25 أغسطس 2009

صوت الشعب ياسكوب؟! وحلقة جديدة من مسلسل القمندة



الحلقة الرابعة من مسلسل القمندة

عبدالهادي طلع من عزاء مشاري وهو يبجي لأنه سمع خبر كدر خلقه، شلون يحسرون ريال مدريد عيل شفايده كل هالمحترفين!! وعقب العزا راح شارع المطاعم وطلب من سهران صمونتين حوت ووجة الشبح وقلاص عصير غريب فروت بالليمون والنعناع، وهناك اتصل تلفون يتأكد اذا اهله جاهزن يروحون الشاليه علشانهم يمرهم، اخته الصغيرة عبير قالت له لازم يمر الجمعية يشتري فحم وبطاريات لجهاز الريموت كنترول حق الاستيريو مال كومار الطباخ.

وهو بشارع المطاعم طاف يمه جيب عود متروس بنات يرقصون "فاصلين على أغنية الاماكن كلها" قرر يلحقهم وفعلا نزل وطق الرصيد وعفس شارع المطاعم اللي مو ناقص عفسه، وبالطريج اتصل بعزوز رفيجه ودار هذا الحوار..

عبدالهادي: عزوووز خو قلبي وينك؟
عزوز: انا موجود انت وينك صار لي اسبوعين ادورك؟!
عبدالهادي: كنت مسافر الفلبين مع صاحبنا فلاحوه نشتري لنا جم شهادة بكاليريوس وماجستير، والحمدلله انا صرت اختصاصي امراض مسالك بولية وفلاح صار دكتور بتأثير الغبار على سلوكيات شعب المايا!!
عزوز: انزين عبدالهادي شتبي داق تبي تحرني لأني صار لي خمس سنين ماني قادر اتخرج من الجامعة والسبة مافي مواد ودكاترة القسم حالفين يخجون كل سنتين 4 او 6 طالبات وطالب!!
عبدالهادي: لا يبا شنو احرك انا قلت اقولك ان مشاري ولد بومشاري راعي الروفر مات وتوني طالع من عزاهم بالعديلية!
عزوز: صججججج محد قالي شلون صج ان هالولد كان باط جبدي وشايف نفسه وملقوف ومليق ونحيس ويسوي نفسه فاهم بس ما عليه الله يرحمه كان خوش ولد، متى اخر يوم عزا وشلون مات؟
عبدالهادي: حسب اللي عرفته ان مشاري كان مسلف جم هيلقي من اللي يتلصقون فيه فلوس وتهاوشو وهناك صكت هوشة وذبحوه!! وناس تقول ان كان لاحق بنت وهناك اتصلت برفيجها اللي وصل الخيران ودعم مشاري وقص راسه وخلاه هناك! وناس....
عزوز: بس بس وين قاعدين احنا يبا الريال مات وان شاء الله اللي اذبحه..المهم عبدالهادي ماعندك سلف خمسين ستون سبعين ميتين دينار بس؟
عبدالهادي: انت على بالك انا ابوك اللي يابك ونساك انت مو قبل شهر خذيت مني 60 دنيار وربع وقلت ان خدامتكم مريضة وتبون تودونها الخفجي يعني علاج بالخارج اشوف مارديتهم!! عموما انا عندي 30 دينار خاشهم قلت بشتري فيهم بفك حق الافلام اللي شريتها وبشوفها بالديوانية.
عزوز: افلام بـ30 دينار انت ليش ما تفتح سينما احسن؟!
عبدالهادي: ما عليه تبيهم مرني بعد ساعة البيت.

--------------

دخلت زينب ام كوث على كوثر واهي للحين تحوس شنو تلبس وصار هالحوار..

ام كوثر: يا يمه انتي ليش ما تبين ولد عمج فلاح؟!
كوثر: يمه انت لوتعرفين اللي بقلبي وخاشته من سنين جان رفضتي حتى نشوف هذا اذا ما تبرينا من فلاح واهله؟!
ام كوثر: شنو اللي بقلبج لا يكون تحبين احد او فلاحوه غلط وياج يوم كنتو بالروضة؟!
كوثر: يمه انتي تعرفيني انا تربيتج وتربية خاله سكينة..فلاحو انا شفته محد قالي بعيوني يمه والله؟!
ام كوثر: تحجي يامالج الحجه شفيه فلاحو لايكون اهو شسمه!!
كوثر: لا يمه مو شسمه اهو شسمونه!!
ام كوثر: غبره كوثروه وليش ساكته انه شسمونه انا على بالي انه شسمه لكن دام طلع شسمونه انا لازم اقول حق ابوج من يرد من الحداق اكيد لاهي مطلق يصيد طيور!!
---------------

باجر نعرف شنو كان قصدهم بالشسمه والشسمونه!! وليش فلاحو طلع شسمه!!

هذه الحلقة برعاية تشريبة الوالدة

هناك تعليقان (2):

Enter-Q8 يقول...

قناة الشغب وانت صاج
لا و احلى شي انهم ماخذين مقلب بنفسهم
قال قمرهم كلهم
مالت على البامية

كاريكاتير يقول...

سالفه المسلسلات العراقية شي يفشل!!

اما موضوع مسلسل صوتك وصل فهي حركة مكشوفة وغباء من قبل وزارة الاعلام!!