30 مايو 2010

مصدر وزاري رفيع المستوى!!




كل جريدة تسعى للحصول على أخبار دسمة ومرات "قليلة الدسم" حتى تثير الراي العام او تزيد من شعبيتها وتطلع لها بمزيد من الارباح المادية وهذا من حقها إنها تربح لكن مرات هالأخبار تكون ناقصة عن عمد او تخرج بصياغة يفهم منها معنى آخر؟!

ما علينا من الجرايد انا اللي باط جبدي تمترس/تخندق ورا مصادرها الوزارية والبرلمانية وغيرها، وتصف هالمصدر الخبري بأنه "رفيع المستوى" طبعا الوزارة تقوم وتقعد والناس تبي تعرف منو ورا "تسريب" هالخبر؟

بحكم تجربتي بشارع الصحافة يكون عادة هذا المصدر هو المسؤول نفسه عن الموضوع، لكنه يقول للمحرر بحكم الميانة "خله مصدر" حتى يبتعد عن المساءلة، حتى إن مرة من المرات جربت هالحركة وقالي المسؤول أرجو انك تكتب مصدر رفيع المستوى، مع ان هالمسؤول ما قال شي سري لكنه خاف ويبي يستانس بنفس الوقت!!

لو كان عندنا شفافية بالتعامل ولنا الحق في الاطلاع على المعلومات اللي تخصنا وتخص مجتمعنا، جان ما شفتو الجرايد تكتب شي، لاحظو في بريطانيا وفرنسا وألمانيا والولايات المتحدة معدلات الشافية عالية جدا ومايحتاج صحفيين و"مصادر" فقط لأن ما عندهم شي يجابلون وينبشون في سلوكيات المسؤولين من ماضيهم الغابر إلى لحظات "الخلوة" بموظفاتهم مثل ما صار مع بيل كلنتون اللي انفضح من مونيكا هذا غير قضية ووتر غيت الشهيرة وغيرها من الحوادث اللي بالنسبة لبعض مسؤولينا رفيعي المستوى أمر عادي ولابد انه يحصل معاهم!!

خبر خاص

علمت مصادر مقربة من مجلس الأسرة عن اعتزام الأسرة قضاء الإجازة الصيفية في سواحل الكويت وضواحيها، إيمانا من مبدأ مشاركة بقية العائلات اللي مالها حظ بالسفر بأزمة الكهرباء والماء القادمة!!!

هناك 4 تعليقات:

le Koweit يقول...

فعلا صارت هبة سالفة مصدر رفيع المستوى
:)

لووول حتى انت بتقضيها على سواحل الكويت الخلابة :)

الجودي يقول...

مساء الخير

بما إنك منت مسافر أنا حابه اقدم لك اوفر احلى

التاج السلطاني لبسه و وسع صدرك فيه و إنت على سواحل الكويت :)

http://aljoudi.blogspot.com/2010/05/reemas.html

وبنكون بانتظارك مو تقول ما قالوا لي

كاريكاتير يقول...

حقوقي...

راح اقضيها في الكويت ديرتي ومالي غناة عنها :)

الجودي...

التاج السلطاني..الكباب السلطاني..

شكلنا داشين حقبة عثمانية تركية :)

اتشرف بزيارة المدونة :)

الجودي يقول...

كاريكاتير ..

الظاهر أنا ما وضحت الموضوع بالشكل المطلوب ...

التاج السلطاني موضوع يحول من مدونة لثانيه ...

و إنت من الأشخاص إلي حولت لهم ...

حبيت أوضح الموضوع لو كان فيه لبس ...
و سوري على اللبس إلي صار أما عن الحقبة فحنا صارلنا فترة نطحس فيها و الله كريم ...