تخيل لو كنت في عام 1820 شمعنه هالسنة ما ادري المهم تخيل انك في هالسنة ومريت على قهوة من قهاوي الكويت وقعدت فيها مع شايب وقلت له انك تقدر تكلم واحد في اخر الدنيا بتلفون هذا اذا كان يعرف شنو يعني تلفون؟!
اما انه يهدك ويمشي ويقول الله يشفيه ودوه الملا يقرا عليه او يضحك عليك ويعتبرك واحد مو صاحي خبل!!
انزين هم تخيل معاي انك في عام 1940 وتروح البحر تقعد على السيف وتكلم واحد من شيابنا وتقوله انك تقدر تشوف شنو قاعد يصير بكل العالم عن طريق اللاب توب!!
وحده من الثنتين اما انه راح يقطك بالبحر او انه يعتبرك مو صاحي وتحتاج جواي!!
ميخالف عزيزي القارئ ممكن تتخيل معاي انك في عام 1988 وتروح القهوة الشعبية وتمسك لك شايب متقاعد قاعد يلعب دامه، (مو تروح للي قاعد يشرب جاي انا حذرتك) المهم تقوله حجي هذا المجكنم (البيجر) اقدر اعرف منو يتصل فيني ؟!
طبيعي بيكفخك بهوز القدو اللي في ايده او انه ياخذ البيجر ويصكه بالطوفه لا ويدفعك قيمة استكانة الجاي!!
لحظة احنا على السيف وين الطوفه!! ادري طافت عليكم!!!!
شي طبيعي ان كل اختراع في الدنيا ما كان الانسان يتوقع الوصول له لأنه يعتقد ان العلم عاجز عن مواصلة خدمة الانسان، ومع هذا الانسان يوم عن يوم يتقدم خطوة من أجل تحقيق الراحة له ولبني جنسه، واحنا في الكويت واللي على ما يبدو تصنفت من دول العالم المتخلفة!! نقدر نطلع الأوائل وهذه عوايدنا في استخدام المخترعات العلمية اسوء استخدام، الأمثلة كثيرة مافي شك لكن اخر شي متخيله هالسالفه اللي للحين ما ودي تخطر في بالي!!
قريبا الكويتيين مفاصيخ بالشوارع!! شلون عن طريق نظارة يديدة اخترعتها شركة بريطانية من اجل حماية المنشآت الحساسة من الارهاب وغيره تكشف عما خلف الملابس وتستطيع ببساطة تصوير جسد الاشخاص عارة من خلال ارتداء هالنظارة العجيبة!!
يعني هذه لو تطيح في ايد شبابنا شنو تتوقعون يصير؟!
يمكن يصير حظر تجول او يطلع قرار يمنع منعا باتا ارتداء نظارة شمسية واللي يصيدونه لابس نظرة شمسية احتمال يا يتم اخلاء المكان اللي فيه صاحب النظارة او يتم تطويق المكان بالقوات الخاصة وتتم مكافحة هالآفة الخطيرة!!
واترككم مع خيالكم الواسع واسم النظارة او الاختراع
T5000 CAMERA
وعلى ما توصل النظارة السحرية ويتم منع استخدامها راح ننسى بطبيعة الحال المورد لهذه النظارة، بعدين هل تسمح الداخلية بارتداء العاملين في المطار للتفتيش؟!
----------------------------------------------------------------------------
اليوم هي الذكرى الرابعة من حصولي على شهادة الليسانس من جامعة الكويت
5 فبراير 2005 كان تاريخي!!
هناك 8 تعليقات:
اتوقع راح تكون الامور عادية وقتها
لان بطبيعة الحال بالدول المتخلفة ماتوصلها الاختراعات الحديثة الا بعد مايملون منها دول الغرب المتطورة وتكون شي مألوف
وقتها بنكون انا وانت شياب
وحفيدي الرابع توه ماخذ ليسن وشريناله طيارة صغيرونة يطير فيها لي الجامعة الله يحفظه
ولابس بنطرونه الجينز بوذبذبات (نوعه محاط بذبذبات خاصة تبعد اوساخ الجو الخارجي من لمس القماش وتحميه من المتطفلين ذوو النظارات الفاضحة)
تخيلت هالوقت متى راح يكون؟
لما توصلنا النظارة العجيبة؟
كويتيين
ننطر الدنيا تتطور
عشان بعدين تستحي على دمنا ونلحقهم بعدما نقعد من النوم
احجزلي وحدة
لووووول حلو البوست عجبني تخيلك حق كل موقف
x)
@@ نظارات الفضايح .. اذا هذي وصلتنا .. بعد ماكو طلعة من البيت ..
تشوفهم بعدين يسوون فرقة خاصة لمكافحة هالنظارة .. يكون عندهم لبس خاص ما يخلي النظارة تكشفهم
فلم
x)
مرحبا
الاخت خديجة
شلون عادية اقولج راح تصير السالفه خري مري!!
اهو معاج حق على ما توصل لنا يكون الموضوع عادي بس خوفي على ما اييبون هالنظارة الا يلع لنا اختراع يديد وهو عقال بوتيله كاشف للكذب يكشف النفاق اللي في بال بعض الناس!!
اهم شي الجينز بوذبذبات!!
اخوي مطقوق
انا موصي واحد من الربع على كرتون نظارات وراح احجز لك وحده نروح فيها مجلس الأمة!!
اخوي هاشميتو
تصدق انا اتوقع الشوارع راح تصير زحمه وكل كويتي راح يلبس قصدير على اساس انه يحميه من نظارات التفصخ!!
كل عام وليسانسك بخير
تصلح مخرج مسلسل كويتي (مخرح جيد)
لأن المسلسلات ماهي جيدة :)
والنظارة اذا كان لها استخدام مفيد ويستغلونه صح في الكويت حياها الله
انشالله يكتب التعليق 3 مرات
p=
المهم
حبيت اقول ان النظارة تطلع الناس بطريقة الthermo vision
يعني حرارية
فيبين المعدن ((السلاح))
فالناس ماراح يكونون مفصخين
http://www.engadget.com/2008/03/11/thruvisions-t5000-camera-peers-beneath-your-clothes/
بس حبيت اتفلسف شوي
=)
مرحبا
الاخ علي
شكرا على التهنئة هل تعلم انك اول شخص في عام 2009 يهنئني على هذه الذكرى..
الامر الآخر فكرة اني اصير مخرجفكرت فيها وايد وسبق وكانت لي محاولة ناجحة بنسبة 80% في اخراج مسرحية من تأليفي طبعا في المسرح المدرسي وحصلت المسرحية على المركز الثالث على مستوى مدارس منطقة حولي التعليمية..
اخوي هاشميتو
شوف اللي اخترع هالنظارة قادر يخترع نظارة التفصخ!!
ساعتها تعال درب مجتمعنا هل بمقدور الحكومة والمجلس تخصيص جلسة عن نظارة التفصخ ونشوف محمدج هايف ووليد الطبطبائي داشين المجلس يبون يستجوبون وزيرة التربية ليش ما حطت منهج كامل يحمي الجيل من هالنظارة!!
لا شكر على واجب انت ذكرت المناسبة اذا فأنت سعيد بها ولذلك ارتأيت أن أهنئك على مرورها..وأنا سعيد لكوني أول كويتي يهنئك على لصانسك
((أول)) ترتيب مفرح لقد ذكرتني بلقاء أجرته جريدة القبس معي وكان عنوانه أول كويتي يعزف في الأماكن العامة... كان عنوان مشرف
سوف أضيفها في ملفي ((أول كويتي يهنئ بدر بمناسبة ليصانصه ))
:)
اذن فملاحظتي في ما يخص النظرة الإخراجية بمحلها..المسرح الكويتي بحاجة إلى ((إنقاذ)) انت استاذ ما فكرت تعرض فكرة مسرح مدرسي مثلا تنقي لك جم طالب موهوب وتقدمون مسرحية كنشاط مفيد وممتع... أتوقع في طلبة راح يحبذون الفكرة
وعموما الإنغماس في نشاط مثل هذا يزيد التآلف بين الأستاذ والطلبة ويبعد الطلبة عن العديد من العادات السيئة وتقدر تدخل المنهج الدراسي ((بطريقة غير مباشرة طبعا))
في وايد أفكار وأتوقع عندك الكثير من الأفكار الحلوة في المجال المسرحي وانا متأكد ان في عدد كبير من الطلبة الموهوبين.
في مجال ؟
إرسال تعليق