09 يونيو 2010

بس كلام...؟!



احنا شعب يحب يتكلم ويتحلطم وما يعرف يعمل بصمت، كل شي نبي نتكلم فيه ونفهم بكل شي من تركيب ألعاب الأطفال لغاية الطاقة الذرية، وفي الديوانيات تلاقينا نتكلم في البداية عن مشكلة وطرح شبه راقي وجاد ويتحول ويتفرع الموضوع ونوصل لسعر كيلو "الميد" وليش ان فلان تزوج وهذا طلق وهذاك شايف نفسه ونعيش يومنا على كلام الجرايد، حتى شركات الاتصالات اتصور لو وزير الداخلية قرر يطبق اللي براسه ويراقبنا راح ينبط راس هالرقيب لأنه راح يدوخ ولا يعرف شسالفه هالشعب اللي يسولف 24 ساعة باليوم!!

العجيب الغريب ان الاجانب لما يسافرون سياحة أول شي يتخلصون منه التلفون، على عكسنا تلاقي اول شي نفكر فيه شحن التلفون واللاب توب وطبعا بعضنا يعتبر نفسه رئيس مجلس ادارات شركات عابرة للقارات والبورصة العالمية من غير اتصال او "مسج" تضيع!!

الوالدة الله يحفظها تتعامل مع التلفون وكأنه دوام قطاع خاص، تشغله الصبح لغاية 1 الظهر وبعدين من الساعة5 العصر لغاية 9 مساء، وماتتصل منه الا للضرورة اذا كانت خارج البيت اما داخل البيت فتقول ان تلفون البيت احسن.

تبون الصج حسبتها كل اسبوع اصرف 5 دنانير تعبئة هذا بالوضع المعتاد لكن مرات اصرف 8 دنانير، حسبوها بالشهر وحسبوها بالسنة؟!

تقريبا 400 دينار مصاريف اتصالات!! بالسنة يعني لو اوفرهم واسافر فيهم مو احسن..

قررت ما اتكلم وايد بالتلفون لأن بيئيا في شي اسمه تلوث سمعي..

شرايكم نخلي السوالف والهذرة ونشتغل ونعمل..

هناك 6 تعليقات:

أم الخـلـود يقول...

والله أنا مريحة دماغي سنتين من غير تليفون ولا جوال .. عشان كدا عرفت أبدع في الكتابة ولله الحمد.

فريج سعود يقول...

والله فكرة الوالدة شغل عدل

بس اشتر لها بلاك بيري هدية بعيد الام الياي وانت راح تشوفها تتغير

الجودي يقول...

-------
-------
-------
-------

لا ما ينفع إحنا شعب لازم نتكلم انفس بالكلام يعني لا أحوال نقدر انعدلها ولا انتحلطم جنه صعبة ...
'
'
'
'
'

لعبة الصمت مأثرة عليك كاريكاتير حتى لو انعرفة قوانينها بس ترى صعبة خل انهذر أحسن من لا يصير فينا شي من القمته ..

@alhaidar يقول...

بو بدر حبيبي انا قعد احضر موضوع حق المدونة خاص بشركة زين وعن المكالمات عموما .. وشكلي بسوي حملة وطنية لتخفيف التحدث بالهاتف النقال .. فيك شدة معاي ؟ :)

ترى جد .. :)

كاريكاتير يقول...

ام الخلود..

تمام الله يهنيج بس ابي اعرف شلون تتواصلين مع الدنيا هل عبر الفاكس ام عن طريق البريد التقليدي :)

فريج سعود..

رافضة اي تلفون حديث اهم شي عندها التلفون خطه واضح والشاشه كبيرة ومافيه تعقيد :)

الجودي..

جربي كل يوم ساعة ماتستخدمين التلفون بالمرة...


بوكوثر...

فوقه :)

الجودي يقول...

لك مني 3 ساعات

:)

أنا مو راعية تلفون ذاك الزود

كنت أقصد الكلام بشكل عام و التحلطم