بنات السوشي وعيال المجبوس!!

الأحد .. عام دراسي جديد!!

كان بداية العام الدراسي وبالتالي صار لي 4 سنوات في مهنتي "للحين صامد" ولأنها السنة الرابعة في المدرسة يعني إني راح اكون درست بهالثانوية 8 سنوات منها 4 وانا طالب فيها ومنها وانا مدرس "اعتبر نفسي طالب" 4 سنوات قابلة للزيادة، كان بداية اليوم زحمة الطلبة المستجدين وحوسة الإدارة والمعلمين في ترتيب الطلبة في الطابور هذا ان "الموجه" اللي مو بالعني مشرّف القسم من صباح الله خير ما ادري اهو صايم ولا انا اللي راح افطر منه!!

الاثنين .. لأني كويتي!!

لأني كويتي وما عندي غير معاشي قعدت بالبيت ما ابي أطلع واعلن إفلاسي..خصوصا إن المعاش ما نزل ويقولون بينزل هالمرة في 17 الشهر يقولون..عشان جذيه قلت افعد أجهز وأخطط شلون راح أقدر أصيد لي دينار واحد على الأقل قبل لا تطير الفلوس على تجهيزات العيد والقرض وغيرها من مصاريف هالسنة!! بس دينار!!

الثلاثاء .. الدينار طار!!

بعد يمعة الأهل رحت "الغانم" اللي في الافنيوز أشوف لي احتياجات الشقة اللي راح أعيش فيها، خصوصا بعد اتخاذي القرار التاريخي رقم (3) وهو العيش بعيدا عن بيتنا العود..خصوصا وأني بانتظار ثالث أعضاء أسرتي وأول ثمرة زواجي الميمون، ولأن معاشي مانزل ونست نفسي بالتمشي بين الأثاث والأجهزة الالكترونية واشوف اللي يناسب ميزانية هالشهر اللي للحين ما حصلت راتبه وشكله طار!!

الأربعاء .. غبقة مافيها أكل!!

كان الوعد في بيت السدو المقر الدائم لمجموعة سامي محمد للفنون التشكيلية، كنت من اللي حضروا لتنظيم اللقاء الأول لأعضاء المجموعة واللي الحمدلله بيضو الويه هالمرة بحضورهم (15 عضو وعضوة) ناقشنا الأعمال واللوحات اللي قدمها الأعضاء في جو رائع، الحقيقة كانت أمسية رمضانية تصلح أن تكون أول غبقة مافيها أكل أحضرها من بداية الشهير الفضيل!!

وبالمناسبة كانت "المدام" تراسلني من البيت أول بأول لنقل آخر أخبار مباراة القادسية مع اوراوا الياباني، واللي انتهت بفوز الأصفر بنتيجة اعتبرها بقعة أمل للكرة الكويتية ان تستعيد جزء بسيط من مكانتها اللي "تخسبقت وتبهدلت" من اللي .... استغفر الله اللهم اني صايم!!

الخميس .. ملعب ماي وصابون!!

طلعت رايح الدوام وانا الحقيقة متخوف من "تاير" السيارة اللي يهددني كل شهر..وقفت السيارة في مكان أضمن في حال إن "التاير فش" أقدر أدبر نفسي إما باتصال في صديق وهو غالبا ما يكون الوالد العزيز أو اخوي اللي ما عنده شي لغاية ما يسافر مسقط يكمل دراسته..طبعا الدوام في المدرسة ما اٌولكم دوام مثالي القسم حر وقمته والحصص اللي عندي متباعدة وما عندي غير قراءة رواية "وكالة عطية" اللي ماني قادر اتجاوز فيها الصفحة 53!! اما بعد الفطور وبعد ما عرفت من "ألمدام" أخبار فضة وفايقة وتطورات عيون الحب قررنا الخروج لزيارة الشقة الجديدة واحنا معانا أسلحة التنظيف من مساحات و"تب" وجم فوطه وصابون وغيره من الأدوات اللي خلتنا نحول صالة لشقة لملعب "ماي وصابون" بس كان ناقصني كرة واتزحلق!!

الجمعة .. توني أدري؟!

من أول ما سمعت عن عالم التدوين عام 2005 وانا كنت اعتبر هالعالم يخص المنبوذين اجتماعيا او المتخوفين من المواجهة الصريحة مع الناس، خصوصا أصحاب التوجهات السياسية والأفكار اللي ربما لو أفصح عنها امام مجموعة من الناس إما يقيمون عليه الحد أو يتحول لزعيم للأمة في نظرهم!!

وبعد عمليات بحث وتحري اكتشف إن التدوين هو "عملية تسجيل مذكرات يومية أو شبه يومية يقوم فيها المدونين وغالبا ما تكون هذه المذكرات شخصية تحمل بعض الإشارات لمحيط كل مدون" ، وبعد ما صرت في عالم التدوين اكتشفت ان معظم المدونين ما يسجلون حياتهم الخاصة ولا مذكراتهم الخاصة بقدر ما يسجلون موقفهم من العالم الخارجي الواقعي في عالم التدوين الافتراضي، جتى أنه بعضهم نسى ان المدونة عبارة عن نافذة شخصية وحولها لموقع ما ينتمي له بل ينتمي لحياة الآخرين!!

عشان جذيه قررت إن يكون يوم الجمعة من كل أسبوع فرصة اكتب فيها مذكراتي الشخصية والتزم بأصل الفكرة في عالم التدوين.

قبل لا أمشي...

بما أن القادسية فاز على "الماسات الحمراء" في الكويت وبنتيجة غير مطمئنة هذا يعني ان المباراة الثانية في اليابان راح تكون صعبة والاحتمالات واردة، خصوصا أن الجمهور الياباني جمهور كبير جدا وعنده أسلوب فريد من نوعه، يكفي ان اليابانيات الحسناوات "صحيح كلهن نفس الشي بالشكل" ولكن جايز وحده فيهن تشجع بضراوة وتنسي لاعبين "الملكي" طعم المجبوس والهريس وتخليه يعشق السوشي!!

سؤال..شنو جمع كلمة "أخطبوط" ؟