18 سبتمبر 2008

بنات السوشي وعيال المجبوس!!



الأحد .. عام دراسي جديد!!


كان بداية العام الدراسي وبالتالي صار لي 4 سنوات في مهنتي "للحين صامد" ولأنها السنة الرابعة في المدرسة يعني إني راح اكون درست بهالثانوية 8 سنوات منها 4 وانا طالب فيها ومنها وانا مدرس "اعتبر نفسي طالب" 4 سنوات قابلة للزيادة، كان بداية اليوم زحمة الطلبة المستجدين وحوسة الإدارة والمعلمين في ترتيب الطلبة في الطابور هذا ان "الموجه" اللي مو بالعني مشرّف القسم من صباح الله خير ما ادري اهو صايم ولا انا اللي راح افطر منه!!

الاثنين .. لأني كويتي!!

لأني كويتي وما عندي غير معاشي قعدت بالبيت ما ابي أطلع واعلن إفلاسي..خصوصا إن المعاش ما نزل ويقولون بينزل هالمرة في 17 الشهر يقولون..عشان جذيه قلت افعد أجهز وأخطط شلون راح أقدر أصيد لي دينار واحد على الأقل قبل لا تطير الفلوس على تجهيزات العيد والقرض وغيرها من مصاريف هالسنة!! بس دينار!!

الثلاثاء .. الدينار طار!!

بعد يمعة الأهل رحت "الغانم" اللي في الافنيوز أشوف لي احتياجات الشقة اللي راح أعيش فيها، خصوصا بعد اتخاذي القرار التاريخي رقم (3) وهو العيش بعيدا عن بيتنا العود..خصوصا وأني بانتظار ثالث أعضاء أسرتي وأول ثمرة زواجي الميمون، ولأن معاشي مانزل ونست نفسي بالتمشي بين الأثاث والأجهزة الالكترونية واشوف اللي يناسب ميزانية هالشهر اللي للحين ما حصلت راتبه وشكله طار!!

الأربعاء
.. غبقة مافيها أكل!!







كان الوعد في بيت السدو المقر الدائم لمجموعة سامي محمد للفنون التشكيلية، كنت من اللي حضروا لتنظيم اللقاء الأول لأعضاء المجموعة واللي الحمدلله بيضو الويه هالمرة بحضورهم (15 عضو وعضوة) ناقشنا الأعمال واللوحات اللي قدمها الأعضاء في جو رائع، الحقيقة كانت أمسية رمضانية تصلح أن تكون أول غبقة مافيها أكل أحضرها من بداية الشهير الفضيل!!

وبالمناسبة كانت "المدام" تراسلني من البيت أول بأول لنقل آخر أخبار مباراة القادسية مع اوراوا الياباني، واللي انتهت بفوز الأصفر بنتيجة اعتبرها بقعة أمل للكرة الكويتية ان تستعيد جزء بسيط من مكانتها اللي "تخسبقت وتبهدلت" من اللي .... استغفر الله اللهم اني صايم!!

الخميس .. ملعب ماي وصابون!!

طلعت رايح الدوام وانا الحقيقة متخوف من "تاير" السيارة اللي يهددني كل شهر..وقفت السيارة في مكان أضمن في حال إن "التاير فش" أقدر أدبر نفسي إما باتصال في صديق وهو غالبا ما يكون الوالد العزيز أو اخوي اللي ما عنده شي لغاية ما يسافر مسقط يكمل دراسته..طبعا الدوام في المدرسة ما اٌولكم دوام مثالي القسم حر وقمته والحصص اللي عندي متباعدة وما عندي غير قراءة رواية "وكالة عطية" اللي ماني قادر اتجاوز فيها الصفحة 53!! اما بعد الفطور وبعد ما عرفت من "ألمدام" أخبار فضة وفايقة وتطورات عيون الحب قررنا الخروج لزيارة الشقة الجديدة واحنا معانا أسلحة التنظيف من مساحات و"تب" وجم فوطه وصابون وغيره من الأدوات اللي خلتنا نحول صالة لشقة لملعب "ماي وصابون" بس كان ناقصني كرة واتزحلق!!

الجمعة .. توني أدري؟!

من أول ما سمعت عن عالم التدوين عام 2005 وانا كنت اعتبر هالعالم يخص المنبوذين اجتماعيا او المتخوفين من المواجهة الصريحة مع الناس، خصوصا أصحاب التوجهات السياسية والأفكار اللي ربما لو أفصح عنها امام مجموعة من الناس إما يقيمون عليه الحد أو يتحول لزعيم للأمة في نظرهم!!

وبعد عمليات بحث وتحري اكتشف إن التدوين هو "عملية تسجيل مذكرات يومية أو شبه يومية يقوم فيها المدونين وغالبا ما تكون هذه المذكرات شخصية تحمل بعض الإشارات لمحيط كل مدون" ، وبعد ما صرت في عالم التدوين اكتشفت ان معظم المدونين ما يسجلون حياتهم الخاصة ولا مذكراتهم الخاصة بقدر ما يسجلون موقفهم من العالم الخارجي الواقعي في عالم التدوين الافتراضي، جتى أنه بعضهم نسى ان المدونة عبارة عن نافذة شخصية وحولها لموقع ما ينتمي له بل ينتمي لحياة الآخرين!!

عشان جذيه قررت إن يكون يوم الجمعة من كل أسبوع فرصة اكتب فيها مذكراتي الشخصية والتزم بأصل الفكرة في عالم التدوين.

قبل لا أمشي...

بما أن القادسية فاز على "الماسات الحمراء" في الكويت وبنتيجة غير مطمئنة هذا يعني ان المباراة الثانية في اليابان راح تكون صعبة والاحتمالات واردة، خصوصا أن الجمهور الياباني جمهور كبير جدا وعنده أسلوب فريد من نوعه، يكفي ان اليابانيات الحسناوات "صحيح كلهن نفس الشي بالشكل" ولكن جايز وحده فيهن تشجع بضراوة وتنسي لاعبين "الملكي" طعم المجبوس والهريس وتخليه يعشق السوشي!!





سؤال..شنو جمع كلمة "أخطبوط" ؟

هناك 12 تعليقًا:

ZooZ "3grbgr" يقول...

الله يعينك
اسبوع حافل
والله يعين زوجتك على ترتيب الشقة
عاد ما اوصيك ساعدها حرام بروحها

وبعد اذنك شيل خاصية تأكيد الكلمة مرتين غلطت فيها كنت بهون عن الكومنت
ههههههههههه

ساره النومس يقول...

خوش موضوع

مبروك فوز الاصفر..

جمع اخطبوط: خطبيطو .... لوووول

أخطبيطات

خرابيط...

خطبوط...

كاريكاتير يقول...

الاخ زووز

يعين الجميع فعلا اسبوع حافل والاسابيع القادمة حافلة!!

واذا على كلمة التأكيد اخيرا فهمت المقصود فيها وشلتها من عرجها!!

الاخت السارونه
تسلمين وان شاء الله الثادسية يكمل المشوار ويكون مشواره ذهبي..
اما جمع كلمة اخطبوط فللحين بانتظار من يحصل على جمعها الصحيح؟!

Salah يقول...

اي طلعنا متخرجين من نفس المدرسة!

أحلى أيام كانت في هذه المدرسة...

بس يمكن لمه كنت انت في الابتدائي

:)

joe يقول...

اسبوووع مليئ بالمغامرات و الاكشن و مبروك عليك الشقه اليديده

لو اسأل مدرس عربي مايجاوب اقوله جمع اخطبوط يقولي اختبوطات

بـنـت بـطنـهـا يقول...

صباحك ورد

اشوه طلعت يارنا عيل لول

والله فكرة حلوة انك تحط مذكرات الاسبوع في يوم اليمعة يازتلي الفكرة

ومبروك المكان اليديد عساه منزل ٍمبارك ان شاء الله وعسى الله يسهل على المدام يا رب

بالنسبة لجمع اخطبوط اتوقع ان هالكلمة اهي الجمع

كاريكاتير يقول...

مرحبا

الاخ صلاح الزميل

انا دفعة 1994 بالثانوية تخصص علوم

انت اي دفعة

على فكرة في مدونة باسم ثانوية صالح شهاب...

الاخ ماستر الكويت

اشكرك بس شوف لي مدرس فاهم وسأله شنو جمع اخطبوط لأني متورط فيها؟

الاخت بنت بطنها
خلاص عيل سحورنا عليج من االاسبوع الياي انا ابي مجبوس دياي من غير حشو ...اتغشمر :)

بخصوص يوم الجمعة فعلا لقيت ان كثرة التدوين عن السياسة وغيرها خلت وايد ناس تنفر من المدونات لأنها اقرب للتحلطم وكلام الجرايد فليش ما يكون فيه يوم على الاقل يكون فيه تسجيل ملخص للاسبوع

Safeed يقول...

جمع أخطبوط : أخـابط .
هالسؤال دوخت فيه مدرسين العربي أيام الدراسة و محد فيهم جاوبه صح غير مدرس عربي سوري / كردي بالثانوية !
.
.

MakintoshQ8 يقول...

منزل مبارك ان شاءالله والله يعينك

وجمع اخطبوط : اخابيط او اخبطه

Salah يقول...

89



بس الشعر الأبيض اللي براسي أقل من 13

:)

Safeed يقول...

رديت مرة ثانية .. عشان عندي احتجاج على الكويز .. يبت 70 % ظلمًا .. لأن قطر و الكويت أكبر من لبنان فالمفروض اجابتي تكون صحيحة .. قطر 11 الف كم2 ، لبنان 10 آلاف كم2 ، و الكويت 18 ألف كم 2 ..
.
.
و منزل مبارك ان شاء الله .. هذي نسيت اقولها المرة اللي طافت

كاريكاتير يقول...

مرحبا

الاخ سفيد بالاول اعتذر منك احتمال وانا احط أجابات سؤال الدول الاصغر مساحة سهيت لكن دام انك زعلت شوي لك مني 10% فوق الـ 70 اللي عندك بعد شتبي وتدخل السحب على 5 ميدات من حسنين اللي في سوق السمج.

ماكنتوش
شكرا ويبارك فيك

الاخ صلاح اذا انت دفعة 1989 وتقول ما عندك الا اقل من 13 شعره بيضة!! ومتخرج من نفس الثانوية!! وكويتي!! اتوقع لازم تعيد النظر في المراية اللي في البيت او انا ابدي اصبغ!!