استفحل الخلاف بين عزووز وأمه على منو يدفع حساب الطلب من المطعم، الام تقول ان المفروض الولد يدفع الحساب لأن الام مدرسة وعزوز طالب في المدرسةوهالمدرسة مو حكومية قطاع خاص، والولد يقول ان اكثر من نص الطلب حق الام وبناتها وهو ما راح ياكل منه غير صمونة!! وجان يدخل ابو عزوز يصارخ على الكل منو موقف سيارته وصاك على موقف بوعزوز بروحه مافي مواقف سيارات بالشارع، الاشغال نابشه الرصيد والجيران كل واحد مأجر في بيته حق 5 او 9 عوايل وكل عايله عندها 5 سيارات وين يصفط فوق السطح!!مو كافي كراتين الفرضة شايلهم على ظهره من راس العاير!! مو كافي ان فيني الضغط والسكر كله منكم مافيكم واحد يطيب الخاطر، الام ما تهيع بالبيت وانت عزوز لايث بالشوارع وشرفوه تلطخ بويهها بالمكياج لغاية ما ذاب ويهها وضاعت ملامحه!! انا من وين الاقيها الاقساط كاسره ظهري وصار لي شهر ما غيرت دشداشتي مو كافي اني بس اكل جبن قلاص ماركة التعاون علشان اوفر لكم قمة العيش الهنية..موكافي اني اوديكم بالعطلة البحر واخليكم تشترون برد من بوكمال بالدوار وافلام من زهير بالجمعية!! مو كافي مو كافي كل هذا...
طاح الابو من طوله وطارو فيه المستشفى بعد ما ملو الاسعاف مو فاضين قاعدين يتابعون مباراة مانشستر ومتراهنين، وصلو المستشفى جان يقولون نطرو مافي سرير فاضي، بس الحمدلله لقو لهم قنفه بالممر سدحو الابو اللي يتحلطم شلون طلعو ونسو التلفزيون مبطل، خاصة وانه من محبي حملة ترشيد، ومر عليهم الدكتور اللي انبهر من جمال شريفة بنت بوعزوز وقال بصراحه اول مرة اشوف هالنمومة من البنات خلاص انا قررت اصير طبيب عيون، والسبه لون عيون شريفة!!
صكت هوشة بين ممرضة وواحد من المواطنين اللي يبي يدخل عنبر النساء اقصد جناح النساء بنص الليل يبي يشوف زوجته وطبعا لأن الجناح عمومي فصعبه، لغاية ما صرخ المواطن وقال خالي رفيج ولد عمه بالرضاعة نائب وراح يستجوب وزير الصحة باجر!! طبعا هالديرة كل واحد خشمه يحكه او أظافره مو عاجبينه شكلهم يبون يستجوبون وزير المهم وزير يصعد المنصة ليش مو مهم!!
----
كوثر تبي تصارح امها ولا يدخل مطلق بوكوثر شفيه ولد عمج يا كوثر، صارحيني اا من زمان شاك ان بينكم شي اكيد تحبينه صح، انا كنت اشوف نظراته لما كنتو يهال حسيت ان الحب جمعكم، خلاص دام الحب جمعكم انا ما اقدر اوقف بطريجكم وماراح افكر مثل ابهات المسلسلات ماراح اسأل عنه ولا راح اطلب مهر وايد ولا افصفص عرج اهله، كل اللي راح اطلبه فحص ما قبل الزواج وان لا حكم عليه وييب لي مطارتين ثلج حق الحداق وجولة حق المخيم!! كوثر ودها تقول اللي بخاطرها ولا اخوها قاسم يقول ان فلاح ولد حلال يستاهل اخته كوثر، كافي انه يعطي مفاتيح الكولت كل ما بخاطره يشفط بمواقف الجمعية او يفتر بشارع من شوارع الرميثية!!
واثناء ما ام كوثر تبي تفتح باب غرفتها زلقت من جيس الحلاو وطاحت على السلم وتكسر ظهرها واتصلو بالاسعاف اللي اخيرا شالو ام كوثر واخذوها نفس المستشفى اللي فيها ابو عزوز وهناك راح تصير احداث ثانية للحين ما ألفتها!!
ليست هناك تعليقات:
إرسال تعليق