21 سبتمبر 2008

برجيت باردو تلاحق الكويتيين!!


الممثلة الفرنسية برجيت باردو أيام عزها!!




من بداية السنة الدراسية يعني من اسبوع تقريبا وكل يوم يطلع لي طالب يقولي بابتسامة عبيطة "استاذ انا اعرف اخوك..استاذ تعرف فلان ترا يعرفك..استاذ انا اعرفك..استاذ ترا خدامتنا شايفتك بالتلفزيون..استاذ اخوي يسلمك عليك..استاذ رفيج اخوي شايف صورتك بالجريدة...الخ"



كل هذا طبعا من أجل "التلصق" و"التميلح" جدام بقية الطلبة يعني انا عندي واسطة والمدرس الاستاذ بدر "أللي اهو انا" راح اضبط هالطالب، والحقيقة اغلب اللي كلموني ما اعرفهم ولا اعرف اخوانهم، وبالذات اخوي اللي اصلا ما اشوفه بالبيت لأنه باختصار يدرس بالخارج واذا شفته اشوفه بأيام معدودة بالسنة، أرجع لسالفة "التلصق" للأسف هذا الأسلوب اكتسبوه الطلبة بالوراثة وشي من خلال سلوك المحيطين فيهم اللي علموهم إن "التلصق" أقصر الطرق لتحقيق المصالح، وبما إني ادرس مرحلة ثانوية يعني معظم هالطلبة يبوني أضبطهم بجم درجة تخليهم يواصلون مشوارهم، وبصراحة وبيني وبينكم معروف عني نحيس بالدرجات ما اعطي أي احد درجة كاملة الا اذا اثبت انه يستحق ورغم نحاستي يعرفوني الطلبة إني طيب "شفيه يمدح نفسه" !!



المهم لفت انتباهي هالموضوع اللي يعتبره العديد من الأقرباء والناس اللي حولي شي عادي، هالأيام من كل سنة تطير في أجواء الكويت مجموعات من طيور "الفري" المهاجرة وطبعا ربعنا بكل فخر وشموخ يطاردون هالطيور المهاجرة من مكان لمكان ويصيدونها بكميات كبيرة، أغلب اللي اعرفهم يتمتع برياضة الصيد من أجل الترفيه لا أكثر ولا أقل، اما البقية فيقولون إنهم ياكلون غنائم من الصيد الجائر، واللي يهدد هذه النوعية من الطيور، وللأسف ما سمعت أحد من جمعيات الرفق بالحيوان أو الهيئة العامة للثورة السمكية والحيوانية أو حتى من أي أحد أن يقول "لحظة" نعم لحظة بل لحظات يا سادة شنو قاعدين تسوون تبون تمارسون هواية الرماية ما اختلفنا بس مو على حساب هالطيور المهاجرة، ترا احنا لو في أمريكا جان تحولتو لمجموعة من المجرمين اللي تعدو على البيئة وعاد شنو يفكم من عيوز النار برجيت باردو اللي تناضل من اجل كل حيوان مسكين"مكرم السامع" يعني تخيلو لو باردو الشمحوطة أيام عزها داشة علينا الديرة وتلاحق ربعنا بالبر وتسوي حملة "إلا الفري" تخيلو أيام عزها تهقون جم واحد راح يسمع كلامها ويطيعها وعلى طريجها تزور الدوانيات المخالفة وتقولهم إن ديوانياتكم مخالفة ولازم تسمعون كلام البطة البلدية أقصد وزارة البلدية وتشيلون خيامكم عفيه حبابي الحلوين!!


اما الموضوع الثاني فهو مجموعة الصور اللي نشرتها الزميلة جريدة الآن في خبرها عن غبقة مظلة العمل الكويتي "معك"، واللي للأسف ما قدرت احضر الغبقة لظروف قاهرة المهم إن الصور اللي نشرتها الآن خلتني أفكر في موضوع ما فكرت فيه من قبل، لغة الإشارة هل كسبناها بالفطرة أم تعلمناها وهل نحن بحاجة للغة الإشارة لتفسير كلامنا؟، لاحظو ان أي واحد فينا يستخدم كلتا يديه في التعبير عن الأشياء اللي يقولها وعلى فكرة لكل حركة تفسير نفسي معين، ولو عندي معرفة في علم الايماءات جان فسرت الصور التالية...







انا شرهان عليك








الكاتب أحمد الصراف "انت ..؟!"





السفيرة الأمريكية "انا يبي واهد قرقيعان كيدز ميل"





الخرافي يؤثر في على اللي حواليه





من يصدق إن هذه برجيت باردو!!

هناك 5 تعليقات:

بـنـت بـطنـهـا يقول...

حي المييييييييييد
اول تعليق لي وناسة

ترى انا بنت مشرف بعد
وهالله هالله بعيالي لما اييب عيال مابي احد يسقط لووووول

مثل ما قلت هالسالفة عادة متوارثة لو بس نبطل من هالسالفة اتوقع الاجيال اليديدة ماراح يكبر معاها هالطبع .. كرهي حق هالسالفة وسالفة الواسطات قعدني بالبيت سنتين بدون وظيفة والكل كان يتحلطم علي حزتها وقالوها " انتي حسبالج عايشه بامريكا؟"

اما سالفة الايماءات بصراحة تمنيت ادرسها او اخذ جم دورة فيها .. شرايك؟؟

ومشكور على صورة بريجيت سببتلي صدمة لوووول ما اقول إلا " من حيلي لي قبيري ان شاء الله "

ميغسي عالبوست

ZooZ "3grbgr" يقول...

حلاتها ايام شبابها
بس الصورة الاخيره أشكره ماكو أمل الشباب يعود يوما
بس عفيه أهم شي حليمه ماتشوف بوستك وتقرر تصير بريجيت باردو الكويت

alsaronah يقول...

طريقتك في سرد الموضوع جدا رائع


والله الي يشوف شكلها يقول هذي امها بس تخرع والله لووول

يارب ماصير مثلها ماحب الكبر .. :(

كاريكاتير يقول...

مرحبا

بنت بطنها

اذا على عيا لمشرف او عيال المدرسة انا متحلف فيهم هالسنة اللي يبي يفكر ياخذ امتياز لازم يثبت لي انه ممتاز ومخلص ومجتهد غير هذا الواسطة ما تنفع!!

واذا على الايماءات انا سمعت في اكثر من مناسبة ان د.منى غريب تسوي دورات؟

واذا على صورة باردو انا نفسي منصدم اقول شي انا اول مرة اشوف صورتها سواء اللي قبل ايام العز او الحين كنت اسمع فيها بس انصدمت @@

زوز عقر بقر..

اذا على حليمه خليها على العدسات والكلونيات والبواريك وغيرها انا قاعد ايمع لحليمة خوش موضوع...!!

السارونه

اذا طريقتي في السرد رائعة فمشاركتج وتعليقج ومتابعتج هو الاروع ويشجعني على المتابعة!!

اما باردو والجكر فهذا نصيب كل شمحوطه وكل من اغتر في نفسه!!

بـنـت بـطنـهـا يقول...

عودة

كاريكاتير بالنسبة لمنى الغريب ما انصح ابدا كانت تدرسني فرنسي ايام الجامعة وعرفت باكثر من مناسبة ان اهدافها مادية ويادوووب تطلع لك بمعلومة معلومتين وتبقى وجهة نظر