كان المفروض إني من أخلص سالفة بوصابر أقوم أسلم عليه وأروح اشتري دلاق لكن عقب السالفه اقتنعت إن دلاقاتي بالبيت حلوين ويمشي الحال فيهم للشهر الياي، عموما قلت حق الحجي اللي طلع اسمه بوصابر ..
انا: حجي بوصابر شللي قاعد يصير بالديرة..الناس متضايقة صج كل شي تغير؟!
بوصابر: شوف الديرة اهي الديرة ما تغيرت على ناسها ولا على نفسها، لكن الناس اهم اللي تغيرو..قبل جارك لو ما شافك رايح المسجد ولا ما شافك بالديوانية يمرك البيت ويسحب معاه الملا جود "جود أو كود..يقصد بها كاد أو يكود أي متوقع" مريض او فيه شي ومحتاج مساعدة..تدري الناس للناس..واذا على الضيجة اللي بالناس لأنهم كلهم يدرون هالدينار..استغفرالله مع ان النفط نعمة على اهل الكويت وخلاها دولة غنية لكن بصراحه حولنا إلى مجتمع مفكك..العيب مو في النفط ولا بالفلوس العيب فينا..
انا: شلون حجي العيب فينا..يعني انت تغيرت على أهلك وجماعتك؟!
بوصابر: ماعاد أهل الفريج يعرفون بعضهم بعض اصلا جارك اللي اهو جارك تشوفه قبال بيته يتصدد ما يبي يسلم تقول السلام صار بفلوس!!
انا: انزين حجي ربعك بالقهوة مثل ما اهم ولا تغيرو؟
بوصابر: أي ربع لا يبا راحو صفيت على عرب وابو عبد العزيز وخليف والبنغالي ابوالكلام والسايق اللي يوديني القهوة ومن القهوة للبيت ومن البيت للمسجد وبس!!
انا: وين راحو ولا الله يرحمهم؟
بوصابر: اللي مات الله يرحمه ولا غيرته الجم بيزه وتكبر علينا وصار عنده عمارات ومحلات واللي مرته حابسته بالبيت تقول خرف ويقط خيط وخيط واللي كبر وتعب وصار ما يقوم من الفراش واللي ولده حذفه دار المسنين وما يندرى انا وين مصيري!!
انا: الله يطول بعمرك ان شاء الله..عيل شلي يخليك تقعد دام ربعك راحو؟
بوصابر: اذا على الربع انا تعودت اقعد بالقهوة بروحي عقب ما مات بوعزوز..الله يرحمه كان صج صاحبي من أيام ما كنا ندرس في المدرسة الشرقية اللي ما ادري شصار فيها الحين صارت متحف ولا سكن عزابية ولا مهجورة ولا انهدمت..التثمين ما خلنا لنا بيت واحد من بيوت شرق كل شي راح!!
انا: الله يرحمه بوعزوز..
بوصابر: قبل لا يتوفى باسبوع كنا بالقهوة وكان قاعد مكان ما انت قاعد.
انا : (تحركت عن المكان..) حجي شمعنا بوعزوز متذكره عدل؟
بوصابر: شوف بوعزوز ما غير من أطباعه كان دايما يقعد بالقهوة ويتجمع حوله الكبار والصغار ويسولف عن أيام قبل وشلي شافه بمصر ولبنان والبحرين وعمان ودبي وإيران والعراق وسوريا حتى الهند واستراليا راح لهم..وكانت ذاكرته قوية يتذكر كل شي صار قبل.
انا: انزين شكان يقول اللي يخلي كل القهوة تسمع سوالفه..
بوصابر: قبل اسبوع من وفاته كان يسولف عن سالفة صارت بالسوق وان هالسالفه خلت الكل يخاف يمر بالليل بسوق المباركية عند دكان بومساعد الخياط.
انا: شنو صار؟
بوصابر: خبرك قبل السوق أمان وين ووين نسمع عن حرامي او شي يصير بالسوق..كانو الشرطة ايام اول ينخاف منهم والتجار والشيوخ عندهم صبيان كل واحد تقول طوفه قاعد بالمحل..المراد إن بيوم من الايام صارت بوقة بسوق السلاح..طبعا سوق السلاح محلاته تتسكر وفيه ناطور معروف عنه نسر لكن حظه إن البوقة صارت في كذا محل ومن غير ما ينكسر باب!!
انا: انزين..شصار!!
بوصابر: ولمدة اسبوع طلعت الاشاعة ان هالناطور بايق..بعد ما زاد عدد الحرامية وقامو يبوقون وايد شغلات بنفس الطريقة لا باب مكسور ولا شي!!..كان بومساعد الخياط محله الوحيد اللي بابه مو من حديد كان من خشب ومافيه غير مكينة الخياطة والابر والخيوط والخامات وطلبات الناس من دشاديش..ومع هذا انباق منها جم دشداشة من غير مافي احد يعرف الحرامية..وكل يوم ينسمع عن بوقه بمحل بومساعد..الريال استخف لأن مو معقولة شنو الحرامية تبوق دشاديش..
انا: انزين..
بوصابر: كان بوعزوز الله يرحمه بالقهوة ومعاه بومساعد الخياط اللي المسكين يشتكي الحال وإن الزباين شوي شوي بدت توخر من محله!! شار عليه بوعزوز "شار أي اعطاه المشورة" وقاله بسيطة تبي تصيد الحرامية وتخليهم ما يوطوطون السوق "يوطوط..اي يقترب"؟
انا: شلون يصيدون بوعزوز..
بوصابر: بوعزوز كان يموت على افلام العصابات والكاوبوي وشارلوك هولمز وافلام فريد شوقي وعماد حمدي وانور وجدي..يعني الريال كان هوايته الافلام والسينما..وقال لبومساعد انه يقعد بالقهوة ويسولف انه بعد اسبوع راح ااييب بضاعة يديدة قيمتها 300 دينار وراح تكون بمخزن المحل بعد اسبوع..طبعا هذه كانت خطة بوعزوز عشان يصيد الحرامية.
نكمل باجر..
انا: حجي بوصابر شللي قاعد يصير بالديرة..الناس متضايقة صج كل شي تغير؟!
بوصابر: شوف الديرة اهي الديرة ما تغيرت على ناسها ولا على نفسها، لكن الناس اهم اللي تغيرو..قبل جارك لو ما شافك رايح المسجد ولا ما شافك بالديوانية يمرك البيت ويسحب معاه الملا جود "جود أو كود..يقصد بها كاد أو يكود أي متوقع" مريض او فيه شي ومحتاج مساعدة..تدري الناس للناس..واذا على الضيجة اللي بالناس لأنهم كلهم يدرون هالدينار..استغفرالله مع ان النفط نعمة على اهل الكويت وخلاها دولة غنية لكن بصراحه حولنا إلى مجتمع مفكك..العيب مو في النفط ولا بالفلوس العيب فينا..
انا: شلون حجي العيب فينا..يعني انت تغيرت على أهلك وجماعتك؟!
بوصابر: ماعاد أهل الفريج يعرفون بعضهم بعض اصلا جارك اللي اهو جارك تشوفه قبال بيته يتصدد ما يبي يسلم تقول السلام صار بفلوس!!
انا: انزين حجي ربعك بالقهوة مثل ما اهم ولا تغيرو؟
بوصابر: أي ربع لا يبا راحو صفيت على عرب وابو عبد العزيز وخليف والبنغالي ابوالكلام والسايق اللي يوديني القهوة ومن القهوة للبيت ومن البيت للمسجد وبس!!
انا: وين راحو ولا الله يرحمهم؟
بوصابر: اللي مات الله يرحمه ولا غيرته الجم بيزه وتكبر علينا وصار عنده عمارات ومحلات واللي مرته حابسته بالبيت تقول خرف ويقط خيط وخيط واللي كبر وتعب وصار ما يقوم من الفراش واللي ولده حذفه دار المسنين وما يندرى انا وين مصيري!!
انا: الله يطول بعمرك ان شاء الله..عيل شلي يخليك تقعد دام ربعك راحو؟
بوصابر: اذا على الربع انا تعودت اقعد بالقهوة بروحي عقب ما مات بوعزوز..الله يرحمه كان صج صاحبي من أيام ما كنا ندرس في المدرسة الشرقية اللي ما ادري شصار فيها الحين صارت متحف ولا سكن عزابية ولا مهجورة ولا انهدمت..التثمين ما خلنا لنا بيت واحد من بيوت شرق كل شي راح!!
انا: الله يرحمه بوعزوز..
بوصابر: قبل لا يتوفى باسبوع كنا بالقهوة وكان قاعد مكان ما انت قاعد.
انا : (تحركت عن المكان..) حجي شمعنا بوعزوز متذكره عدل؟
بوصابر: شوف بوعزوز ما غير من أطباعه كان دايما يقعد بالقهوة ويتجمع حوله الكبار والصغار ويسولف عن أيام قبل وشلي شافه بمصر ولبنان والبحرين وعمان ودبي وإيران والعراق وسوريا حتى الهند واستراليا راح لهم..وكانت ذاكرته قوية يتذكر كل شي صار قبل.
انا: انزين شكان يقول اللي يخلي كل القهوة تسمع سوالفه..
بوصابر: قبل اسبوع من وفاته كان يسولف عن سالفة صارت بالسوق وان هالسالفه خلت الكل يخاف يمر بالليل بسوق المباركية عند دكان بومساعد الخياط.
انا: شنو صار؟
بوصابر: خبرك قبل السوق أمان وين ووين نسمع عن حرامي او شي يصير بالسوق..كانو الشرطة ايام اول ينخاف منهم والتجار والشيوخ عندهم صبيان كل واحد تقول طوفه قاعد بالمحل..المراد إن بيوم من الايام صارت بوقة بسوق السلاح..طبعا سوق السلاح محلاته تتسكر وفيه ناطور معروف عنه نسر لكن حظه إن البوقة صارت في كذا محل ومن غير ما ينكسر باب!!
انا: انزين..شصار!!
بوصابر: ولمدة اسبوع طلعت الاشاعة ان هالناطور بايق..بعد ما زاد عدد الحرامية وقامو يبوقون وايد شغلات بنفس الطريقة لا باب مكسور ولا شي!!..كان بومساعد الخياط محله الوحيد اللي بابه مو من حديد كان من خشب ومافيه غير مكينة الخياطة والابر والخيوط والخامات وطلبات الناس من دشاديش..ومع هذا انباق منها جم دشداشة من غير مافي احد يعرف الحرامية..وكل يوم ينسمع عن بوقه بمحل بومساعد..الريال استخف لأن مو معقولة شنو الحرامية تبوق دشاديش..
انا: انزين..
بوصابر: كان بوعزوز الله يرحمه بالقهوة ومعاه بومساعد الخياط اللي المسكين يشتكي الحال وإن الزباين شوي شوي بدت توخر من محله!! شار عليه بوعزوز "شار أي اعطاه المشورة" وقاله بسيطة تبي تصيد الحرامية وتخليهم ما يوطوطون السوق "يوطوط..اي يقترب"؟
انا: شلون يصيدون بوعزوز..
بوصابر: بوعزوز كان يموت على افلام العصابات والكاوبوي وشارلوك هولمز وافلام فريد شوقي وعماد حمدي وانور وجدي..يعني الريال كان هوايته الافلام والسينما..وقال لبومساعد انه يقعد بالقهوة ويسولف انه بعد اسبوع راح ااييب بضاعة يديدة قيمتها 300 دينار وراح تكون بمخزن المحل بعد اسبوع..طبعا هذه كانت خطة بوعزوز عشان يصيد الحرامية.
نكمل باجر..
ليست هناك تعليقات:
إرسال تعليق