29 سبتمبر 2008

لا تبجي يا جوجو ..عيدك مبارك!!


طق طق طق ..


ابي برد موز مثلثات!!


العيد هل هلاله..العيد العيد درندررن هالله هالعيد..باركو يا حباب الفرح هل وطال اليوم يوم العيد واليوم نغني نشيد...هذه الأغاني اللي من صباح الله الخير كنت اسمعها كل ما ادخل بيت خالي يوسف الله يرحمه وبيت يدتي بكيفان الله يرحمها او في بيت عمتي فاطمه..يعني كل بيت ادخله واقعد بصالة الضيوف مع خواتي وامي وابوي وانا كاشخ بالدشداشة اليديدة وبوكي اليديد حاطه بمخبتاتي اللي فوق يعني اشكره وين عيديتكم..هذا غير ريحة البخور اللي تهد الحيل اما العصير اللي انخدع فيه واكتشف انه عصير قواطي كي دي دي لكن لأن العصير صابينه بقلاصات العيد "انا اسمي هالنوع من القلاصات قلاصات العيد..لأني ما اشوفها تطلع إلا بالعيد"


قلاصات العيد!!


المهم بعد جولة جمع العيادي اللي تختلف من عيد لعيد وتتناقص بشكل تدريجي كل ما كبرت، حتى وصلت الحين هالعمر وصرت انا اعطي عيادي ويا ويلك إذا ما مديت ايدي وطلعت نوط أزرق وفوق حق اليهال اللي ما يعجبهم شي..انا قبل ربع دينار من خالي عبداللطيف اشوفه وايد الحين الدينار مو عاجبهم جم يبون 5 دنانير ليش احد قالهم انا ولد اونيسيس!!





المهم العيادي كانت مصروفي أو تقدرون تسمونه "استثمار المستقبل" لكن الوناسة بالعيد مو بس بالفلوس، الوناسة كانت بأشكال الناس اللي كانت تضحك وتفرح الكل يعيد عليك ما تشوف واحد ضايق خلقه، كنا نوقف بالحوش نشوف الخروف المسكين شلون ينذبح وبعد جم ساعة يطيح جدامنا بمجبوس اللحم اللي انا ما آكله إلا بالعيد ومن إيد خالتي أم أنور "الله يقومها بالسلامة" المهم العصر كنا نقعد بحوش البيت وننطر عربانة البرد اللي تسمع صوته ..بريييييييييد بريييييييييييييييييد.." يطلعون عيال الفريج ويهجمون على العربانة والكل يقول عطني..طبعا طول السنة كان محد يعطيه ويه وخوالي كانو يقولون ان البرد ماله "مو زين" بس بالعيد عندهم عادي ناكل منه طبعا أغلب اليهال ياخذون اللي يبون ويعطينه اللي يبي محد كن يعد فلوسه وانا مثلهم "برد موز مثلث..برد بوذهب..سندويش" ونرد ناكل البرد لغاية ما يذوب بحضنا..عاد تعالو شوفو الزف والهواش اللي نسمعه بعد ما ندمر دشاديشنا ونفانيف البنات تدمر.. وبعد المغرب الكل يبدل ملابسه وتطلع البدلات المخصصة لليالي العيد ايام العز القميص والبنطلون كنت حركات بحركات بس ها يظل البوك بالمخباة اللي فوق!!




عاد نروح نحجز مسرحية لولوة الصغيرة او مسرحية من مسرحيات هدى حسين او حتى نروح شرق الألعاب "اللي يشتي قاري بي ام اكس..اللي تشتري باربي..اللي يشتري سيارة ريموت كنترول..الخ" المهم بليل نروح المسرحية ونحجز تذاكر الصف الثالث (5 دنانير) بعدين اذا خلصنا نروح مطعم الارنب الجائع اللي بكيفان عشان ناكل ونلعب بالنقازية العملاقة ونرد البيت نلبس بجامة العيد نشوف آخر حلقة من أي مسلسل ما خلص ونشوف سهرة العيد واللي يمل منا نطلع الحوش نلعب كرة او نلعب لبيده او حي الميد او شرطي حرامي يعني اليوم كله لعب بوناسة مافي احد يحاسبنا على شي!!






طق طق طق طق



جوجو الحزين!!




عيدك مبارك يا جوجو*!!






نقوم الساعة 8 الصبح ونروح نزور بيوت الاهل اللي محذفه بمناطق الكويت ناس بسعد العبدالله وناس بجابر العلي وناس بكيفان وناس بالعديلية وناس بالمنصورية وناس بالدعية وناس في ابوحليفه وناس في فهد الاحمد..يعني نقعد نفتر بالسيارة وتعال اذا احد طلع لك من البيت هذا اذا ما طلعت الخدامة وقالت "بابا نوم ماما نوم.." او من الاساس اللي مسافر..طبعا كل هذا والشوارع زحمة وتطل على الناس بالسيارة تلاقي الام تتهاوش مع بناتها والاب يتحلطم على زوجته اللي ما خلت شي بالكبت الا ولبسته من ذهب هذا غير الولد الصغير للحين نايم ما يبي يقوم يلبس بالسيارة..وتلاقي الخدامة قاطينها بآخر السيارة راعصينها مع عربانة الياهل والجنطة وفيها النوم!! اما عمال النظافة بالشوارع تقول ما تحلى لهم النظافة الا بهاليوم هذا غير قوافل السيارات اللي متروسة صبيان مغترين وطريقة النسفة تقولك مظلات كي سبان!!


للأسف الحين تبي تروح سينما مافي مكان الا كرسي واحد جدام ولا بالزاوية!! تبي تروح مسرحية مافي مسرحية تسوى الكل "سلق بيض" تبي تروح المدينة الترفيهية زحمة وبعيده ومتروسة "حبربش" وحديقة الشعب زحمة "هيلق" والمجمعات زحمة على الفاضي والخيران الناس حاجزته من قبل خمس سنين اما المطاعم فالناس موجودة بالمطعم من الصبح حتى بدر البدور زحمه!! يعني وين اروح انا والاهل ما عندي غير اروح اشتري جم فيلم واروح الجمعية اشتري لي مرتديلا وجبن مربع وجم قوطي عصير واقعد بالصالة اجابل التلفزيون والانترنت والفيديو، حتى حديقة الحيوان "عزكم الله" ما عدت مثل قبل لا الشاذي مرتاح ولا الأسد له خلق يزأر ولا حتى التماسيح موجودة "رايحين يعيدون على عيالهم عمهم!!" يعني باختصار العيد من غير طعم واذا تبي تعيد تدفع فلوس وحتى اذا دفعت ما راح تستانس!!




سؤال وين تبون تروحون بالعيد ووين اقدر اطلع استانس من غير زحمة ومدازز ولا هيلق او حبربش!!




من ورا الباب!!




يقولكم ان وزيرة التربية نورية الصبيح استجابت لشكوى المراجعين والموظفين بسبب ضيق مباني الوزارة في الشويخ وقررت البحث عن مكان يديد..وناسة الحين كل ما اشتكى احد الوزيرة تستجيب؟




انا عندي شكوى ابي مظلة لسيارتي في المدرسة وابي مظلة لساحة العلم بالمدرسة وابي كتب الدستور للصف الثاني عشر تكون متوزعة عشان ادرس عيال الكويت الدستور وابي اعرف متى اقدر اشوف تقديري السنوي وهل راح احصل ترقية رئيس قسم السنة اليايه ولا انطر جم سنة!! وعندي شكاوي وايده بس ما ابي اثقل عليج طال عمرج!!








*جوجو اسم الشاذي باللي بحديقة الحيوان مثل ما سميته من آخر مرة شفته قبل 10 سنين!!
بالمناسبة كل بدلية موجودة بالموضوع عشان نضيف نكهة للقارئ خصوصا النوع اللي يحب يصيد البدليات!!

هناك 4 تعليقات:

goooooood girl يقول...

i like......

Miss-Q8 يقول...

عيدك مبارك ,
و تقبل الله طاعتك ..
و عساك من عوداه كل عام : )


و عيده مبارك جوجو .. هذا إذا ليلحينه عايش لوول


~~~

alsaronah يقول...

عيدك مبارك بدر


خوش عصير حاطه لووول

والله ايام حلوة العيد بيوم البحار والهنود مع الالعاب وعلى 100 فلس

والصعيدي الي يغني ((حياكم الله وحياكم)) لووووول والله ايام :( ببجي والله

كاريكاتير يقول...

مرحبا

الاخت فتاة طيبة
شكرا

الاخت سيدة الكويت
منا ومنج وتقبل الله طاعتج وطاعة الجميع

وعلى طري جوجو اكد لي مصدر في حديقة الحيوان ان جوجو طلع على المعاش وطلع له قفص على شارعين من حكومة بلاد الموز عشان يقضيه بقية حياته مع الشيتة زوجته عقب ما تزوج ولدهم وياله عقد عمل في سيرك روسي يفتر بالخليج!!


السارونه اختي الصغيرة

عيدج مبارك وعلى طاري يوم البحار انا فيني حرة وراح تشوفين اللي يسرج فيهم قريبا!!