28 يوليو 2009

بورزيقه زعيم العصابة!



معاكم بورزيقه انا كنت واحد من الطلبة اللي تخرجت أيام ثانوية كيفان واللي حصلو على بعثة للدراسة في الولايات المتحدة الامريكية، ودرست هناك 6 سنوات أول سنتين ضاعو على دراسة اللغة وباجي السنين خلصت دراسة الجامعة ورديت الديرة.

انا من فريج اسماعيل الازرق، وسبب هالتسمية لأنه متولع بالمنتخب وكان لاعبه المفضل مرزوق سعيد!!، المهم خل أقولكم وحده من السوالف اللي صارت معاي بأمريكا واتمنى إنكم تعطوني ويه ولقصتي.

وصلت أمريكا بعد ما ترست الجناط دهن عداني واجياس هريس، وطبعا ما أقولكم شلون كان شكلي والأمريكان يتفلسفون علي بالانجليزي وانا ماني عارف شنو أقولهم غير "I`m Kuwaiti man come here to study" عالجملة حفظتها من طلعت الطيارة لغاية ما وصلت المطار، وطبعا أنقذ الموقف واحد من العرب اللي الظاهر مهاجر من ديرته وما قصر كمل جميله وخلاني أروح الجامعة بالتاكسي ولأني كويتي دفعت حساب التاكسي وحسابه، خو مو معقولة بعد كل هالخدمات ما أوريه كرم اهل الكويت!!

ما علينا الايام تعدي لغاية ما صار لي تقريبا سنتين هناك، طبعا كنت أكتب مكاتيب للأهل واتصل عليهم بين فترة والثانية، كانت بعض المكالمات تطول لأني اكلم الوالده اللي تنقلني مقادير المجابيس والأكلات اللي ما أشوفها غير بالأحلام، عاد وانا رايح السوبر ماركت هناك قصرني شوية فلوس وقلت أروح اقرب ماكنية سحب آخذ لي جم دولار لزوم الاغراض، وللأسف الماكينه كانت ماتشتغل ومافي غير اروح المدينة اللي يمنا، بيني وبينكم انصحوني وايد من الامريكان اروح واسكن هناك على أساس انا لوني مثل لون السكان اللي هناك "خوال يعني" بس انا ما حبيت هالشي لأنه فيه عنصرية وثاني شغله هالمدينة نصها عصابات وانا متعقد من العصابات، لأن أيام المدرسة الربع يتهاوشون مع عصابات عيال كيفان والشامية وانا اللي انطق سنه بساع!!

ذاك اليوم قررت اروح المدينة واخذت القطار، صج فرق بين المكان اللي عايش فيه والمكان اللي زرته فرق في شكل الشوارع والريحة والناس، وصلت ورحت أدور البنك وقبل لا أوصل طليت على محل يبيع أسلحة "شوازن وام صجمه" تذكرت أيام البر والربيع كنا نطلع خمستعش صبي وبجيب صغير وندور لنا حباري ولا زراير، ما علينا قلت ادخل اتطمش ومن دخلت انبهرت للاسلحة الموجودة أشكال وألوان وأحجام، حتى السجاجين غير وملابس الصيد والبر كان المحل صغير بس واضح ان فيه اللي يكفي للمشاركة بأي حرب.

انا دخلت المحل اتمقل وراعي المحل ما فكر يرحب فيني، لغاية ما فكرت اتطمش على الصور اللي معلقها على الطوفه، وتوني ابي اشوف الصور ولا راعي المحل اييني ويقول لي "أي خدمة؟!" كان منفس لكن من طاحت عيني بعينه رجع خطوتين وتبلعم وصبت عظامه، وحاشه عقر بقر، هذا شفيه بعد لا يكون بيستنزل علي مو وقته؟!، سألته شفيك انت مريض؟ ما يبي يرد خايف الحبيب يرجف، جان يقولي انت شلون دخلت المدينة والشرطة تدور عليك؟!

شرطة تدور علي..انت من صجك "قلتها بالانجليزي" يا معود انا وين والشرطة وين يبا انا ادرس بالجامعة، وماني من اهل امريكا ولا حتى اعرف يصير لي فيها!! طبعا الحبيب ما صدقني وقالي شوف، جان يوريني صورة واحد تشبهني نازله بالجريدة عندهم مطلوب للعدالة يقولون إنه زعيم عصابة وذابح له جم واحد ومهرب مخدرات بعد! يعني ببساطة صاحب الصورة هذا اقل ما فيها يروح مأبد او اعدام بكرسي الكهربا، حاولت افهمه اني مو صاحب الصورة ابد مافي براسه ماي، لا ويقولي تكفه لا تقول لهم انك دشيت هالمحل، الظاهر ما يبي مشاكل، عاد انا قلت ليش اجابله خل اطلع قبل لا يقولي اني ذابح كنيدي ولا حتى واحد من اهله!!

انا بطلع من المحل ولا خمسة شباب خوال عضلاتهم مثل المصارعين اللي نشوفهم، يصكون على فريد شوقي وشكري سرحان، هالشباب كل واحد يبحلق فيني ويحشون ويتحلطمون نعم، عسى ما شر، جان يمسكني واحد فيهم ويلمني الا كسر ضلوعي عصرني، وربعه يرحبون فيني وكل واحد مستانس متشققين، الحين عرفت على بالهم انا المجرم والظاهر هذه عصابتي!! أهلا انا ناقص، يا بو الشباب انا مو صاحبكم انا من الكويت، طبعا ما يخلوني أشرح شي، وياخذوني معاهم غصب، وكل واحد فيهم ما ادري شنو قاعد يقول ،وانا من شفت السالفه قلبت جد جان انحاش واركض، الجماعة خبر خير اركضو وراي من شارع لشارع ما ادري وين أروح، جان يلمحني شرطي توقعت يساعدني جان يرفع سلاحه ويقولي اوقف بمكانك، يا عمي هذا وقته انا مو المجرم!!

اسمع صوت الدوريات حسيت اني عفست المكان، وانا منخش ورا درام الزبالة، تذكرت ايام ما كنا نلعب "لبيدة" طبعا الدنيا بدت تظلم وانا بصراحة ما كنت اطول بره السكن اكثر من الساعة 7، لأني اقعد اغسل ملابسي وارتب الغرفة واشوف لي شي آكله، هذا غير الدراسة وتعال ترجم وانزل المكتبة او شوف لك احد يساعدك!! ما ادري ليش تخيلت نفسي مصيود وحاطيني بالسجن ويوصل الخبر للكويت، مو حلوة بحق امي وابوي ولا حتى ربعي (عزوز وجسوم ورشود العصل) يا جماعه اهون علي انسجن من اني انزف ولا حتى ابوي يحوكني ذاك الطراق الراشدي، اللي ينزل الكنار من السدرة، عاد اللي قاعد يصير معاي مو وقته يصير، انا ما احب انخش "انحصر" واذا انحصرت ما اعرف افكر، فقلت اروح اشوف لي طريج لمحطة القطار ومنها ادخل الحمام وتالي اركب القطار واطير للجامعة، بس المشكلة اكيد ان المحطة فيها شرطة وأوصافي عمموها، هذا اذا مو ناطريني بأول الشارع!!

وانا قاعد افكر ولا اسمع صوت جلب يلهث ما ادري وينه، والصوت يقرب يقرب، وهذاك الجلب الاسود تقول ثور من حجمه وشكله مسعور، اكملت يعني شرطة وعصابات طوفناها وطراق راشدي من الوالد ملزوم فيه، ومحصور اتحمل بس جلب مسعور، انحش وقمت ركضت بأسرع ما عندي اللي ما احس اني امشي على ريولي احس اني طرت، ما لقيت غير مطعم شكله ماادري بس المهم دخلت، وهناك تعال شوف الاشكال اللي طافي من الشرب واللي يغني مع رفيجته واللي قاعد يفصخ هدومه ما ادري ليش، طلبت من اللي واقف اظنه راعي المطعم التلفون، توني ابي اتكلم ولا شوية رياييل يطلون بويهي أثاري عارفين سالفة المجرم ويبون يطقوني، لا انا رحت من جيس اهلي خلاص، تدري شلون قمت وانحشت ونص اذا مو كل اللي بالمحل يركضون وراي، الشارع صار يركض وانا اركض ما ادري وين اروح، مافي غير وانيت قبالي اقط روحي بالدبه، وفعلا مثل الافلام طمرت واشوه راعي الوانيت ماثبت وداس الحبيب وطاف فيني الشوارع، وقف الحبيب عن الاشارة ولا العصابة اللي خبركم بالسيارة اللي يمنا، يبون ينزلون ولا انا انزل قبلهم واركض، ما ادري وين المهم انحاش، بصراحة من زمان ما ركضت اخر مرة بالمدرسة لما مدرس العربي استاذ شوقي صادني ادخن بالملاعب، وقلت انحاش وشافني وقتها مدرس التربية الرياضية استاذ عزت اللي اخذني وسجلني بفريق ألعاب القوى وصرت "مرزوق السلوقي" على اساس اني سريع وفزت ويبت للمدرسة جم كاس وميدالية!!

هذا وقته اقولكم بطولاتي ما علينا صرت الحين بفريج تقريبا مافيه لمبات، وقلت هالمكان احسن مكان، بروحي خال يعني لو ادخل بمكان ظلمه محد يشوفني، وانا اتمشى فجأة جان اطيييييييييييييييييييح ببالوعة..


























ها شسالفه ولا صاحبي اللي معاي بالغرفة يقعدني، وقوم باقي ربع ساعة على المحاضرة، ولا طلع حلم، وزعيم العصابة انا حلمان فيه لأني شفت فيلم عصابات ومستانس ان راسي مثل راسه "آفارو"

اشوه حلم مو صج!!

قصة خيالية – بدر بن غيث 2009

هناك 4 تعليقات:

فريج سعود يقول...

انا تعبت من كثر ما انت ركضت بالحلم

كاريكاتير يقول...

ما عليه ريح واخذلك نامليت او سينالكو..

عسى اعجبتك!!

Eve's Heart يقول...

ههههههه تسلم أيدك !!

كاريكاتير يقول...

ايفز هارت

وايدج ان شاء الله ما طولتها عليج