13 أغسطس 2010

الحلقة الثالثة IRON MAN




الحلقة الثالثة

ما حبيت أصدمه وخليته يكمل عشاه وطبعا شرب البارد وحسيت داخ خصوصا وإني حاط له برنامج إذاعي مقدم البرنامج الظاهر يساسر الناس ويبيهم ينامون بالسيارة، مو احنا ناقصين حوادث!! ما علينا خذيت فيه لفه بشارع الخليج ووريته الكويت الجميلة خصوصا العمارات في الفترة المسائية ومع ظلام الليل تخش عيوب مدينة الكويت المهجورة، وتخش فضايح بيوت بنيد القار، وطبعا قعد اهو يسألني شنو هذا وشنو هذا وانا أجاوبه بكل أريحية، لغاية ما قربنا من مجلس الأمة وقالي what about this building? قلت له هذا بيت الأمة "البرلمان" وإنه رمز الديموقراطية اللي كانت يوم من الأيام "حرام" عند ناس وبيوم وليلة صارت"حلال" وعند البعض كانت "تعدي على الحكام" وتحولت بالنسبة لهم شوية كراسي تخيلهم من "سواق تكاسي ووانيتات" إلى أصحاب شركات عمالقة؟!

بيت الأمم المتحدة

طحت بمشكلة وبشغلة ما حسبتها وين راح أسكن هالضيف؟ بيتي عبارة عن شقة زين شايلتني انا وعايلتي؟! وبيت أهلي ما يصير احطه بالديوانية ولا أقدر أخليه في غرفة السواق، أخاف "يصير شي"!! لا تفهموني غلط أخاف مثلا يحرضهم على الاحتجاج والمظاهرات وتنطلق ثورة السواق والطباخين من بيتنا وتعم البلاد فوضى، وقتها عاد مو بس أهم يتسفرون الكل يتسفر!! ما علينا خلونا بالمهم لازم أفكر الحين وين ينام، وانا سألته إذا كان معاه أي أوراق رسمية مثل الجواز أو حتى بطاقة مدنية، لحظة أي بطاقة مدنية ما عندهم هذيل، بعدين ليش إييب الجواز وهو طاير من هناك بنفسه من غير طيارة، بصراحة كانت وهقة والساعة الحين قريب الثانية عشر ليلا، ومافي غير إني أخليه ينام فوق السطح لكن الخوف إني أصحى الصبح آلاقيه ساح من الحر!! تدرون شلون قررت أوديه جليب الشيوخ هناك كنت أعرف صعيدي مرة من المرات صبغ لنا السرداب فاحتمال يضبطني بغرفة محترمة عندهم ببيت العزابية؟


قررت أصارحه وأقوله الآتي:

Looking front of you the first problem you need to solve it? And if you do it you will see my first homework. you will sleep in somewhere like united nations house its very nice way to learn new language, traditional and costumes for many of people who work in Kuwait and they want to make there dreams.

للي ما يعرفون انجليزي قلت له..

شوف جدامك أول مشكلة نبيك تحلها؟ واذا حليتها راح تشوف أول واجب لك، راح تنام في مكان ما يشابه بيت للأمم المتحدة (ماقلت له بيت عزابية) هذه طريقة زينة لتعلم لغات وتقاليد وعادات يديدة من ناس يشتغلون بالكويت ويايين يحققون أحلامهم.

*ملاحظة1: المكان مشبوه وراح أخليه يروح بيت العزابية ويسأل عن عوض البواب اللي ولد عمه الصباغ اللي صبغ السرداب، وبصراحة انا ما عطيته فلوس لأن راح يفهمني غلط وقلت له في حال صارت لك أي مشكلة يقولهم إنك مباحث؟

*ملاحظ2 : أخذت منه الغترة والعقال لأن راح يكون شكله غلط بعدين أنا متسلفهم من راعي المصبغة اللي بالجمعية.

هناك 4 تعليقات:

نمووول يقول...

ههههههههههههههههه
united nations house
ككككككككك, وربي ابداع
القصة ولاحداث
نوع جديد من الكوميديا
بانتظار التكملة ..

Eve's.Heart يقول...

هههههههههه
اهم شي الغترة متسلفها !!1

يلا ناطرين التكملة ^_^ عفية استاذ بدر طول اشوي احسه وايد قصير ما شبعنا

سلة ميوّة يقول...

LOL

هيهيهيهيه

صراحه الجزء عجيب....

انا سويت لك دعايه امشي واقول اقرو ايرون مان على مدونتك..

صج شي...


يعطيك العافيه هالجزء ضحكني وايد:)
واهم شي
شوف جدامك هيهيهي

مبددددع

عشاك عالقوة

الجودي يقول...

الديرة بالليل

و الغترة متسلفه

كمل معاك على الخط ..