بوعزوز واقف في الفرضة يشتري شوية طماط وبطاط وخيار، ونقصه دينارين ومافي هناك ماكينة سحب، وقرر يتصل بولده اللي يحبه وكله يدلعه "الهيس الأربد" ويتصل فيه لكن الهيس الاربد اقصد ولده عزوز ما يرد!!
وبعد ثواني يرد عزوز اللي موعارف شلون يرقع السالفة اللي صارت له مع بنت الحلال بنت الحسب والنسب!!،
عزوز: الو هلا يبا شنو شصاير داق علي وداز لي عشر مسجات شدعوه صرت وزير!
بوعزوز: انا ابوك يا الدرو ليش ما ترد اكيد لاحق لك بنت شقره ادري فيك من الصور اللي تخشهم بالدرج ومقلقصهم ورا كبت الحمام!!
عوز: يبه خلاص خلاص انا اسف "فضحني الوالد" المهم يبا امر تدلل تمنى اطلب شبيك لبيك ولدك عزوز بين ايديك؟!
بوعزوز: ابيك تيي سوق الفرضة وتسحب قبلها من البنك عشرة دنانير؟
عزوز: عشرة دنانير مرة وحده ليش قالولك انا ولد محمود حيدر ولا عندي ناقلةنفط ولا حتى ابوي بواق دياي!!
بوعزوز: عزوزو يا الهيس انا بواق دياي ما عليه انت بس رد البيت اذا ما علقت ببنكة الديوانية وخليت الربع يضغطونك ما اكون بوعزوز!! تعال انت الحين تكفه نخيتك!!
عزوز: ما عليه كسرت خاطري خالص بشوف الخردة اللي بالسيارة جم وراح امر البنك يمكن اعانة الجامعة نزولها حسبي يالله ونعم الوكيل هذه مو مكافأة هذه مو اعانة هذه مهانة، "آه يا القهر عيل انا عزوز يصير فيني جذيه"!!
-----
كوثر طلعت من بيتهم رايحة الجمعية تبي تشتري بطل فيمتو وقرصين خبز حق ابوها مطلق، وما شاء الله عليها كوثر بنت عاقلة رزينة الكل يحلف براسها بالفريج حتى ان امها خلتها تلبس نقاب من جمالها العيمي الأصيل، المهم راحت الجمعية وهناك قامت تدور لها على بطل الفيتمو اللي طبعا ادارة الجمعية كل يوم يغيرون مكان الاغراض مرة تلاقي صابون الغسيل قبالباب الجمعية ومرة تلاقي الحفاظات عند الكاشير ومرة ركن الحلاو والككاو عند اللحوم واخذ من هالسوالف!! هناك بالجمعية لمحت كوثر صديقها ريتاج اللي يايه الجمعية وصار لها ساعتين تفتر، حبت كوثر تساعدها.
كوثر: هلا هلا بريتاج شلون شخبارج انا اقل ليش الجمعية منوره حبيبتي اساعدج بشي؟
ريتاج: انتي تعرفين اسمي شدراج اكيد عرفتيني لأن صورتي امس حاطيني بليالينا، بس انا ما قلت لهم يحطون اسمي قلت لهم كتبو "شوق"!! ما عليه انتي منو؟
كوثر:افا يا ريتاج انا كوثر شفيج نسيتيني؟
ريتاج: هاااا كوثر ليش لابسة نقاب لايكون تطرين من الناس افا عيب هذا وابوج مطلق صاحب عمارات وبقالات؟! عيب عيب!!
كوثر: هذه انتي ما تغيرتي كله تتطنزين ما علينا تبين اساعدج شايفتج تحوسين وعربانتج فاضية قلت اكيد ضايعة؟
ريتاج: ها لا مو ضايعة قاعدة ادز مسجات وشابكة بالبلاك بيري وسهيت شوي!! شفتي بلاك بيري مالي لونه فستقي بوردي يديد امس بابا يابه لي من دبي؟
كوثر: الله يهديج شنو بلاك بيري انتي للحين مافي فايدة منج تحبين تقلدين العالم اصلا انتي بالانجليزي كله على الحفه وانا اللي اغششج!!
ريتاج: كوثروه بس عاد كل ما شفتيني تعايريني على سؤال صح وغلط غششتيني اياه ايام المتوسطة!!
كوثر: لا مو قصدي بس ما يصير جذيه رحمي نفسج، المهم شرايج نتسوق مع بعض ونسولف من زمان ما سمعت اخبارج واخبار البنات؟
ريتاج: شدعوه نتسوق يبا انا داشه الجمعية شابكه مع واحد ضبطني من يومين في شوكليت بار وما شفته وقالي انه راح يدش الجمعية وقلت فرصة اشوفه يمكن زوغه؟!
كوثر: لا حول ولا قوة الا بالله عيل خل اوخر عنج لأن الصاحب ساحب!!
ريتاج: ها نسينا ما كلينه شوف النقاب مأثر على ذاكرته نسيتي حمود بوصماخ ولا كريموه راعي الكمارو!!
كوثر: اصلا هذيل كانو يلحقوني بكل مكان بالفري ويتهاوشون علي من يوم كانو يهال والحمدلله عمري ما عطيتهم ويه، الا انتي محتره ليش أن صبيان الجامعة يلحقوني بكل مكان عكسج انتي تلحقينهم من شارع الحب لغاية طريج المطلاع!!
طبعا ظلت كوثر وريتاج يطلعون خياس بعض والناس تيمعو عليهم وأغلب الظن ان مر عليهم شهرين لغاية ما محاسب الجمعية طردهم لأن باجر عندهم جرد!!
مشاري توه مخلص دوامه "مزرق" وقال يمر بيت يدته موضي، وتوه وصل البيت يبي يصفط سيارته لاند روفر لونه زيتي جان يتصل فيه رفيجه هيثم، وقاله انه تعطلت سيارته البارح بالخيران ومحتاج احد يروح معاه يسحبون السيارة، واتفق هيثم ومشاري العصر يروح مع بعض.
نزل مشاري وطاح الغدا وأكل وشبع وراح انسدح وانشكح بالصالة تحت التلفزيون البلازما وماسك الريموت كنترول يقلب بالمحطات لغاية ما شاف مسلسل توم وجيري وطاح شخري خخخخخخخخخخخخخخخخخخخ
العصر قام مشاري من صوت ميري اللي تنادي "مشوري مشوري.." طبعا اصغر عيالها اهي اللي ربته بعد ما امه خلته بالكويت وانحاشت بيروت، قام مشاري غسل ويهه وشرب له قلاص عصير طازج مو كي دي دي مثل اللي بعض الناس!! ما علينا صفط سيارته عند فرع ق4 وهناك كان هيثم ناطره، وركب مع هيثم اللي كان ويهه معرق ومبين عليه يا انه مريض او فيه شي.
بالطريج مشاري انتبه انه الوحيد اللي قاعد يهذر ويسولف وهيثم ساكت، الظاهر سرحان..!!
مشاري: هيثم شفيك تعبان خل اسوق بدالك عسى ما شر ساكتب؟!
هيثم : .............
مشاري : هيثم هيثم هيثم شفيك؟
هيثم: ها انا مافيني شي بس تذكرت سالفه واحد من الربع يكسر الخاطر..ما علينا المهم مشاري انا اسف طلعت العصر بعز الحر وموديك الخيران بس ما عليه سيارتي من امس هناك عقب ما طلعت من الشاليه وما لقيت صديق وفي مثلك؟
مشاري: افا عليك انت صديق عزيز واخو دنيا بعدين انا ما عندي شي وتدري فيني مضبط مسؤولي بالشركة اداوم بس الصبح والعصر اقعد ببيتنا او اروح اتمشور بالشوارع!!
وقف هيثم يترس بانزين بالمحطة ولأن البنغالية بهاليوم مسوين اضراب نزل يترس بنفسه، وهو واقف يترس يقول حق نفسه" ماشي يا مشاري الجلب اخو دنيا ها اذا ما علمتك منو هيثم انا اوريك" خل بس نوصل المكان اللي مخطط له وهناك اعلمك اذا ما خليت دمك يسيح ما اكون هيثم ولد بوهيثم!! طلع هيثم من مخباته اليمين مو اليسار سجينة صغيرة لافها بجريدة.
وصل مشاري وهيثم مسجد منتزه الخيران وهناك قال هيثم لمشاري..
هيثم: مشاري الله لا يهينك هذا مفتاح السيارة روح افتح القبق على ما اطلع الاشتراك ونشوف علة السيارة؟
مشاري: خوش..
نزل مشاري يفتح السيارة وتوه بيدخل السيارة يبي يضغط زر القبق جان ايي هيثم من وراه ويطعنه بالسجين على ظهره خمس او عشر طعنات والدم طشر على دشداشة هيثم ومشاري يصرخ من الألم وطاح..
باجر نعرف ليش كوثر رفضت ولد عمها وشنو صار عقب ما طاح مشاري مقتول!
موعدكم ولا يطوفكم مع برنامج المسابقات "جم أقول..؟!"
الليلة عقب نشرة الاخبار
هناك 3 تعليقات:
ههههههههههههههههاي اهم شي كوثر وابوها مطلق شلون ركبت الاسامي على بعض :p
انا ابي اعرف شتقصد بالقمنده!! قمندة منو بالظبط
انطر البارت 3 واشوا هالمره زايد الجييله :D
قوواك الله
حدك دقيق بالتفاصيل بالذات اللاند الزيتي اشمعنى لووووول ;q
الجوري
طبعا مسلسل القمندة ما اقدر اكشف للمشاهدين المزيد من خباياه ومفاجآته ونطرو حلقاته القادمة تشويق إثارة دراما دموع ارهاب حب كوميديا كل شي يطري على بالكم بيصير واذا حبيت تغير من القصة عادي !!
غيرف معرف
الزيتي لون بنطلون واحد من الربع أيام الجامعة سنة كاملة حالف ما غيره الا لم نشق من تحت شق عود!!
إرسال تعليق