26 سبتمبر 2008

الشيخ يشوف جذيه؟!

هذا الأسبوع هو الأغرب من بداية العام 2008، والسبب امتداد العطلة اللي راح تكون لنهاية العيد السعيد "بالمناسبة عيدكم مبارك وعساكم تعودونه..وكل عام وأنت بخير.." ولأنه وحسب رزنامتي الخاصة مافي نهاية للأسبوع راح أتكلم بعيدا عن ما هو مقرر، من تلخيص لمذكراتي في أسبوع.




من أين نبدأ؟!




ودي أصدق بس قوية..اذا مستشفى جابر بجنوب السرة والدائري الأول وجامعة الشدادية وشاطئ البلاجات وشوبيز ما تحركو فيهم متر واحد!! تبون أصدق إن 250 مشروع بيخلصون خلال 4 سنوات..اتوقع في خطأ بالعنوان كان المفروض يقولون 40 سنة!!






الزميلة جريدة النهار في كل شهر تقريبا تنشر خبر بالبونط العريض في صفحتها الأولى عن ملف التجنيس ولغاية اليوم ما صار ولا شي من اللي يقولونه النهار!! ما ادري العيب فيهم ولا في الحكومة!!








أوردت الزميلة جريدة أوان خبر أمني على ما يبدو راح نتعود عليه، وللأسف المسؤولين ما يحسون على دمهم اذا المنفذ الجوي "المطار" مخترق!! عيل المنافذ البرية والبحرية شلون..الحين فهمت شلون الايرانيين خطفو حسين الفضالة!!











النائب علي الراشد يجمد استقالته لحين انتهاء الوسطاء بينه وبين التحالف الوطني من معالجة ما يراه الراشد تصحيحا لمسار التحالف، الحقيقة الموضوع أخذ أكبر من حجمه التحالف كتجمع سياسي شنو راح يستفيد من عودة النائب للتحالف او حتى استقال منه، هل التحالف يعتمد على رجل واحد فقط؟! برأيي المتواضع سيبقى علي الراشد في نظر البعض "تابع" للتيار الوطني والبعض الآخر يراه "مستقيل" من التيار الليبرالي داخل المجلس!!





معقولة حليمه بولند أفضل مذيعة برامج مسابقات..معقولة لأن الشيخ يشوف جذيه!!



معقولة أحمد العونان وخالد العجيرب أفضل ثنائي كوميدي..معقولة لأن الشيخ يشوف جذيه!!



معقولة شيماء علي أفضل ممثلة دور ثاني..معقولة لأن الشيخ يشوف جذيه!!



معقولة زينب العسكري تفوز بكل هالجوائز..معقولة لأن الشيخ يشوف جذيه!!



معقولة إن برامج ومسلسلات تلفزيون الوطن ما تفوز حتى لو بميكرويف "بالقرعة"..معقولة لأن الشيخ يشوف جذيه!!



معقولة تعلن أسماء الفائزين واعمالهم ورمضان ما خلص..معقولة لأن الشيخ سبق العجيري وشاف هلال العيد قبله!!



معقولة حفل تكريم المميزين من غير لجنة تحكيم..معقولة ونص لأن الشيخ يشوف جذيه!!



معقولة حفل مختلط في رمضان ومحد يقول شي..معقولة ونص لأن الشيخ موجود فيه!!





بعد هذا العمر من التنافي بالعمل والإخلاص في نشر البهجة والسرور على كافة أطفال العالم، وأولهم العالم العربي وأطفاله يطلق أحد العلماء فتوى بقتله لأنه نجس!! انزين شمعنى ميكي ليش مو جيري مع أن جيري "مفصخ" بس ميكي يلبس شورت إسلامي!! وعلى الأقل جان فكو توم من أذية جيري بس الظاهر جيري واصل!!



تدرون أول من استانس على هذا الخبر؟ .. اليابانيين اللي ابتكرو شخصية بوكيمون عشان تنافس ميكي، والحين خلاص الظاهر الساحة صارت فاضية لبوكيمون اللي احتمال يطلع ويعلن عن تاييده لهذه الفتوى!!




شخصية الأسبوع


إلى المبدع الزميل محمد هشام المغربي شكرا على ما يكتبه قلمك وأتمنى أن تظل كما أنت ولا تلتحق بقافلة المنافقين ممن يطلق على نفسه محرر شؤون ثقافية بشارع الصحافة!!



هناك 7 تعليقات:

ZooZ "3grbgr" يقول...

زينب العسكري مو ناقص الا تغني وترسم وتلحن وتوزع وتكتب شعر و و و و
توها الطريج طويل جدامها
حليمه .. عفيه مابي أعلق

Makintosh يقول...

الصراحه الشيخ لو مادري اشفيه مرتز مع اهل الفن
حليمه بولند ندري يعزها وايد مو شي يديد
بس عاد زينب العسكري ؟ الصراحه لاتمثيل لا انتاج لا اخراج لا قصه لاتعليق شي يبط الجبد

وين راح مسلسل عيون الحب ؟ وهدى حسين

لاتعليق لاتعليق لاتعليق

بس خوش بوست

Safeed يقول...

لما يصير عندك 15 جريدة يومية .. توقع اللا متوقع منها ، فكلها يطمح للبقاء :)

منال العنزي يقول...

ودي أصدق بس























الشيخ يشوف جذي :)

بـنـت بـطنـهـا يقول...

لوول

لا تعليق صراحة

اساسا ما اعرف احد تابع حلقة وحدة من مسلسل زينب العسكري


شكلة مسوي قرعة

Salah يقول...

ملخص جيد لاخبار الديرة!

بس يعتمد على مدى مصداقية الصحف الكويتية...

كاريكاتير يقول...

مرحبا

زووز عقر بقر

لا لا لا ترسم زينب العسكري لن اذا رسمت انا احسن لي ابيع رقي!!

ماكنتوش

طال عمرج الشيخ الظاهر عنده جم درع زيادين عنده بالصالة قال يوزعهم على ربعه بس بطريقة يديدة حب يسوي "اوسكار دعيج"

سفيد
العيب مو في عدد الصحف العيب في نوعية الصحافيين!!

منال العنزي
صدقي لأن الشيخ يبيج ويبينا نصدق!!

بنت بطنها

تصحيح لمعلومة اللي يتابع مسلسل لعنة امرأة الشيخ وزينب فقط!!


صلاح

مصداقية الصحف تبي تعرفها شوف كثرة الاعلانات وتعرف منو اللي يجذب اكثر!!