31 مايو 2009

زحلاقية الدسمة مشروع أزمة سياسية!!



وصلني عبر البريد الالكتروني صور مضحكة لمجموعة من الأطفال الأبرياء بمنطقة الدسمة أرادوا اثبات أن تصميم جمعية الدسمة التعاونية الجديدة يناسبهم ويوفر عليهم الذهاب للمدينة الترفيهية خاصة وأن أحد زوايا الجمعية صارت زحلاقية مفتوحة لجميع الأطفال بالمجان.

المطلوب عاد من مسؤولين الجمعية يا أنهم يوفرون جناط اسعافات أولية لأي ياهل ينبط راسه أو إنهم يحطون اسفنج حوالين الزاوية لزوم ما يطيح فيهم ياهل وتتحول الطيحة إلى أزمة سياسية وتصعيد تروح ضحيته وزيرة التربية الجديدة د.موضي الحمود!

طبعا بتقولون ليش وشمعنا د.موضي مو أي وزير ثاني؟!

ليش لأنها المسؤولة عن تربية الأجيال وبالتالي ليش ما حطت مناهج ولا أوصت المدارس بتعليم الأطفال بأن استغلال المرافق بالشكل السيء يؤدي لخطر محدق!!

طبعا هذا منطق ربع هايف اللي عسى ما تنرفز مواطن نايم بجبد لأن المطعم طول وضيع الطريج رفع السماعة يبي النواب اللي من جماعته يستجوب أي وزير وكلش كلش يصعد الموضوع ويستجوب رئيس الوزراء...!!


المهم انا رايح اتزحلق..اشوفكم




هناك 12 تعليقًا:

chــاي أخضر يقول...

متأكدين الدسمة ؟!

طموحة مملوحة يقول...

لوووووول عادي عيال الكويت الحين ماصار لهم مناطق يعبطون فيها كل المناطق صار فيها عبط لوووول انتشر الوباء :P


ذكروني لمن كنت صغيرة :p بس ماكنت اخرب

Eng_Q8 يقول...

امبين من الويه انهم راح يسوون جذي :q

غير معرف يقول...

Boys will be boys, whether it's at this grocery store or at home, they'll always feel the need to bounce off walls and jump off high places

Crappy architecture though, I'll give you that

أبو الدســتور يقول...

ههههههه

كاريكاتير يقول...

الاخت جاي أخضر..

للأسف تأكدت بعد فحص الموقع ومقرنتها بالصور.

الاخت طموحة مملوحة

انا اطالب بوزارة الاشغال بتوفير قليلبة وزحلاقية في كل بيت أو كلش كلش كل فريج، مع تخصيص زحلاقية خاصة مخصصة للبنات!!


اخونا كاسك يا وطن

تدري المصيبة مو في اليهال المشكلة في اللي يمر ولا يقول لهم شي ولا حتى بإدارة الجمعية وينهم ولا الظاهر مستانسين بالجمعية اليديدة ومالهم خلق يطلعون بالحر!!

المشارك غير المعروف

اولا قعدت ادقق بكلامك علشان اترجمه واكتشفت التالي

اني قدرت وبعون من الله ترجمة ثلاث ارباع الكلام وما تبقى لي غير سطر ونص!!

شكرا

Yang يقول...

خل اليهال يستانسون :))

مـي يقول...

لووووول
تحفة... بغض النظر عن تصرف اليهال مع الزحلاقية...أكيد انه غلط..
لكن تعجبني براءتهم...عفويتهم..

ma6goog يقول...

بس والله خوش جمعية

Mr_CHoCoLaTe يقول...

ههههههههه
الحاجه ام الاختراع
حطوا لهم العاب خل يفرفشون شوي

Um il sa3af wil leef يقول...

ينانوه مو يهال...
:) الله يحفظهم من الشر
أنا بتزحلق بعد بس راح أحط بنهاية الزحلاقيه طشت ماي

كاريكاتير يقول...

ابوالدستور..

عساها دوم هالضحكة..

يانغ

اشم من كلامك نية تأزيم!!

الاخت مي

حياج الله في مدونتج منع في الكويت

مو دايما براءة الاطفال وعفويتهم زينة..!!

الاخ مطقوق

لايكون دافعين لك علشان تدافع عنهم..عن نفسي احلى شي لو اتورط بالزحمة ادخل الدسمة وآخذ لي عصير برتقال!!

مستر ككاو

بين الجمعية ومركز حسن أبل الرياضي 10 أمتار وبين الجمعية واحد حدائق المنطقة هم 5 أمتار..

لايسمعونك الأهالي ويجبرون إدارة الجمعية زادة الزحلاقيات!!


ام السعف والليف

ما أوصيج صابون تايد معاج!!

:)