بوعزوز قدر يقنع حجي شريف راعي بسطة الطماط المحلي إن فلوسه قاصرة وولده للحين ما وصل الظاهر ناسي و يتناسى!!، طلع بوعزوز وهو حالف يبط راس ولده باكبر صخره يلاقيها ببراحة بيتهم "الحديقة سابقا" لأن البلدية شالتها من عرجها وشالت النافورة اللي "بثينة ..أم عزوز" حاطتها عناد حق ام الجيران!! بوعزوز اتصل بولده اللي شرح حق ابوه ان البنك حجز على باجي الفلوس اللي نزلت من الاعانة والبة استخدامه للفيزا ماستر، الابو تعاطف مع ولده وقاله خلاص خاش لك خيارة شكلها تلوق لك.
هيثم عقب ما خلص جريمته رجع سيارته ودعم فيها السيار اللي مذبوح فيها مشاي، اتصل بالداخلية وقال لهم ان حرامية تعرضو له اهو وصاحبه وانحاشو وصاحبه الظاهر انذبح عقب الهوشة مع قطاع الطرق!! بهذه الأثناء تصل الدوريات وسيارة اسعاف والمطافي ووحدة رصد الطقس، والمباحث و5 و ستة باصات جمهور يحبون الطماشة هذا غير المحطات الفضائية وأولهم فلاش وسكوب ولصباح والشاهد في حين اكتفى تلفزيون الكويت بقطع برنامج شعراء النبط واعلان عن نفي الداخلية لوجود فرع لعصابة المافيا او الكابوني بالخيران!!
هيثم يتكلم للمحقق وهو يبحي والكل يتعاطف معاه، وقررو يوصلونه البيت بعد ما صادرو السيارات للتحقيق بالأدلة الجنائيةن وهو بالطريج يتصل فيه صاحبه جمعان اللي يبيه يشرفه عرس خويه ولد خال ام عمة ولد عمه اللي بيصير باجر، طبعا عقب الخبر جمعان حلف إن العرس ما يتم وراح يتأجل علشان صاحبه هيثم تدرون الناس للناس.
كوثر ردت من الجمعية قب ما اتصلت امها وقالت ان ام فلاح جايه اليوم تخطب كوثر لولد عمها فلاح، عاد كوثر بصراحه ما تبلع فلاح من يوم ما كانو يهال وبحضانة وحده، وصلت كوثر وراحت شوف لها دراعة من الدرايع اللي شتها امها زينب من معرض سكينة ستايل اللي صار قبل شهرين بسرداب عذاري اللي خلت آشي طباختها الخاصة تسو دونات وتبيعه بمعرض كوكب يعني بنتها مسويته بإيدها!! هذه الهبة هالأيام!!
كوثر قعدت تبجي بالغرفة وتفرك ويهها بالكمبل على بوكاهانتس، وتقول ما ابي فلاح فلاح ما ابيه وحطت اغنية "علىخدي احط ايدي" للفنان محمد المسباح، دشت اختها الصغيرة النزغة شقحه ودار هالحوار الهام!!
شقحه: افا ليش تبجين يا كوثر وانا اختج؟!
كوثر: شقولج امي زينب تبي تزوجني ولد عمنا فلاح المليق بضروس صفر وانا ما ابيه..بكاء طويل !!
شقحه: بس هذه سالفتج مالت علج يا مينونة حمدي ربج في احد يبي يتقدم لج اصلا نص بنات الفريج طايحين بجبود أهاليهم عنسو وعليه!!
كوثر: عاد فلاح ما غيره ما ابيه انتي ما تدرين عن وعن سوالفه ايا الجامعة قبل ما يسقط وينفصل وحول معهد الكهربا والماي؟!
شقحه: يا معوده مافيه شي فلاح كاهو الحين صار سكرتير نائب قبيلتنا وياخذ معاش من دوامه ومن المجلس اهو عمره ما طلع من باب بيتهم!! انا لو مو حاطه عيني على ولد خالتي شوقية "غلوم" جان قلت لج انا اخذ فلاح، بس شسوي انا احب غلوم شفتيه بآخر يمعه من دخل البيت ولغاية ما خلص العشا وهو ينقز لي حواجبه اللاصقين يحبني ودز لي اخوه كريم معطيه رسالةمعطرة يقول نه ناوي يخطبني عقب ما يتخرج من الثانوية.
كوثر: انا ايام الجامعة فلاحوه فشلنا كسر ويهنا، طب معاي بمحاضرة وضرته طالع فيها فاهم كل يوم يقول حق الدكتور ان هالبنت خطيبته اللي اهي انا، والدكتور حط علي لأن فلاحو بانتخابات الجامعة راح اشتغل مع "...." والدكتور حط في باله اني معاه، هذا غير ان مرة بمواقف الجامعة، سك علي واحد من الطلبة فانا نزلت اشوف منو جان ينزل الشهم فلاح ويفش تواير السيارة الليمسكره علي، وانا طبعا جذيه طافني امتحان بسبته، هذا غير انه اول كورس بالجامعة وعقب نهائية الاختبارات دش الجامعة بنص الليل مع ربعه وكتب على طوفة الكافيتيريا"احبج كوثر" وما خله ولا طاولة ولا كرسي ال وكتب ذكرى فلاح يحب كوثر!!
شقحه: ياحظج بصراحه رومانسي فلاح هنيالج!!
كوثر: يا معوده سكتي انا فكرت احبه لكن عقب ذاك اليوم هونت؟ ما تذكرين عيد ميلادي يوم عزمت صديقاتي بالبيت؟
شقحه: ايي اذكر صارت مصخرة بارتي مو عيد ميلاد!! اذكر لما فلاح ياب لج هدية عيد ميلادج وحاطها بعلبة ماركة قوتشي والبنا زاغو عليها ويوم فتنا العلبة ولا ضب طمر علينا وعفس علينا العيد ميلاد وطاحت علينا سعاد غشيانه وانفضحت انها مركبة عدسات وانباقت جنطة خديجة اللي قالت انها أصلية وعقب الحفلة لقيناها بالحديقة وطلعت تقليد درجة خامسة ولا في جنطة اصلية مكتوب عليها سي كاي بالعربي!!
طبعا دشت امهم زينب وزفتهم ليش مافي احد بالصالة ينطر ام فلاح على ما تجهز كوثر، طبعا كوثر قالت حق امها مفاجأة من العيار الثقيل!!
الحلقة القادمة نقولكم شنو قالت وأيضا ما نسينا سالفة مشاري وهيثم اللي اجلناها بناء على تعميم وزارة الاعلام بضرورة تصوير المسلسلات الرمضانية بعد الاستئذان منهم!!
اما سؤال حلقتنا
هناك تعليقان (2):
احسن مسلسل برمضان ..
تسلم
يعني احسن من شر النفوس وا احسن من شوجي!!
إرسال تعليق