16 مايو 2009

دقت الساعة..!!




اليوم 16 مايو 2009 صحيت على صوتج قلت مو جنه يا فطوم مقعدتني انا وأمج مبجر، شعندج ادري انه يوم انتخابات مجلس الأمة تبيني أصوت حق منو أكيد تبين أصوت حق محمد هايف وحسين القلاف وخالد طاحوس وبورمية وجمال العمر وغيرهم من المرشحين اللي "...." ما علينا.

حسيت وانا أتريق توست جبن قلاص التعاون وعصير كي دي دي يعني الأكل كله إفطار صناعة كويتية، تجميع هندي لكون اللي أعدت الوجبة العاملة المنزلية لاجمي وبإشراف أم فطوم الله يحفظها، ما علينا قبل لا أروح مرك الاقتراع حسيت بإحساس اللي رايح الاختبار، مع إن هالشي ما حاشني من 5 سنوات!!

نعم انتخابات اليوم هو اختبار للأمة اللي الكل يراهن على أنه واعي باختيار الأفضل اللي يعرف يصون البلد يحترم الدستور وقوانين الدولة ويذود عن حريات الشعب ومصالحه، خل يفوز 50 نائب شيعي خل يفوز خمسين بدوي أو حتى خمسين سني أو خميس حضري، مو مهم المهم يخدمون هالبلد.

انت وانتي اللي قاعد تقرأ ليش ما قمت صوت، ناطر كرت دعوة، صار هذا يومك لا تخيب ظن ديرتك فيك، روح سمعنا صوتك، وتذكر أن الكويت قبل قبيلتك قبل طائفتك قبل مصلحتك قبل تيارك الكويت حطها دوم قبل كل شي لأنها لازم تكون كل شي.

قبل لا أطلع أصوت وصلتني مجموعة رسائل قصيرة بالتلفون "تلوع الجبد" كلها تستعبط من صباح الله خير على راسي؟!

راح اوافيكم بتغطية خاصة بانتخابات مجلس الأمة 2009 في كافة الدوائر، بالصوت والصورة وبالرسومات الكاريكاتيرية اللي خاشها لهذا اليوم.

دقت الساعة..صار لازم أقوم..

بدر بن غيث-أمة 2009

هناك 5 تعليقات:

M.AlQallaf يقول...

المفرووض ... المفرووض إني أكون في أمتحان الحين !! بس عشان الانتخابات تأجل !! :( وأحتا شكو بالانتخابات !! تونا مكملين 18 !! :( زجان زين محصلين من ورى المجلس شي ، إذا هالمجلس ما شال قانون منع الاختلاط وما زاد لنا إعانتنا على الأقل 50 دينار يطلع حاله حال المجالس إللّي قبله XP

ma6goog يقول...

يعطيك الف عافية

نفس الشعور

Mr_CHoCoLaTe يقول...

بالتوفيق ان شاءالله

و الله يعطينا على قد نيتنا

مع السلامه

كاريكاتير يقول...

مرحبا

ام القلاف

في البداية انتي وغيرج من فئة 18 سنة محرومين من حقهم في التصويت، وبعدين المسألة مو واقفة على يزيدون الطلبة 50 دينار ولا حتى 100، ولا حتى في إلغاء قانون منع الاختلاط مع انه غير دستوري، لكن المسألة اكبر جذيه، الكويت مو بس فيها زيادة معاشات الكويت محتاجة نفظة وطنية الكويت تبي اعادة توطين الكفاءات وتبي إحالة الفاسدين إلى مزبلة التاريخ وتبي أكثر وأكثر من كل اللي قاعد نقوله..

اخوي مطقوق

اعتبرك المتابع الذهبي ويعطيك ألف عافية وشعوري من شعورك صحيح ما قصيت شعري من مدة لكن اتصور نتبادل نفس الشعور!!

الاخ ككاو

أجمعين..تأكد إذا ما اخترنا اللي يشرفنا يا أن الكويتيين مدمغين، أو تم تبديلهم أمس واحناما ندري إذا وصلو المتردية والنطيحة!!

أستاذ حمام يقول...

مادري ليش ربكة هالانتخابات.. فيها رهبة مادري ليش..

الله يوفق الكويت ويطلع لنا مولود يبشرنا بالخير.. مجلس الامة 2009

.. وبانتظار تغطيتك..