29 يونيو 2009

بلاك بيري لكل كويتي!!





هالأيام والايام اليايه راح نشوف بعض النواب ما ادري عاد كلهم ولا بعضهم أي الأقلية، هالنواب راح يسمعونا مقترحاتهم اللي يمكن توصل لتخصيص الدولة مدلك تايلندي يهمز كل مواطن ويلحقه وين ما يكون حتى لو بالحمام!!

نائب يقترح تسمية شارع بإسم شخصية توفاها الله، ونائب يبي مدرسة بإسم شخصية أخرى ونائب يطالب ببناء مخفر في منطقة ما ونائب يرغب في فتح المستوصف 24 ساعة، وهكذا...

وبعد أربعة سنوات هذا إذا الله كتب لمجلس الأمة يكمل مدته، فراح تشوف نفس النواب راح يسطر لك اقتراحاته بعد ما يجمعها من الجرايد على طريقة "القص واللزق" ويقولك شوف انا اشتغلت ما كنت نايم.

لو انت نائب شنو راح تقترح؟

ناطركم..


بالنسبة راح اطالب وزير المالية بتخصيص بدل "رفاهية" لكل أسر كويتية خصوصا في ظل الطلب الزائد على "البلاك بيري" خصوصا ان زبابيط النقعة واللي للحين ما طلعو من البيضة كل واحد يتشيحط بواحد ولا مشتري له التلفون هذا ولونه على لون عدسةعيونه!!

ماني ضد ان الكويتي يشتري التكنولوجيا المتطورة لكن بذمتك واحد عمره 11 سنة شنو يبي بالبلاك بيري!! من كثر عماراته ولا الـ 100 ألف سهم بالبورصة او المنتجعات اللي يملكها في بورت غالب!!

هناك 9 تعليقات:

Eng_Q8 يقول...

شنو ماراح اقترح اصلا

كاريكاتير يقول...

لا لا ما يجوز كل شي بالدور نبدي بمحمد هايف اللي اتصور راح يتيح المجال لسيل العوضي اللي راح تدز ايميل لرئيس المجلس باقتراحاتها اما خالد الطاحوس فراح يرجع للمجاميع يشوف طلباتهم وتالي يرد المجلس، اما بورمية فاحتمال يكون آخر واحد لأن طلبه صعب!!

جنون الكويت يقول...

اقترح صرف مبلغ 20 الف دينار لكا اسره كويتيه كل عطله صيفيه عشان يصيفون بعيد عن الحر €......شرايك بالاقتراح مو شغل عدل

غير معرف يقول...

روح امريكا بريطانيا كندا استراليا .. حتى زبابيط نقعتهم عندهم بلاك بيري شالمشكلة اذا زبابيطنا يستانسون عليه؟

كاريكاتير يقول...

يا جنون الكويت..

شرايك نصرف لكل أسرة شاليه في هاواي وكوخ في جبال الألب ومعاهم يخت ونصرف لهم ماجلة في كل ديرة يروحون لها..

وبعدين يكون لكل أسرة نائب يشوف طلباتهم وبالمرة يصرف لهم شارع يوصلهم وين ما يبون الكويت..

هذا اوفر!!

امريكا للحين ما طبيتها واستراليا شفتها بالصور اما بريطانيا فعيالهم ما شفتهم الا ويمشون بأدب واللي يبي يتشيحط يلبس له نظارة او بلوزة رياضية!!

ما شفت بايدهم تلفونات!!

Um il sa3af wil leef يقول...

قانون لحماية الأطفال من الإستغلال وقانون لحماية حقوقهم في حالة الطلاق

كاريكاتير يقول...

ام السعف والليف

حدج عتيجة..

نوابنا الحمدلله حطو كل القوانين اللي تقضي على انتهاكات حقوق الانسان وما ظل في ولا عامل تنظيف في الشارع ينظف الا وعنده بدل تلوث وبدل عرق وبدل عطش وبدل بهدلة وبدل نوم..

غير معرف يقول...

لو انا نائب اقترح يوقفون الاقتراحات إلّي ما منها فايدة !! وسنعوا ديرتكم بالإنجازات مو الإقتراحات !!!

كاريكاتير يقول...

ايفيز هارت

انا اقول يحطون لهم فلتر ألماني وكل نائب يقول اقتراحاته ويحق له بكل جلسة اقتراحين..

مانبي نواب يصرحون الجرايد عن اقتراحاتهم..