وخر حمود وخر عبود ..التيس مهدود!!

اول محاولة

من آخر موضوع كتبته وحتى الساعة السادسة فجرا حاولت الاستسلام للنوم لكن كل المحاولات باءت بالفشل...

محاولة ثانية

من الساعة 3 الفجر حتى الساعة 6 ما قدرت انام وظليت....

محاولة ثالثة

لم استطع الاستسلام للنوم يوم أمس حتى وجدت نفسي أمضي ساعات الصباح الأولى مستيقظا...

محاولة رابعة!!!

...

محاولة خامسة

حاولت انام امس ما قدرت والسبه طبعا اني ودي اسوي شي يديد بالمدونة، قلت أصير مثل المحطات الفضائية واسوي باقة برامج لشهر رمضان واشوف شلون راح اقسم المدونة وشنو راح اكتب فيها وانزل فيها من مواضيع وصور ورسومات كاريكاتيرية وأقسام، كل هذا اخذ مني وقت بصراحه لدرجة أن زوجتي حست ان في شي غريب مو طبيعي يخليني اسهر مجابل اللاب توب بهالطريقه، وبعد محاولات اقنعتها بانها ترد تكمل الحلم الوردي اللي عندها عشان لا يطوفها شي منه!!

المهم ما بقى موقع ما دخلته ما بقى مدونة زميلة زرتها ما بقى صورة في قوقل او جوجل أخذتها، حتى الجرايد اليومية دخلت عليها اشوف عددها اليوم شنو فيه، بصراحه ما ادري ليش امس أو بالاحرى ساعات الفجر الأولى ما رضت تعدي من غير ما أصل لنتيجة، وفي الحقيقة وبالواقع ان البحر متروس قواقع "شخباري هالسوالف" اتضح لي إني ما ادري شنو أبي بالضبط، يعني باختصار ما عندي سالفه لدرجة خلتني اتخيل شنو راح يصير باجر وهل ممكن أنام واصحى وألاقي تشكيل وزاري جديد ولا حل لمجلس الأمة ولا حل غير دستوري، ورحت أحلل الأوضاع السياسيية والاجتماعية واستعيد ذكريات الجامعة وما بقى سالفه ولا فيلم ولا شي طرى في بالي وبذاكرتي الا وشفته ومع هذا ما فهمت شسالفه شقاعد يصير بالضبط، بصراحه ما نمت الا بعد ما سمعت باب السطح يتبطل على طريقة أفلام الرعب حسيت ان في شي بيصير الحين فيني اذا ما نمت؟!

من الخوف نمت وتركت كل شي مثل ما اهو، واول ما صحيت ولا زوجتي مو موجودة بالدار بصراحه شكيت بالوحش اللي ياي من السطح، ومن الخوف ولأني توني صاحي مافيني شدة اصارخ او انادي فقررت ابحث عن زوجتي، كانالبيت خالي الكل مسافر الا ابوي "الله يطول بعمره" قاعد بغرفته مطول على التلفزيون تقول قاعد بقهوة بوناشي وصوت قناة الجزيرة واصل آخر العاير، توني ابي انزل الصالة ولا صوت تلفون ورنه غريبة جدا ما تعودت اسمعها بتلفوني رحت اركض "لو داش الاولمبياد احسن" ووصلت بزمن قياسي للغرفة دورت التلفون ورفعت السماعه"رفعت السماعه شنو قديم انا .." اقصد تكلمت فيه من غير ما اشوف منو المتصل ولا زوجتي "بدر انت قعدت من النوم انا بالصالة يلا انزل انا يوعانه والغدا جاهز.." تخيلوا وانا اركض تخيلت ان عملية خطف صارت او انها زعلت ليش سهران وراحت بيت اهلها "مع اني اشك تسويها ..لأني بصراحه احبها واهي بعد" يعني بهالسوالف نصلح نصير مسلسل احسن من مسلسل "نور" وسنوات الضياع" اللي ما ادري ليش كل هالخبه عليه..!!

بالنهاية تغديت شوربة عدس وعيش "تقول قاعد بالسجن المركزي" ورديت الغرفة انبش مرة ثانية بالكمبيوتر، وقلت لازم اشوف المدونة واكتب فيها موضوع اليوم اللي من حطيت "أناملي" على الـkeyboard وانا احاول اكتب شي ماني قادر!! يعني ردت لي الحالة اياها من يديد!!

عموما قبل لا انهي الموضوع حبيت اشاركم باللي قريتها بالصحف وهو كالآتي..

خبر في جريدة ديرة نيوز الالكترونية يقول

ان في تعديل وزاري محتمل قريب جدا، ونورية الصبيح وزيرة التربية ووزيرة التعلم العالي راح تكون خارج التشكيلة المتوقعة، وبأن علي البراك وزير الصحة سيتولى وزارة التربية من خلال التدوير الوزاري اللي راح يطول بعض الوزراء.

http://www.deerah.com/index.php?act=artc&id=2041

اما خبرنا التالي فهو من جريدة "التابلويد" جريدة الراي اللي على ما يبدو ما عندها موضوع رئيسي تخليه بصفحتها الأولى غير هالخبر..

لا تعليق..

عموما اختم باهداء هالمقطع من اوبريت والله زمن واهداءي لأعضاء مجلس الأمة

حسافه حاولت انزل المقطع ما صار!! عموما خل اغنيه لكم..

موسيقى... وخر حمود وخر عبود...موسيقى عن الشطانه التيس مهدود!!

مخر حمود وخر خلود..ما تيوزون يا صبيان!!عن الشطانه التيس مهدود!!