خلال الاسبوع الماضي تفاعلت مع العديد من الطلبة في المدرسة، مجموعة منهم مهتمين بالرياضة ومجموعة منهم مهتمين بالسينما والتلفزيون ومجموعة منهم ما يدرون وين الله حاطهم ومجموعة منهم بطبيعة الحال مهتمين بالعلم والمعرفة لكن كان من بين الـ 200 طالب اللي ادرسهم كان بينهم طالب اسمه أحمد هذا اهتمامه مختلف وصدمني!!
المكان : فصل دراسي
الزمان: آخر الحصة
الحوار..
أحمد: استاذ بدر ممكن سؤال؟
انا: تفضل بس ذكرني بإسمك؟
أحمد: انا اسمي أحمد استاذ.
انا: تفضل أحمد؟
أحمد: استاذ انا عندي طلب موسؤال؟ عادي؟
أنا: اذا تبي فلوس ترا انا مفلس؟ واذا داش هوشه ترا انا مااعرف اطق؟! (الطلبة يضحكون بالصف)
أحمد: استاذ اقدر أمرك القسم عندي موضوع ابي أسمع رايك فيه؟
انا: ايي ليش لا حياك واذا تبي تعال ومعاك (ريوقك) وأسمعك عدل؟
بالفرصة دخل أحمد من غير ريوق ودار الحوار التالي..
أحمد: استاذ بدر انت فاضي ولا اييك مرة ثانية؟
أنا: تعال انا ناطرك حياك اسحب هالكرسي واقعد؟
أحمد: استاذ اسمح لي انا ييتك بالفرصة؟
أنا: افا عليك حياك بس تعال وين ريوقك؟!
أحمد: انا أكلت بسرعة أول ما طق الجرس.
انا: ماشي شرايك بقلاص ماي او حتى ككاو؟
أحمد: لا مشكور انا ياي لك وعندي سؤال؟
انا: اسمعك أحمد تفضل؟
أحمد: استاذ ليش للحين ما بنو مدينة الحرير؟!
@@ شنو سويت روحي ما سمعت ورديت اقوله ..
انا: عفوا أحمد ما سمعتك؟! شنو قلت؟
أحمد: استاذ بدر ليش للحين ما بنو مدينة الحرير ابوي يقول المفروض مخلصينها 2012 بس للحين ما حطو اساساتها ..ليش؟!
المرة اليايه راح اقولكم باجي الحوار..!!
هناك 9 تعليقات:
سؤال وجيه أستاذ بدر .. جاوبه :)
ههههههههه
الاجابه عالسؤال بسييطه
ليش ما بنوا مدينة الحرير !!؟
لأن الديره فيها خرير (:
و للخرير اللي بالديره معاني كثيره عندي ! أهمها خرير ميزانية الدوله !(:
مرحباً من جديد
أول شي . اول مرة اعرف انك استاذ
يا ترى استاذ رسم ؟
ولا اجتماعيات << مادتي المفضلة :>
:
تصدق يلفتون نظري جداً الطلاب اللي احسهم " عندهم سالفة بهالحياة " اللي يفكر بأشياء محد يتوقعه ان قاعد يفكر او يحس فيها .. مو لان كنت جذي و الكل كان حسباله اني مسيجيينه ..!
لأن كل واحد عنده الحق بالتفكير و التعبير عن رايه و تساؤلاته و و و !!
بس للأسف محد يحس فيك و محد يسألك ..
ماكو حوار .. بالمدرسة ماكو حوار
بالبيت .. يمكن يكون فيه و احيان اكثر ماكو ..
الاصدقاء .. غاالباً آخر اهتمامهم اللي ببالك .. << عن تجربتي
فــ وين يروح أحمد و امثاله ؟!
اذا حصل من يحاوره فا هذا شي ممتاااز
بس اذا ما حصل .. و هذول الاغلبية ؟
مو حرام تموت افكارهم و يموت وعيهم بما يحدث حولهم ، نبيهم يعني حالهم حال اللي ما يدرون وين الله قاطهم مثل ما حضرتك قلت ..؟؟؟
:
ناطرة الجزء الثاني @---
و بالمناسبة : للأسف انا آآخر من يريد ان يعرف السبب !!<< ادري ان راح يسببلي اكبر خيبة ممكن اتلقاها
أحمد الحيدر الزميل الاخ العزيز
فعلا سؤال أنجب تساؤلات أخرى ستراها قريبا!!
أبوغرايم
كنت راح اجاوب نفس جوابك لكني لقيت اجابة ثانية!!
انعكاس
ما راح اقولج انا مدرس شنو علشان ما يتم اغتيالي او الاعتداء علي!!
من صرت معلم بوزارة التربية وحتى هذه اللحظة انا اثق بالشباب اكثر ما اثق بالشياب، والطلبة اللي صادفتهم وصادقتهم الكثير منهم لديهم من الوعي ما يدفع عجلة التنمية والإصلاح بأن تدور بظروف أيام لتغير الكويت 180 درجة.
من مساوئ النظام الموحد عدم وجود ساعة للنشاط الطلابي الذي يشرف لعيه المعلمون؟ بل ان معظم الوقت الطالب حبيس فصله ويتمنى أن يعلن عن حريق او اي حادث ليخرج من دون عودة للقفص المدرسي!!
تحياتي لكل من علق ولكل من تابع من بعيد لبعيد..
انا بجاوب عليه يا بدر
لانه ديرتنا الواحد ماصدق لقا هوا وتنفس يت ازمات سياسية يا حل المجلس او استجواب او تدوير الوزراء وكل وزير يمر على وزارة ولازم يشفط له جم فلس من هالمناقصات الي ماندري شنو مصدرها او مشاريع للشعب ولكن سري و بيي يوم من الايام و يبطون الجربه يابدر و يقولون لك انه مشروع مدينه العفن او قصدي الحراير مجرد مشروع او مقترح ولحد الحين مامر في مرحلة التفكير و الدراسه و تنفيذ هذا المشروع لانه حامض على بوز الكويتيين للأسف مشروع مدينه الحراير قاعده اشوفها كل يوم اهي مشروع مجلس الأمه الفاشل الي ماشفت منه لا خير ولا بركة لانه بصراحه كل نائب في هالمجلس يفكر بنفسه و اهله وداير مداره ولايهمه ديرته او مستقبل ديرته اهم شي اخذلي جم فلس انفع و استنفع
قوتشيا
اشوه انج مو قاعدة مع احمد!!
شوي شوي هدي اعصابج ما يسوى عليج!!
انا معاج مدينة الحرير حتى الآن حبر على الورق وان هناك من تنفع على حساب البلد لكن ما يصير بعد اعمم ان كل وزير او كل نائب او كل مدير اكيد باق!!
ترا اذا اللوحة بالنسبة لج سودة اكيد وانا متأكد ان في بقعة صغيرة بيضا في حياتنا.
انا معاج لكن ما يجوز اعمم؟
استاذ بدر ، اتهقى ناطرين دودة القز على ما تنتج؟ وهل ياترى فيه نقص بميزانية الدود؟ وهل مخزون الدود في الدوله يكفي لإنتاج نسيج مدينة الحرير؟ وهل ياترى المناقصه فيها فرض جزاء فيحال ما تأخرت الجهه المسؤوله؟ استاذ بدر ماغثيتك انا بأسئلتي اللي مالها جواب؟
الله كريم :(
elEjaba ma3roufa ...
le'ana el7achy eb Baiza..
elGol akthar men elFi3el..o hatha shay wayd e7err esara7a bs shensawy
ma bel yad 7eelah
Actions speak louder than words shay mu mwjoud 3endinah.
o 3ashan enafthoun ay shay yabeelhum Dahar.
emabyin enik etfathel etyping ekoun 3araby bas wallah ma 3indy
3araby.
fa e3therny
بوعلي
احتمال يزرعون حقول لدودة القز وهم اللي راح يبنون المدينة نظام "بي او تي" لكن تدري انا ما استبعد بناء مدينة الحرير بسهولة وبسرعة بعد لكن طبعا على حساب البيئة والمال العام وكل شي فيه مصلحة للمواطن.
غيرف معرف
ميخالف علشان أحمد سامحتك هالمرة تكتب بالانجليزي العربي ومعذور بكل كلمة تقولها علشان جذيه ابتسم انت بالكويت!!
إرسال تعليق