سوالف بوصابر - الحلقة الرابعة

بعد ما اشار بوعزوز على بو مساعد على الخطة البوليسية الهوليوودية قرر بومساعد يطبقها...

بوصابر: قام بومساعد وعلق كل دشاديش المحل بالسقف وصبغ جم دشداشة بألوان وبعد اذان المغرب طلع بومساعد يصرخ من قمة راسه..يا الايواد "الاجواد..اهل الخير" لحقو علي المحل مسكون الينانوه لعبت بالمحل وشقت الدشاديش..طبعا لأن الكل مصدق بومساعد دخلو المحل وشافو الدشاديش معلقة وكلها اصباغ..الكل خاف وقال لبومساعد اقرا جم آية او خل الملا يقرا على المحل..وبعد ما قعد بومساعد بالقهوة يسولف للناس اللي صار وانه ترك بالمحل صندوق الفلوس..الناس طبعا كلها قالت له يا ابن الحلال تعوذ من ابليس وروح المحل اخذ فلوسك..ابد بومساعد حلف ما يطب المحل الا بعد ما ياخذ الملا من الصبح يوديه المحل..
انا: انزين وبعدين..
بوصابر: طبعا بومساعد سكر الدكان وقفله جدام باجي اصحاب المحلات والناس عشان يوريهم انه طلع من المحل وقفله عدل..وقبل صلاة الفجر كان بومساعد ومعاه بوعزوز والناطور لابدين "لابدين يعني مختبئين" ورا طوفة السوق..وراح بومساعد يبي ينفذ الخطة عشان يصيد الحرامية..واول ما وصل الدكان حرك بومساعد خيط رابطه من تحت الباب وفجأة سمعو صراخ "لا لا ينانوه فتحو الباب ..فتحو الباب..لحقو علينا.." كان هذا صراخ الحراميه داخل المحل بس شصار..
انا: في ينانوه؟!
بوصابر: من طلعت الشمس الناس تجمعت عند المحل وفتح بومساعد باب المحل وشاف الصبي اللي يشتغل عنده وجم واحد ما يعرفهم منسدحين بالارض ويبجون من الخوف..شفيكم طبعا هذيل الحرامية والناطور صادوهم..بس الناس ما فهمت شلون صادهم بومساعد..
انا: انا مو فاهم!!
بوصابر: بوعزوز طلب من بومساعد يعلق الدشاديش كلها بالسقف ولأنه متأكد ان اللي يبوق قادر يدش المحل ويطلع من غير ما في احد يحس فيه او يصيده..قرر انه يقول لبومساعد يعلق الدشاديش ويربطها بحبل من تحت الباب..ووقت ما يصير الليل او الفجر يقدر بومساعد يهد رباط الحبل وتطيح الدشاديش داخل المحل..الحرامية ما راح يتخيلون غير ان ينانوه تتحرك وتطير وتطيح عليهم..الحرامي بطبعه يخاف من أي حركة تصير وراه فشلون لو كان بالاصل يدري ان المكان في ينانوه!!
انا: صج مخ بوعزوز هذا وينه ما يصيد اللي يبوقون الديره كل يوم!!
بوصابر: يبا هذه سالفه وانقالت لا تدخلني بالسياسة مالنا خلق!!
انا: انزين بوصابر انت سوالفك ما تنمل بس عندي سؤال انت للحين ما سولفت ولا سالفة عن شي صار معاك؟
بوصابر: عاد انا من زيني لا يكون انا هرقل ولا عنتر بس!!
انا: لا بالعكس اكيد بعد كل هالعمر الله يطول بعمرك اكيد صار لك موقف او سالفه هالصوب ولا هالصوب..
بوصابر: اسمع هالسالفه...يقولك قبل اليهال من يشوفون قطوه ولا تكرم جلب لايث "لايث أي ضائع" يركضون وراه يحذفونه بالصخر..انا بيني وبينك ولا تعلم احد كنت ما احب الحيوانات وبأول عيد الأضحية "عيد الأضحى" كان يدي الله يرحمه حالف الا يذبح له خروف بحوش البيت..كانو عيال عمي وعيال خالي وعيال الفريج كل يوم ايوون البيت يتحرشون بهالخروف المسكين الا انا كنت اوقف من بعيد اطلع واطمش..ومن صباح الله خير نزل يدي وراح السوق اييب له قصاب "قصاب او جزار" وتجمعو عيال الفريج وراحو يطقون الخروف اللي كانت قرونه حادة ولن الخروف الظاهر زهق منهم قرر يهاجمهم وفجأة تبطل الحبل وراح الخروف يركض ورانا..ولأني ما كنت متوقع هالشي عيال الفريج كلهم طلعو من الحوش للسكه وانا اكيد وراهم والخروف وراهم يلاحقنا..من فريج لفريج وبالشارع والناس تطالعنا وتتطمش لغاية ما ك واحد منا راح بطريج وانا ما ادري وين اروح والخروف الظاهر مصمم يلحقني مع اني كنت ما اتحرش فيه..
انا: انزين..
بوصابر: اخيرا لقيت شجرة تعلقت فيها والخروف ينطح الشجرة بكل قوة وانا اصارخ وابجي..تجمعو الناس تحت الشجرة بعد ما امسكو الخروف وابوي يصارخ انزل فضحتنا ريال شطولك تخاف من خروف..طبعا ما كنت ابي انزل الا بعد ما قال ابوي ترا اذا ما نزلت اخليك تنام يم الخروف..بعد ما نزلت ابوي تواليني طق وقالي اكيد انت اللي تبي تنحش الخروف وتركض وراه..كنت ابي اقوله اني مالي شغل مو انا ابد..المهم لغاية العصر وانا منسدح بالفراش ابجي من كثر العوار حتى ما رحت زرت احد ابوي حرمني من الطلعة واللعب يومها..ثاني يوم قرر ابوي انه يسامحني بشرط اييب خبز ايراني من الخباز وارجع البيت وهالكلام بعد صلاة الفجر..استانست اني راح اطلع وفعلا رحت الخباز ولا للحين ما خلص الخبز قلت اوقف براس العاير على ما يخلص الخبز..فجأة ولا صوت ذاك الجلب الاسود العود ينفخ وانيابه من كثرهم حسيت انه يقدر ياكلني كلي مرة وحده!! طبعا من الخوف ركضت والجلب وراي من سكه لسكة ومن فريج لفريج لغاية ما حكرني بزاوية بيت من البيوت انا كنت ابجي والجلب ينابح..كنت مفكر اطقه بعصا بصخرة لكن المكان كان فاضي والجلب يقرب وينبح!! قمت و....

نكمل باجر...