22 أغسطس 2008

استراحة الجمعة وضيقة الخلق!


يعتبر يوم "الجمعة" اليوم الأول من إجازة نهاية الأسبوع بعد ما كان الثاني، قبل ما يتغير من قبل الحكومة اللي لغاية اليوم ما فهمنا ليش غيروا أيام العطلة من الخمي والجمعة إلى الجمعة السبت؟!، عموما في شغلات وايدة احنا كشعوب العالم الثالث ما نفهم ليش حكوماتنا الرشيدة تسوي هالشغلة وتقر هالقانون وتصدر هالقرار وعلى ما يبدو أنهم يشوفون شي احنا ما نشوفه!!


وبما ان اليوم الجمعة يعني الواحد يكبر المخده وياخذ له فرصة يتعرف على نعومة وبرودة المخدة ويتلحف عدل، وما يصحى إلا قبل صلاة الظهر اللي ما يطوفها الكثيرين منا واللي "البعض" منهم ما يعرف يصلي إلا هالفرض بس وطول السنة فيما عدا رمضان ما يدل طريج المسجد وين؟!


كان يوم الجمعة بالنسبة لنا لما كنا طلبة في المدارس أو حتى في الجامعة يوم "كئيب" وترتفع فيه درجة الحرار حتى لو كنا في شهر فبراير، لأن الأهل ما يخلونا نكمل اليوم باللعب وكنا نرد البيت قبل الساعة الثامنة نتعشى ونتسبح "غصب" ونجهز جنطة المدرسة، وكل واحد يقعد بالصالة يشوف اللي يقدر يشوفه من فيلم او مسلسل وبعدين يصدر الفرمان السلطاني بتوجه الجميع وتحديدا الأطفال للنوم وبأي طريقة المهم ننام لأن باجر ورانا مدرسة ولازم نقعد مبجر!!


طبعا الحين وضع تغير ما عاد في فرمان سلطاني لأن اليهال ما ينامون إلا قريب الساعة 3 الفجر، وتلاقي الأهل يصارخون عليهم "قصرو على صوت التلفزيون..نبي ننام!!" طبعا هذا الكلام طول أيام الأسبوع ما عدا الجمعة، تلاقي اللي مجابل الانترنت واللي مجابل الفيديو"الدي في دي" او اللي مجابل البلاي ستيشن واللي مجابل مسلسل بالتلفزيون "نور..سنوات الضياع...الخ" واللي ماسك التلفون وخاش روحه تحت الفراش يهذر ويقرق!! يعني الكل يطلع حرته بهاليومين ولو بعد يصدف يكون يوم الأحد عطلة تلاقي الناس تعطل من يوم الأربعاء وتعتبره حق من حقوقها مع إن هذا يعتبر نوع من "العصيان المدني" لكن درجة الاستهتار وعدم تطبيق القانون جعلت الجميع يعتقد بأن هذا جزء من النظام السائد في المجتمع وإذا يعني الناس أخذت عطلة خلها تستانس ويرتاحون اليهال من المدارس وعوار الراس!!


كانت عطلة الخميس والجمعة بالنسبة للكثيرين فرصة للأهل يروحون الشاليه أو الحدائق العامة اللي صارت مهجورة إلا من عائلات الجاليات العربية والآسيوية، طبعا المدينة الترفيهية أو حديقة النافورة الراقصة أو حتى القعدة على يال البحر سواء في شاطئ الشويخ، أو اللي عنده فلوس ياخذ عياله يوديهم المثنى أو الخليجية أو شوبيز"شخباري" يعني كان في برنامج للترفيه الأسري، حتى لو كان هالبرنامج يتضمن زيارة البيت العود لكن كانت العطلة صج عطلة، الحين بالنسبة لي من تصير العطلة أحس إني ما أعرف وين أروح المجمعات زحمة والسينما زحمة لدرجة إن الناس واقفة طابور من شباك التذاكر لغاية باب المجمع، وإذا على التمشي بالسيارة تلاقي كل شارع الخليج زحمة ليش ما تدري؟! والجو ما يسمح تقعد بحديقة أو تنزل تتمشى لأن الشمس راح تخليك "تفوح" وإذا على المطاعم اللي تارسه الواجهات البحرية كل مطعم يكلفك على الأقل نوط "بوعشرة" هذا إذا كنت عازم روحك طبعا!!



للأسف ما راح تلاقي مكان تقعد فيه وتستمتع فيه تحت الظل إلا ولازم تقط فلوسك، ماني بخيل لكن مافي مكان يستوعب هالأعداد الكبير من الجماهير الغفيرة اللي تنتشر في كل مكان، ويبقى جدامك حلين إما تقعد بالبيت وهذا هم يكلفك فلوس لأن الخدامة ماخذه إجازة رايحة المرقاب وبالتالي راح تطلب من مطعم توصيل منازل اللي ما راح يرضى يوصل طلب أقل من دينارين وانطر عاد اذا وصل الطلب حار أو حتى يكون الطلب مثل ما طلبته لا يزيد ولا ينقص!!، والحل الثاني او الحل الأخير او إنك تعكر مزاجك اللي مو ناقص وتطلع ورا هالعالم وتضيع وقتك بالزحمة وتكون أسير دندرة وحنة "المدام" اللي راح تستغل المناسبة خير استغلال وراح تملي عليك طلباتها كاملة واللي من البديهي تكلفك مبلغ من المال يعني يا شاطر راح تدفع يعني بتدفع بالطيب بالعنف راح تدفع!!


عشان جذيه تلاقوني متخذ قرار يعادل بيان رقم 1 في أي ثورة وقلت فيه للمدام "ما أروح سينما أيام الجمعة والسبت حتى لو التذكرة بربع دينار..اذا بنطلع من البيت تكون الطلعة من الساعة 4 العصر، ونشوف لنا مطعم ما عليه زحمة وأفضل تكون الطلعة عبارة عن مطعم للغداء وأخذ جولة في مجمع الافنيوز اللي كل يوم يزيد متر لدرجة إني خايف على يوم أفتح باب بيتنا ألاقيه دخل علينا وصارت الصالة محل او مطعم!!


كان هذا حديث الجمعة اللي راح يكون في كل أسبوع وقلت أطلق عليه اسم استراحة الجمعة، مثل اسم البرنامج الجماهيري أيام الثمانينات اللي كانت تقدمه المذيعة دعاء عبد الرحمن مع المذيع عبد الرحمن الشطي بتلفزيون الكويت، وعموما عطلة نهاية أسبوع سعيدة وبما إن العطلة يومين راح يكون السبت من كل أسبوع إجازة للمدونة يعني بتفتكون مني يوم هذا إذا كان في أحد يتابع المدونة أصلا!!

هناك 4 تعليقات:

عثماني يقول...

بن غيث .. شلونك يا خوي ؟؟

ماني معلق الا على اخر جملة

( يعني بخلي البوست كلة .. بجلب باخر كلمة)

منو اللي يقدر ما يتابع مدونتك انت !!؟

:)

بانتظار المزيد يا خوي

كاريكاتير يقول...

شكرا على تعليقك اللي يشجعني على الاستمرار في التدوين.

Dalal_eng يقول...

من متابعين المدونة الجميلة والاسلوب الساخر العجيب والى الامام انشاء الله

كاريكاتير يقول...

تسلمين على مرورج واشوه طمنتيني لأني كنت اعتقد ان اللي متابع مدونتي اهم 5 بس!!

انا وعثماني وزوجتي اللي اقايض شوفتها للمدونة بطلعة لمجمع وواحد من الشباب وانتي صرتي خامس المتابعين..

اشكرج واتمنى ان تكون المدونة عند حسن ظن الجميع..مع اني ما اعرف حسن والظن اغلبه اثم!!

تحياتي