11 أغسطس 2010

الحلقة الأولى-iron man kuwait trip






طماشه بكشرز

تقدم

IRON MAN
KUWAIT TRIP

قصة ورسومات وإخراج
بدر بن غيث

---------------

الحلقة الأولى

هذا المسلسل برعاية مدونة laish

www.bloglaish.com

---------------

ضيوف الحلقة حسب الظهور:

ابو بدر
ام بدر
السيد محمود حيدر
السيد جاسم الخرافي
الصحافي ياسر العيله

----------------


مقدمة (حالي حال المؤلفين)

مثلي مثل أي طفل يولع ويحب الأبطال الخارقين مثل "سوبرمان-باتمان...الخ" وهذا الولع كبر معاي، حتى إن لما كبرت بديت أطلع حرتي أكثر، خصوصا لما كان ابوي ولا حتى اموي مرات ما يلبون طلباتي "الماصخة" لما أطلب منهم لعبة أو شريط حق هذا البطل أو ذاك، وتلاقيني ماصار لي جم يوم شاري على حسابهم لعبة وشريط!!

لما كبرت اعتقدت مسألة الفلوس هي العائق وراء حصولي على هالأشياء، لكن اكتشفت ان الفلوس ما كانت العائق وراء امتناع ابوي وأمي من شراء اللي اطلبه، بكثر ما هي كانت حكمة كان لازم اكتشفتها لما اكبر، والحين انا كبرت وما اكتشفت شنو الحكمة؟!

المهم حصلت نسخة "موأصلية" من فيلم IRON MAN 2 وقلت لازم أشوف شنو ممكن يقدمون في الجزء الثاني من هذا البطل اللي تتوفر فيه التكنولوجيا المقنعة والقدرات اللي تخليه أقوى رجل في العالم، وللأسف ما كان الفيلم بالمستوى المطلوب وكأنه مجرد "سلق بيض" ويومها تحسفت على "النص دينار" ولو شاري أي شي ثاني من البسطة أفضل؟!

قعدت يومها أفكر بالخسارة الفنية اللي تعرض لها البطل وصورته اللي اهتزت في بالي، خصوصا وأن بقية الأبطال الخارقين كانوا يقدمون أفضل ما عندهم وهم يدرون ما يملكون كل اللي قدر يحصل عليه "الرجل الحديدي" ولما راجعت حساباتي، قلت مافي غير إني أساهم في إنقاذ هذا البطل وفي نفس الوقت استعين في قدراته الخارقة، ويكون معاي بالكويت علشان يحل معاي مجموعة من المشاكل والقضايا اللي اشوفها صعب تنحل إلا اذا كان مثل الرجل الحديدي موجود بينا!!

ما قدرت انام يومها ودخلت الانترنت فكرت ادور الرجل الحديدي في "face book" لكن للأسف ما حصلت له شي، وقلت أدور في Google لكن للاسف ما طلع معاي غير صور ومواقع تتكلم عن الفيلم ولقيت الموقع الالكتروني الخاص بالفيلم، وكذلك الموقع الخاص بشركة MARVEL، فكرت اني اتواصل معاهم وأبلغهم إني ممكن أساهم في تعويض خسارتهم من عرضهم للجزء الثاني واللي ما كان بقيمة ولا بتشويق الجزء الأول؟

لكن كل هالأفكار هونت عنها لأن الشركة الأم ما اتصور بتفكر إني مو من صجي، ولا حتى أصلا اني قادر ماليا أعوضهم، مو معقولة أكون بيوم وليلة "محمود حيدر" ولا حتى "جاسم الخرافي"، المهم استسلمت وقررت إني أحذف الفكرة من راسي، وأثناء تواجدي على "face book" قررت إني أبحث أكثر يمكن ألاقي أحد عنده مثلا Email الرجل الحديدي، بصراحة قلت بالكويت مافي غير إني ألاقي أحد يمون على ياسر العيلة، المتخصص في استقبال الفنانين من المطار لصالة هلا فبراير، لكن قلت ياسر العيلة راح يحسبها معاي حسبة وبالنهاية راح ياخذه مني؟! قلت أشوف كاتب صحفي ولا حتى سينمائي كويتي معروف، للأسف مافي أحد أقدر أوصله بسهولة ولا أتصور يعرفون يوصلون للي أبيه...!!
كرت زيارة

يعني شلون أهون عن الفكرة خلاص أدفنها مع غيرها من الأفكار اللي ما حققتها؟!، لا طبعا قعدت أحوس وأحوس لغاية قدرت أوصل للرجل الحديدي، وبعثت له رسالة الكترونية واللي اخذت مني تقريبا ساعة أعدل فيها وأضبطها وأشرح فيها كل اللي ابيه، ومن بعدها قررت أنهي السهرة وأنام.


يتبع غدا...

هناك 11 تعليقًا:

Hashimoto يقول...

لول !
خوش مقدمة
P:

بانتظار الحلقة الثانية

=)

Mohammad Al-Yousifi يقول...

ناطرين

:)

bof-10 يقول...

مو قلنالك يايلك الدور ماتصدقني


بأنتظار الحلقه القادمه

فهد الغريب يقول...

يا سلام عليك يا استاذ ...
مقدمة روعة وبانتظار الحلقة الياية:)

سلة ميوّة يقول...

مبارك عليك الشهر

:) باعترف لك بسر

من ذاك الشهر الي بالسينما حطولنا مادري منو بكشرز

وانا اقراها

baksharz!
واقول شهالإسم أقيد تركي !
هيههيهيهي


خوش بداية...وناطرين الحقية الثانية

أهل شرق يقول...

مبارك عليكم الشهر

وعساكم من عواده

خديجة البهاويد يقول...

شوقتنا .. ناطرين الحلقة الثانية :)

كاريكاتير يقول...

هاشموتو

اشكرك على المتابعة وان شاء الله تعجبك الحلقة المقبلة

مطقوق

وانا بعد ناطر تعليقاتكم :)

بوفتين

ياي لي الدور مشكور بشرتني بيطلع لي بيت حكومة :)

فهد الغريب

تحياتي لك وان شاء الله يعجبك المسلسل

سلة ميوه

الاخ العزيز المبدع داود شعيل استخدمها

بالنسبة لي على قدي "طماشه بكتشرز"

ان شاء الله تعجبج الحلقة المقبلة

نمووول يقول...

شوقتنا للجزء الثاني
بانتظار التكملة

مبارك عليك الشهر
وكل عام وانت بخير ,,

le Koweit يقول...

بانتظار الحلقة الثانية
:)

ومبارك عليك الشهر

الجودي يقول...

مبارك عليك الشهر

و كبر الخط باجر علشان نشوف عدل

متابعه و بحاول أعرف الحكمه P;