دشداشة صفرا ومسمار والكابتن سالم!!

who is he

الاحد

عفسه ولويه في نقل الاغراض من البيت للشقة، هذا غير الترتيب والتنظيف اللي اخذ وقت "يعطيج العافية يا أم ناصر"

الاثنين

كان آخر يوم رمضان بعد سماعي للخبر في "العربية" فقررت أن امتثل للطلب الشعبي "اشتري عدة العيد" رحت محل الملابس الشعبية اللي بجمعية الخالدية..ازدحام وناس والبياع يبيع بضاعته اللي عنده من سنة يدري ان في ناس مثلي ما يشترون الا اخر يوم، ولأني ضامن "أعيد" ليوم واحد فقط قررت اشتري من غير ما اكاسر بالسعر، على الأقل انا ابي هالعدة ليوم واحد بس شتقولون للي دخل اهو وعياله وخدامته وراح يطلب دشاديش وفنايل ومكسر وجم غترة وعقل "جمع عقال" هذا غير تكرمون نعل .. والمشكلة ان المحل صغير وايد والحبيب يلبس ويفصخ عياله بوسط الزحمه، اهو معصب وولده الصغير يبجي يبي دشداشة صفرا !! صج اني قدساوي بس ما اظن ان هالطلب وقته الحين .. الحريم يدخلون يبون عبايه كان طلبهن غريب لكن الاغرب ان البياع عنده تشكيلة واسعة من العبايات يكفي يلبس حريم الكويت كلها، الناس تحذف فلوسها على البياع اللي اتصور كان يقول بقلبه "بسنا فلوس يا سعد.." وأشك انه يدري شنو باع وجم اخذ المهم ان الدرج متروس .. طبعا دفعت وطلعت بسرعة بعد ما صكت بين واحد يبي يكاسر البياع غصب يبي ينزل بسعر الدلاقات .. تبي تشتري ادفع ما تبي روح المباركية ...

الثلاثاء

غصب شلعت روحي من الفراش ولبست "لبس العيد" رحنا في جولة مكوكية نبارك للجميع، وأول بيت اعايده بيت الوالد كان شعوري متكهرب والسبب انه اول عيد اعايد فيه اهلي وانا بره البيت، خبركم من وانا صغير لغاية قبل اسبوع ساكن معاهم وفجأة اغادر البيت واعيش في بيت يديد "هذه حال الدنيا .. " المهم أثمرت الجولة المكومية عن احتراق لساني بسبب فناجين القهوة واللي ما طفاها لا قلاصات العصاير ولا أي شي ثاني .. ومن صباح الله خير التلفون ما يسكت "مسجات العيد" ناس تعرفها وناس ما تعرفها وأهم شي الكابتن سالم!!

كل عيد يوصلني مسج من الكابتن سالم ما ادري اهو يعرفني ولا انا اعرفه وناسيه!! او بالغلط حتى فكرت اتصل فيه اقوله "منو حضرتك..؟" بس خفت ينقص ويهي ويطلع يعرفني وانا ناسيه!! واغلب المسجات مكررة يعني ما احس ان اللي دازه قاصدني، بصراحه ما بعثت مسجات الا لعدد قليل جدا مو لأني بخيل بس لأن الشبكة علقت "كالعادة" عموما قضيت النصف الثاني من أول يوم بالعيد في الشقة اتابع نهايات المسلسلات اكيد تدرون شنو صار..

الاربعاء

ضاع النهار بتفقد الموجودات بالبيت، خصوصا كتبي وعدة "الدوام" وكان ودي أرسم بس محتاج وقت ارد ارسم.. اما النصف الثاني فقضيته برفقة "المدام" رحنا شاليه أهلها قعدت مع الشياب والشباب ماسك كتاب خبركم وراي تدريس مادة الدستور وهذه تحتاج مراجعة لبعض المصادر والمراجع اللي تخليني مستعد للطلبة، وبصراحه ما ابي الموجه اليديد اللي حاط علي اصلا يصيد علي "شعره" صحيح ان حصة الدستور الحصة الأخيرة وتقريبا مافي احد راح يمرني وأشك أصلا إني الموظف الحكومي الوحيد بالبلد اللي مدوام لغاية الساعة 1.30 الظهر لكن ما تدرون وبيني وبينكم القراءة تخليني اندمج وما اسمع التحلطم الشعبي على ك شي بالبلد!!

قلت ارد ازور الوالدة "الله يطول بعمرها..قولو امين" وصلت البيت الوالدة نايمه قعدت بالصالة آكل العشا "علي بالعافية" ولما قررنا نرد البيت لقيت تاير السيارة نايم على الآخر كانت الساعة 2.30 يعني الوقت كلش ما يسمح نبدل البنشر أو البنجر تركت السيارة وطلبت من اختي توصلنا البيت ومنها فرصة تدل بيتنا اليديد.

الخميس

يعني أمس !! ايي صح أكيد أمس لأن اليوم يوم الجمعه .. عموما حتى الخميس مشى الحال وضاع على التبضع في جمعية مشرف "اللي زوجتي ما تحبها وتقول مافيها شي..كبيرة على الطل!!" ما ارضى على جمعيتنا صحيح غالية لكن الجمعية الوحيدة اللي احس فيها إني كويتي!! وللأسف صار موقف بايخ وهو إني كنت ناوي اشتري بعض الأغراض من ضمنها هدية خاصة لشخص غالي!! ولما ردينا ناخذ العربانة اللي صفطناها تحت ما لقينا العربانة ولقينا اغراضنا بوسط سلة..يعني في أحد شال الاغراض وبدل عربانتنا بسلة!! صج ذوق مافي .. بيني وبينكم المدام عصبت ونادت حارس الامن اللي ما يدري وين الله قاطه وزفته واقص ايدي اذا فاهم شنو قاعد تقول المدام .. عموما طلعنا وزرنا بنت اخت زوجتي ما صار لها شهر والحين اهي بالعناية المركزة "الله يقومه بالسلامه..قولو امين"

وصلت البيت وتعيشت "بالعافية" ووصلني خبر ان سبب البنشر أو البنجر هو مسمار!! ما ادري ليش تذكرت فيلم كركر!!

ما عرفت انام قعدت اقرا كتاب "الكويت مثلث الديموقراطية" لغاية ما خدرت ..

الجمعة

كاني قاعد اكتب هالموضوع .. قاعد افكر اكتب عن حريم الصباح وعن القادسية وما هو تفسيري الخاص لأزمة الافنيوز الأخيرة ..وهل هو مخطط ارهابي وراه عصابة تركية تطلق على نفسها "أتباع مهند" ولا فعلا مجتمعنا مهدد والاشاعات ممكن تضربه في أي وقت!!

غدا السبت افكر ما اكتب شي لكن قررت اخصص السبت اتابع مذكراتي الجامعية...

have a nice week end