23 مايو 2009

طبخة حكومة2009


المقادير:

صندوق برتقال لبناني - جنجفة بوطبر - قفشة معبوج هندي - قطرة دهن عادني - علبة بندول اكسترا نايت - ألبوم صور - دفتر شيكات - صبغ أظافر -(تقليد الفلبين) - قلاص ماي بارد - ثلاثة قوالب ثلج - جبن أبيض مبشور - بطل كتشب أصلي - درزنين مكعبات ماجي - نظارة سودة - سيارة ليموزين ام عشرتعش باب - جريدة الوسيط - تلفون فيه رصيد حتى لو رنة - كوب فاضي - قحفية قحطة


طريقة التحضير:

تصحى من النوم تلاقي الانتخابات اخلصت تفكر شلون تسوي حكومة راضين عليها الناس، بالأول البس نظارتك السودة علشان محد يشوفك!! تالي اقرأ الصحف وشوف تصاريح النواب وركز على الجدد لأن العتج كلامهم مأخوذ خيره بمثل هذه الأيام، ومن بعد القراءة تروح بقالة الجوارح بصباح السالم وتسأل عن المقادير اللي طلبتها، إذا حصلت اللي قلت لك عليه تمام ما حصلت مو مهم، تروح تقعد على كرسي مو مكسور من كراسي شاطئ أنجفة وتركز بالبحر لمدة دقيقتين، بعدين ارفع السماعة وأطلب من السايق اللي قاعد يمك يحضر لك ألبوم صور الوزراء السابقين الميت منهم واللي للحين فيه الروح، وتالي تطمش على الصور وييب الجنجفة نوع بوطبر هذه ما تحصلها إلا بديوانية بومساعد بس تأكد إن الجيكر موجود أما إذا ما لقيته فتقدر تستعين بنصيحة بوراشد اللي عرف شلون يستفيد على ظهور الناس في الانتخابات كل ثانتين بمسج ماصخ.

تكتب أسماء الوزارات وتحط كل وزارة بقوطي نخي وتبدي تحذف أوراق الجنجفة من مسافة نص متر إلا شبر مو اكثر، تالي تشوف اللي يطيح عليه خال الكلفس اتصل فيه راح تلاقيه يرد عليك بسرعة لأنه من شهر وهو مجهزالبشت الرمادي على المسمار اللي حاطه ورا باب السكة، ومن تسلم على هالمطفوق راح يقولك موافق، هذا النوع يصلح لأي وزارة المهم يصير وزير، اما فحال تلفون هالمطفوق مسكر أو محوله على بقالة الجوارح خبرك نص الديرة مطلوبة ضبط واحضار، تتصل ربنة بس لا تكثر أو رنتين على جريدة الوسيط تحط إعلان تقول فيه "مطلوب وزراء يدبرون نفسهم بنفسهم مع الجلس اليديد شرط الفحص وأوراقه كامله وياريت يعرف يلعب هند روسي أو نذالة، وسبق له طبخ في بيتهم في حال غياب الزوجة أو نظف المطبخ في حال زعل الخدامة اللي متهاوشة مع المعزبة!!

من تحصل عدد من الوزراء تحطهم في ألبوم وتنقع زعفران بكوب حليب بارد لزوم الحارج، وتالي تروح تشاور سميح منو سميح مادري بس أكيد بتلاقي واحد أسمه سميح بسوق السمج!، ما خلصت صارت الطبخة جاهزة حطها بالميكرويف لمدة عشرتعش دقيقة وتأكد إن الدريشة مسكرة ومن يخلص التسخين تاخذ هالطبخة وتوقف يوم الاحد بطريق الملك فهد بن عبدالعزيز وتحديدا تحت جسر التحكم وتختار يا حزة الساعة 7 ونص الصبح أو الساعة 6 المغرب، علشان تزهق من الزحمة وبالتالي ما أوصيك عبة بندول اكسترا نايت وبعده كرتون جزر أو قصب سكر تسلي روحك من الزحمة ومن تشوف إن برج التحرير واضح من بعيد خل السايق يوقف على اليمين (حارة الأمان) بس ها دربالك هالأيام حارةالأمان صارت حارة خامسة ويمكن يعدي عليك يوكن أخضر مدعوم من كل صوب، هذا واحد مصرقع من خمسة أيام مو عارف ينزل من السيارة ويبي يثبت إنه الوحيد بالكويت اللي يقدر يسبق الناس بالشارع!!

وبالهنا والشفا..

*ملاحظة هذه الطبخة جربها رئيس وزراء مملكة جزر الواق ويق ،وأثبتت أن أي تشكيل وزاري من ورا هالطبخة يدوم سنوات طويلة بس من غير سنع!!

ملاحظة ثانية- راح تسألوني ليش كل هالمقادير اللي فوق أقولكم ببساطة مافي طبخةمن غير مقادير وإلا شلون راح تطبخ!

هناك 3 تعليقات:

Enter-Q8 يقول...

و الله ما الومك مت منالضحك
اول مره اشوف كتاباتك جذي يا بدر
من حر ما فينا عز الله

كاريكاتير يقول...

مرحبا

بووليد الحقيقة عندي مجلد طبخات طلابية أيام الجامعة نشرته على سلسلة مقالات في جريدة آفاق الجامعية ولأن حال البلد أصبح أقرب للجدر اللي ما تعرف شنو فيه..قررت إعادة وصف طبخات جديدة جايز نعرف شنهو اللي بالجدر اللي حتى الملاس ما يطلع اللي فيه!!

ودامك ضحكت الحمدلله!!

Mr_CHoCoLaTe يقول...

ههههههههههههههههههه

عاد لازم اللي يطبخ هالطبخ يكون نفسه حلو بالطباخ ؟ و لا عادي الكل يقدر يضبطها ؟

تسلم ايدك ^_^