24 يونيو 2009

ساس البلا..!!



نورية قبل لا تسافر بيروت اتهمت د.رشا الصبا بأنها المتسبب الأساسي بملف شهادات البقالات!!

مجرد أسئلة "تسربت" من عقلي للمدونة!!

وين كنتي يا نورية من صرتي وزيرة إلى غاية ما حجزتي تذكرة سفر لبيروت؟!

وينج عن تعيينات الجامعة والتطبيقي لموظفين حصلوا على وظائفهم على أساس شهادات البقالات؟!

وينج أصلا عن التجديد لوكيل التعليم العالي د.رشا الصباح إذا القانون ما يسمح لها بالتجديد وصار لها تقريبا 20 سنة وكيل وزارة؟!

وينج ووينج ووينج..

حتى القرار اللي اخذتيه ترا يناقض نفسه!!

القرار يعترف باللي اشترى له شهادات "اشتر شهادتين تحصل على شهادة مجانا" اعترف باللي اخذ الشهادات وتوظف على أساسها وبنفس الوقت يوقف ضد الاعتراف باللي يبي يوقف بالدور بالبقالات!!

انا ما أبي أعرف منو ساس البلا..لأن هذا ما راح يأثر بالموضوع احنا نبي نحاسب ساس البلا ومطلوب من "أصحاب الضمائر الصاحية" فتح تحقيق ويتم إحالة نورية الصبيح ود.رشا الصباح وكل مسؤول عن هذا الملف للتحقيق وقبلا تصدرون القرار..

مطلوب من ديوان الخدمة المدنية يحاسب المواطنين اللي اشتروا من البقالات شهاداتهم وحصلوا بمقابل شهاداتهم الرخيصة مناصب وألقاب..

وراح أعترف لكم بالآتي

كنت ناوي أدرس في أحد الجامعات البحرينية ماجستير اللي طريقته "مرة كل أسبوع" لكن سبحانه كنت شاك بالبقالة البحرينية، لغاية ما ظهرت الحقيقة!!

اشوه ان شهادتي من جامعة كويتية عمرها أكثر من 40 عام.

صج ان الجامعة اللي درست فيها "متطرشة بأكثر من منطقة بالكويت لكن ميخالف اسمها شهادة موثوق فيها.

هناك 4 تعليقات:

دكتور كويتي يقول...

يعطيك العافية على هذا الموضوع
الحين اللي راحت و ما تحاسبت على الاقل سوت شى ووقفت الجامعات المضروبة
الدق على الموجودة... اقصد رشا
والسلام

خديجة البهاويد يقول...

استغرب من ناس يجذبون الجذبة ويصدقونها
شلون يفرح البني ادم بورقة تشهدله بانجاز اهو ماحققه
وشلون يرضى على نفسه يستقبل نظرات الاحترام الي يلقاها من الناس نتيجة لشهادته الرخيصة
ماعاد في ضمير صاحي

الأستاذ حمام يقول...

اتوقع خطوتها باصدار هذا القرار ترجمه فعلية لاقوالها... ليش ماسوت شي؟ انت ماتدري ان الوزير مو كل شي بوزارته؟ طبعا في ضغوط تهدد حتى وجودها بالوزارة اذا مارضخت.. بتقول ليش ماتستقيل؟ بقولك في وجودها المحصلة بالنهاية زينه.. والدليل هذا القرار..

كاريكاتير يقول...

دكتور كويتي

حتى إذا راحت هذا ما يعني ما تحاسب ويتم استدعائها..

نعم اصدرت القرار متأخرا لكن هذا ما يعني انها خلاص ما تحاسب؟

اختي خديجة

اللي اتشو ماتو..لازم يتم التدقيق بشهادات الموظفين..

عيل موظف ما أخذ ولا يوم اجازة خاصة حصل على الماجستير والدكتوراه وهو على رأس عمله!!

استاذ حمام

شكرا لمداخلتك

ما قصرت الوزير اصدرت القرار لكن ان تكون بمنصب وما تبي تكون ند للتهديدات والضغوط اتصور لابد من محاسبة الجميع نورية ود.رشا وكل من ساهم في انتشار انفلونزا الشهادات!!