24 أغسطس 2010

الحلقة الثالثة عشر والرابعة عشر iron man




الحلقة الثالثة عشر والرابعة عشر

هذه الحلقة برعاية

قرقيعان أم بدر...

----------


Iron : wait wait what is the problem?

صاحب الديوانية: الحق علينا الجماعه يبون يشيلون المجلس ويفشلوني معاك ومع الجماعة، تراضها وانت امس ماكل وشارب معي؟ اشهد انها كبيرة بحقك وارجو تتصل في شيخكم اوباما ولا نائب دائرتكم يشوف لنا حل للجنة الازالة.

Iron: ok its very easy just give me 5 minutes and I will solve this problem?

رد اتصل فيني iron والظاهر انه ناسي اني مجرد معلم بوزارة التربية يعني مو وزير ولا نائب علشان اتوسط حق العالم والناس، وقمت شرحت له ان الديوانية هذه وغيرها من أشكال البناء هو استغلال لأملاك الدولة، وشرحت له ان في تجار وناس بسطاء ومن مختلف شرائح المجتمع استغلو سكوت وصمت وتطنيش الحكومة عن ممارسة دورها في الدفاع عن أملاك الدولة، وقلت له إن أحد المواطنين كان مسوي ديوانية وتحتها مسبح أولمبي وغرفتين يعني تقريبا ماخذ مساحة ثلث بيت حكومة، وطبعا كل هذا مكلفه آلاف الدنانير والأرض اللي باني عليها كل هذا هي أرض الدولة، ولأن النواب بس شاطرين يحولون مثل هالمواضيع من عبارة عن تطبيق لقانون إلى لأن الموضوع هو حضري وبدوي، فصار الموضوع محط متابعة وصارت سكوب والعدالة ماعندهم غير يستقبلون المتردية والنطيحة علشان بس يتفنون إنهم يرقعون لبعضهم البعض، وأذكر طلع واحد ما ادري شنو بالضبط دوره بالموضوع كانت مهمته إنه يسب رئيس لجنة الإزالة ويدعي عليه، وما قدم أي حجة أو دليل في دفاعه عن رفض تطبيق القانون، شرحت حق iron ان حكوماتنا تركت الفساد والاهمال وغضت النظر عن وايد امور من سنوات طويلة وانا في تصوري جزء منه سياسة إفساد المؤسسات وجزء منه هو فعلا فشل في ادارة هذه المؤسسات.

Iron من طرفه تصرف وقال حق اللجنة شوفو شغلكم، طبعا صارت هوشة وطق مطاقق وفزعو الناس تكفخ في iron اللي كان المفروض يصير عون صار عليهم فرعون، وانا ما الومهم ولا راح اقول انهم ما يحترمون القانون ولا حتى هم غير متحضرين، ما ينلامون لأن في إهمال كبير وتقصير من قبل المؤسسات التعليمية والاجتماعية والاعلامية في انها تغير مفاهيم وايده في مناطق صار فيها مخالفة القانون شي عادي وتحول إلى قانون بحد ذاته، اتصل فيني iron لكن وقتها كنت مندمج اشرح درس عن حق في المساواة بين الناس مثل ما كفل الدستور هالشي، والملاحظ وانا ادرس او حتى اسولف مع وايد ناس عن الدستور، على بالهم كتاب موجود بس عند الحكومة او عند النواب او موجود بالمتحف ومحد يقدر يشوفه، وطبعا قعدت اشرح ان الدستور هو وثيقة ربطت الشعب الكويتي وأسرة الصباح من جديد، وصار فيه إلزام قانوني لكيفية الحكم ومنو اللي يحكم وما هي حقوق المواطنين، ما راح اشرح وايد لأن وقتها طق الجرس وبعض الطلبة للامانة يبوني اطلع لأن وراهم حصة (ألعاب) ومساكين ما ألومهم لأن بالمدرسة مافي نشاط ولا فرصة ينفسون فيها عن روحهم غير حصة الألعاب اللي اهي مجرد خمسين دقيقة يركضون فيها ورا كرة قدم وبعضهم اصا ما يبي يلعب يبي يقعد تحت الظل يسولف وينام ويحل واجب الفيزيا او الرياضيات!!


يتبع باجر...

هناك 7 تعليقات:

اقصوصه يقول...

رمضان كريم

وكل عام وانتم بخير :)

Ali .M Haji يقول...

متى تنزل باجي الحلقات ؟؟؟!

سلة ميوّة يقول...

مازلت انتظر باقي الحلقات...

عسى المانع خير؟

أهل شرق يقول...

تقبل الله طاعتكم
وعيدكم مبارك

فريج سعود يقول...

عيدك مبارك وعساك من عواده

الجودي يقول...

تقبل الله منا ومنك


و عيدك مبارك ولو إنها متأخره

سوري :)

وين هالغيبة عسى المانع خير إن شاء الله

Alimusickw يقول...

هلا بدر
اذا ما فاد Iron Man تقدر تلجأ ل Black Sabbath اهما أصحاب الفكرة

تحياتي