُعجِبت بشغفك ..
يعطيك العافيه , وإنشالله نشوفك
رئيس قسم D;

بوطلال يقول...

هذا بالصوره استاذ حمزه وياكم
شخباره شنو ماسك الحين ؟ خبري فيه قبل عشر سنين عندنه بثنوية الروضه

العباسي يقول...

الله يعطيك العافيه ويكثرمن امثالك

BeNT JaBeR يقول...

السلام عليكم...

بالفعل يا استاذ بدر احنا محتاجين لامثالك الي فيهم الغيره على هالجيل والاجيال القادمه,,,لانه بصراحه احس انه هالجيل حيل مظلوم من الناحيه التوعويه والثقافيه وحتى الروح الوطنيه احسهم ما يستطعمونها مثل ماكنا نستطعمها,,

وبالعكس مهنة التعليم من اسمى المهن كافي انك تزرع وتنمي بذرة أدب واخلاق في روح الطلاب..

ويكفيك فخر هالطلاب المتفوقين وهذا دليل على تفوقك بمهنة التدريس ,,,

عسى ربي يوفقك ويوفق عيالنا ولا يغير عليكم,,

تحياتي