09 أغسطس 2009

اكتشاف كويتي جيولوجي!!



أيام ما كنت أدرس بكلية العلوم بالجامعة، وصلت لمرحلة مر فيها كل طلبة العلوم وهي "فكرة النحشة من الكلية" وأقصد التحويل في ظل الصعوبة اللي نواجهها سواء من الدراسة، أو لون المباني اللي كانت "تييب لنا الحارج" او حتى من قلة مواقف السيارات، أو حتى من أشكالنا اللي ما "تنبلع"!!

قررت أحول قلت بالأول ليش ما أسم نصيحة الوالد وأحول تحويل داخلي، اشوف لي تخصص غير الميكرو بيولوجي، بصراحة تعبت من الوقفة بالمختبر ومو قادر ابقق عيوني على جراثيم وكائنات دقيقة، خلتني أشك بكل شي حوالي!! ما علينا هذا مو موضوعنا رحت على يوم معرض الأقسام العلمية وطليت على كل التخصصات ومن التخصصات الحلوة تخصص الجيولوجيا، أحس هذا يصلح لي وراح يغير شخصيتي لأني متخيل نفسي ماسك لي شبل صغير وأنبش في براكين قديمة وكهوف وراح ألاقي كنوز وحضارة قديمة وجايز ألاقي حضارة اتلانتس المختفية!!

عقب ما سمعت الشروط رديت البيت وقررت أعقد اجتماع قمة طارئ عاجل، انا ونفسي وظلي وبنات أفكاري، وقررنا بالإجماع على أن يكون تخصص الجيولوجيا الأنسب ولازم من باجر أباشر بالتحويل قبل ما يطوف القطار!!، وكالعادة كانت الوالدة تتوقع ادخل عليها وأقولها "يمه قررت أحول هالتخصص.." لأني كنت مولع جبدها كل يوم لي تخصص وكلية، عموما قالت لي شتبي بالجيولوجيا صبخة وغبار وأذية تروحون البر وتطلع لك كوبرا!!

عموما تقبلت منها تعليقاتها الساخرة ورديت الغرفة أسمع أغنية "الصد والهجران" شخباري!!، وثاني الصبح رحت الكلية وانا لابس البالطو الأبيض ومستانس ودخلت مبنى 3خ رافع راسي، وداش ممر الجيولوجيا اللي يخليني أحس إني راح أصير رائد فضاء من كثر الصور والمجسمات الحلوة، ما علينا رحت للقسم وقلت لهم انا بحول عندكم، على طول ما صدقو خبر واكتبو اسمي وقالو لي خلاص، ادخل القاعة اللي هناك وشوف على الطبيعة دراسة الجيولوجيا بنفسك، دخلت كان في شوية طلبة وطالبات وكل واحد ماسك له صخرة ويبحلق فيها، اللي يقول هذه جيرية واللي يقول هذه كوارتز واللي يقول هذه جزء من طوفة مجمع حجري، واما البنات واقفين بالدور يم صورة كهف ياخذون صور تذكارية!!

دخل الدكتور والمفاجأة ان محد عبره، وكتب على السبورة بالطبشير الجيولوجي إن باجر في رحلة لمنطقة عريفجان، واللي يبي ينجح لازم يروح الرحلة، انا على طول سجلت اسمي قلت رحلة وببلاش فوقه!!

رديت البيت زهبت جنطة الأكل مالت أخوي اللي وقتها بالابتدائي، وخذيت مطارة الوالدة مالت البر علشان أحط فيها ماي، واستعرت من الوالد جاكيت القنص ورحت لوازم العائلة أخذت لي عشرة أمتار حبال، ومترين وربع سلسلة حديد، ولبمة نيون "عجبتني وأخذتها" ومريت الفرع شريت لي كرتون سانكيست علشان أعزم اللي معاي، أبي أكون اجتماعي وراعي واجب، وشريت لي بفك وكرتون حلاو "فكرت أبيع الحلاو والعلوج على البنات" مخي تجاري!!

ركبت السيارة وعلقت عليها علم الكويت، وحطيت كاميرا الفيديو على طبلون السيارة علشان أسجل الرحلة كاملة مثل الأفلام الوثائقية، وبالطريج اتصل فيني واحد من الزملاء قالي ان سيارته بنجرت بالطريج وسيارته "كامري عنابية" طبعا من باب الشهامة مريته مع إني ما أحس ان هالولد "جيولوجي أصلي" عموما بالطريج هالزميل قالي قصة حياته وتجاربه العاطفية، وشلون كان متفوق لكن حبه للحداق ضيع مستقبله، وإنه كان مترشح لبعثة لفرنسا لكن حبه الخالد وعلشان قصة الحب قرر يقعد بالكويت ويدخل كلية العلوم علشان يكون يم "حبيبته"!!

طبعا كان هالحجي شهر ديسمبر، يعني الجو ما بين الحر والبرد والرطوبة والغبار والمطر والجفاف، قلت حق الزميل يشوف الخريطة ويتأكد المكان اللي رايحين له شكثر باقي عليه، جان يصدمني ويقول هذه خريطة شنو؟! كان سؤاله عبيط هذه خريطة الكويت؟ "يا الدرو" جان يقولي اوقف اوقف، انا من الخرعة قلت أكيد عقرب طمر السيارة وألدغه، جان أدوس بريك وعفست الشارع باللي فيه!!

شفيك شفيك!! يا معود هذه خريطة المعالم السياحية شكو يايبها!!، يكون صايدني أدري انها خريطة السياحة انا كاتب عليها وين عريفجان وشكثر الطريج منها لغاية بيتنا، وبحسبة رياضية راح أعرف اذا كان باجي شي ولا وايد؟

قام الحبيب طلع آلة حاسبة ما ادري وين لاقيها، وحسب وطلع ان احنا المفروض واصلين من ساعة!!! شنو شسالفه يا معود تأكد أخاف انك غلطان؟! ما خليته يحسب ورحت أحسب ولا طلع المفروض واصلين من نص ساعة!! لا حلوة هالحركة احنا وين والطلبة وين، وبعدين لازم نتصل في أحد من الطلبة يدلينا، وللأسف الزميل ما عنده رقم أي طالب بس عنده رقم طالبة كانت معاه قبل كورسين بتمهيدي انجليزي وأغلب الظن إنها معانا بالمرحلة؟

فعلا اتصل فيها لكن محد يرد! أصريت انه يرد يتصل لو ان شاء الله يطلع من التلفون وير البنت من كشختها ويصحيها من النوم!! عموما صحت البنت وقالت له خبرين واحد حلو والثاني كلش مو حلو!!، الخبر الحلو ان فعلا اهي معانا بالرحلة، اما الخبر اللي مو حلو إنها ما راح تروح لأن اليوم ملجة بنت خالة ام عمها!!!! انزين يا زميل قول لها ما تعرف رقم الدكتور؟ مع كل أسف ما تعرف!!

"لا يكون يضيق خلقك انا ادربها" بهذه الجملة المتروسة ثقة ومع ابتسامة كشفت عن اختفاء ثلاثة أسنان على اليسار وتسوس ضرس العقل، اختفاء واحد أنيابه! قالي تعال نوقف بحارة الأمان ونوقف لنا سيارة نسأله عن عريفجان، الوقت يمر والثلج اللي بالمطارة يذوب ومافي ولا عتوي او جربوع يمر علينا!! ومن بعدين ولا وانيت دستن دايس قلت حق صاحبي نوقفه يعني نوقفه، انا عن نفسي مديت ايدي أاشر بينما صاحبي رفع بنطلونه "يكون اغراء الحبيب" وفعلا تسمع صوت الوانيت يقرقع تقول جدر هريس!! وقف لنا ولا شايب ومعاه خادمه الهندي ومعاهم خرفان رايحين الوفرة، يا حجي ما تدل عريفجان؟ جان يرد علينا الهندي ويقول "بابا هذا بابا كبير مافي يسمع مافي ركب سماعة..!!" لا صج عيل شلون يسوق السيارة؟ جان يرد علينا الهندي "بابا انا سوي وقف منشان يسأل هذا وين جبد؟!" يعني هذا واقف لنا يسألنا؟ تدري شلون يا انك تنزل تنطر معانا أحد نسأله ولا كمل طريجك جايز يوصلك الشايب الهند!!

الشايب ما تحملنا قام ونزل يتفاهم معانا، ووريناه الخريطة الحقيقة تخربط وعلى باله احنا أجانب، جان يقول ما شاء الله عليك عنقريز وتتكلمون كويتي؟! ما ادري عاد اهو يتطنز ولا من صجه انا لو امشي بالمرقاب محد يعرف اني كويتي، وصاحبي لو يوقف بشارع المطعام يطقون له هرن على بالهم يشتغل بمطعم شاورما!! عموما ما اطولها الشايب قالنا يا انك تردون الديرة او تردون ديرتكم!! "مصمم الحجي ان احنا عنقريز" الشايب راح ونسى الهندي عندنا!!، واحنا قعدنا نفكر بطريقة شوي جان تطلع فوق راس الزميل لبمة الفكرة، واللي كانت عبارة عن اختراقنا للصحراء ناحية الغرب على أساس احنا جيولوجيين، فعلا قررت وعزمت عقب ما عطيت الهندي جيس بفك وبطل ماي، ورحنا بطريجنا وهالمرة خليت الزميل يسوق لأن الوضع بصراحة صار غير اللي متخيله، صحراء مالها اول ولا آخر وانا ما ودي اسوق ونطيح بحفرة واكون متقلقص ورا السكان، الافضل أكون مرافق، وهالشي يعطيني ميزة اطلع من السيارة بأمان!!

ربع ساعة لا أكثر شوي ولا ندوس على صخرة وتطير فينا السيارة وتطب من الخرعة، احنا قلنا يا زلزال وفرصة نرصده يا ان صار بالسيارة شي وبكلا الحالتين راح ننزل، نزلنا ولا كالعادة ناس مخيمين قبل جم يوم وقاطين الوصخ بالبر!! كملنا الرحلة ولا منظر قل ما نجد مثله عدد من الصخور الرملية متراكمة فوق بعضها مشكله كهف، وهالكهف مكتوب عليه من بره عز .... وذكرى أمونة المينونة غير لعبة اكس اوه وهذا غير رقم كنتاكي ما ادري منو الفاضي اللي يبي يطلب كنتاكي بهالمكان!! نزلنا نتفقد المكان، كل شي يدل على ان المكان مارين عليه الكويت كلها، قواطي البيبسي محذفة بكل مكان وأجياس الزبالة وغيرها، قرر الزميل يصد فوق هالكهف وآخذ له صورة للذكرى، رحت اييب الكاميرا ورديت ولا الزميل مختفي، بلشنا بوسوالف أفلام الرعب الفاشلة، يا زميل اطلع قديمة تنخش ألعب غيرها، الحقيقة ما طلع الزميل وخرعته قلت اذا ما تطلع راح امشي عنك؟! "لحظة مفتاح السيارة معاه"!!

رديت السيارة ولا واحد شكله غريب عجيب قاعد يطق السيارة بايده وبريله وماسك له عصا من خشب، طبعا لبسه يذكرني بأفلام طرزان بس المشكلة انه لابس غترة وعقال!! الظاهر طرزان كويتي ما علينا "يا الاخو شتبي وخر عن السيارة بعدين ما تعرف وين عريفجان؟" ما عبرني وقام يطامر ما ادري شنو شاف بالسيارة واعجبه، بطلت له الباب دش داخل السيارة وقعد يطامر من كشن لكشن مثل الشاذي، حاولت انزله ما نفع الا لما بطلت له بيبسي طلع من السيارة وأخذ البيبسي وراح يركض صوب الكهف!!

لحقت هالطرزان وهناك وقف عند الباب ومنعني ادخل، قلت له ما ابي شي انا انسان وابي اكتشف المكان، المشكلة انه ما يرد علي لما أكلمه "احس انه كويتي" بعد ما عطيته حلاوة خاشها بمخباتي، خلاني ادخل وراه، ولا ذيج الغرفة الكوخية كل شي فيها بدائي وجان اشوف صاحبي مربط ومنحذف بزاوية الكهف، شسالفه ليش مربوط جان التفت وراي ولا وحده فيها شبه من الريال واقفه بإيدها عظمة وشي مثل الجدر تطقطق فيه!!

جان فجأة اسمع صوت "يعني لازم تخربون علينا حياتنا"!، هذا منو اللي يتكلم؟! اووف طلع هالطرزان يتكلم، حجي انت كويتي؟ جان ترد زوجته ايي احنا كويتيين ومادة أولى بعد، انزين حجي حجية انتو ليش عايشيت هنا شعندكم هادين حياة المدينة والمدنية وعايشين بعالمكان اللي حتى العقارب ما تبيه؟!

طبعا صاحبي يرافس يبيني افكه من الرباط، بصراحه طنشته اهو اهم ولا هالسالفه الخطيرة اللي ممكن اصير فيها واحد واصل والسبه هالاكتشاف الخطير!! انزين حجي يعني انتو شكثر صار لكم عايشين هني، عندكم عيال ما عندكم أهل يسألون عليكم معقولة محد اكتشف مكانكم ولا سأل عنكم؟! لا يكون انتو بدون او حتى منحاشين من الشرطة ومنخشين؟! الطرزان حمق وقالي؟ أي بعد بعد ألف قول احنا بعد اللي دمرنا هيروشيما وفجرنا مفاعل تشرنوبل وكنا السبب الأكيد في القبض على عبدالله اوجلان، وابلشنا بعد بسالفه انقلاب هاييتي!! حجي حجي انت شعرفك بهالسوالف؟! اذا كنت عايش هني مع المدام؟

شوف انا والمدام كنا دكاترة جيولوجيين، وقبل 17 سنة قررنا نطلع في رحلة استكشافية نشوف لنا مكان نتعرف فيه على تاريخه وأبرز معالم الحياة القديمة، وفعلا طلعنا وقصدنا وايد أماكن، كان وقتها الجو بالشتا وكل شي تمام وأخذنا معانا اكل يكفينا شهرين، وقعدنا ننبش وننبش لغاية ما تعبنا بعدين قلنا حياة المدينة شنو استفدنا منها غير الدمار، البيئة مدمرة والانسان اهو اللي قاعد يدمرها بوقت السلم أكثر من وقت الحرب، ومحد مهتم بالبيئة الكل يقط الوصخ بالشارع ولا هامه، حتى احنا كدكاترة مالنا دور بالمجتمع، ما يبونا الا حق اجتماعاتهم يخلونا نشتط وبالاخير كل اللي قلناه ما يسوى شي جدام صفقة او مناقصة او حتى سفرة لمؤتمر بينقال فيه نفس كلامنا لهم؟ قررت انا والمدام ان نعيش هني ونتخلى عن كل شي له علاقة بالمدينة وحياتنا قبل وعلشان ما يلحقونا الملاقيف والصحافة، قدمنا استقالتنا وقلنا ان احنا مسافرين استراليا نعيش هناك، اما اهلنا فقلنا لهم ان جامعة باستراليا طالبينا هناك؟ وفعلا الكل صدق واختفينا حتى عيالنا بنتي الكبيرة من تزوجت ما فكرت تمر لو بالغلط يم البيت تسلم على أمها ولا اسألت علينا، اما ولدنا من سافر يدرس بره ما رفع السماعة يسمعني صوته الهيس الاربد، عاد احنا قلنا ما علينا منهم وقررنا نعيش حياة الانسان الأول علشان نجرب ونشوف لنا حياة جديدة نظيفة، البحر مو بعيد ناخذ منه ماي ونصفيه وحافرين لنا بير نحط فيه الماي، اما الأكل فحنا نروح مزارع الوفرة ونلقط اللي يظل بالارض من طماط وخيار وغيره، وزرعنا هناك بعد لنا مكان نعيش عليه، اما هالكهف فهذا تقدر تقول بيتنا بالشتا اما بيتنا بالصيف فهو بمكان شوي بعيد على البحر.

ما اقولك ان احنا مقطوعين عن العالم، نلقط ورا اللي يخيمون جرايدهم نقرأ آخر الأخبار، على أمل ان الناس تصحى ومتى ما عادوا لوعيهم راح نفكر وقتها نرجع، بس حجي انت انسان اكاديمي معقولة كلامك يدخل العقل تعيش هالحياة؟!، مدام طرزان اهي اللي تكلمت وقالت "على فكرة احنا متواصلين مع بعض اخوانا البشر اللي عايشين نفس حياتنا في اماكن متفرقة من العالم، ناس في تكساس وناس في الربع الخالي وناس في سيبيريا وناس في الامازون وناس في كينيا وناس في القطب الجنوبي وناس في استراليا وناس في منغوليا وناس في استراليا، واخذ كل مكان لنا جماعة نتواصل معاهم كل اربعة سنين مرة!!

تجتمعون وين وشنو تسوون بالضبط؟، طبعا طرزان هالشايب نحيس وقالي "مو شغلك المهم اخذ صاحبك ولا يكون اشوفكم هني مرة ثانية ولا ترا اخلي عقارب عريفجان تنهد عليكم من كل مكان؟" لحظة لحظة حجي هذه عريفجان؟ انزين حجي ما شفت باص من جامعة الكويت وجم سيارة وراه احنا طلبة بالجامعة ويايين نسوي مسح جيولوجي، طرزان يقول لزوجته انا مو قايلج تراقبين المكان شلون في ناس بالمكان؟! طرزانة تحلف وتكفر ان مافي احد وصل المكان الا هالشباب!!

انت متاكد ان الجامعة عندهم رحلة اليوم؟، حجي صدقني انا ياي مع صاحبي نفس المحاضرة قرر الدكتور اليوم، جان يدخل طرزان يقولنا متأكدين اليوم؟! ايي حجي والله اليوم، بس يا شباب اليوم جمعة ما أظن في احد يبي ايي هالمكان والجامعة ما تطلع باصاتها يوم الجمعة لأن معظم السواق ياخذون هالباصات ويترزقون منها بالجليب!! شنو اليوم يوم الجمعة قوم يا زميل تأكد؟ طليت بالتلفون ولا فعلا الرزنامة تقول اليوم يوم الجمعة والرحلة الخميس..شنو الخميس الاسبوع الياي!! يعني احنا يايين قبل الموعد باسبوع!!!!
خوش طلبة على بالكم فاهمين انتو الرزنامة ما تدرون عنها وتبون تنجحون وتصيرون جيولوجيين، اشوف عطونا مقفاكم لا اصلخكم واسويك ستيك بشري للذيابه!!

خذيت صاحبي وحد الدوسه تركنا المكان، وقطيت الخريطة بالشارع، وما كلمت الزميل ومن بعدها ثاني يوم رحت سحبت اوراقي من قسم الجيولوجيا وقررت اسوف لي كلية ادبية وايد ارحم من هالسوالف، اليوم رحنا كهف باجر يقطونا ببركان ويطلع فيه ديناصور ولا حتى تنين منسدح!!

اقولكم شي كل اللي صار طلع حلم، وكان يفترض باجر اروح أباشر تغيير التخصص ومنها يومها خططت انحاش من الكلية، والحمدلله ياني عرض احتراف بكلية الآداب ودخلتها لغاية ما تخرجت منها.

من مذكراتي اللي ما قلتها لاحد!!

بدر بن غيث

هناك 9 تعليقات:

Eng_Q8 يقول...

خوش قصه على الريج مت من الضحك .. اتوقع لو مكمل بكلية العلوم جان الحين تمشي واطق بروحك مادري اشلون يستحملون يقعدون بهالكليه الكئيبه انا من خلصت كالكولاس 2 ما دشيتها الا حق امتحان كالكولاس 3 والديفرينشال حتى دوام ما اداوم فيها

كاريكاتير يقول...

شوف الحسنة الوحيدة بهذه الكلية اذكرها مطعمهم

عليهم حلوم وعيش ومرق لحم مو طبيعي..

كذلك مرسم العلوم اللي اعتبره اكاديمية سهيلة النجدي للفنون الجميلة.

طموحة مملوحة يقول...

لوووووووووووووول شفيك على الجيوولوجيا بدر @@؟؟؟

ترا الجيولوجيا تعلمنا اصل الارض وفصلها وشنو فخذها ومن وين طلعت لووول



والله الرحلات الجيولوجية حلوة بصراحة علمتني الرجولة وتحمل الصبر والشدة :)


فديت الجيوولوجيا والله فديتها لوول

Um il sa3af wil leef يقول...

خووووش حلم

كاريكاتير يقول...

الاخت طموحة

مافيني شي كنت احب الجيولوجيا بس لقيت اللي احلى منها "التاريخ" اللي اقدر اعرف فيه وايد شغلات!

الجيولوجيا تعلم الرجولة؟!

هذا قسم الجيولوجيا ولا بلاتينيوم!!

ام السعف

قصدج كابوس اشوه ما صار صج!!

الوتيــــــــــن يقول...

ههههههههههه

حلوة الديباجه

صج هاذا حال الناس .. اما عالهامش او .. عالهامش

وييييييه ذكرتني بأيام العلوم .. كنت رياضيه طبيعيه .. رياضيات :\

حولت (مايبيلها كلام) وصرت مدرسة قد ( العلبه) .. والحمد الله

فعلا وصفك ردني لأيام حلوه كانت بايخه وقتها بس الحين اتذكرها اقول اخييييييه على ايام الجامعه :|""""

عساك عالقوه
ومتوقفين الا مابعد انتهاء اجازتك :) بالسلامه

ZooZ "3grbgr" يقول...

تعبت وانا اقرا

ابي بدل قراءة

مممم

دينار عالبوست

~~p:

كاريكاتير يقول...

الوتين

كل يوم جامعي عشته اعتبره بحد ذاته فيلم!!

حتى لما امر وانا الحين صار لي 4 سنوات متخرج اوقف بموقفي المعتاد واسرح بذكرياتي!!

طلعنا زملاء بمهنة "التعليب"

عقر بقر

يسلم عليج بورمية ويقولج قدمي الاقتراح وراح يستجوب وزير الاعلام ليش ما يخصص بدل تعب قراءة في المدونات!!

غير معرف يقول...

يا إلهي على الملاقة