29 أبريل 2010



بطريجي للدوام اشوف أولياء الأمور بالسيارات في أقصى درجات "النرفزة" الكل يبي يوصل قبل الثاني..

في الدوام أبسط نظرة بين طالبين ممكن تتحول إلى حرب عالمية تبدأ بالسب وتنتهي بنقل اللي له شغل واللي ماله شغل للمخفر/المستشفى...

اثناء "الهدة" مافي احد معصب كثر اولياء الامور الظاهر ان الشمس لها دور في فوران الدم بالجسم او يمكن الجوع وراء تحولهم وحوش كاسرة لا تقوى على ريحة المجبوس من على بعد آلاف الكيلو مترات!!

في المباريات الجماهيرية تجد المسؤولين الرياضيين أكثر عصبية من اللاعبين والجمهور وتلاقيهم يحمسون اللاعبين بعبارات ابعد ما تكون عن جو الرياضة امثلة:

اكله..عندك اياه..خلك وحش..لا تخليه

لاحظو المقاهي في خيطان وجليب الشيوخ تحط مصارعة حرة للصعايدة وتفور دمهم، لاحظو ألعاب البلاي ستيشن كلها قتل وتكفخ..لاحظو أفلام السينما تبرمجنا ان نعتبر العنف امر طبيعي!!


اما في الانتظار بالمستشفيات او العيادات فتلاقي الناس مو متحمله نفسها، الكل يبي يخلص قبل الود ودهم يحطون قرار بأن الطبيب يعالج كل واحد فيهم قبل الثاني!!

حتى الانسان الطيب اللي يسعى للحفاظ على اعصابه هادية الناس احسها تبي تنرفزه غصب طيب، مع ان طيبته ما تعني انه غبي او مسبه!!

على صعيد شخصي سعيت احط اعصابي بثلاجة في اكثر المواقف اللي تتطلب تحولك من "تويتي" إلى "وحش الفيغا" خصوصا لما اكون مع أهلي زوجتي وبنتي..

تعالو بذمتكم شنو ذنب اللي تصرخ بويهه واهو ماله ذنب باللي صار معاك!!

نصيحة..

لما تعصب وتتنرفز تذكر ان اول شخص يتأذى اهو انت؟!

هناك 5 تعليقات:

قارئه فـ حسب,, يقول...

القوي هو الشخص اللي يمسكـ نفسه ساعه الغضب

لا تغضب و صلوا عالنبي عليه الصلاة و السلام

و كل شي تمام ان شاء الله

بس يبيلنا شوي صبر

لان تعودنا بهالعصر عصر السرعه نحصل كل شي بسرعه

فتحدث اختلافات ،،

شكرا عالطرح اخوي

نمووول يقول...

صاج الكل معصب والكل متنرفز وبالشارع الكل مستعيل محد طالع مبجر ..

والافلام والعاب الفيديو يمكن لها دور لكن ما احملها المسؤلية ..

خوش نصيحة

شكراً

panadool يقول...

حرب الشوارع

تحياتى

MaNoO يقول...

فعلا كل واحد ليه حاجه تعصبه كل حاجه حوالينا كدا بس الهدوء الداخلى للانسان ممكن على الاقل يطول البال شويه ان الانسان يشغل نفسسه بحاجه تانيه ننسى السرعه وردود الافعال المباشره دى مش كل حاجه هتييجى كدا
تشرفت بزيارة مدونتك ويارب يهدى الحميع

الجودي يقول...

في نصيحة جربتها و فعلا يابت نتيجه ..

أبدأ نهارك بالإبتسامه ...

و لما اتواجه أي موقف سلبي أو تثار قبل لا اتعصب ردد في قلبك لا تغضب لك الجنة ...

و سبحان الله فعلا تهدى على طول

بس لا إله إلا الله الناس الصبح و في المستوصفات و في طابور الجمعية بعد

كلهم مالهم حل ليش كله معصبين و عاقدين النونه ما أدري...

الله يصلحنا و يصلحهم ...
:)