22 أغسطس 2009

مسلسل القمندة (الحلقة1)



يطلع عزوز من بيتهم بالشامية زعلان، لأن أمه ما رضت تخليه يسافر مع ربعه البحرين، وقرر يفتر بالسيارة لغاية ما يخلص البانزين، وهو بالطريج بشارع جمال عبدالناصر شاف سيارة مجكنمة لبنت حلوة واقفة، الظاهر خربانه فقرر أبو الشهامة يصفط ويساعد البنت، وفعلا عقب ما صفط سيارته على بعد 4 او حتى 5 كيلو علشان ما تعرف البنت شكل سيارته اللي تفشل!!

افا سلامات أي مساعده شسالفه، ممكن تفتحين قبق السيارة لو سمحتي، طبعا البنت تعجبت من دفاشته ومع هذا قالت في نفسها، صج ملاقيف هالصبيان!! بطلت القبق وقعد عزوز يحوس ويبقق عيونه ويفحص ماي السيارة والزيت ويقولها ممكن دقين السيارة سلف، طبعا البنت شغلت السيارة بالريموت كنترول وعزوز بحسرته وبقول "مبين عليها بنت جخ تشغل السيارة بالبلاك بيري"!!

عقب دقايق شاف ان مافي فايده وقالها "مافي غير اتصل بالوكالة لأن علط السيارة جايد" واحسن شي حضرتج تتصلين بأهلج، طبعا عزوز كان وده يقولها تاخذ سيارته بس للأسف بعيدة وتفشل، جان تطالعه من تحت إلى فوق وتقول بطرف لساني "لو سمحت انتا شنو قاعد تسوي صار لك ربع ساعه، السيارة مافيها شي كل ما في السالفة اني واقفه نطاره صديقتي عذاري تمرني اهي ما تدل وقلت انطرها بره اوقف علشان تشوفني؟!"

عزوز يبي يقول...

اللي مايعرف شنو بلاك بيري؟!

جهاز يديد "هبه كويتية عند البنات والصبيان عبارة عن تلفون كبر ايد شعبان، ويمسكونه بإيدهم ويتمشون فيه بالمجمعات وبالكافيهات ويسولفون فيه بينهم بين بعض حتى لو اهم بالحمام!!"


باجر نكمل!!

هناك 8 تعليقات:

Manal يقول...

مبارك عليكم الشهر
متابعين
:)

الجـــوري..كـــلام الصمــــت يقول...

مبارك عليك الشهر

شكله المسلسل خطير :p

اووف والله المسكيين اندقر دقرة حياته

يلا ننطر الحلقات اليايه بس زيد الجيله بليز :p

قوااك الله

كاريكاتير يقول...

تلفزيون طماشة يشكر مشاهدينه الكرام ويودعهم بالمزيد من البرامج الخاصة بالشهر الفضيل..

وعلشان نثبت لكم ان قمرنا غير!!

نطلب منكم ترسلون لنا شنو تبون يصير في الحلقات القادمة وشنو تبون من برامج؟

اما عن المسلسل "القمندة" فغدا حلقة جديدة تخرع؟!

Yin مدام يقول...

مبارك عليكم الشهر أنت والعائلة الكريمة

رزقكم الله من خيره وبركاته



وناطرين الخرعة باجر إن شاءالله

:)

ma6goog يقول...

و جان؟

صبا يقول...

مبارك عليك الشهر
وان شالله نعوده بكل خير يارب


منور بالموفمبيك
وزوجتك بعد
وقبلاتي على خد فطومه
تحياتي
:)

فريج سعود يقول...

مبارك عليك الشهر


ما ادري ليش لما وصلت حق كلام النعومة الي صافة قمت اقراء على طريقة حليمة لا شعوريا

كاريكاتير يقول...

مدام يانغ

علينا وعليج وراح نباشر بقية برامجنا قريبا


مطقوق

ان شاء الله راح اكمل وجان..

صبا

المنور هالناس الطيبة ورمضان نوره كافي على الجميع عسى ربي يكتب لج من خيره الكثير.

فريج سعود

وانا بعد حسيتان من كثر الدلع رموشها راح تنكسر!!