14 أغسطس 2010

الحلقة الرابعة iron man



الحلقة الرابعة

سامحونا ما يمدي نحط اغنية المسلسل لان الاعلانات مو ملحقين عليها؟!

ضيوف الحلقة حسب الظهور:

شون مايكل
هولك هوقن
هريدي ولد عم معلم القهوة


نزلته من عند الباب وقلت له حاول ماتتكلم وايد وكثر ما تقدر تكلم عربي او انجليزي مكسر، شلون ما ادري المهم يحاول!! وفعلا نزل وأخذ معاه باجي العشا "طلع بخيل" وخليته يروح اما عن نفسي فعلى طول ما صدقت خبر وفوق تحت ورديت البيت لأن كان وراي دوام باجر الصبح.

وصل iron وكان الشارع مافيه غير هنود يتمشون بالوزرة (جمع وزار) وجم واحد من مختلف الجنسيات اما الصعايدة بالذات فتجمعهم في القهوة اللي أساسا عبارة عن كراج سيارات حق البيت اللي تحول لفندق بوربع نجمه للعمال، المهم الصعايدة يتابعون مباراة في المصارعة بين شون مايكل وهولك هوقن!! وواضح ان الجمهور متابع بحماس والدليل إن التلفزيون معلقينه بالسقف وأي حركة ممكن يطيح على راس معلم القهوة اللي قاعد يحسب عدد روس الشيشة الموجودة وشكثر محتاج حق عرس ولد عمه هريدي؟

طبعا دخل iron القهوة ومحد سلم عليه لأن واضح هولك هوقن ماسك شون مايكل وطايح فيه طق والشباب بالقهوة يصفقون تقول ولد عمهم بالتلفزيون!، راح صاحبنا وسأل معلم القهوة وين عوض البواب؟ للأمانة معلم القهوة خاف لكن قال هذا أكيد عامل حدادة لابس لبس الشغل للحين ما بدل؟ وفعلا طلب له جاي "حاجم" وخلاه يقعد لغاية ما يشرب الجاي ويشوف شنو يبي؟ وطبعا وصل الجاي وصاحبنا ما صدق خبر جرب الجاي "من باب إنه كرم عربي" وواحد من الموجودين زاد هالكرم بشفطتين من الشيشة السلوم، ومن عقبها زقارة كيلوبترا عربون محبة من محمدين اللي كان يضبط الفيديو كل ما اخترب عليهم شريط "الحزام الأزرق".

ما اطولها صار هالحوار بين معلم القهوة والموجودين مع iron..

Iron: excuse me? Where can I found Awad bawab?
المعلم : يا ولكم يا ولكم اهلا اهلا شكلك بتعرف انجليزي قوي قوي بص يا باشا عندينا هني في الحساوي many عوض بس أي واحد فيهم عاوز..عاوز اللي يصلح المواسير ولا الستلايتات سوري سوري seatlete ولا عاوز عوض بتاع غاز الفروانية ولا عاوز عوض ابن عمي بس ده بالصعيد لسه بيدرس اعدادي وقبال أمنتك عاوز يتجوز نفيسة بنت رجب الطحوني بس أمها مش عوازها بتقول عوض لسه ميعرفش internet؟

طبعا تدخل كل من في القهوة لشرح ومعرفة اللي يبيه iron لكن الحبيب ضاع معاهم فقرر انه يسكتهم وصرخ صرخة "من قلب" وقال..

PLEASE..PLEASE..

نط واحد من الحضور واللي كان فاهم وايد وقال..يا رجاله الواد ده من الشرطة انا سامع بليز دي بالافلام البوليسية حتنط الشرطة علينا اهربو يا رجاله؟!

هناك 7 تعليقات:

سلة ميوّة يقول...

ما مداني اقرا الحقة الثانية والثالثة
ومن اللقابة واللقافة قريت الرابعه

بس اقولك شي!!!

غشييييت اتخيل الشفطة..واشوف زقاير كليوبترا:) و اسمعهم يصفقون...

وتخلته وهوا يصلحها
ستلييييييييييييت هاههااي

صراحه
أبدعت...سرد عامي روعه... ويخليك اتعيش جو اللي حولينك بوصف لطيف


برجع اقرا الي طافني
مساك الله بالخير

Abdulwahab يقول...

هههههه خوش مسلسل والله استاذ بدر , ناطرين الأكشنات :) يعطيك العافية :)

Kuwait Food يقول...

LOOOOOOOOOOOOOOOOOOOOOL

so funny! iron mannn in q8

gr8 idea really

غير معرف يقول...

هاهاهاهاهاهاهاهاهاها

عجييييييييية الحلقة اليوم

تسلم بدر :D

هدى اشكناني

فريج سعود يقول...

مبارك عليك الشهر





ولنا عودة للحلقات

الجودي يقول...

شون مايكل من وين مطلعه

وأهم شي لفيت ورديت البيت وخليته خوش شي ما تنلام وراك دوام لوووول

يعطيك العافيه

غير معرف يقول...

hehehhe please please
صارت
police police
looooooooooooooooooooooooooool nice one ;)
keep it up man