10 أغسطس 2009

بنات وحريم الكويت!! part1

سبق ورسمت عن "بعض" شباب وشياب الكويت، وتلقيت العديد من التعليقات من كل مكان، ومن هالتعليقات ان الصبايا يبون يشوفون نفسهم برسوماتي، ووعدت الكثيرين والكثيرات بأن الدور ياي لهن قريبا!!

وقبل لا أودعكم حبيت يكون هالموضوع آخر موضوع أقدر احطه بالمدونة قبل ما انطلق بإجازتي السياحية مع المدام إلى جزيرة قبرص.

وارجوا قبل لا احد ياخذ بخاطره ويعتبرني مثير للفتن والسبب الاساسي في تدني لغة الحوار في مجلس الامة، ويقول اني السبب وراء تدهور مستوى منتخبنا، هذه الرسومات لا تمثل الواقع ووإن مثلت في واقعكم وواقعي شي فهي تمثل "البعض"!!


-----------------------------------------



هذه النوعية تلاقون منها منتشرة وتتكاثر في الشامية مول، تحوس عند الفلبينية اللي تبيع مكياج "بوربع" ويمرون بطريجهم هارديز يشترون من باسكن روبن كل ثلاث بنات بواحد!!

ويمكن تصادفون منهن في حوش السالميه يدورون حجابات تقليد!!

----------------------------------



هذه الفصيلة غير النادرة ممكن تشوفونهم ينتشرون كل ثلاثة مع بعض او سبعه ومعاهم بنت صغيرة، واغلب الاماكن اللي ينتشرون فيها حديقة الصباحية، وجمعية القرين القديمة، وكذلك مجمع بلازا حولي وما يمنع من تشوفون بعضهم بعد الظهر بسيارات كامري او جيب هونداي بشارع الحب او الخليج لغاية الساعة5 العصر.

-------------------------



هذه النوعية المغلوب على أمرها مرات، بعضهم بمجمع أجيال والبعض الآخر يستانس بالتطمش على ألبومات المغنيات في فيرجين ما يشترون ولا حتى يعرفون يشترون لأن اوامر "الوالد" تمنعهم من حتى التفكير بشراء شي بخاطرهم ولازم ينطرون اللي تقدمه الاسرة لهم من ملابس وجناط ومكياج، يتميزون بأنهم يكسرون الخاطر ودائما يكونون بديلات للخدم في اصطحاب الاطفال "الصبيان تحديدا" يودونهم جمعية الخالدية او حديقة سيتي سنتر السالمية!!

-----------------------------------------



المفروض ان هذه النوعية نشوف لها صور في المتحف العلمي التربوي بالمرقاب، أو حتى يخصصون لها درس بكتاب خامسة ابتدائي عن هالنوع من العيايز، تلاقونهم يفترون مع درزن من الخدم والسسترات هذا غير السايق، طبعا محل الخضرة ولفكاهة بكل الجمعيات وخاصة الفترة من الصبح الساعة 6 ودقيقتين ولغاية الظهر قبل صلاة الظهر، يناشبون الكاشيرية والحمالية على نوعية الطماط والخيار، ودايما تحن وتز ليش البيض صاير خفيف وشدعوه الفازلين مخلص وغالي؟! كل هذا علشان ولد اخو حفيدها كان عضو مجلس ادارة الجمعية قبل سبع او ثمان سنين!!

--------------------------------------------



اما هذه النوعية "النفسية" اللي على بالها مثقفة وجميلة وحبوبة، فتشوفونها مع صديقاتها الجياكر، اما في بيتزا هت كيفان، او في سوق شرق عند المطاعم، ويتميز هذا النوع بحدة النظر والخز من على بعد، خصوصا الرياييل المتزوجين تلاقي البنت منهم تتفحص الزوجة من تحت إلى فوق، وبعدين تعفس ويهها وتعقد النونه، واذا شفتو مثلهم فأكيد في ابل بيز أيام الاعياد تلاقي هالاشكال كل ساع تقوم تروح الحمام "عزكم الله" مو علشان شي لكن علشان تقدر تشوف اللي بالمطعم كلهم وخصوصا اللي احلى منها او الشباب اللي ما يعطي ويه!!

اغلب الظن يتكاثرن في المنتديات ويستخدمن اسماء مستعار مثل "لولي كاتي او فلونة الجليب"

-----------------------------------------------------



شنو اقولكم على هالموديل من الحريم اللي ما يعرفون يقطون عبايتهم تلاقيها من اول ما تزوجت، لغاية عرس بنتها بنفس العبايه، ونفس الشكل وتشتكي وتتحلطم على بناتها ليش يكشخون ويلبسونن اهم شي عندها ان سوق الميرة مسوي خصومات برمضان او سوق الصادق عنده طاولة بلاستيك حلوة، ملابسها من سوق المحاميد ومرات وايده تلاقيهم واقفين بالدور بأي جمعية تعاونية ان شاء الله في جبد ولا حتى العبدلي، دام سعر البيض ارخص من الجمعية اللي ورا بيتهم!!

----------------------------------------------------



ويح قلي!! شوفو هذه النمونه تلاقونهم بأي مطعم يديد يجربون كل الاكلات البحرية والبرية والجوية والفضائية، يموتون على الاكل الصيني يعتقدون ان اللبس الغالي يغطي على عيوبهم، يتعبون على نوعية مكياجهم، بس المشكلة لما يدخلون محلات وما يلاقون شي قدهم غصب طيب تاخذ اكبر مقاس تشتريه يعني تشتريه، مو علشان شي فقط علشان تحر صديقاتها او اللي وراها في الدور، وبعدينعاد تحذف اللي شرته بالكبت اللي فط اسمه كبت لكن في الاصل اهو سلة مهملات لملابس يديده، هن ضحايا وجبات الريجيم واطباء النحافة، والاندية الصحية كل شي جربوه على عمرهم ومافي فايده.

رومانسيات يسمعون تامر حسني وهاني شاكر وعمرو دياب وبشار الشطي، واذا زعلو راحو اقرب مطعم وخلصو على كل قائمة الطعام، ويتكلمون من طرف لسانهم يعني ذرابة، وماني قايل شنو يسوون في شاطئ المسيلة....خلوني ساكت احسن!!

------------------------------------------



يا رب الصبر..نوعية هالعيايز اللي للحين تشوف بنتها اللي حطبت وطلعت خيوطها طفله، صغيرة البنت قبل امس تقاعدت من دوامها واتصور ان اطباء شد البشرة في لبنان قالو ان حاتها ميؤوس منها، الام للحين تدور لبنتها ولد الحلال رفضت حتى لحظة كتابة الموضوع 500 معرس من يوم كانت البنت عمرها 17 سنة ولغاية اليوم، آخر معرس ولد عايلة "ولد بطنها" عمارات وشركات ومنتجعت واسهم في البورصة وشهادات اصلية مو شغل الفلبين ومصر، وقال للام انه مستعد يدفع تقريبا مليونين دينار شبكة وعمارتين بلندن مهر ويسجل لها وكالة السيارات باسم الام!!!

مع هذا الام رفضت الولد فقط لأن اسم امه "نائلة" طبعا البنت من كثر ما فلست قامت كل يوم بليل تدخل الانترنت وتشترك بكل المواقع والمنتديات تدور لها مراهق تعيش معاه "شات غرام" البنت قبل لا تنام ترقص مع شماعة الملابس اللي ملبستها الغترة والعقال والبشت، يعني معرس، طبعا كل البنات يحلمون بقصة روميو وجوليت اما اهي فتحلم لو سايقهم يتقدم لها!!!!!

------------------------------------------------



نادرا ما تكتمل الصفات الحسنة لمثل هذه النوعيات المريضة، تجدها جميلة ناعمة حساسة من بره لكن من داخل حقودة نمامة حشاشة تحب تعيش على ظهر الشباب، تلاقيها بمجمعات الصالحية والراية ما يشترون فقط للفرجة، المشكلة انها متخلفة عقليا ما تعرف شي بالدنيا غير تعبئة الرصيد على حساب ولد الجيران، وللأسف انها متفوقة بالدراسة والبركة في المسبهين...!!

------------------------------------------



يا ليت الجرا ما كان!! اكثر الفئات النسائية غموضا وانفتاحا في آن واحد، واتعس انواع النساء في العالم الثالث، واكثرهن ثقافة ومعرفة ببواطن الامور وظهورها، ولكن مصيرهن ان تكون دائما خلف الستار خلف الجدار لأنها ببساطه "عار" يمنع عليهن التمتع بأبسط حقوقهن واذا اخطأن ينتهي بهن الامر لتوديع الدنيا، النقاب الحقيقي ليش قطعة الخام التي تخبئ وجهها، بل جدار خانق خنقه الاهل وتحديدا الرجال منهم، يوصون بتخلفها واحتقارها، عليهن كل الواجبات وليس لهن سوى حق الاكل والشراب وشراء العطور الغالية والملابس الفاخرة على ان يكون كل ذلك بصمت...

اشفق عليهن!!

هناك 15 تعليقًا:

عيون إعلامية يقول...

ما شا الله رووووعة :)
خوش رسمات و تعليقات ... بس أشوا ما لقيت نفسي بينهم p:
يعطيك العافيه :)

الوتيــــــــــن يقول...

ياسلام

يبتهم يييييييب يالغيث

اولا تروح وترد والمدام بالسلامه .. بس جنه فطومه سقطت سهوا من القائمه؟ وين وديتوها؟

اعجبتني فكرتج عن النوع الاخير من النساء فهن فعلا كما وصفت بالضضضضضضبط

قواك الله عزيزي

Shaikha يقول...

ولد اخو حفيدها ، والله قعدت افكر فيها وايد لول !

زعفرانه يقول...

ليش كان اغلب التركيز على المحجبات؟

الغير محجبات اشكال و انواع ياريت لو تسلط الضوء على الفئة البارزة منهم :) ..

يعطيك العافية .. ابداع

Shaikha يقول...
أزال المؤلف هذا التعليق.
رزنامــــــة يقول...

تفسيرات مضحكة مبكية
ولكن يخونها نقص بعض النماين
وعدم وضع النمونة المثالية والتي يجب ان تكون مثالا يحتذى به

وللعلم ترى كل فئة فيها جانب يكسر الخاطر من تاثيرات البيئة التي تعيش فيها
كان لازم تتكلم عنها ايضا

بس خوش رسمات تضحك :)

Mohammad Al-Yousifi يقول...

ظالم

C'est La Vie يقول...

اغلب هالنماين مارين علي P:
Bon Voyage

الجـــوري..كـــلام الصمــــت يقول...

الصراحه حلوه بس لي تعليق

االعنوان بارت واحد!!
هل في بارت 2!! افضل او بالاحرى تبين الفئه المثاليه او الافضل.

اذا لا مو هذا القصد من بارت واحد او 2 كان المفروض العنوان يكون (بعــض بنات وحريم الكويت) :)

الرسمات روعه والتعليقات تضحك وتبجي وتخلي الواحد يتحسر على الوضع اللي وصلنا له

بس كان في نوع من المبالغه البسييييطه في بعض التعليقات

بردت جبدي من زمان هالكلام يقرقع بقلبي بس بالعته وساكته وانت ماقصرت بس ننطر البارت الثاني وان شالله في النوع الثاني :)

شكرا

غير معرف يقول...

:-)

Never judge a book by it's cover

خديجة البهاويد يقول...

خووووووووش رسمات بدر يعطيك العافية

فريج سعود يقول...

وانا اقول ليش شارع الحب فضى ومافيه الا البانشيات

كاريكاتير يقول...

عيون اعلامية

وايد ناس ناطرين يشوفون نفسهم واوعدهم ألب طلباتهم في الجزء القادم..

الوتين

الموضوع مو بس ضحك على الناس لا مو هذا هدفي هدفي ان توصل فكرة انتقاد على وضع من غير ما يكون في انتقاد خشن حاد والكاريكاتير برأيي هو افضل طريقة


شيخة

لا تتعبين نفسج انا ما ادري شلون طلعت معاي!!


زعفرانة

الجزء القادم يتناول غير المحجبات اوعدج


رزنامة

الشخصية المثالية ما يصير افرضها عليكم وكل شخص يرى في ملابسه وتصرفاته انه مثالي

والكاريكاتير مو دوره عرض المثال الجيد..


مطقوق

اشكرك


سي لا في

عيل ما شفتي الباجي!!


الجوري كلام الصمت

انتظري الجزء الثاني، وقلت بالمقدمة اني اقصد البعض..


غير معرف

ما احكم على الشكل السلوكيات تكشف الناس واطباعها والشكل ياخذ جزء من هالسلوكيات


خديجة

تسلمين يا فنانة

فريج سعود

الحين الدوس على شارع الغوص!!

غير معرف يقول...

زييييين رسمت البنات :> كنت انطرها من مدة

وو في وحده 50 % أنا بس هم ما يبتها صح :> بس وااايد حجي صح

تلم ايدك

كاريكاتير يقول...

ايفز هارت

قالو لج انا ساحر ولا شيخ يفسر احلام

ودام يبنا منج 50% عيل الباجي تلاقينه بالجزء الثاني!!

مفكر ارسم بعض الشخصيات العامة كاريكاتير شرايكم؟!