27 يوليو 2010

طارق العلي..حسافة عليك؟!




اتحمل مشهد غرق مبدع في وحل "الغرور" أو حتى ضياعه في "غابة" فقدان الثقة بالنفس، لكن ما راح أتحمل إن فنان بحجم طارق العلي يستمر بالطريج اللي يمشي فيه، صحيح ماني خريج المعهد العالي للفنون المسرحية ولا اعتبر نفسي حتى متابع للمسرح، لكن على الاقل مشاهد تابع معظم مشوار الفنان طارق العلي.

طارق العلي اللي انطلق من مسرح الشباب ومن المعهد العالي للفنون المسرحية وأجاد لعب عدة ادوار في اعمال تلفزيونية ومسرحية، ووقف أمام عملاقة المسرح والفن بالكويت استمثر موهبته كفنان يجيد التمثيل والغناء وراح يحفر اسمه كفنان كوميدي، وتحول لنجم للشباك بعد ما كان "كومبارس" بارز في مسرحية سيف العرب، مثل ما كان فنان موهوب في مسرحية "هالو بانكوك".

طارق العلي اليوم ما هو طارق العلي اللي عرفناه في عدة اعمال مميزة اجاد فيها دور الشاب المراهق المتهور وأجاد فيها تقليد العديد من الشخصيات وبطريقة تخليك ما تفرق بين الأصل و"التقليد"..كان ممثل يفرض نفسه بالعمل بفنه مو فقط لأنه طارق العلي..

اليوم ما عاد طارق العلي هو طارق العلي اللي يعرفه جمهوره وما اتصور في ناقد مسرحي ومتتبع لمشوار طارق العلي يقبل لو مجرد التفكير والتخيل ان هذا المستوى اللي يقدمه طارق العلي على خشبة المسرح تحديدا يسمى بفن عهدناه من طارق العلي.

اقدر ألخص لكم اللي قاعد يسويه طارق العلي في مسرحياته بالتالي..

طارق "عصر" كل المشاهد اللي أداها في برنامج مسرحيات 2000 وراح يكبرها و"يمغطها" علشان تتحول إلى مسرحيات يكون فيها النجم، وللاسف ما كان يسمع طارق الناس اللي تحب فنه لما كانوا ينصحونه يوفق من خروجه الزايد عن اللزوم من نصوص الأعمال اللي يقدمها، ويفتك من عقدة الكومبارس اللي صار بطل ولازم يطلع حرته ببقية الممثلين وفي جمهور أول سطرة!!

طارق حتى لو كنت تعتقد إن اللي تقدمه مسرح مو تجاري، فإسمح لي أقولك تراك غلطان، لأن الجمهور اللي يحبك ما قام يشوف لك اعمال يديدة ويفضل يشتري من البسطة جم مسرحية من المسرحيات اللي كنت وفيها ويشوف طارق العلي وفنه، اليوم يا طارق ما عندك غير إنك تمثل دور شايب من غير ضروس او حتى رب أسرة بنفس "الكركتر" حتى بنفس الملابس..البالطو الازرق!! او تلبس ملابس "الشخصية العراقية" وتفصل على الجمهور بشوية اغاني مستفيد من صوتك الحلو، وتضيع تقريبا 5 دقايق ويمكن اكثر من عمر المسرحية بوصلة غنائية ما تخدم النص..؟!

طارق اسال الناس اللي تحبك وتحب فنك، ليش وخروا عنك الممثلين حسن البلام وعبدالناصر درويش، واسماعيل سرور وشعبولا وغيرهم، وراح يوخرون منك الشباب اللي تعتقد إنك قاعد تمنحهم الفرصة إنهم يطلعون معك، على فكرة يا طارق ترا جزء كبير من جمهور هالأيام "زهقان نفسه" وفقط يبي يدفع لو 100 دينار بس علشان يدخل بالزحمه ويقدر يضحك من غير محد يقوله ليش تضحك وعلى شنو؟

طارق مو انا اللي يعلمك الصح من الغلط ولا أفكر يوم ألعب دور المرشد ولا حتى الناقد المسرحي، طارق اللي اعرفه إن العمل المسرحي يحتاج ديكور يتناسب مع العمل تقدر تقولي شنو الفايده من استعراض ديكور صالة البيت "بودورين" وكانك تسوق حق مهندس ديكور مو لاقي أحد يعطيه ويه؟! طارق ارجع لآخر 5 مسرحيات قدمتها وشوف شكثر انت خذيت وقت علشان تنفرد بجمهور الصالة علشان تتحول من ممثل مسرح إلى مقدم عرض كوميدي "غصب يبي يضحك الجمهور" صرت تنسى نفسك وتتكلم عن تفاصيل هامشية وتستخدم فيها اوصاف ومفردات ما تليق بفنان اكاديمي يعرف ان المسرح أبوالفنون مو رصيف خمارة!!

على فكرة طارق العلي وحسن البلام ومعاكم داوود حسين وحتى عبدالناصر درويش صرتو تايهين بعد ما كان الجميع يتوقع منكم متجمعين أو متفرقين تكونون صف يديد يسد الفراغ اللي تركوه عمالقة المسرح الراقي، اللي منح المجتمع فرصة للتفكير في مشاكله المختلفة، طارق استهلكت وايد حوار"الجهراوي" واستهلك اكثر الطنازة على زملائك وأعطيك مثال شفته وياليتني ما شفته "تركض بالمسرح وتطيح هيا شعيبي بالمسرح" وفوق هذا تمسك فرحان العلي وانت عارف يا طارقإن لا فرحان ولا أي احد على خشبة المسرح يقدر يرد عليك الحوار او الحركة لأنك باختصار مو نجم في المسرح؟ لأنك باختصار صاحب المسرحية وفلوسهم عندك!!

اعتبر كلامي "حرة فيني" على اللي اشوفه منك يا طارق، لأن فنان مثلك المفروض يكون الحين "أثقل" وأكثر "دقة" في اختياره لكل حركة وتصرف على خشبة المسرح، وللاسف ان حتى اعمالك التلفزيونية صارت من غير طعم، وما ودي إنك "تخورها" ويكفي الصورة الحلوة عن الفنان طارق العلي اللي نعرفه.

هناك 14 تعليقًا:

AuThoress يقول...

طارق العلي مو حسافة عليه
حسافة علينا إحنا "المشاهدين" اللي تعبونا بما يقدّم من أذية سمعية وبصرية .. كل يوم انحدار شكل.. وأنانية في المحافظة على العدسة بشكل مكثف لشخص بعينه .. استحواذ على الادوار مهما كان الحوار قصيرا :/ شيء متعب فعلا

منذ ايام اعيد للمرة الزليون متابعة درب الزلق.. وهمست : كانوا فريق واحد وكانوا كلّهم نجوم .. من صاخب اللقطة الواحدة حتى .. حسينوه وسعد .. الابداع ينتفي متى ما صار الصف الاول هاجسا... الابداع يُقدم ويترك.. والجمهور يقرر أين تكون منه ..

شكرا بدر

خديجة البهاويد يقول...

اوقات كثيرة اتخيل نفسي اجرب التمثيل تحت رحمة طارق .. اول شي اتخيله شلون بيبهدلني جدام الجمهور .. لان الي بيجرب التمثيل مع طارق اتوقع لازم يكون قلبه جااااامد ويتحمل الطراقات والتمصخر والبهدلة الي يسميها طارق كوميديا !!
ما انكر اني افصل ضحك على اغلب المشاهد بمسرحياته .. وهذا لان مو بس انا بل العموم يبي يضحك وبس مثل ماتفضلت بدر .. سواء كان المشهد الكوميدي لائق وصالح للعرض امام الجمهور متنوع الاعمار والاجناس او غير صالح

شكرا لك على هالموضوع الحلو

سلة ميوّة يقول...

أصفق لك...

لأنك فعلا قلت الواقع والي قاعد يصير
اتمنى يوعى قبل فوات الأوان

انا شخصيا..ماقمت أدل طريج الكوميديا اهني
لأن وصلت لقناعة ان مافي كوميديا..يادوب طنازة والسلام...

صبحك الله بالخير
ويعطيك العافيه

الجودي يقول...

اذكر شفت له مقطع أيام ما كان طالب في المعهد أعتقد ...

فعلا حسافه عليه طاقه عالية ..

و أضم صوتي لك ..

إن شاء الله يصحى ..


شكرا كاريكاتير

le Koweit يقول...

أأيدك بكل حرف كتبته
وانا قبل فترة كتبت موضوع مشابه في منتدى طارق العلي
ولقيت الاغلبية من جمهوره يوافقوني الرأي

اتمنى يرجع طارق العلي النجم اللي عرفناه وحبيناه

غير معرف يقول...

طارق العلي للأسف قاعد يكرر نفسه ومرة سألوه بأحد المقابلات الصحفية وقال إن مافي نص جيد. يعني كأنه يقولنا انه معذور مو بإيده لأن مافيه نص ما أقدر أغيب عن الجمهور وما أقدم شي. انزين الستاف الفاشل الي معاه لي متى؟ الصراحة ملينا كل سنة نفسهم، وين عبد الناصر درويش وين البلام؟

الممثلين الكبار كل واحد قام يفتح مسرحية بروحه ويجمع معاه شوية ممثلين مبتدئين.. مثل طارق وداوود مادري ليش ما يتجمعون مع بعض ويسوون مسرحية حلوة؟ تدرون ليش ما يسسون؟ علشان إنه أرخص وعبد الرحمن العقل قالها بأحد المقابلات التلفزيونية

لما يشترك أكثر من ممثل كبير بعمل واحد سواء تلفزيوني أو مسرحي بتكون التكاليف أكثر من ناحية الاجور فعلشان جذي يكون بالعمل ممثل كبير والباجي عاديين علشان تغطي المزاينية

شفتوا شلون الحين ان التمثيل عندنا صار الله بالخير؟

وبعدين عفية طارق لا تسوي مسلسلات وبرامج دمك حده ثقيل. لأن طارق فنان مسرحي أكثر من تلفزيوني..

===========

نف الكلام على داوود وانتصار شوفهم أكثر من مرة يطلعون بلقاءات وصارلهم فترة قاطعين من بعض وانتصار تقول انا ماعندي مانع بس بعدين اللي عرفته ان داوود مو حاب يتعاون مع انتصار لسبب مجهول انا اولته برأيي انه ما يبي يكرر نفسه


حال الفن عندنا بالكويت مليق وبايخ وياريت ترجع نفس مسرحيات قبل

انتصار وداود

طارق والبلام ودروويش بمسرحية وحدة بيصير عليها مظاهرة لو صار جذي

فريج سعود يقول...

مسرحياته الاخيرة كلها من السر ونازل

ولا تصلح للاستهلاك الآدمي


يعطيك العافية على توجيه النقد الى المسرح الوحيد الباقي

كاريكاتير يقول...

aythoress

نحتاج نهضة جديدة شاملة واوروبا لما نهضت نهضت بمثقفيها وفنانينها قبل السياسيين

ودرب الزلق لن تتكرر.. :(

خديجة البهاويد

يمكن طارق بالمسرح يبي يعلم اللي معاه ان "كل طراق بمشهد زيادة" ؟!

المشكلة ان الجمهور ينغسل مخه بالدوامه اللي يسوويها طارق واللي يختم دايما خروجه عن النص وعن العمل يرد يحمد ربنا على النعمة!!

سلوة ميوه

لا تصفقين لي على بالهم طلعت بره النص او على بالهم كتبت اللي كتبته لأني ما احب طارق..هالصفقة يستاهلها الفنان الجاد والمؤمن بقيمة الفن بتغيير المجتمع..

انصحج بزيارة ببعض العروض المسرحية الاكاديمية..اخر عمل مسرحي ممتع كان "دراما الشحاتين" من تأليف بدر محارب..اذا تعرفين يحصل لج على نسخة منه انصحج :)

الجودي

لو طارق يفكر فيها ويحسبها بعد 10 سنين منو راح يتقبله ويتقبل اللي سواه في نفسه؟!

le kowiet

اتمنى جمهور واعضاء منتدى طارق العلي يسوون حركة تأثر في طارق العلي وتصحيه !!

قلم ومساحة

اهو يجاوب ويأكد على انه يبي الظهور فقط والبقاء في مسرح النقابة !!

بعض الوزارات تشتري من طارق العلي وبعض اصحاب المسارح التجارية المسرح بالكامل لصالح عائلات الموظفين وللاسف العروض تكون للتنفيع؟!

اما الممثلين الكبار فلازم يحترمون مسيرتهم وما يقبل يشارك في مذبحة الفن


فريج سعود

ماظل فيها لا سر ولا بطن ولا حتى فوق الركب!!!!!!!!!!

كاريكاتير يقول...

aythoress

نحتاج نهضة جديدة شاملة واوروبا لما نهضت نهضت بمثقفيها وفنانينها قبل السياسيين

ودرب الزلق لن تتكرر.. :(

خديجة البهاويد

يمكن طارق بالمسرح يبي يعلم اللي معاه ان "كل طراق بمشهد زيادة" ؟!

المشكلة ان الجمهور ينغسل مخه بالدوامه اللي يسوويها طارق واللي يختم دايما خروجه عن النص وعن العمل يرد يحمد ربنا على النعمة!!

سلوة ميوه

لا تصفقين لي على بالهم طلعت بره النص او على بالهم كتبت اللي كتبته لأني ما احب طارق..هالصفقة يستاهلها الفنان الجاد والمؤمن بقيمة الفن بتغيير المجتمع..

انصحج بزيارة ببعض العروض المسرحية الاكاديمية..اخر عمل مسرحي ممتع كان "دراما الشحاتين" من تأليف بدر محارب..اذا تعرفين يحصل لج على نسخة منه انصحج :)

الجودي

لو طارق يفكر فيها ويحسبها بعد 10 سنين منو راح يتقبله ويتقبل اللي سواه في نفسه؟!

le kowiet

اتمنى جمهور واعضاء منتدى طارق العلي يسوون حركة تأثر في طارق العلي وتصحيه !!

قلم ومساحة

اهو يجاوب ويأكد على انه يبي الظهور فقط والبقاء في مسرح النقابة !!

بعض الوزارات تشتري من طارق العلي وبعض اصحاب المسارح التجارية المسرح بالكامل لصالح عائلات الموظفين وللاسف العروض تكون للتنفيع؟!

اما الممثلين الكبار فلازم يحترمون مسيرتهم وما يقبل يشارك في مذبحة الفن


فريج سعود

ماظل فيها لا سر ولا بطن ولا حتى فوق الركب!!!!!!!!!!

Blog 3amty يقول...

طارق أهو إنبراطور المسرح التجاري الهابط بالكويت، أهو المشكلة وهو الحل !

غير معرف يقول...

طارق استهلكت وايد حوار"الجهراوي" واستهلك اكثر الطنازة على زملائك وأعطيك مثال شفته وياليتني ما شفته "تركض بالمسرح وتطيح هيا شعيبي بالمسرح" وفوق هذا تمسك فرحان العلي وانت عارف يا طارقإن لا فرحان ولا أي احد على خشبة المسرح يقدر يرد عليك الحوار او الحركة لأنك باختصار مو نجم في المسرح؟ لأنك باختصار صاحب المسرحية وفلوسهم عندك!!



اعتقد انك كتبت كل شي بخاطري وخصوصا هالفقره


حسافه يا طارق



وحده من الناس

غير معرف يقول...

بالنسبة لاخر مسرحيه له ما أذكر إن شفت فيها غلط وبالنسبة للخروج عن النص هذا شي يمتع الجمهور بس بحدود وهذا رايي وبالنسبةللي يقول اهو مو شي بالتلفزيون هذا غلط اهو ينفع خق غير التلفزيون بس شوي خل يصحح أخطاءه بالمسرح

كاريكاتير يقول...

بلوق عمتي

يمكن مقتنع انها "خاربة خاربة" :)

غير معرف

طارق حسب ما فهمت من بعض الناس اللي لهم علاقة بالساحة الفنية انه مستفيد من شريكه ويبي يضمن له ربح سريع سريع؟!

المشكلة ان المسرحيات الاخيرة مافيها غير "الملاقة" و"المصاخه" و"قلة الأدب" و"الاسفاف" و"الخبال"..اللي حل محل الحوار والنص الجيد

غير معرف يقول...

انا اتوقع انه طارق شاف التمثيل الحقيقي مردوده المادي اقل من وضعه الحالي فقال اكمل بالدرب هذا وطلعلي جم فلس احسن
وانا اعتقد طارق غير مهتم انه يكون تاريخه حافل بالاعمال الفنية الراقيه الريال يبي فلوس بس
مافكر يجمع الاثنين مع بعض مثل الكبير بوعدنان