06 أكتوبر 2008

بطة المارينا السودة والمواطن القدوة!!

الاثنين بابين مع ان عندي وايد أبواب ودي افتحها لكم لكن ما عليه نكتفي بهذه الأبواب...


الباب الأول


إذاعة المارينا العنصرية


كل يوم الصبح وانا رايح دوامي افتح الراديو استمع لأثير محطة مارينا اف ام المتميزة بفريق العمل وبرامجها، وبما ان الصبح وقت المدارس المارينا مخصصين برنامج جميل جدا وهو عبارة عن قصص للأطفال على اعتبار عيالنا "اجيالنا القادمة" رايحة المدارس تأخذ العلم للي يخليها تبني الوطن وتحميه.


اليوم من الصبح المذيعة تقرأ قصة للأطفال المستمعين "انا مو محسوب طفل" المهم كانت تتكلم عن الطفلة سارة بطلة قصتها اللي كانت تخدم أختها الشريرة وتخم البيت وتطبخ وتنظف وهي في غاية البراءة، للحين القصة ممتازة وانتهت بأن سارة راحت الخباز "مو محل الحلويات" راحت الخباز الايراني واخذت خبز منه ولقت هناك عجوز محتاجة مساعدة ولأن سارة طيبة قررت تساعد العجوز وتروح معاها بيتهم عشان تمشط شعرها وتساعدها "يعني يا اطفال من تشوفون شايب ولا عجوز طاوعوه اذا قال لكم تعالو معاي ساعدوني همزوني.."


انتهت القصة بأن سارة صارت فتاة جميلة بعد ما قدمت لها العجوز الجدر السحري وتمنت فيه كل أمنياتها، اما اختها الشريرة فراحت تطل في الجدر وتتمنى فانقلب السحر عليها وصارت جيكرة "يعني شريرة وبلعناها هالمرة شر وجكر!!"


راح تقولون انزين شسالفه القصة عادية!! حضرتك تبي تصيد على المارينا شي وتطلع عليهم اشاعات!!



انا اقولكم المذيعة بدأت القصة ووصفت بطلة قصتها سارة كالآتي



كان في بنت حلوة طيبة بيضه اسمها سارة..


هل الطيبة والحلاة مقصورة فقط على البنات البيض؟! يعني انا ادري ان الجماعة في المارينا مو قصدهم لكن تخيلو ان هذه القصة خطيرة وتعكس مفاهيم عديدة وأول من راح يتأثر فيها البنات السمر والخوال .. اللي راح يفكرون بعقلهم الباطن انهن "شريرات جياكر" فقط لأنهن مو من البيض!!


عشان جذيه نصيحة يا مارينا ونصيحة لكل من يريد مخاطبة عيالنا اختاروا كلماتكم لأن اليهال هذيل يتأثرون وحساسين وايد ويقتنعون بكلام الكبار بسرعة ويؤمنون بكل شي يقال لهم على اساس انه حقيقة مطلقة.



شفيهم السمر يعني الكل غنى لهم ميامي مثلا اللي الظاهر ياز لهم "الفلكلور الافريقي" وغنوا لنا "رقص السمر والبيض وياهم شوفو محلاهم..وجمبلو جمبو ليلو جمبو جمبو ليلو..."


عاشووو عيال كيفان قطة 4 !!


الباب الثاني


المواطن القدوة!!


بعد تنفيذي لخطة الوصول للمدرسة اللي اشتغل فيها واختصاري العديد من الاشارات بجنوب السرة، توقفت عند الاشارة ما قبل قبل الاخيرة، وفجأة سيارة صغيرة فيها وحده تصطدم باللي جدامها اللي كان يسوق جيب كبير جدا والاشارة كات حمرا!! انا توقعت الآتي يا انه ينزل صاحب السيارة و"يرنجف" صاحبة السيارة أو انه يطلب الشرطة عشان سوالف التأمين والتعويض أو انه ما ينزل بالمره لأني ما اعتقد سيارة حست الصدمة أو تصير معركة كلامية على الريج بين المواطن والمواطنة، لتكون هذه الهوشة سبب اغلاق الدائري الخامس والسادس وتطويق المنطقة بالكامل وتصير معركة تاريخية وبدال ما نقول داحس والغبراء راح نقول هوشة حطين والزهراء!!


المفاجأة إن المواطن نزل من سيارته وتوجه للمواطنة وقالها سلامات وحصل خير.. بصراحه انا انجعمت والمواطنة صاحبة السيارة اللي تنحت فوق ما اهي "متنحة" وتدرون شنو صار ... صارت الاشارة خضرا والمواطنة وقفت في مكانها والسيارة اللي وراها صدمت باللي جدامها!!


اهم ما في الموضوع سماحة هذا المواطن "القدوة" وأخلاقه العالية واهتمامه بالناس قبل اهتمامه بنفسه، ويبقى السؤال لو تعرضت لا سمح الله لذات الموقف وبأضرار جسيمة في السيارة وبنفس التوقيت ماذا ستكون ردة فعلك؟! بصراحة!!


أخيرا وليس آخرا كل عام وهي بخير المدونة الاخت سارة وعقبال تخاريف مديدة!!


من تحت الباب!!


أعلنت وزارة التربية عن تنظيمها لاحتفالية بمناسبة عيد المعلم العالمي وذكرت الوزارة أن عدد المكرمين هذا العام 318 معلم ومعلمة و26 مدرسة متميزة


السؤال اللي يقرقع؟! معقولة وزارة التربية فيها 40 ألف معلم ومعلمة بس منهم 318 منهم متميزين؟!

هناك تعليقان (2):

Salah يقول...

تحياتي للمواطن القدوة

هذي من الشغلات القليلة اللي تخليني أشتاق حق الكويت...

في ناس طيبين...

لا يمكن تشوف هالموقف في بريطانيا!

ومعاك حق بخصوص العنصرية اللي في القصة!

تحياتي

كاريكاتير يقول...

مرحبا

الاخ صلاح اللندني "عجبني اللقب اذا تسمح"

المهم لو خليت خربت للحين في طيبين في العالم وفي كل دول العالم وانت اكيد واحد منهم ان شاء الله

وعلى فكرة بعثت رسالة الكترونية لموع اذاعة المارينا اف ام وضحت فيها القصة العنصرية

اشكرك على المرور